Décembre

Muntu weri salaka ku nzo ya mutinu wa ku Etiopi ngano wa kubama wabâ mu batusu? Banza’eti: Musi-Etiopi wo wayenda ku Yerusaleme mu kembela Nzambi. (Bis. 8:27) Buna, muntu wa nsi yakaka wabâ, watambula tikulu tia Bayuda; yandi wayizi tambula nsambululu ya Bayuda. Ntembe kâni, yandi wayizi longoka mu Matsonoko ma santu ma Hebre ti Yehova kô kena. Kâ nsatu yayingi yabâ nandi mu longoka misamu miakaka. Mu ntangu yi kabwabana na Filipe mu nzila, Musi-Etiopi wo rulo ya Matsonoko ma mbikuri Izaya keri tangaka. (Bis. 8:28) Nsatu ya bâ nandi ya tatamana mu longoka. Yandi wasa nzietolo tûka ku Etiopi mu kwe sambila Yehova ku Tempelo ya ku Yerusaleme. Musi-Etiopi walongoka matieleka ma môna ma mfunu kwe Filipe. Yandi wayizi longoka mpe misamu mitariri Masiya. (Bis. 8:​34, 35) Luzolo lwandi mu Yehova na mu Mwana’andi lwayizi kula. Yandi wayizi bâ na timina dia bonga nzengolo ya mfunu ya batusu ngatu kabâ mulongoki wa Yezu Kristo. Filipe wamona ti muntu wo wa kubama wabâ; buna wamubatisa. w23.03 8-9 par. 3-6

Ka tulendi’â tatâ Yehova nsayi ko tala ti ka tutâka matieleka ko. (Bin. 6:​16, 17) Ni bu sa ti lumbu ti bantu babîngi bamonaka ti bungungu bwa mbote bwena, beto mabanza ma Yehova tulandaka. (Mik. 15:​1, 2) Wa matieleka, keba tusaka mu lembo tâ bungungu, kâ mpe keba tusaka mu lembo sweka misamu miakaka kwe bantu bafweti mia zaba ngatu ka bawunakanandi. Tufweti bika mpe mu zonzelaka bantu bakaka mu mpila ya mbi. (Bin. 25:23; 2 Tes. 3:11) Tala ti bakuri ti mu timoko ti luta sa lweka tola bantu mu mpila ya mbi, sobesa tio mu timoko tia mbote. Mu bungu ti mu nza yi tubâka bantu nzonzolo ya mbi ye nawu, tufweti sarila ngolo mu bâ na nzonzolo yitâka Yehova nsayi. Ngolo zi tusa mu sarila lenda dio mu mpila ya mbote mu tisalu tia samuna, ku tukutakanu na mu bimoko bieto kasakumuna. Yehova bu kakwizi fukisa nza yi ya mbi, musamu wa fioti wubâ mu mu kembela mu nzonzolo’eto.—Yude 15. w22.04 9 par. 18-20

Bu tubakulaka luzolo lwa Yehova na Yezu mu bungu dia beto, beto mpe bawu tukwizi zoloko. (1 Za 4:10) Luzolo lo ngolo lukwizi yikamaka bu tubakulaka ti Yezu wafwa mu bungu dia muna muntu mu beto. Ntumwa Paulo wabakula musamu wo, mpe watonda bu katsoneka kwe Bisi-Ngalate: “Mwana Nzambi [. . .] wakunzolo mpe watihana yandi beni mu bungu dia meno.” (Nga. 2:20) Mu nzila ya nkûlulu Yehova wakubenda kwe Yandi ngatu wabâ ndiku’andi. (Za 6:44) Ngano musamu wo ka wukuyangirikaka ko bu zebi ti Yehova wamona tima tia mbote mu nge, mpe wafuta ntalu yiyôkele ngatu wabâ ndiku’andi? Ngano musamu wo ka wuyikaka luzolo lwaku ngolo ko mu Yehova na mu Yezu? Musamu wa mbote wena mu tiyulaka tiyuvu eti: ‘Ngano luzolo lo nti lukuntumaka mu sa?’ Luzolo lweto mu Nzambi na mu Kristo beto lutumaka mu songela luzolo kwe bampwana’eto.—2 Kor. 5:​14, 15; 6:​1, 2. w23.01 28 par. 6-7

