Like

1 Mu bungu ti bantu babingi basiri ngolo mu tsoneka misamu miamiansoni mi tutomo kwikilaka, 2 ntiana bu tabakiri mio kwe bô bamona misamu miango tûka ku mbatukulu mpe bayizi bâ bisari bita samuna nsangu zango, 3 mu bungu ti natomono dinga na bunsungu bwabwansoni misamu miamiansoni miayôka tûka ku mbatukulu, meno mpe nabongele nzengolo ya ku tsonekena mio buna bu miayôkela mfumu Teofile, 4 ngatu watomo bakula matieleka ma misamu mi bakutêla mu ku longesa.

5 Mu ntangu ya Erode,* mutinu wa ku Yude, kweri na nganga-nzambi yi beri tâka nkumbu Zakari mu tikunku tia Abiya. Mukento’andi mwana wa Arone weri, mpe nkumbu’andi yeri Elizabete. 6 Ba bole ba sungama beri ha meso ma Nzambi, bantu ba baketi lembo semba mu bungu ti ntumunu na misiku miamiansoni mia Yehova* beri tumamanaka. 7 Kâ ka beri’â na mwana ko, mu bungu ti Elizabete tisita tieri, mpe ba bole ba nuna beri.

8 Bu keri salaka tisalu tiandi tia nganga-nzambi na bantu ba tikunku tiandi ha matu ma Nzambi, 9 tintwari na mpila* yeri sarilaka banganga-nzambi, ntangu’andi yafwana ya kota mu mbuka ya santu ya Yehova* mu yoka encens. 10 Bantu babansoni ku mbazi beri sambilaka mu ntangu yi bayokaka encens. 11 Mbazi ya Yehova yamumonekena, yatelama ku lubakala lwa ziku* dia encens. 12 Kâ Zakari bu kamumona wayizi bâ na mabanza yeko-yeko, mpe bunkuta bwamubaka. 13 Kâ mbazi yamutêla: “Kubândi na bunkuta Zakari, mu bungu ti Nzambi ndiawululu’aku ya kawîri, mukento’aku Elizabete mbo kakubutila mwana wa bakala, mpe fweti mu hana nkumbu Za. 14 Mbo bâ na nsayi mpe mbo tomo yangalala, mpe bantu babingi bayangalala mu mbutukulu’andi, 15 mu bungu ti mbo kabâ muntu wa wunene ha meso ma Yehova.* Kâ kani kabwe ka fweti’â kanwa vinu peleko malavu mabakaka ko, mpe mbo kafuluka mu mpeve santu tûka mu moyo wa nguri’andi, 16 mpe mbo kakarisa bala babingi ba Israele kwe Yehova* Nzambi’awu. 17 Mpe, mbo kakwe yende ha matu ma Nzambi na mpeve mpe na ngolo za Eliya, mu karisa mitima mia batata kwe bala na mu bakisa bantu bê na bukolo mu sarila ndwenga za bantu ba sungama, mu kubikila Yehova bantu bê ba kubama.”

18 Zakari watâ kwe mbazi: “Bwe ndendi bêla na lukwikulu mu musamu wo? Mu bungu ti wa nuna ndiena, mukento’ani mpe wa nuna wena.” 19 Mbazi yamuvuturila: “Meno ni Gabriele, wô telamaka pene-pene ha matu ma Nzambi, mpe meno batambikiri mu ku zonzela na mu ku têla nsangu zi za mbote. 20 Kâ mu bungu ti kukwikiri’â mu misamu mi nikutêlele ko, mbo kwizi bâ baba mpe kuvutu’â zonza ko tii tilumbu tikwizi lungana misamu mi, mu ntangu yi bakubika.” 21 Mu ntangu yîna, bantu Zakari beri kêlaka, mpe bayituku mu bungu ti wazingila mu mbuka ya santu. 22 Bu kaduka, ka bâ na lenda ko dia ba zonzela, mpe babakula ti musamu wa nzitukulu* kamona mu mbuka ya santu. Mu bidimbu keri ba zonzelaka, kâ zu ka dieri’â dukaka ko. 23 Bilumbu biandi bia sala tisalu tia santu bu biawa, wakâla ku nzo’andi.

