Kwe Bisi-Rome
1 Paulo, tisari tia Kristo Yezu, wu batâ mbila mu bâ ntumwa, mpe wu basôla mu samuna nsangu za mbote za Nzambi, 2 zi kakanisina tûka ntama mu Matsonoko ma santu mu nzila ya mbikuri zandi, 3 nsangu zitariri Mwana’andi wabutuka mu kanda dia Davide na nitu ya tinsuni. 4 Kâ mu nzila ya ngolo za mpeve santu, bamutâ Mwana wa Nzambi bu bamuvumbula kwe ba fwa—yee, Yezu Kristo Mfumu’eto. 5 Ni mu nzila ya yandi tabakiri bweso bwa nzitukulu mpe nabakiri tisalu tia ntumwa, ngatu makanda mamansoni matumama mu nzila ya timinu mu bungu dia mukembo wa nkumbu’andi. 6 Beno mpe ha kati dia makanda mo balutêle mbila ngatu lwabâ bantu ba Yezu Kristo— 7 kwe bô babansoni bê ku Rome Nzambi ba kazololo, ba batêle mbila mu bâ basantu:
Bîka lwabaka bweso bwa nzitukulu na tidzunu tia Nzambi Tata’eto na tia Mfumu Yezu Kristo.
8 Ntete, matondo nita vutula kwe Nzambi’ani mu nzila ya Yezu Kristo mu bungu dia beno bansoni, mu bungu ti timinu tieno bata zonzela mu nza ya mukaka. 9 Diangana, Nzambi wu nisarilaka tisalu tia santu mu mutima’ani wawansoni bu nisamunaka nsangu za mbote zitariri Mwana’andi, zebi ti ntangu zazansoni beno nizonzelaka mu tusambulu twani. 10 Lomba nilombaka mu kwiza kwe beno tala ti wudelakane mpe tala ti lo ni luzolo lwa Nzambi. 11 Mu bungu ti nsatu yayingi ye nani ya lu mona mu lu hana kabu dia timpeve, ngatu lwabâ ba kangama; 12 peleko beto bansoni tatitindisa mu nzila ya timinu tia muna muntu.
13 Kâ bampangi, ka nita zolo ko ti lwalembo zaba ti mbala zazingi naweyi mu kwiza kwe beno (kâ tii bwawu bu, ka bakungeni’â nzila ko ya lungisa wo) ngatu nabaka mpe ndandu za mbote kwe beno ntiana kwe makanda makaka. 14 Mfuka ye nani kwe Bagreke na kwe banzenza,* kwe bantu ba ndwenga na kwe bô bakondolo ndwenga. 15 Buna kwe beno mpe lwe ku Rome, timina die nani dia lu samunina nsangu za mbote. 16 Ka ndiena na nsoni za nsangu za mbote ko; wa matieleka, zo ni ngolo za Nzambi zi kasarilaka mu vûkisa bô babansoni bê na timinu, batikila kwe Muyuda na kwe Greke mpe. 17 Mu bungu dia nsangu zo buderede bwa Nzambi bumonekaka mu nzila ya timinu na mu bungu dia timinu, ntiana bu watsonama: “Kâ muntu wa sungama mbo wuzinga mu bungu dia timinu.”
18 Tûka ku zulu, Nzambi nkesi kasongelaka kwe bô babansoni balembo mu zitisaka na kwe bô basarilaka kondo kwa buderede kukabakasaka matieleka, 19 mu bungu ti musamu wu balendi zaba mu Nzambi wa wutomo monekaka kwe bawu, mu bungu ti Nzambi wa katomono ba songela. 20 Diangana, tûka ntangu yi kasala nza, bifu biandi bilembo monekaka, ngolo zandi zilembolo na nsuka na Bunzambi bwandi, bia bitomo monekaka mu bima bi kayirika. Buna, ka bena na mpemba ko mu lembo kwikila mu Nzambi. 21 Ni bu sa ti bazaba Nzambi, ka bahana mukembo wufwanane kwe Nzambi ko mpe ka bamutonda ko, kâ mbanzulu zawu zayizi bâ buzoba, mpe mitima miawu mikondolo ndwenga miakota mu mpimpa ya ngolo. 22 Ni bu sa ti ntiana bantu bê na ndwenga batibongelaka, bayikiri bizoba 23 mpe bakariri mu hana mukembo kwe Nzambi yilembo fwaka mu hana wo kwe biteki bia bantu bafwaka, bia banuni, bia bibulu bie na malu mayà na bia bibulu bikwe yendele tia moyo.
24 Ntiangu tintwari na nsatu za mitima miawu, Nzambi wabayambirikiri mu nsalulu za mvindu, ngatu bavweza nitu za bawu beni. 25 Bawu basobese matieleka ma Nzambi na bungungu bu basambiri bima bi bayirika, mpe bu basariri bio tisalu tia santu, kani basila bo kwe Mvangi yi bakembelaka ntangu zazansoni. Amen. 26 Ntiangu Nzambi kabayambirikiri mu nsatu zawu za ngolo za vukasa nitu na za nsoni, mu bungu ti bakento bawu babîkiri mpila ya vukasa nitu ya sungama mu vukasa nitu mu mpila yilembolo ya sungama; 27 mpila mosi mpe babakala babîkiri mpila ya vukasa nitu ya sungama na bakento, mpe bayikiri na nsatu ya yôka ya vukasa nitu bawu na bawu, babakala na babakala. Buna misamu mia mvindu bata yirika, mpe nsembolo’awu* ya lunga bata baka yidelakane na mbi’awu.
28 Mu bungu ti bakariri mu tomo zaba Nzambi, Yandi wababîkiri mu sarila mabanza ma kalembo tambulaka, ngatu bayirika misamu milembolo mia sungama. 29 Mpe bawu bafulukiri mu mabanza ma mpila na mpila makondolo buderede, ma tengama, ma bundiafu na ma mbi. Bawu ba fuluka bena mu tifu tia dienokena, tia honda bantu, tia bakana, mu bungungu, mu mayela ma mbi na mu tifu tia tola bantu, 30 tia finga bantu, Nzambi bayinaka, leho die nawu, lulendo na lumpampani. Mabanza ma yirika mbi me nawu,* mpe bibuti biawu bakolamanaka, 31 ka bena na mayela ma bakula misamu ko, ka balungisaka makani mawu ko, ka bena na luzolo mu bantu ko mpe ka bafwilaka bantu tiari ko. 32 Ni bu sa ti batomono zaba musiku wa sungama wa Nzambi wutâka: bô basarilaka misamu mio lufwa lubafwanane; kâ mbo batatamanaka mu sarila misamu mio, mpe mbo batambulaka bô bayirikaka mio.