Bibila nguria mfunu diena mu kani dia Nzambi dia sa ti bisari biandi biamusarila mu tintwari. Yehova mbuka zazingi katsonekesa mu Bibila mu mpila yi lendi bakula kwa bantu ba kuluka. (Like 10:21) Mu mbuka zazansoni, bantu Bibila batangaka. Muntu wumosi wa mayela watâ ti Bibila “ka diena kwa buku di batomo tangaka mu mabuku mamansoni ko, kâ mpe buku di batomo tangaka na bunsungu bwabwansoni mu mabuku mamansoni.” Kâ, bantu ba kuluka kwa babakulaka dio, mpe basarilaka misamu mi ditâka. (2 Kor. 3:​15, 16) Bibila ndwenga za Yehova dimonekesaka. Yehova Bibila kasarilaka mu longesa kanda diandi diadiansoni, kâ mpe mu longesa na mu tindisa muna muntu mu beto. Bu tutangaka Zu dia Yehova tulendi mona ti muna muntu mu beto kakipaka. (Iza. 30:21) Ngano mbala zikwa watanga verse zi wamona ti ntiana nge kwa batsonekena zo? Bibila milio za bantu dibendaka. Bwe dilendi bêla na nsangu ze mfunu lumbu ti mpe zidelakane na nsatu zaku? Mu bungu ti Muntu we na ndwenga ziyôkele vwiri dio.—2 Tim. 3:​16, 17. w23.02 4-5 par. 8-10

Mu bungu ti Bakristo ba matieleka twena, Yehova Yandi tutomono zolo. Tuzololo ti tisalu tieto mu bungu dia Yandi tiabâ tia nguria tia mbote. Kâ, tala ti tuzololo tatomo sarila lenda dieto, tufweti bâ na makani ma timpeve ntiana kani dia kurisa bifu bia bukristo, longoka bisalu bie mfunu, na mu dinga mpila zi bakisila bampwana’aku. Mu bungu dia nti tufweti bâka na makani ma timpeve? Ntete, tuzololo tatâ nsayi kwe Tata’eto dia luzolo dia ku mazulu. Yehova nsayi yibâka nandi bu tusarilaka lenda dieto na misamu mi tuzebi mu tisalu tiandi. Mpe tuzololo tabâ na makani ma timpeve ngatu tabakisa mpangi zeto. (1 Tes. 4:​9, 10) Ni bu sa ti ntama tazabâ matieleka peleko kâni, beto bansoni tufweti bâ na makani ma timpeve. w22.04 22 par. 1-2

Ntamana bimfumu bia politike mbo bibalukila Babilone ya Yinene, wuzololo tâ mabundu mamansoni ma bungungu. (Nza. 17:16, 17) Musamu wo mbo wusongela mbatukulu ya mpasi ziyôkele. Ngano musamu wo mbo wusa ti bantu babîngi basarila Yehova? Kâni. Mu ntangu yo ya mpasi, Nzabukusu 6 yitusongele ti bô balembo sarilaka Yehova mbo badinga mu tikengerela mu binsamu bia politike na bia nkari bia nza yi, bi bafwanakasaka na miongo. Mu bungu ti bawu ka bayika Timfumu tia Nzambi moko ko, Yehova mbo kababongela ntiana mbeni zandi. (Like 11:23; Nza. 6:​15-17) Wa matieleka, mu ntangu ya mpasi ziyôkele bisari bia kwikama bia Yehova mbo bisongela ti bia swaswana biena. Bawu kaka kwa batatamana mu sarila Yehova mpe bakala mu yika moko kwe tibulu tia sangi.”—Nza. 13:​14-17. w22.05 16-17 par. 8-9

Kanda dia Nzambi ka diena kwa na tisalu tia zonzelaka “nsangu za mbote za Timfumu” ko. (Mat. 24:14) Bawu bafweti mpe yika moko mu tisalu tia bambazi ti bazonzelaka mu Nzabukusu 8 tii 10. Mbazi zo misamu mia mpasi mitûrila bantu balembo tambulaka Timfumu tia Nzambi zizonzelaka. Buna, Mbangi za Yehova nsangu za mfundusu zi bafwanakasaka na mvula ya matari mboko na tiya zisamunaka, zimonekesaka mfundusu za Nzambi kwe bima bia mbi bia nza yi ya Satana. (Nza. 8:​7, 13) Bantu bafweti zaba ti nsuka ka yisiri’â mala ko ngatu basa nsobolo za zinene mu luzingu lwawu, mpe bavuka mu tilumbu Yehova ti kabaka nkesi. (Sof. 2:​2, 3) Kâ, nsangu zo bantu babansoni ka batambulaka zo ko. Tufweti bâ na butindi mu samuna nsangu zo. Mu ntangu ya mpasi ziyôkele, nsangu za mfundusu za mansukina mbo zitomo bâ ngolo.—Nza. 16:21. w22.05 7 par. 18-19

