Matie

24 Yezu bu keri katukaka ku tempelo, milongoki miandi miapusana kwe yandi, mpe miamusongela mpila yi batungila tempelo. 2 Wabahana mvutu eyi: “Ngano bima bi biabiansoni bia luta mona? Wa matieleka nita lu têla, kani kabwe ka ku sâla tari ha zulu tari ko di balembo mwangasa.”

3 Bu kazakala ha Mongo wa miti mia Olive, milongoki miapusana kwe yandi ha bawu kaka, miatâ: “Tu têla, ntia ntangu misamu mio milungana, mpe tidimbu ni tie tisongela ti hô wena* mpe nsuka ya nza* yituriri?”

4 Yezu wabavuturila: “Seno keba ngatu na kani muntu ka lu wubakasandi, 5 mu bungu ti babingi bakwiza mu nkumbu ya meno, bu batâ: ‘Meno ni Kristo,’ mpe mbo bawubakasa bantu babingi. 6 Mbo luwâ lwaza lwa mizingu na nsangu za mizingu. Ka lubândi na bunkuta, mu bungu ti misamu mio mifweti tula, kâ ka yibâ nsuka ko.

7 “Mu bungu ti kanda mbo dinwanisa kanda diakaka, mpe timfumu mbo tinwanisa timfumu tiakaka. Mbo kubâ nsatu na midikutulu* mia mutoto mu mbuka za mpila na mpila. 8 Misamu mio miamiansoni mbo mibâ mbatukulu ya mpasi za ngolo.

9 “Buna bantu mbo balumwisa mpasi, mbo baluhonda, mpe mbo baluyina kwe makanda mamansoni mu bungu dia nkumbu’ani. 10 Musamu wakaka, babingi batâ makuba, batekasana, mpe bayinasana. 11 Mbikuri za bungungu zazingi ziduka, mpe mbo ziwubakasa bantu babingi; 12 mu bungu ti bantu babingi bavweza misiku, luzolo lwa bantu babîngi mbo luwola. 13 Kâ wô korela tii ku nsuka, mbo kavûka. 14 Mpe nsangu zi za mbote za Timfumu mbo basamuna zo ha mutoto wa mukaka, mu tâ timbangi kwe makanda mamansoni, mpe buna nsuka mbo yitula.

15 “Buna bu lumona tima tia ntonto tinataka mfukulu, tia zonzela mbikuri Daniele, titelama ha mbuka ya santu (bîka ti titangi tiasarila lenda dia swasikisa), 16 dieka bo, bô bê ku Yude babatika mu dioka ku miongo. 17 Muntu wê ku zulu muluri wa nzo ka kôkandi mu bonga bimvwama biandi bie mu nzo, 18 mpe muntu wê ku musitu, ka kâlandi mu bonga tinkuti tiandi tia zulu. 19 Tiari kwe bakento babâ na mazimi na bayemeka bala mu bilumbu bio! 20 Tatamaneno mu sambila, ngatu tilumbu ti ludioka ka yabândi ntangu ya tiozi tia ngolo peleko tilumbu tia Sabala; 21 mu bungu ti mbo kubâ mpasi ziyôkele zalembo toko kwa bâ, tûka mbatukulu ya nza tii bwawu bu, mpe kani kabwe ka zivutu’â kwa bâ ko. 22 Diangana tala ti bilumbu bio bifweti zingila, ka kwena muntu* ko wuvûka; kâ mu bungu dia bô ba basôla, bilumbu bio ka bizingila ko.

23 “Tala ti muntu lu têlele, ‘Taleno! Kristo eku kena,’ peleko ‘Ehanê!’ ka lumukwikilandi. 24 Mu bungu ti Kristo za bungungu na mbikuri za bungungu ziduka; mbo basa bimangu bia binene na misamu mia nzitukulu mu wubakasa bô ba basôla, tala ti bulendi bâ. 25 Taleno! Nilulwengese. 26 Buna, tala ti bantu balutêlele, ‘Tala! ku sese* kena,’ ka ludukandi; peleko ‘Tala! mu nzo* kena,’ ka lumukwikilandi. 27 Ntiana kwa mutsamina wudukaka ku este mpe wukengaka ku weste, ntangu Mwana muntu yi kabâ hô* ni bo mpe yibêla. 28 Hô habâ mvumbi, mbemba mpe ni hô zikutakana.

