Wa ntete kwe Bisi-Korente

15 Bampangi, nsangu za mbote zi nalusamunina nita lu bambula, nsangu zi lwatambula mpe zi lutatamanaka mu landa. 2 Mbo luvûka mu nzila ya nsangu za mbote zi nalusamunina tala ti lutomono za simbirila, diambu’eti wabâ ti kwa mpamba kwa lwayizi kwikila.

3 Mu misamu mia ntete mi nalutêla, kweri mpe na misamu mi nabaka: ti Kristo wafwa mu bungu dia masumu meto ntiana bu tâka Matsonoko; 4 bamuzika, yee, wavumbuka kwe ba fwa mu tilumbu tia bitatu ntiana bu tâka Matsonoko; 5 wamonekena Sefase,* mpe ha manima ba 12. 6 Ha manima wamonekena mpangi yôka 500 ha timosi. Babîngi ha kati diawu ba moyo batiri kâ bakaka bafwa. 7 Ha manima wamonekena Zaki, mpe ha manima bantumwa babansoni. 8 Kâ ku nsuka wakumonekena mpe, ntiana kwe mwana wubutukiri ntete ntangu’andi yafwana.

9 Diangana ni meno ndiôkele wa fioti mu bantumwa, mpe ka ndiena wa lunga ko bakuntâ nkumbu ntumwa, mu bungu ti nakwamisa timvuka tia Nzambi. 10 Kâ ni mu nzila ya bweso bwa nzitukulu bwa Nzambi ndiena bu bu ndiena. Bweso bwa nzitukulu bwa kunsongela Nzambi ka bwena bwa mpamba ko, mu bungu ti nasala bwabwingi yôka babansoni; ka mu ngolo za me beni’â ko kâ mu bweso bwa nzitukulu bwa Nzambi bwe mu meno. 11 Ni bu wubâ meno peleko bawu, ni bo tuta samunina, mpe ni mu nzila yo lwayizi kwikila.

12 Nsangu zi tuta samuna ni zena’eti, Kristo wavumbuka kwe ba fwa. Buna mu bungu dia nti bantu bakaka ha kati dieno bata tâ ti ka kwena mvumbukulu ya ba fwa ko? 13 Diangana, tala ti ka kwena mvumbukulu ya ba fwa ko, buna Kristo ka vumbuka kwe ba fwa ko. 14 Kâ tala ti Kristo ka vumbuka kwe ba fwa ko, ntembe kâni tisalu tieto tia samuna tia mpamba tiena, mpe timinu tieno tia mpamba tiena. 15 Buna beto mpe tumonekene mbangi za Nzambi za bungungu, tala ti mu matieleka bantu ba fwa ka bafweti’â bavumbuka kwe ba fwa ko, mu bungu ti nsangu za bungungu tuta samuna mu Nzambi ti, Yandi wavumbula Kristo kwe ba fwa, kâ tio ka mu vumbula ko. 16 Buna tala ti bantu ba fwa ka bavumbukaka kwe ba fwa ko, dieka bo, Kristo mpe ka vumbuka kwe ba fwa ko. 17 Musamu wakaka, tala ti Kristo ka vumbuka kwe ba fwa ko, timinu tieno ka tiena salu ko; mu masumu meno luta tatamana. 18 Mpe bô bafwa mu bumosi na Kristo, bafwa mbala mosi. 19 Tala ti tivuvu tieto mu Kristo mu luzingu lu kwa tiena, buna bantu ba tiari twena yôka bantu babansoni.

20 Kâ Kristo wavumbuka kwe ba fwa, yandi ni mbutu ya ntete mu bô bafwa. 21 Mu bungu ti lufwa mu muntu wumosi lwayizila, mvumbukulu ya ba fwa mpe mu muntu wumosi yayiziri. 22 Ntiana kwa bantu babansoni bu bafwaka mu Adame, mpila mosi mpe mu Kristo, bantu babansoni mbo babakarisa mu luzingu. 23 Kâ muna muntu mu ntangu’andi: Ntete, Kristo mbutu ya ntete, ha manima bô ba bavwiri kwe Kristo mu ntangu yi kabâ hô. 24 Ku nsuka, mbo kakarisa Timfumu kwe Nzambi’andi na Tata, bu kamana fukisa guvernema zazansoni, tuyâlu twatwansoni na ngolo. 25 Mu bungu ti fweti bâ mutinu tii Nzambi bu katûla mbeni zazansoni ku nsi’a malu mandi. 26 Mpe mbeni ya mansukina, lufwa, mbo bafukisa lo. 27 Mu bungu ti Nzambi “watûla bima biabiansoni ku nsi’a malu mandi.” Kâ bu kata tâ ti ‘bima biabiansoni mu lutumu lwandi biena,’ wutomono moneka ti ka ta zonzela Wô watûla bima biabiansoni mu lutumu lwandi ko. 28 Kâ bu bakwizi mu hana lutumu mu bima biabiansoni, ha manima Mwana yandi beni mbo katumama kwe Wô wumuheni lutumu mu bima biabiansoni, ngatu Nzambi kabâ bima biabiansoni mu bungu dia bantu babansoni.