Banza’eti Bakristo bata zolo bâ bibuti. Tûka mivu, kampe bayizi wirikila binzonzi biabingi bieri zonzelaka mpila yi basansilaka bala. Kâ bwawu bu, malongi mo mbo matomo bâ mfunu kwe bawu. Mwana wubâ nawu basansa. Diangana dema dia dinene diena! Wa matieleka, misamu bu misobaka mu luzingu lweto, mitieno miakaka mia Bibila nguria mfunu mikwizi bâka kwe beto. Ntiangu bisari bia Yehova bitangaka Bibila mpe bidimbitilaka dio ‘bilumbu biabiansoni’ ntiana bu batâ wo kwe mitinu mia ku Israele. (Lub. 17:19) Bibuti, bweso bwa bunene bwe neno bulendi bâ na Bakristo; bweso bwa longesa bala beno misamu mitariri Yehova. Kâ lufweti sa tima tiakaka kani lwasukisina kwa mu ba têla misamu mitariri Nzambi. Lufweti bakisa bala beno mu zolo Nzambi. w22.05 26 par. 2-3

Ka wufwanane ko kwa mu nionga nsalulu za masumu peleko masumu ma tasa, kâ tufweti bâka mpe na manzangu ma saka nzobolo. Musamu wa mfunu wu tomo talaka Yehova bu kabongaka nzengolo ya lemvokela ni vutuka. Vutuka wuzololo tâ “sa nsobolo.” Mu nzonzolo yakaka, muntu wufweti bika mu yirika misamu mia mbi, mpe wufweti diatila buna bu zololo Yehova. (Iz. 55:7) Yandi fweti soba mbanzulu zandi mu bika mbanzulu za Yehova zamutwarisa. (Rom. 12:2; Efz. 4:23) Yandi fweti losa mbanzulu na nsalulu zandi za mbi. (Kol. 3:​7-9) Kâ, ni timinu tieto mu mukayulu wa Kristo wusaka ti Yehova katulemvokela, mpe katutsemesa mu masumu meto. Mu nzila ya mukayulu wo Yehova mbo katulemvokela bu kamona ngolo zi tuta sarila mu soba ndiatulu’eto.—1 Za 1:7. w22.06 6 par. 16-17

Bantu, ba zabakana bena mu bungu dia mpasi zi bamwisasanaka bawu na bawu. (Ekl. 8:9) Mu tifwani, bantu lutumu lwawu basarilaka mu mpila ya mbi, bimpumbulu misamu mia miangu bayirikaka, bantu bakaka ku lukolo bampwana’awu bafingaka mpe basilaka miangu, bakaka mpe bantu ba kanda diawu babongelaka na miangu miamiansoni. Ka wena musamu wa nzitukulu ko mu mona bantu batînaka bampwana’awu! Bwe Satana kadingilaka mu baka ndandu mu bunkuta bubâka neto mu bantu? Satana bunkuta bubâka neto mu bantu kasarilaka mu yêla mu tu nata mu diata mitieno mia Yehova na mu bika mu samuna. Mu lutumu lwa Satana guvernema zayimina tisalu tieto mpe zatukwamisa. (Like 21:12) Mu nza ya Satana, bantu babingi bayalangasaka nsangu za mbi na za bungungu mu Mbangi za Yehova. Bantu bakwikilaka bungungu bo balendi tu sehesela peleko balendi tu nwanisa. (Mat. 10:36) Ngano mu nsalulu zo za Satana tuyitukuku? Na kani fioti, mu bungu ti za keri sarilaka mu mbandu ya ntete.—Bis. 5:​27, 28, 40. w22.06 16 par. 10-11

