Matie

26 Ha manima, Yezu bu kamanisa mu tâ misamu mio miamiansoni, watâ kwe milongoki miandi: 2 “Luzebi ti bilumbu biole kwa bisiri ntete Pake yatula, mpe Mwana muntu mbo bamuteka mpe mbo bamuhonda ha poto.”

3 Buna mfumu za banganga-nzambi na bakuluntu bavukana ku lupangu lwa mfumu-nganga-nzambi yi batâka nkumbu Kayife, 4 mpe batâ mfundu mu tambila Yezu mutambu* ngatu bamubwila* mpe bamuhonda. 5 Kâ batâ: “Ka mu ntangu ya malaki’â ko, tala kâni kulendi bâ vwandi ha kati dia bantu.”

6 Yezu bu kabâ ku Betani, mu nzo ya Simo munkwa-bwazi, 7 mukento wumosi wapusana he yandi na mbwata ya albatre, yeri na mafuta ma nsunga ya mbote ma ntalu yayingi, mpe wabatika mu tsamuna mo ku mutu wa Yezu bu beri diaka.* 8 Milongoki bu miamona bo, nkesi zababaka mpe miatâ: “Mu bungu dia nti kata ma bebesela? 9 Mu bungu ti balendi ma teka nkatika ntalu mpe baheni mbongo zo kwe bamputu.” 10 Mu bungu ti wazaba misamu mio, Yezu wabatêla: “Mu bungu dia nti luta kanzakasa mukento wu? Musamu wa mbote kakundirikiri. 11 Mu bungu ti mbo lubâ na bamputu ntangu zazansoni, kâ meno ka lubâ nani ko ntangu zazansoni. 12 Bu kasiri mafuta mo ma nsunga mu nitu’ani, ni mu kunkubika mu bungu dia ndiamunu’ani. 13 Wa matieleka nita lu têla, kwakwansoni ku bazonzela nsangu zi za mbote mu nza, mbo bazonzela mpe misamu mia yirika mukento wu mu mu bambukila moyo.”

14 Buna wumosi mu ba 12, wu batâka Yuda Iskariote, waye monekena mfumu za banganga-nzambi 15 mpe watâ: “Nti lukungana ngatu namuteka kwe beno?” Bawisana mu mu hana mipata 30 mia arza. 16 Buna tûka tilumbu tîna, watatamana mu dinga ntangu ya mbote mu mu teka.

17 Mu tilumbu tia ntete tia mampa malembo levire, milongoki miapusana he Yezu, miatâ: “Kwe zololo takubikila misamu ngatu wadia Pake?” 18 Watâ: “Yendeno mu mumvuka kwe tingandi, mpe mu têleno, ‘Mulongi têle: “Ntangu’ani yeka pene-pene, nzololo nadia Pake na milongoki miani ku nzo’aku.”’” 19 Milongoki miasa buna bwa ba tumina Yezu, mpe bakubika Pake.

20 Mpimpa bu yatula, walambalala ha meza na milongoki mia 12. 21 Bu beri diaka, watâ: “Wa matieleka nita lu têla, wumosi mu beno kunteka.” 22 Tiari tiatomo ba baka mpe mosi na mosi mu bawu wabatika mu mu têla: “Mfumu, ka meno’â ko, ka buna ko?” 23 Wabavuturila: “Wô ta vwika koko kwandi na meno mu ndonga, ni yandi kunteka. 24 Wa matieleka, Mwana muntu ni mwendo’andi, ntiana bu batsoneka wo mu yandi, kâ tiari kwe muntu wô teka Mwana muntu! Mbo wuketi bâ bubote kwe yandi tala ti ka butuka ko.” 25 Yuda, wô waketi mu teka, watâ: “Ka meno’â ko, ka buna ko, Rabi?” Yezu wamutêla: “Nge beni têle wo.”

26 Bu beri tatamanaka mu dia, Yezu wabonga dimpa, mpe bu kamana sambila, wabukuna dio mpe wahana dio kwe milongoki, watâ: “Bongeno, dieno. Nitu’ani dita monekesa.” 27 Wabonga mpe mbungu,* wavutula matondo mpe wabahana yo, bu katâ: “Nweno yo, beno bansoni, 28 mu bungu ti yimonekese ‘menga mani ma luwawanu,’ matsamuka mu bungu dia bantu babingi ngatu babaka mulemvo wa masumu. 29 Kâ wa nita lu têla: Kani kabwe, ka nivutu’â nwa vinu yi ko, tii tilumbu ti nivutu ya nwa na beno mu Timfumu tia Tata’ani.” 30 Ku nsuka, bu bamana tanga mikunga mia mukembo, bayenda ku Mongo wa miti mia Olive.