29 Tala ti kâni, bantu bata batusu mu kwizi fwa nti basa? Tala ti wa matieleka bantu ba fwa ka balendi’â bavumbuka kwe ba fwa ko, mu bungu dia nti bata ba batisa mu kwizi fwa? 30 Mu bungu dia nti tutûlaka mpe luzingu lweto mu mpasi ntangu zazansoni? 31 Bilumbu biabiansoni ha matu ma lufwa nibâka. Bampangi, musamu wo nita singasa mu nzila ya nsayi ye nani mu beno tintwari na Kristo Yezu Mfumu’eto. 32 Tala ti ntiana babakala bakaka,* nanwana na bibulu bia sangi ku Efeze, ntia ndandu nita wa bakila? Tala ti bantu ba fwa ka bafweti’â bavumbuka kwe ba fwa ko, “bîka ti tadia mpe tanwa, mu bungu ti mbazi fwa tufwa.” 33 Ka luhunakanandi. Ndiku za mbi bifu bia mbote zibebesaka.* 34 Kariseno mabanza ma mbote mu mpila ya sungama mpe ka lusarilandi masumu, mu bungu ti bantu bakaka ka bena na luzabu lwa Nzambi ko. Ni bo nita zonzela mu lu fwisa nsoni.

35 Kâ muntu mbo katâ: “Bwe bantu ba fwa bavumbukila? Yee, na ntia mpila nitu bakârila?” 36 Nge tizoba tiena! Tima ti kunini ka tilendi’â tiabâ moyo ko, tala ti ka titokolo’â fwa ko. 37 Mpe mu bungu dia tima ti ta kuna, tio ti ta kuna, ka muti’â ko wukula, kâ ni mbutu ya mpamba, yilendi bâ ble peleko mbutu yakaka; 38 kâ Nzambi nitu kahanaka yo buna bu kazololo, mpe kwe muna mbutu kahanaka nitu yimudelakane. 39 Nitu zazansoni ka zena mpila mosi ko, kâ nitu ya bantu ye kô, nitu ya bibulu, nitu ya nuni, mpe na nitu ya mbizi. 40 Nitu za mazulu zê kô na nitu za mutoto; kâ mukembo wa nitu za mazulu wakaka wena, mpe wa nitu za mutoto wa swaswana wena. 41 Mukembo wa ntangu wa swaswana wena na mukembo wa ngonda mpe na mukembo wa mbwetete; diangana, muna lubwetete mukembo wa swaswana wê nandi na lubwetete lwakaka.

42 Mpila mosi mpe na mvumbukulu ya ba fwa. Nitu yifwiri bola yibolaka; kâ nitu yi bavumburi, ka yilendi’â yabola ko. 43 Bakunini yo mu nsoni; kâ bavumburi yo mu mukembo; bakunini yo yalembo ngolo; kâ bavumburi yo mu ngolo. 44 Bakunini yo nitu ya tinsuni; kâ bavumburi yo nitu ya timpeve. Tala ti nitu ya tinsuni ye kô, nitu ya timpeve mpe ye kô. 45 Ntiangu watsonama: “Adame bakala dia ntete wayizi bâ muntu wa moyo.”* Adame dia mansukina diayizi bâ mpeve yihanaka luzingu. 46 Kâ tio tie mpeve ka tiayiza tia ntete ko. Ni tio tia tinsuni tiayiza tia ntete, mpe ha manima ni tio tie mpeve. 47 Bakala dia ntete mu mutoto katûka mpe mu mfumfuta bamuyirikila; mpe bakala dia nzole ku zulu katûka. 48 Bô ba basala mu mfumfuta, mpila mosi bena na wô wu basala mu mfumfuta; bô bê ku zulu mpila mosi bena na wô wa ku zulu. 49 Mpe mpila mosi bu twe mu tifwani tia wô wu basala mu mfumfuta, mbo tubâ mpe mu tifwani tia wô wa ku zulu.

50 Kâ wa nita lu têla, bampangi, nitu na menga ka bilendi’â biabiarila Timfumu tia Nzambi ko, mpe tio tibolaka ka tibiarilaka tio tilembo bolaka ko. 51 Tala! mansweki ma santu nita lu têla: Beto bansoni ka tufwa ko, kâ beto bansoni mbo batusoba, 52 mbala mosi, mu mbwetolo disu, mu ntangu yiwakana lwaza lwa mansukina lwa mpungi. Mu bungu ti mpungi mbo yisa lwaza, mpe bantu ba fwa mbo bavumbuka na nitu zilembo bolaka, mpe mbo batusoba. 53 Mu bungu ti tio tibolaka tifweti kwizi bâ tima tilembo bolaka, mpe tio tifwaka tifweti kwizi bâ tima tilembo fwaka. 54 Kâ tio tibolaka bu tikwizi bâ tima tilembo bolaka mpe tio tifwaka bu tikwizi bâ tima tilembo fwaka, buna misamu emi mi batsoneka mbo milungana: “Lufwa baminini lo mankululu.” 55 “Lufwa, nungunu’aku kwe yena? Lufwa, lusonso lwaku kwe lwena?” 56 Lusonso lunataka lufwa ni masumu, mpe ngolo za masumu ni Musiku.* 57 Kâ matondo kwe Nzambi, mu bungu ti nungisa kata tu nungisa mu nzila ya Mfumu’eto Yezu Kristo!

58 Dieka bo, mpangi zani zi ntomono zolo, bêno ba kangama, ba sikama, ntangu zazansoni salakeno bwabwingi mu tisalu tia Mfumu, bu luzebi ti tisalu tieno mu Mfumu ka tiena tia mpamba ko.