‘Nzanda bantu’ yi banata ku buderede ni banani? Ni bantu ba bavumbula kwe ba fwa, bô bavuka ku muzingu wa Armagedo na bala babansoni balendi butuka mu nza ya môna. Ku nsuka ya luyâlu lwa mvula 1000, bantu babansoni ha mutoto mbo babâ ba lunga. Tufweti bambukaka ti tala ti muntu wa lunga wena, ka wuzololo’â tâ ko ti fweti baka luzingu lwa mankululu. Banza’eti Adame na Eva. Bawu ba lunga babâ, kâ bafweti tumamana Yehova ntete bazinga mankululu. Kâ, musamu wa tiari, ka bamutumamana ko. (Rom. 5:12) Ku nsuka ya luyâlu lwa mvula 1000 babansoni mbo bakwizi bâ ba lunga. Ngano bantu bo ba lunga ntangu zazansoni mbo batomo singasa lutumu lwa Yehova? Peleko, ngano mbo babâ ntiana Adame na Eva—bayizi kolama ni bu sa ti ba lunga babâ? Biyuvu bio bafweti bia hanina mvutu. w22.09 22-23 par. 12-14

Ngano mpasi wubâka kwe nge mu bâ na mabanza ma mbote, bu mônaka misamu mia nza? Makanda ni ma mata mwangana. Miangu na bwimi ni yikama kwa bisimbiri. Babingi bamonaka mpasi mu kwikila bantu bê na timfumu. Kâ misamu mio milendi ku hana lukwikulu. Mu bungu dia nti? Mu bungu ti bantu ntiana bu tâka mbikululu yimosi ya nzitukulu yitariri ‘bilumbu bia mansukina’ bata diatila. (2 Tim. 3:​1-5) Ka kwena muntu wa nsungu ko wulendi kala ndungananu ya mbikululu yo, mpe ndungananu ya mbikululu yo yisongele ti Kristo wayika Mutinu mu Timfumu tia Nzambi. Kâ yo mbikululu yimosi kwa yena mu mbikululu zazingi zitariri Timfumu tia Nzambi. Mbikululu zazansoni za Yehova zikwelane ntiana kwa muntu wutungaka binkuti bu kavukasaka bitenda mu yirika tinkuti. w22.07 2 par. 1-2

Mu ntangu ya coronavirus, tayizi baka lutwalusu lwa delakana mu mpila ya silaka tukutakanu twa timvuka na ya samunina. Hô nkatika bendo, tayizi batika mu saka tukutakanu twa timvuka na tukutakanu twa tunene mu nzila ya vidéoconférence. Tayizi batika mpe mu yôkesaka ntangu yayingi mu samuna mu nzila ya mikanda na ya telefone. Yehova wasakumuni ngolo zeto. Filiale zazingi zahana rapore mu bungu dia lutangu lwa bisamuni lwakuriri. Diangana, bantu babingi bayizi mona misamu mitindisaka mu ntangu ya coronavirus. Kampe bantu bakaka babenzi ti organizasio ya Yehova yatomono yôkesa ndilu mu mpila yi basiriri keba mu ntangu ya coronavirus. Kâ ha manima, wayizi moneka ti lutwalusu lu tabakiri lwa ndwenga lwabêle. Mpe bu tudimbitilaka mu mpila Yezu yi katwarisilaka kanda diandi, lukwikulu lubâka neto ti musamu ni musamu wututûrila ku matu, Yehova na Mwana’andi wa luzolo mbo babâ neto.—Ebr. 13:​5, 6. w22.07 13 par. 15-16

Tufweti kembelaka Yehova mu tusambulu tweto, kâ mpe tufweti mu tondaka mu bungu dia bima bia toma bi katuhanaka. Mu tifwani, tulendi mu tonda mu bungu dia bifulu bia toma bie na couleurs za nzitukulu, bidia bia mpila na mpila bie na luwu lwalwingi, mpe mu bungu dia bindiku bie neto bitutâka nsayi. Tata’eto dia luzolo bima bio na biakaka katuhanaka ngatu tabâ mu nsayi. (Mik. 104:​12-15, 24) Musamu wuyôkele mfunu, ni mu tondaka Yehova mu bungu dia bima biabingi bia timpeve bi katuhanaka, na mu bungu dia tivuvu tia toma tie neto mu bungu dia bilumbu bita kwiza. Kampe ka wena mpasi ko mu zimbakana mu tonda Yehova mu miamiansoni mi kayirika mu bungu dia beto. Ngano nti bilendi mia ku bambula? Lendi tsoneka misamu mi walomba, mpe ha manima lendi kwe taluzuri bwe Yehova kata mia hanina mvutu. Ha manima sambila Yehova mu mu tonda mu bungu dia lubakusu lwandi.—Kol. 3:15. w22.07 22 par. 8-9