24 Bilumbu fioti ha manima mukento’andi Elizabete wabaka zimi, mpe waswama ngonda tanu, watâ: 25 “Yehova* ni bu kasiri mu bungu dia meno mu bilumbu bi: kunkipiri mpe katuri nsoni zani ha meso ma bantu.”

26 Zimi diandi bu dialungisa ngonda 6, Nzambi watambika mbazi Gabriele ku mumvuka wa Galile wu batâka Nazarete, 27 kwe ndumba yimosi yi bakanisina makwela kwe bakala dieri na nkumbu Yozefe dia mu nzo ya Davide, mpe nkumbu ya ndumba yo yeri Maria. 28 Mbazi yakota mpe yamutêla: “Mbote, nge wê na bweso bwabwingi, Yehova* ni kê naku.” 29 Kâ watomo yituku mu nzonzolo’andi mpe wadinga mu bakula mbote’andi bwe yeri zolo tâka. 30 Buna mbazi yamutêla: “Kubândi na bunkuta, Maria, mu bungu ti bweso bwa Nzambi bwe naku. 31 Tala! mbo baka zimi, mbo buta mwana wa bakala mpe fweti mu tâ nkumbu Yezu. 32 Mbo kabâ muntu wa wunene, mbo bamutâ Mwana wa Wô Watomo Zangama, mpe Yehova* Nzambi mbo kamuhana timfumu tia tata’andi Davide, 33 mbo kabâ Mutinu mu nzo ya Yakobe ntangu zazansoni, mpe Timfumu tiandi ka tibâ na nsuka ko.”

34 Kâ Maria watâ kwe mbazi: “Bwe wuyilamana, mu bungu ti ka ndieka’eti vukasa nitu na bakala ko?” 35 Mbazi yamuvuturila: “Mpeve santu mbo yikukôkela, mpe ngolo za Wô Watomo Zangama mbo zikuyabama. Ntiangu wô butuka mbo bamutâ wa santu, Mwana wa Nzambi. 36 Mpe tala! Elizabete muntu wê mu kanda diaku yandi mpe zimi die nandi dia mwana wa bakala mu bununu bwandi, yandi wu beri tâka tisita, mpe zimi diandi mu ngonda 6 diena; 37 mu bungu ti Nzambi ka lendi’â kalembana musamu wu katêle ko.” 38 Buna Maria watâ: “Tala! meno ngamba ya Yehova* yena! Bîka ti misamu miayôkela buna bu têlele mio.” Ha manima mbazi yamusisa, mpe yayenda.

39 Buna mu bilumbu bîna, Maria wayenda mu ntinu ku tizunga tia miongo, ku mumvuka wumosi wa Yuda, 40 wakota mu nzo ya Zakari mpe wahana Elizabete mbote. 41 Buna kwa Elizabete kawâ mbote ya Maria, mwana weri mu moyo’andi waningana mu ngolo.* Elizabete wafuluka mu mpeve santu, 42 mpe wakawula mu ngolo: “Nge wa sakumunu wena mu bakento babansoni, mpe mwana wê mu moyo’aku wa sakumunu wena! 43 Buna, bwe mbwiriri bweso bwa mpila yi, nguri ya Mfumu’ani kizi kwe meno? 44 Mu bungu ti buna kwa bu ngwiri mbote’aku, mwana wê mu moyo’ani wuningane mu ngolo* mu nsayi. 45 Nsayi mpe kwe wô wakwikiri misamu mi bamutêlele mu nkumbu ya Yehova,* mu bungu ti mbo mitomo lungana.”

