Matie

5 Bu kamona pôka dia bantu, wanaka ha zulu mongo; mpe bu kamana zakala, milongoki miandi miayenda ha kabâ. 2 Buna wabatika mu ba longesa bu keri tâka:

3 “Nsayi kwe bô bazebi ti nsatu ya timpeve* ye nawu, mu bungu ti Timfumu tia mazulu tia bawu tiena.

4 “Nsayi kwe bô bê mu tiari, mu bungu ti mbo bababomba.

5 “Nsayi kwe bantu ba lembama, mu bungu ti mbo babiarila mutoto.

6 “Nsayi kwe bô bê na nsatu* yayingi ya buderede, mu bungu ti mbo bayukuta.*

7 “Nsayi kwe bô bafwilaka tiari, mu bungu ti mbo babafwila tiari.

8 “Nsayi kwe bô bê na mitima mia verela, mu bungu ti mbo bamona Nzambi.

9 “Nsayi kwe bô badingaka tidzunu, mu bungu ti mbo babatâ bala ba Nzambi.

10 “Nsayi kwe bô ba bata kwamisa mu bungu dia buderede, mu bungu ti Timfumu tia mazulu tia bawu tiena.

11 “Nsayi kwe beno bu balufingaka, bu balukwamisaka mpe bu baluhunisinaka misamu mia mbi mia mpila na mpila mu bungu dia meno. 12 Yangalaleno mpe tomoeno bâ mu nsayi, mu bungu ti musendo’eno wa wunene wena ku mazulu, mu bungu ti ni bo kwa mpe bakwamisina bambikuri bazinga ntete beno.

13 “Beno ni mungwa wa mutoto, kâ tala ti mungwa ka wusiri’â na luwu lwandi ko, ngano bwe balendi lwa mu karisila? Ka wusiri’â salu ko, buna wufwanane kwa balosa wo ku mbazi ngatu bantu badiata wo.

14 Beno ni mutsamina wa nza, mumvuka ka wulendi’â waswama ko tala ti ha mongo wena. 15 Bantu ka banamisaka mwinda ko mu tûla wo ku nsi’a titunga, kâ ha zulu titûlulu tia mwinda, mpe mutsamina wuhanaka kwe bô babansoni bê mu nzo. 16 Mpila mosi mpe, bîka mutsamina’eno wakenga ha matu ma bantu, ngatu bamona bisalu bieno bia mbote, mpe bakembela Tata’eno die ku mazulu.

17 “Ka lubanzandi ti Musiku peleko bambikuri ndizi fukisa. Ka ndiziri’â ko mu fukisa, kâ ni mu lungisa. 18 Wa matieleka nita lu têla, zulu na mutoto bilendi yôka, kâ ka kwena titsono timosi ko peleko lweka lwa titsono tilendi zimbakana, tala ti miamiansoni ka milungane’â ko. 19 Buna, wô kolamanaka yimosi ya ntumunu zi za nguria za fioti, mpe longesaka kwe bakaka mu sila bo, mbo bamutâ muntu wa nguria wa fioti mu musamu wutariri Timfumu tia mazulu, kâ wô sarilaka zo mpe longesaka zo, mbo bamutâ muntu wa kula mu musamu wutariri Timfumu tia mazulu. 20 Diangana nilutêlele ti, tala ti buderede bweno ka buyôkele’â bwa bitsoniki na bwa Bafarize ko, kani kabwe ka lukota mu Timfumu tia mazulu ko.

21 “Misamu mi batâ kwe nkaka zeno mia lwawâ: ‘Kufweti’â wahonda muntu ko, mu bungu ti wô honda muntu mbo bamunata ku tribinale.’ 22 Kâ meno nilutêlele ti, wô tatamana mu bâ na diki mu mpangi’andi, mbo bamunata ku tribinale; wô tâ misamu mia mbi kwe mpangi’andi mu mu vweza, mbo bamunata ku tribinale ya yinene; mboko wô tâ kwe mpangi’andi: ‘Nge tilawuki tiena!’ balendi mu tuba ku Zehene* ya tiya.

23 “Tala ti neti kabu diaku ha ziku,* mpe hâna bambukiri ti mpangi’aku musamu wê nandi na nge, 24 sisa kabu diaku hâna, ha matu ma ziku,* yenda toko sa tidzunu na mpangi’aku, mpe ha manima mbo wakâla mu hana kabu diaku.

