Kwe Bisi-Rome
7 Bampangi, kwe beno luzebi Musiku nita zonza: Ngano ka luzebi’â ko ti Musiku muntu wutumaka ntangu yayansoni yi kabâ wa moyo? 2 Mu tifwani, mukento wa kwela wa kangama wena kwe bakala diandi mu nzila ya musiku ntangu yayansoni bakala diandi yi dibâ dia moyo, kâ tala ti bakala diandi difwiri, yandi kûlukiri mu musiku wa bakala diandi. 3 Tala ti kwelele bakala diakaka mu ntangu bakala diandi yi kê wa moyo, yandi sariri bunsuza. Kâ tala ti bakala diandi difwiri, yandi kûlukiri mu musiku wa bakala diandi. Buna tala ti kwelele bakala diakaka, ka ta sarila bunsuza ko.
4 Mpangi zani, beno mpe mu nzila ya mukayulu wa Kristo lwayizi bâ bantu ba fwa mu musamu wutariri Musiku, ngatu lwabâ bantu ba muntu wakaka, muntu wo wu bavumbula kwe ba fwa, ngatu tabuta mbutu mu bungu dia Nzambi. 5 Mu bungu ti bu tweri kwe diati tintwari na timuntu tieto tia masumu, Musiku wasa ti tabakula nsatu zeto za masumu zeri salaka mu nitu* zeto. Nsatu zo ku lufwa kwa zaketi tu nata. 6 Kâ bwawu bu takûlukuri mu Musiku, mpe tafwiri mu musamu weri tu kangaka mu boloko. Bwawu bu Nzambi tuta sarila mu mpila ya môna mu nzila ya mpeve, ka wena ko ti mu mpila ya ntama mu nzila ya musiku wa tsonoko.
7 Buna, bwe tutâ? Ngano Musiku ni masumu? Diangana kâni! Wa matieleka, tala ti Musiku kâni ka naketi’â zaba masumu ko. Mu tifwani, ka naketi’â zaba tifu tia dienokena ko tala ti Musiku ka watâ ko: “Kufweti’â wadienokena ko.” 8 Kâ masumu masarila bweso bwa mu hana ntumunu mu buta nsatu za mpila na mpila za bwimi mu mutima’ani. Tala ti musiku kâni, masumu mbo maketi fwa. 9 Wa matieleka, mu ntama wa moyo ndieri ntete musiku wizi. Kâ musiku bu wayiza, masumu mayizi vutu bâ ma moyo, mpe nayizi fwa. 10 Mpe ntumunu yaketi nata ku luzingu, nayizi bakula ti ku lufwa kwa yeri nataka. 11 Mu bungu ti masumu bu masarila bweso bwa mu hana ntumunu, makumbenda mpe makungonda mu nzila ya ntumunu. 12 Musiku wa Mose wa santu wena, mpe misamu mi batsoneka mu kati mia santu miena, mia sungama mpe mia mbote.
13 Buna, ngano tima tia mbote tiakunata ku lufwa? Diangana kâni! Kâ masumu makunata ku lufwa mu nzila ya tima timosi tia mbote, mpe ntumunu yatomo songela ti masumu ma mbi mena. 14 Tuzebi ti Musiku kwe Nzambi watûka mu nzila ya mpeve santu’andi, kâ musamu kwe meno wena, muntu wa tinsuni ndiena wu bateka ntiana ngamba ya masumu. 15 Mu bungu ti ka nita bakula misamu mi nita yirika ko. Mio mi nzololo ka nita mia yirika ko, kâ mio mi niyinaka ni mio niyirikaka. 16 Kâ tala ti ka nita yirika mio mi nzololo ko, ntamburi ti Musiku wa mbote wena. 17 Bwawu bu ka meno’â ko nita mia yirika, kâ ni disumu die mu meno. 18 Mu bungu ti nzebi ti mu meno, wuzololo tâ, mu nitu’ani, ka mwena tima tia mbote ko; buna nzololo mu yirika mio mia mbote, kâ ka ndiena na lenda ko dia yirika mio. 19 Mu bungu ti mbote yi nzololo ka nita ya yirika ko, kâ mbi yi ndembolo zolo ni yo nita yirika. 20 Tala ti mio mi nzololo ka nita mia yirika ko, ka wusiri’â meno ko nita mia yirika, kâ ni disumu die mu meno.
21 Buna mbakuri ti musiku ni wo wê mu meno: Mu ntangu yi nzololo mu yirika misamu mia mbote, ni misamu mia mbi mie mu meno. 22 Diangana mu mutima’ani, mbo nitomo yangalalaka mu musiku wa Nzambi. 23 Kâ mbakuri ti mu nitu’ani* musiku wakaka wuta nwana na musiku wa Nzambi wê mu mabanza mani, mpe wuta kunkanga mu boloko dia musiku wa disumu die mu nitu’ani.* 24 Tiari meno! Nani kunkûla mu nitu yi yita kunata ku lufwa? 25 Ntondele Nzambi mu nzila ya Yezu Kristo Mfumu’eto! Buna mu mabanza mani, meno ngamba yena ya musiku wa Nzambi, kâ mu nitu’ani meno ngamba yena ya musiku wa disumu.