Kwe Bisi-Rome
5 Buna, bwawu bu batutêle ba sungama mu bungu dia timinu, bîka tabêno mu tidzunu na Nzambi mu nzila ya Mfumu’eto Yezu Kristo. 2 Mu nzila ya Yezu na ya timinu tulendi bâ pene-pene na Nzambi mu baka bweso bwa nzitukulu bwe neto bwawu bu. Buna, tabêno mu nsayi mu bungu ti tivuvu tie neto tia baka mukembo wa Nzambi. 3 Musamu ka wusukini’â kwa wo ko, kâ tabêno mu nsayi bu tubâka mu mpasi, mu bungu ti mpasi luvivululu zibutaka; 4 luvivululu mbo lusaka ti Nzambi katutambula; mpe tambula tivuvu kubutaka, 5 mpe tivuvu ka tihunaka ko, mu bungu ti luzolo lwa Nzambi lwa fuluka lwena mu mitima mieto mu nzila ya mpeve santu yi katuhana.
6 Wa matieleka, bu talembo bâ na ngolo, Kristo wafwa mu ntangu ya fwanana mu bungu dia bantu balembo zitisaka Nzambi. 7 Diangana, musamu wa mpasi wena mu mona ti muntu watambula mu fwa mu bungu dia muntu wa sungama; kâ ku lweka lwakaka, muntu wulendi tambula mu fwa mu bungu dia muntu wa mbote. 8 Kâ Nzambi mu mpila eyi katusongelaka luzolo lwandi: Kristo wafwa mu bungu dia beto bu tweri kwa bantu ba masumu. 9 Buna, mu bungu ti bwawu bu batutêle bantu ba sungama mu nzila ya menga mandi, mu nzila ya yandi mpe tuvûkila mu nkesi za Nzambi. 10 Tala ti bu tabêle mbeni takarisi tindiku na Nzambi mu nzila ya lufwa lwa mwana’andi, tulendi bâ na lukwikulu ti bwawu bu bu tukarisi tindiku na yandi, mbo tuvûka mu nzila ya luzingu lwandi. 11 Musamu ka wusukini’â kwa wo ko, kâ nsayi tubakaka mpe mu Nzambi mu nzila ya Mfumu’eto Yezu Kristo, yandi tu heni lenda bwawu bu dia karisa tindiku na Nzambi.
12 Ntiangu, mu nzila ya muntu wumosi masumu makota mu nza mpe mu nzila ya masumu lufwa lwakota, mpe lufwa lwayangana kwe bantu babansoni mu bungu ti bantu babansoni basumuka—. 13 Masumu mu nza meri ntete Musiku. Kâ tala ti ka kwena musiku ko, ka balendi’â batâ ko ti muntu wusumukini. 14 Lufwa lwayâla tûka Adame tii Mose, lwayâla mpe bô balembo sa masumu ntiana ma Adame. Adame wadelakana na wô waketi kwiza.
15 Kâ kabu ka diena ntiana masumu ko. Tala ti mu bungu dia masumu ma muntu wumosi bantu babingi bafwa, bweso bwa nzitukulu bwa Nzambi na kabu diandi dia mpamba di kahana mu nzila ya muntu wumosi, Yezu Kristo, tintwari na bweso bwandi bwa nzitukulu, mbo binatinaka mbote yiyôkele bima biabiansoni kwe bantu babingi. 16 Mpila mosi mpe kabu dia mpamba diswaswane na mpila ya yôkela misamu mu bungu dia muntu wumosi wasumuka. Diangana mfundusu ha manima ma masumu ma muntu wumosi yanata zenga kwa mambu, kâ kabu dia Nzambi diayiza ha manima ma masumu mamingi diasa ti batâ bantu ba sungama. 17 Lufwa lwayâla mu nzila ya masumu ma muntu wumosi. Kâ lukwikulu lwe neto ti bô babakaka bweso bwa nzitukulu bwa Nzambi na kabu diandi dia mpamba dia buderede mbo bazinga mpe mbo bayâla mu nzila ya muntu wumosi, Yezu Kristo!
18 Ntiangu, ntiana kwa mu nzila ya masumu mamosi bantu ba mpila zazansoni babazengela mambu, mpila mosi mpe mu nzila ya musamu wumosi wa buderede bantu ba mpila zazansoni babatêle ba sungama mu bungu dia luzingu. 19 Ntiana kwa mu nzila ya bukolo bwa muntu wumosi bantu babingi bayizi sumuka, mpila mosi mpe mu nzila ya tifu tia tumama tia muntu wumosi bantu babingi mbo babatâ ba sungama. 20 Musiku wayiza mu songela masumu mamingi ma bantu. Kâ mu mbuka yayizi bâ na masumu mamingi, bweso bwa nzitukulu bwayizi yôka bwabwingi. 21 Mu bungu dia nti? Mu bungu ti ntiana kwa masumu mayâla tintwari na lufwa, mpila mosi mpe bweso bwa nzitukulu yâla buta yâla mu nzila ya buderede bunataka ku luzingu lwa mankululu mu nzila ya Yezu Kristo Mfumu’eto.