Marke
1 Mbatukulu ya nsangu za mbote zitariri Yezu Kristo, Mwana wa Nzambi: 2 Ntiana bu batsoneka wo mu buku dia mbikuri Izayi: “(Tala! tinati-nsangu tiani nita tambika ku matu maku,* mpe mbo kakubika nzila’aku.) 3 Zu dia muntu dita kawula ku sese:* ‘Kubikeno nzila ya Yehova!* Sungikeno nzila zandi.’” 4 Za Tibatisi ku sese* keri, bateme keri samunaka yeri tidimbu tia nsobolo ya mabanza mu bungu dia mulemvo wa masumu. 5 Mpe tizunga tiatiansoni tia ku Yude na bantu babansoni ba ku Yerusaleme kwe yandi beri kwendaka, mpe bawu keri batisaka* mu nzari ya Zurde, bu beri tomo fungulaka masumu mawu. 6 Za tinkuti ti basala mu mika mia shamo keri lwataka na musinga wa kwire mu luketo, mpe makonko na mafuta ma niosi keri diaka. 7 Mpe ebu keri samunaka: “Muntu wukwiza ha manima mani kundiôkele mu ngolo, mpe ka ndiena wa lunga ko mu kondama na mu sutula misinga mia mapapa mandi. 8 Meno mu mamba nilubatisi, kâ yandi mbo kalubatisa mu mpeve santu.”
9 Mu bilumbu bîna, Yezu watûka ku Nazarete ya Galile mpe wayenda ku Zurde mu kwe batusu kwe Za. 10 Bu kamana duka mu mamba, wamona mazulu mazibuka mpe mpeve yamukôkela ntiana bembe. 11 Mpe zu diatûka ku mazulu diatâ: “Nge ni Mwana’ani wu ntomono zolo, wu ntamburi.”
12 Mpe hô nkatika bendo, mpeve yamunata ku sese.* 13 Buna watatamana mu bâ kô bilumbu 40, mpe kûna Satana wamutonta. Na bibulu bia sangi keri, kâ bambazi yandi beri sarilaka.
14 Bu bakanga Za, Yezu wayenda ku Galile. Kûna, nsangu za mbote za Nzambi keri samunaka 15 bu keri tâka: “Ntangu yi bakubika yifweni mpe Timfumu tia Nzambi tieka pene-pene. Sobeno mabanza mpe bêno na timinu mu nsangu za mbote.”
16 Bu keri kwe yende ha ndeko mubu wa Galile, wamona Simo na mpangi’andi Andre beri losaka file* zawu mu mubu, mu bungu ti bilobi bia mbizi* biabâ. 17 Buna Yezu wabatêla: “Kundandeno, mpe mbo nilutitula bilobi bia bantu.” 18 Mpe hô nkatika bendo bayambirika file* zawu mpe bamulanda. 19 Bu kapusana mwa mala, wamona Zaki mwana wa Zebede na mpangi’andi Za beri yirikaka file* zawu mu bato’awu, 20 mpe hô nkatika bendo wabatâ mbila. Buna basisa tata’awu Zebede mu bato na bantu beri salaka nawu mpe bamulanda. 21 Ha manima bakota ku Kafarnawome.
Sabala bu yabatika, Yezu wayenda ku sinagoge mpe wabatika mu longesa. 22 Mpe bantu batomo yituku mu mpila yi keri longeselaka, mu bungu ti ntiana muntu wê na lutumu keri ba longeselaka, kâ ka ntiana bitsoniki biawu’â ko. 23 Mu ntangu yîna kwa, muntu wabâ kô mu sinagoge weri na mpeve ya mbi, mpe wakawula: 24 “Ntia musamu wê neto na nge, Yezu Musi-Nazarete? Ngano wiziri mu tu fukisa? Wa ntomono zaba nge nani wena: Musantu wa Nzambi!” 25 Kâ Yezu wamubamina bu katâ: “Kuta, mpe duka mu yandi!” 26 Mpeve ya mbi bu yaningasa bakala dio, yakawula mu ngolo mpe yaduka mu yandi. 27 Dieka bo bantu babansoni batomo yituku mpe babatika mu yulasana, bu beri tâka: “Wu ntia musamu? Ndongosolo ya môna! Na lutumu lwalwansoni kata tumina mpeve za mbi mpe yandi bata tumamana.” 28 Buna nsangu za Yezu zayangana kwakwansoni ku tizunga tia Galile.
29 Buna baduka mu sinagoge mpe bayenda ku nzo ya Simo na Andre tintwari na Zaki na Za. 30 Kâ nguri ya mukento wa Simo wa lambalala weri mu bungu ti fievre yeri nandi, mpe bakulu mu zonzela kwe Yezu. 31 Yezu wapusana he yandi, wabonga koko kwandi mpe wamuvumbula. Fievre’andi yawa mpe wabatika mu ba kipa.
32 Nkokela bu yatula, bwisi bu bwayila, bantu babatika mu mu natina bô babansoni beri na bimbevo na bademo; 33 mpe mumvuka wa mukaka wavukana ha mwelo nzo. 34 Buna wawasisa bantu babingi beri na bimbevo bia mpila na mpila, mpe wakuma demo zazingi, kâ keri’â bîka ko ti bademo bazonza mu bungu ti bazaba ti yandi ni Kristo.*
35 Mu nkatika pari, bu kwabâ kwa mpimpa, watelama mpe waduka mu kwenda ha mbuka ya hengama mpe wabatika mu sambila. 36 Kâ Simo na bô beri na yandi baye mu dinga, 37 bamumona mpe bamutêla: “Bantu babansoni nge bata kwe dingi.” 38 Kâ wabatêla: “Tokoeno kwakaka, mu mahata me pene-pene, ngatu nasamunina mpe kûna, mu bungu ti musamu ni wo nayizila.” 39 Waye samuna mu sinagoge zawu mu Galile yayansoni, mpe bademo keri kwe kumi.
40 Munkwa-bwazi wumosi wayiza kwe yandi, wafukama ha matu mandi mu mu lemberela. Watâ: “Tala ti zololo lendi kuntsemesa.” 41 Yezu tiari tiamubaka, walambula koko kwandi, wamusimba mpe watâ: “Nzololo! Tsema.” 42 Hô nkatika bendo, bwazi bwandi bwawasa mpe watsema. 43 Buna wamuhana ntumunu za ngolo mpe wamubîka kenda, 44 bu kamutêla: “Kutândi na kani musamu kwe muntu, kâ yenda watisongela kwe nganga-nzambi mpe hana bima bia lomba Mose mu songela ti tsemene, ngatu tiabâ timbangi kwe bawu.” 45 Kâ bu kayenda, bakala dio diabatika mu zonzela misamu miamiansoni miamuturila kwe bantu babansoni. Buna Yezu ka vutu’â bâ na lenda ko dia kota mu mumvuka ha meso ma bantu, ku mbazi keri sukisinaka ku mbuka za hengama. Kâ bantu ba mbuka zazansoni kwe yandi beri tatamanaka mu kwiza.