25 “Tala ti musamu wê naku na muntu, sarila manzangu mu yirika wo na yandi bu luta kwenda ku tribinale, tala ti kâni, mbo kazonzela wo kwe mfundisi, mpe mfundisi mbo kakubîka ha moko ma minkengi, mpe bawu balendi ku tuba ku boloko. 26 Diangana wa nita tomo ku têla, kani kabwe kuduka ko, tala ti kufutiri’â mfuka yayansoni ko tii bu dukisa mupata’aku* wa fioti wa mansukina.

27 “Wa lwawâ ti: ‘Kufweti’â wasa bunsuza ko.’ 28 Kâ nilutêlele, wô tatamana mu tala mukento na nsatu ya vukasa nitu na yandi, siri bunsuza na yandi mu mutima’andi. 29 Tala ti disu diaku dia lubakala kuba dikutêsaka, katula dio mpe losa dio mala na nge, mu bungu ti bubote bwena mu hombesa tinama timosi na bu balosele nitu’aku yayansoni ku Zehene.* 30 Tala ti koko kwaku kwa lubakala kuba kukutêsaka, zenga ko mpe losa ko mala na nge, mu bungu ti bubote bwena mu hombesa tinama timosi na bu balosele nitu’aku yayansoni ku Zehene.*

31 “Bavutu tâ: ‘Wô honda makwela na mukento’andi, fweti mu hana mukanda wusongela ti makwela mafwiri.’ 32 Kâ, meno nilutêlele ti wô honda makwela na mukento’andi tala ti ka mu bungu dia bunsuza ko,* lendi mu tuma mu sa bunsuza, mpe wô kwelele mukento wahonda longo, bunsuza kata sa.

33 “Lwawîri mpe misamu mi batâ kwe nkaka zeno ti: ‘Kufweti’â wadia ndefi ko mpe kuta ya lungisa ko, kâ fweti lungisa ndefi zi wasa kwe Yehova.’ 34 Kâ meno nilutêlele: Ka ludiakandi ndefi ni bu yibâ mu nkumbu ya zulu, mu bungu ti muyâlu wa Nzambi wena; 35 ni bu yibâ mu nkumbu ya mutoto, mu bungu ti ni hô katensekaka malu mandi, peleko mu nkumbu ya Yerusaleme mu bungu ti mumvuka wa mutinu wa munene wena. 36 Kudiandi ndefi mu mutu’aku, mu bungu ti kulendi’â wasa ko ti lusuki lumosi lwabâ lwa mpembe peleko lwa ndombi. 37 Bîka ti bu tâka ‘Yee,’ yabâ mpe yee, ‘Kâni’ yabâ mpe kâni, mu bungu ti mio milandaka ha zulu kwe munkwa-mbi mitûkaka.

38 “Wa lwawâ ti: ‘Disu mu bungu dia disu, mpe dînu mu bungu dia dînu.’ 39 Meno nilutêlele: Ka lutelamanandi munkwa-mbi, kâ tala ti bakukamuni mbata ku bundi dia lubakala, hana mpe bundi diakaka. 40 Tala ti muntu dingiri mu ku nata ku tribinale mu bonga tinkuti tiaku tia ku nsi, mu bîkila mpe tinkuti tiaku tia zulu. 41 Tala ti muntu wê na lutumu ku lombele mu ngolo mu mu sarila tisalu tia kilometre mosi, nge sa nandi kilometre zole. 42 Hana kwe wô ta ku lomba, mpe kukalandi mu defesa* mbongo kwe wô ta zolo ku defa.

43 “Wa lwawâ ti: ‘Fweti zolo mpwana’aku, mpe fweti yina mbeni’aku.’ 44 Kâ meno nilutêlele: Tatamaneno mu zolo mbeni zeno, mpe sambilakeno mu bungu dia bô balukwamisaka, 45 ngatu lwasongela ti beno bala ba Tata’eno die ku mazulu lwena, mu bungu ti mwini katêkesaka kwe bankwa-mbi na kwe bantu ba mbote, mpe mvula kanokesaka kwe bantu ba sungama na balembolo ba sungama. 46 Tala ti bô kwa baluzololo luzoloko, ngano ntia ndandu lubaka? Bantu batotaka mpaku, ngano ka basilaka bo ko? 47 Tala ti mpangi zeno kwa luhanaka mbote, ngano ntia musamu wa nzitukulu luyirikaka? Bantu ba makanda ngano ka basilaka bo ko bawu mpe? 48 Buna, lufweti bâ ba lunga ntiana Tata’eno die ku mazulu bu kê wa lunga.