Like

2 Mu ntangu yîna, Sezare Auguste wahana musiku weri lombaka kwe bantu babansoni babâka ha mutoto mu tsonekesa nkumbu. 2 (Yo ni mbala ya ntete yi babatika mu tsonekesa nkumbu mu ntangu Kiriniuse yi keri guvernere ya Siri.) 3 Bantu babansoni baye tsonekesa nkumbu, muna muntu mu mumvuka’andi. 4 Buna Yozefe, wakatuka ku Galile, ku mumvuka wa Nazarete, mu kwenda ku Yude, ku mumvuka wa Davide, wu batâka Beteleyeme, mu bungu ti muntu wa nzo na wa kanda dia Davide weri. 5 Waye tsonekesa nkumbu na Maria, wu bamuhana mu makwela ntiana bu bamukanisina wo, mpe wabâ pene-pene mu buta. 6 Bu babâ kûna, ntangu’andi ya buta yafwana. 7 Wabuta mwana wa bakala, mwana’andi wa ntete, wamuzinga milele, mpe wamusekesa mu mbuka yi dîlaka bibulu, mu bungu ti ka kwabâ tibuka ko mu bungu dia bawu mu nzo yi bakubikila banzenza.

8 Kweri mpe na mivungi ku tizunga tio mieri bêlaka ku mbazi, mpe mieri kêlaka twila diawu mu mpimpa. 9 Mu ta-pulukusu, mbazi ya Yehova* yatelama ha matu mawu, mpe mukembo wa Yehova* weri kengaka wabazungirila. Bunkuta bwatomo ba baka. 10 Kâ mbazi yabatêla: “Ka lubândi na bunkuta, mu bungu ti nsangu za mbote nita lu têla zinata nsayi yayingi kwe bantu babansoni, 11 mu bungu ti lumbu ti ku mumvuka wa Davide muvukisi wubutukiri, ni yandi Kristo, Mfumu. 12 Tidimbu ti lumuzabila ni eti: Mbo lumona mwana wu bazingiri milele, wusekele mu mbuka yi dîlaka bibulu.” 13 Mpe mu ta-pulukusu, mukangu wa mbazi wabatika mu kembela Nzambi, mpe batâ: 14 “Mukembo kwe Nzambi ku mazulu, mpe tidzunu ha mutoto kwe bantu ba mbote.”*

15 Mbazi bu zakâla ku zulu, mivungi miatâ bawu na bawu: “Twendieno ku Beteleyeme mu tala misamu mituriri na misamu mi tu zabikisi Yehova.”* 16 Bayenda mu ntinu, mpe bamona Maria, Yozefe na mwana waseka mu mbuka yi dîlaka bibulu. 17 Bu bamona bo, bazonzela nsangu zi babaka mu mwana wo. 18 Mpe bantu babansoni bawâ misamu mia ba têla mivungi bayituku, 19 kâ Maria wabatika mu lunda misamu mio, mpe mbo keri mia dimbitilaka mu mutima’andi. 20 Ha manima mivungi miakâla, bu beri kwe kembele na bu beri kwe kundi Nzambi mu bungu dia misamu miamiansoni mi bawâ na mi bamona ntiana kwa bu babatêla mio.

21 Ha manima ma bilumbu 8, ntangu yi baketi mu zenga sutu bu yafwana, bamuhana nkumbu Yezu, nkumbu ya hana mbazi ntete Maria kabaka zimi.

22 Mpe ntangu yi baketi ba tsemesa tintwari na Musiku wa Mose bu yafwana, bamunata ku Yerusaleme mu mu songela kwe Yehova,* 23 ntiana kwa bu watsonama mu Musiku wa Yehova:* “Muna mwana wa bakala wa ntete,* bafweti mu tâ wa santu mu bungu dia Yehova.”* 24 Mpe bahana mukayulu tintwari na mio mi tâka Musiku wa Yehova:* “bidukia biole peleko bala bole ba mabembe.”

