Kwe Bisi-Rome
3 Buna, Muyuda ntia ndandu ye nandi, peleko mfunu ya zengoso sutu ni ye? 2 Yandi yôkele mu misamu miamiansoni. Ntete, ni kwe bawu bahana misamu mia santu mia Nzambi. 3 Buna, bwe tutâ? Tala ti Bayuda bakaka ka babâ na timinu ko, ngano kondo kwa timinu kwawu kulendi sa ti Nzambi ka vutuandi bâ wa kwikama? 4 Na kani fioti! Diangana, wufweti zabakana ti Nzambi matieleka katâka ni bu sa ti bantu babansoni bungungu batâka, ntiana bu watsonama: “Ngatu wamoneka muntu wa sungama mu nzonzolo’aku mpe bakuhana mpemba bu bakufundisa.” 5 Kâ, tala ti kondo kwa buderede kweto buderede bwa Nzambi kusongelaka, bwe tutâ? Ngano Nzambi kondo kwa buderede kasongelaka bu katubakilaka nkesi? (Mu mpila yi banzilaka bantu nita zonzela.) 6 Diangana kâni! Tala ti ni bo, ngano Nzambi bwe kafundisila nza?
7 Kâ tala ti mu nzila ya bungungu bwani, matieleka ma Nzambi matomono moneka mu bungu dia mukembo’andi, mu bungu dia nti meno mpe bata kumfundisila ntiana musumuki? 8 Mpe mu bungu dia nti tulendi lembo têla, ntiana bu tu hunisinaka wo bantu bakaka ti ebu tutâka: “Tasarileno misamu mia mbi ngatu miabuta misamu mia mbote”? Mfundusu ya bantu bo ya delakana yena na buderede.
9 Buna, nti tulendi vutu tâ? Ngano beto mu mbuka yiyôkele bubote twena? Kâni! Mu bungu ti ntiana bu tutêleke wo ku mbatukulu, ni bu wubâ Bayuda peleko Bagreke, babansoni bantu ba masumu bena; 10 ntiana bu watsonama: “Ka kwena muntu wa sungama ko, na kani wumosi; 11 ka kwena muntu ko wê na lenda dia bakula, ka kwena muntu ko wudingaka Nzambi. 12 Bantu babansoni babîkiri nzila ya mbote, babansoni ka basiri’â salu ko; ka kwena muntu wumosi wusarilaka mbote ko, na kani wumosi.” 13 “Munwa’awu* wa zibuka wena ntiana mpiema; bahunini na ludimi lwawu.” “Misamu mi batâka mie ntiana miswa mia nioka.” 14 “Munwa’awu wa fuluka wena mu misamu mitâka ndoko na mu misamu mia mbi.” 15 “Malu mawu ntinu makwendaka mu tsamuna menga.” 16 “Mu mbuka zazansoni zi bayôkelaka bima bia bantu bamwangasaka mpe mpasi babamwisaka, 17 ka bazebi’â nzila ya tidzunu ko.” 18 “Ka batînaka Nzambi ko.”
19 Kâ tuzebi ti misamu miamiansoni mi tâka Musiku mbo mitarilaka bô bê mu lutumu lwa Musiku, ngatu minwa miamiansoni miakuta mpe nza ya mukaka yabaka nsembolo ya Nzambi. 20 Buna, ka kwena muntu* ko wu balendi tâ wa sungama ha meso ma Nzambi mu nzila ya nsalulu za musiku, mu bungu ti mu nzila ya musiku masumu matomo zabakanaka.
21 Kâ mu bungu ti bwawu bu musiku ka wusiri’â kô ko, buderede bwa Nzambi butomono moneka ntiana bu tâka wo timbangi tia Musiku na Bambikuri, 22 yee, buderede bwa Nzambi mu nzila ya timinu mu Yezu Kristo, mu bungu dia bô babansoni bê na timinu. Mu bungu ti ka kwena luswaswanu ko. 23 Diangana, bantu babansoni basumuka mpe ka bena na lenda ko dia bâ ba lunga ntiana Nzambi, 24 mpe ntiana bawu babakiri kabu dia mpamba bu babatêle ba sungama mu bungu dia bweso bwa nzitukulu bwa Nzambi mu nzila ya nkûlulu ya futa Kristo Yezu mu ba kûla mu masumu. 25 Nzambi wamuhana ntiana mukayulu mu karisa tindiku mu nzila ya timinu mu menga mandi. Yandi wasila bo mu songela buderede bwandi, mu bungu ti Nzambi mu luvivululu lwandi walemvokela masumu masalama mu ntama. 26 Yandi wasila bo mu songela buderede bwandi mu ntangu yi, ngatu kabâ muntu wusongelaka buderede ni bu wubâ mu ntangu yi katâka ti muntu wê na timinu mu Yezu wa sungama wena.
27 Buna, mu ntia musamu tutizangurila? Kâni, ka kwena musamu ko. Mu ntia musiku tutizangula? Ngano wa nsalulu? Kâni, kâ mu bungu dia musiku wa timinu. 28 Mu bungu ti tuzebi ti Nzambi mbo katâka muntu wa sungama mu bungu dia timinu, kâ ka mu bungu dia nsalulu’â ko za musiku. 29 Peleko yandi Nzambi ya Bayuda kwa yena? Ngano kena mpe Nzambi ko ya bantu ba makanda? Yee, Nzambi yena ya bantu ba makanda. 30 Mu bungu ti Nzambi yimosi kwa yena, mbo katâ bantu ba bazenga masutu ba sungama mu nzila ya timinu, mpe mbo katâ bantu ba balembo zenga masutu ba sungama mu bungu dia timinu tiawu. 31 Ngano wuzololo tâ ti musiku tukatulaka mu nzila ya timinu tieto? Kâni, na kani fioti! Kâ musiku tusingasaka.