29 “Buna kwa mpasi za bilumbu bio ziwa, ntangu mbo yibâ mpimpa, ngonda ka yivutu’â hana mutsamina’andi ko, mbwetete mbo zibwa tûka ku zulu, mpe ngolo za mazulu mbo ziteketa. 30 Buna tidimbu tia Mwana muntu mbo tiduka ku zulu, mpe makanda mamansoni ma ha mutoto mbo matibula ntulu mu tiari, mpe mbo bamona Mwana muntu wuta kwiza ha zulu matuti ma ku zulu, na ngolo mpe na mukembo wa wunene. 31 Mu lwaza lwa mpungi ya yinene, mbo katambika mbazi zandi. Mbo bakutakasa bô ba basôla tûka ku nore, ku side, ku este na ku weste, tûka kwa batikila mazulu tii ku masukisina.

32 “Bwawu bu bakeno malongi mu tifwani tia mufige: Bu lumonaka ti bintala biandi bia môna bieka bia peta, mpe makaya mandi madukiri, mbo lubakulaka ti ntangu yi menaka bima yituriri. 33 Mpila mosi mpe bu lumona bima bio biabiansoni, zabeno ti weka pene-pene ha mielo. 34 Wa matieleka nita lu têla, kani kabwe mbandu yi ka yiyôka ko tii misamu mi miamiansoni mitula. 35 Zulu na mutoto mbo biyôka, kâ kani kabwe zu diani ka diyôka ko.

36 “Mu musamu wutariri tilumbu na ntangu, ka muntu’â ko zebi bio, ni bu zibâ mbazi za ku mazulu peleko Mwana, kâ ni Tata kwa zebi. 37 Ntiana kwa misamu bu miabâ mu ntangu ya Noa, ni bo kwa mpe mibêla mu ntangu Mwana muntu yi kabâ hô.* 38 Ntiana kwa bu beri mu bilumbu ntete Delize yabwa, dia beri diaka mpe nwa beri nwaka, babakala kwela beri kwelaka mpe bakento mu makwela beri ba hanaka tii mu tilumbu Noa ti kakota mu arshe, 39 mpe ka basa keba ko tii Delize bu yatula, mpe yabanata babansoni, misamu ni bo mpe miyôkela mu ntangu Mwana muntu yi kabâ hô. 40 Buna, mbo kubâ babakala bole ku musitu; wumosi mbo bamubonga mpe wakaka mbo bamusisa. 41 Mbo kubâ bakento bole banika ble; wumosi mbo bamubonga mpe wakaka mbo bamusisa. 42 Dieka bo, tatamaneno mu sa keba, mu bungu ti ka luzebi’â tilumbu ti kwiza Mfumu’eno ko.

43 “Kâ zabeno ti: Tala ti munkwa-nzo zebiki mu ntia ntangu* mwivi wuketi kwiza, ka keti’â seka ko, mpe ka keti’â mu bîka ko kabangula nzo’andi. 44 Ntiangu beno mpe, bêno ba kubama, mu bungu ti Mwana muntu mbo kakwiza mu ntangu yi luta lembo banza.

45 “Mu matieleka, nani wê ngamba ya kwikama na ya ndwenga mfumu’andi yi kanomene ha zulu bisari biandi, mu ba hana bidia biawu mu ntangu yifwanane? 46 Nsayi kwe ngamba yo tala ti mfumu’andi wizi mu bwana bu kata sila bo! 47 Wa matieleka nita lu têla, mbo kamunoma ha zulu bima biandi biabiansoni.

48 “Kâ tala ti ngamba yo ya mbi yena, mpe têle mu mutima’andi ti: ‘Mfumu’ani ka ta kulu kwiza ko,’ 49 weka twa bampwana’andi bangamba, batikiri mpe mu dia na mu nwa na bantu banwaka malavu mamingi, 50 mfumu ya ngamba yo mbo yikwiza mu tilumbu ti kata lembo kekolo na mu heure yi kalembolo zaba, 51 mbo kamusemba mu mpila ya ngolo, mpe mbo kamutûla na bangungu. Ni kô kadirila, mpe kakwetesela mêno mandi.