31 Buna Yezu wabatêla: “Mpimpa yi, beno bansoni mbo lutâ makuba mu bungu dia misamu mikunturila, mu bungu ti watsonama: ‘Mbo nitwa muvungi, mpe bimeme bia twila mbo bimwangana.’ 32 Kâ bu nimana vumbuka kwe ba fwa, mbo nilutekerela ku Galile.” 33 Kâ Piere wamuvuturila: “Ni bu sa ti babansoni batêle makuba mu bungu dia misamu mikuturila, kani kabwe meno ka nitâ kuba ko!” 34 Yezu wamutêla: “Wa matieleka nita ku têla, mpimpa yi ntete nsusu yakuba, mbo kunkala mbala tatu.” 35 Piere wamuvuturila: “Ni bu sa ti mfweti fwa na nge, kani kabwe ka nikukala ko.” Milongoki miamiansoni miakaka ni bo kwa mpe mieri tâka.

36 Buna Yezu wayenda na bawu ku mbuka yi batâka Getesemane mpe watâ kwe milongoki: “Zakaleno ha bu nita kwenda ehanê mu sambila.” 37 Wanata Piere na bala ba bole ba Zebede, mpe wayizi bâ na tiari mpe na lwaka lwa ngolo. 38 Mpe wabatêla: “Tiari tie nani,* ntiana me nifwa. Sâleno ha mpe tatamaneno mu tiesa disu na meno.” 39 Bu kayenda mwa mala, wakondama mpe wasambila ebu: “Tata’ani, tala ti bulendi bâ, bîka ti mbungu yi yayôka mala na meno. Ka ntiana bu nzololo’â ko, kâ ntiana bu zololo nge.”

40 Wakâla kwe milongoki mpe wababwana ku tolo, watâ kwe Piere: “Ngano ka lulendi’â lwatiesa disu ko na meno na kani heure yimosi? 41 Tieseno disu mpe tatamaneno mu sambila ngatu lwalembo kota mu ntontolo. Diangana mpeve yizololo mu sala, kâ musunia ka wena ngolo ko.” 42 Mu mbala ya nzole wavutu kwenda mpe wasambila: “Tata’ani, tala ti mbungu yi ka yilendi’â yayôka ko ya ka ninwe, bîka ti luzolo lwaku lwasalama.” 43 Wavutu kâla mpe wababwana ku tolo mu bungu ti meso mawu dema meri. 44 Buna wasa ba sisa, wavutu kwenda mpe wasambila mbala ya ntatu, misamu ni mio kwa kavutu tâ. 45 Ha manima wakâla kwe milongoki mpe wabatêla: “Mu ntangu ya mpila yi tolo luta bwa mpe huma luta huma! Tala! Ntangu yi bafweti teka Mwana muntu ha moko ma bisumuki yeka pene-pene. 46 Telameno, tokoeno. Tala! Muntu wukunteka weka pene-pene.” 47 Bu keri zonzaka, tala! Yuda, wumosi mu ba 12, wayiza na pôka dia bantu beri na mbele na mibota. Mfumu za banganga-nzambi na bakuluntu babatambika.