46 Mpe Maria watâ: “Tilundi* tiani Yehova* tita kembela, 47 mpe mpeve’ani ya fuluka kwa yilendi bâ mu nsayi mu bungu dia Nzambi Muvukisi’ani, 48 mu bungu ti mweni ngamba’andi ya yikento ni bu sa ti muntu wa mpamba-mpamba wena. Mu bungu ti tûka bwawu bu mbandu zazansoni mbo zikuntâ muntu wa nsayi, 49 mu bungu ti Muntu wê na ngolo yirikiri misamu mia minene mu bungu dia meno, mpe nkumbu’andi ya santu yena, 50 mpe mbandu batêle mbandu tiari tie nandi mu bantu bamutînaka. 51 Yandi yirikiri misamu mia minene mu koko kwandi; mwangase bô bê na lumpampani mu mabanza ma mitima miawu. 52 Katuri babakala ba ngolo ha miyâlu miawu mpe zanguri bantu ba kuluka; 53 yukutisi bantu beri na nsatu mu bima bia mbote mpe karisi bamvwama moko mpamba. 54 Bakisi Israele tisari tiandi, bu kabambukiri tiari tiandi tia ntangu zazansoni, 55 ntiana bu katâ kwe nkaka zeto, kwe Abrahame na kwe bala* bandi.” 56 Maria wabâ na Elizabete kampe ngonda zitatu, ha manima wakâla ku nzo’andi.

57 Ntangu yaketi buta Elizabete yafwana, mpe wabuta mwana wa bakala. 58 Mpe bantu beri bâka pene-pene na yandi na bantu ba kanda diandi bawâ ti Yehova* wamusongela tiari tiatingi, mpe bayangalala na yandi. 59 Mu tilumbu tia 8 baye zengoso sutu dia mwana, mpe badinga mu mu hana nkumbu ya tata’andi, Zakari. 60 Kâ nguri’andi wavutula: “Kâni! Za bamutâ.” 61 Buna bawu batâ: “Ka kwena muntu ko mu kanda diaku wê na nkumbu yo.” 62 Buna bayula tata’andi mu bidimbu ntia nkumbu keri zoloko bamutâ. 63 Walomba baya mpe watsoneka: “Nkumbu’andi Za.” Babansoni bayituku. 64 Hô nkatika bendo munwa’andi wazibuka, ludimi lwandi lwasutuka mpe wabatika mu zonza na mu kembela Nzambi. 65 Mpe bantu babansoni beri bâka pene-pene na bawu bunkuta bwababaka, mpe misamu mio miamiansoni babatika mu zonzela mio kwakwansoni ku tizunga tia miongo tia Yude. 66 Bô babansoni bawâ misamu mio balunda mio mu mitima miawu, mpe ebu beri tiyulaka: “Mwana wu ntia mpila muntu wukwizi bâ?” Mu bungu ti koko kwa Yehova* diangana na yandi kweri.

67 Buna Zakari tata’andi wafuluka mu mpeve santu, mpe wabikula bu katâ: 68 “Bîka ti Yehova* Nzambi ya Israele kakemboso, mu bungu ti kanda diandi kakipiri mpe kakûriri. 69 Mpe tu dukisiri muvukisi wa ngolo* mu nzo ya tisari tiandi Davide, 70 ntiana bu katâ wo mu nzila ya mbikuri zandi za santu za ntangu ya ntama. 71 Muvukisi wo, wufweti tu kûla mu mbeni zeto na mu bô babansoni batuyinaka. 72 Mu mpila yo, Nzambi mbo katusongela tiari ti kakanisina kwe nkaka zeto mpe mbo kabambukila luwawanu lwandi lwa santu, 73 ndefi yi kadia kwe nkaka’eto Abrahame, 74 ngatu bu kamana tu kûla mu mbeni zeto, katubakisa mu mu sarila tisalu tia santu na kondo kwa bunkuta, 75 na kwikama mpe na buderede ha matu mandi bilumbu biabiansoni bia luzingu lweto. 76 Kâ nge mwana fioti, mbo bakutâ mbikuri ya Wô Watomo Zangama, mu bungu ti mbo kwe yende ha matu ma Yehova* mu kubika nzila zandi, 77 mu zabikisa kwe kanda diandi ti mbo kabavûkisa bu kalemvokela masumu mawu, 78 mu bungu dia tiari tia lemvokela tiatingi tia Nzambi’eto, tiari tio mbo timoneka kwe beto tûka ku mazulu ntiana ntielolo bwisi ya pari na pari, 79 mu hana mutsamina kwe bô bazakale ku mpimpa ya ngolo na ku mpeho ya lufwa, na mu twarisa malu meto mu nzila ya tidzunu.”

80 Mpe mwana wô wa fioti wakula mpe wayizi bâ ngolo mu mpeve, mpe watatamana mu bâ ku sese* tii tilumbu ti kayizi tizabikisa ku Israele.