25 Mpe tala! ku Yerusaleme bakala dimosi dieri kô di beri tâka nkumbu Simeone, wa sungama weri, mpe Nzambi keri tînaka. Ntangu yi baketi bomba Israele keri kêlaka, mpe mpeve santu mu yandi yeri. 26 Nzambi wamuzabikisa mu nzila ya mpeve santu ti ka keti’â toko fwa ko ntete kamona Kristo ya Yehova.* 27 Mu ngolo za mpeve, wakota ku tempelo, mpe mu bungu ti bibuti bia Yezu biamunata mu lungisa misamu mi lombaka Musiku, 28 wabonga mwana mu moko mandi, mpe wakembela Nzambi bu katâ: 29 “Bwawu bu, Mfumu Yatomo Zangama, ngamba’aku ta bîka kenda mu tidzunu, ntiana kwa bu watâ, 30 mu bungu ti meso mani mamweni muntu wunata mvukulu, 31 wu kubikiri ha meso ma bantu babansoni, 32 mutsamina wukatula mulele wuzibikaka meso ma makanda na mukembo wa kanda diaku Israele.” 33 Buna tata na nguri ya mwana batatamana mu yituku mu misamu mi beri tâka mu yandi. 34 Simeone wabasakumuna mpe watâ kwe Maria, nguri ya mwana: “Tala! Mwana wu batumbiri wo mu bwisa na mu vutu telamasa bantu babingi ku Israele, mpe mbo kabâ tidimbu ti bakala 35 (yee, mbele ya yila yikutobola*), ngatu mbanzulu za mitima mia bantu babîngi zazabakana.”

36 Kweri mpe na mbikuri yimosi ya yikento weri na nkumbu Ana, mwana wa Fanuele, wa mu kanda dia Asere. Mukento wo wa nkatika wa nuna weri, mpe mvula 7 kayôkesa na bakala diandi ha manima ma makwela mawu,* 37 mpe mufwiri wa mvula 84 weri. Ntangu zazansoni ku tempelo keri kwizaka mu sala tisalu tia santu, mu sa diêna na mu sa ndiawululu. 38 Mu ntangu yo wapusana mpe wabatika mu vutula matondo kwe Nzambi, na mu tâ misamu mu mwana wo kwe bantu babansoni beri kêlaka nkûlulu ya Yerusaleme.

39 Buna bu bamana lungisa misamu mi lombaka Musiku wa Yehova,* bakâla ku Galile, ku mumvuka’awu Nazarete. 40 Mwana watatamana mu kula na mu baka ngolo. Wafuluka mu ndwenga mpe watatamana mu bâ na bweso bwa Nzambi.

41 Bibuti biandi tifu tiabâ nawu tia kwendaka ku Yerusaleme mivu miamiansoni mu bungu dia malaki ma Pake. 42 Mpe bu kalungisa mvula 12, banaka mu bungu dia malaki ntiana kwa bu beri toko saka. 43 Bilumbu bia malaki bu biawa mpe bu beri kâlaka, Yezu wasâla ku Yerusaleme, kâ bibuti biandi ka biazaba wo ko. 44 Mu bungu ti babanza ti ha kati dia bantu beri saka nzietolo keri, bayôkesa tilumbu timosi mu sa nzietolo mpe babatika mu mu dinga kwe bantu ba kanda diawu na kwe bantu ba bazaba. 45 Kâ mu bungu ti ka bamumona ko, bakâla ku Yerusaleme, mpe batomo mu dinga. 46 Ha manima ma bilumbu bitatu, bamumona ku tempelo, wa zakala ha kati dia milongi. Bawu keri wirikilaka, mpe biyuvu keri ba yulaka. 47 Kâ babansoni beri mu wirikilaka, batatamana mu yituku mu mpila’andi ya bakurila misamu na mu mvutu zandi. 48 Bibuti biandi bu biamumona, biayituku, mpe nguri’andi wamutêla: “Mwana’ani, mu bungu dia nti tusiriri bo? Tata’aku na meno lwaka lubêle neto, mpe kwakwansoni tuta kwe ku dingi.” 49 Kâ yandi wabatêla: “Mu bungu dia nti luta kwe kundingi? Ngano ka luzebi’â ko ti mfweti bâ mu nzo ya Tata’ani?” 50 Kâ ka babakula misamu mi keri ba têlaka ko.

51 Ha manima wakâla na bawu ku Nazarete, mpe watatamana mu ba tumamana; mpe nguri’andi watatamana mu tomo lunda misamu miamiansoni mi keri tâka mu mutima’andi. 52 Mpe Yezu watatamana mu kula mu ndwenga na mu tipamu, mu bweso bwa Nzambi na bwa bantu.