48 Muntu wamuteka wabahana tidimbu, bu katâ: “Wô wu nihana bize, ni yandi; mu kangeno.” 49 Mpe mbala mosi wayenda he Yezu mpe watâ: “Mbote, Rabi!” Mpe wamuhana bize ya lembama. 50 Kâ Yezu wamutêla: “Mpwana’ani, nti ta sa kû?” Ha manima bapusana, babwila Yezu mpe bamukanga. 51 Kâ tala! wumosi mu bô babâ na Yezu walambula koko, wabenda mbele’andi, mpe wawinda yo kwe ngamba ya mfumu-nganga-nzambi mpe wamuzenga kutu. 52 Kâ Yezu wamutêla: “Karisa mbele’aku ha tibuka tiandi, mu bungu ti bô babansoni babongaka mbele, mu mbele bafwila. 53 Peleko benzi ti ka ndendi’â natâ mbila Tata’ani ko, ngatu kakuntambikila bwawu bu mikangu yôka 12 mia bambazi? 54 Buna, bwe Matsonoko matâ ti misamu ni bu miafweti yôkela malunganana?” 55 Mu ntangu yîna, Yezu watâ kwe pôka dia bantu: “Ngano meno lwizi kanga na mbele na mibota ntiana mwivi? Bilumbu biabiansoni mu tempelo ndieri vulu zakalaka mu longesa, kâ ka lwakunkanga ko. 56 Kâ misamu mi miamiansoni mituriri ngatu matsonoko ma bambikuri malungana.” Buna milongoki miamiansoni miamuyambirika mpe miadioka.

57 Bô bakanga Yezu bamunata kwe mfumu-nganga-nzambi Kayife, kô kwa vukanana bitsoniki na bakuluntu. 58 Kâ Piere ha manima keri kwe mu landi ha titini tia mwa tia tila, tii ku lupangu lwa mfumu-nganga-nzambi, mpe bu kamana kota, wazakala na bisari bia nzo mu tala misamu miyôka.

59 Mfumu za banganga-nzambi na Sanedre yayansoni timbangi tia bungungu beri dingaka mu Yezu ngatu bamuhonda. 60 Kâ ka babaka tima ko, ni bu sa ti bantu babingi beri kwizi tâka timbangi tia bungungu. Ha manima bantu bole bayiza 61 mpe batâ: “Bakala di diatâ: ‘Lenda die nani dia mwangasa tempelo yi ya Nzambi na mu vutu ya tunga mu bilumbu bitatu.’” 62 Buna mfumu-nganga-nzambi watelama mpe watâ: “Kuta tâ musamu ko? Ngano misamu mi ta tâ babakala ba mu nge mia ta wâ?” 63 Kâ Yezu ka tâ na kani musamu ko. Buna mfumu-nganga-nzambi wamutêla: “Nikulombele mu dia ndefi mu nkumbu ya Nzambi ya moyo mu tu têla tala ti nge ni Kristo, Mwana wa Nzambi!” 64 Yezu wamutêla: “Nge beni têle wo. Kâ wa nita lu têla, bwawu bu mbo lumona Mwana muntu wuzakala ha koko kwa lubakala kwa wô wê na ngolo mpe kwiza mu matuti ma ku zulu.” 65 Buna mfumu-nganga-nzambi watenda binkuti biandi bia zulu, watâ: “Fingiri Nzambi! Ntia timbangi tiakaka tuta dinga? Tala! Mpila yi kafingiri Nzambi ya luwîri. 66 Ngano bwe luta banza?” Bawu bavutula: “Fweti fwa.” 67 Buna bamulobolela mante ku tidiri mpe bamuwinda nkomi. Bakaka bamutiatuna mbata, 68 mpe batâ: “Nge Kristo, tu bikurila. Nani ku twiri?”

69 Piere wazakala ku mbazi, ku lupangu, mpe tisari timosi tia tikento tiapusana he yandi mpe tiatâ: “Nge mpe na Yezu weri kwe yende, Musi-Galile!” 70 Kâ wakala ha meso ma babansoni, bu katâ: “Musamu wuta tâ ka nzebi’â wo ko.” 71 Bu kayenda ha mwelo wa lupangu, mukento wakaka wamumona mpe watâ kwe bô babâ hô: “Bakala di na Yezu keri kwe yende, Musi-Nazarete.” 72 Wavutu kala bu kadia ndefi: “Ka nzebi’â muntu wo ko!” 73 Ha manima ma mwa ntangu, bô batelama hô bapusana mpe batâ kwe Piere: “Diangana, nge mpe wumosi mu bawu wena, mu bungu ti mpila’aku ya zonzela* yikufundiri.” 74 Ha manima wakala mpe wadia ndefi: “Ka nzebi’â muntu wo ko!” Hô nkatika bendo nsusu yakuba. 75 Mpe Piere wabambukila misamu mia mu têla Yezu: “Ntete nsusu yakuba, mbo kunkala mbala tatu.” Waduka ku mbazi mpe waye tomo dila.