Tuzebi ti ka wufweni’â ko mu longoka kwa matieleka. Mu tomo baka ndandu, tufweti diatila mu matieleka, wuzololo tâ tufweti sarila mio mi tulongokaka. Ni mu mpila yo kwa matieleka matunatina nguria nsayi. (Zaki 1:25) Bwe tulendi bêla na lukwikulu ti mu matieleka tuta diatila? Mpangi yimosi yatêle ti tufweti titaluzula mu zaba misamu mi tulendaka mu yirika na mio mi tufweti sila nsobolo. Ntumwa Paulo watâ: “Ntono nsobolo zi tasiri, tatatamana mu diatila mu nzila yo mu mpila ya fwanana.” (Flp. 3:16) Banza’eti ndandu zi tubakaka bu tusarilaka ngolo mu diatila mu matieleka! Wa matieleka luzingu lweto tukwizi tomesaka, kâ mpe Yehova na mpangi zeto tutâka nsayi. (Bin. 27:11; 3 Za 4) Mio ni misamu mia nguri misaka ti tazolo matieleka, mpe tadiatila mu matieleka! w22.08 18-19 par. 16-18

Bwe bakuluntu balendi songela luzolo lwawu mu Yehova na Yezu? Mpila ya mfunu yi balendi lwa songela ni mu kipa bimeme bia Yezu. (1 Pi. 5:​1, 2) Musamu ni wo Yezu katâ kwe ntumwa Piere. Bu kamana kala Yezu nkumbu zitatu, kampe Piere watomo nionga bu kalembo songela luzolo lwandi mu Yezu. Ha manima ma mvumbukulu’andi, Yezu wayula tiyuvu eti kwe Piere: ‘Simo mwana Za, ngano me zololo?’ Tulendi bâ na lukwikulu ti Piere musamu ni musamu kaketi yirika mu songela luzolo lwandi kwe Mfumu’andi. Yezu watâ kwe Piere: ‘Dikila bimeme biani.’ (Za 21:​15-17) Ha manima, Piere watomo kipa bimeme bia Mfumu, mu songela luzolo lweri nandi mu Yezu. Bakuluntu bwe lulendi songela ti misamu mia tâ Yezu kwe Piere mfunu miena kwe beno, mpe ka luzimbakanaka mio ko? Lulendi songela luzolo lweno mu Yehova na Yezu bu lutomo tihana mu tisalu tia tindisaka bampangi, na bu lusarila ngolo zazingi mu bakisa mpangi za kota tiozi mu kâla kwe Yehova.—Ezk. 34:​11, 12. w23.01 29 par. 10-11

Sa keba mu banza ti ka kwena muntu ko wulendi bakula musamu wu ta telamana. Mbanzulu za mpila yo zilendi sa wabanza ti kwa lembo bâ tivuvumu bungu dia nge, mpe walembo bâ na lenda dia telamana nsatu za mbi. Bibila ka ditâka bo ko; kâ ditêle: “Kâ mu ntontolo mbo kakubika mpe ndukulu ngatu lwalenda mu korela.” Buna, nsatu ya mbi ni bu yibâ ngolo, lenda die neto mu telamana yo. Na lubakusu lwa Yehova, tulendi sarila ngolo mu lembo yirika misamu mia mbi. Ntangu zazansoni bambukaka ti bu we muntu wa masumu, kampe kubâ na lenda ko mu kabakasa nsatu zazansoni za mbi zikukârila. Kâ nsatu za mbi bu zitûlaka, lendi kulu za losa ntiana bwa sa Yozefe bu kadioka mukento wa Putifare. (Mba. 39:12) Ka wena na nsatu ko ya lungisa nsatu za mbi! w23.01 12-13 par. 16-17

Buderede tifu tiakaka tia nguri tia Yehova tiena. (Lub. 32:4) Muntu wusarilaka buderede ka bâka na tihambula ko, mpe Yehova kena na tihambula ko. (Bis. 10:​34, 35) Kondo kwa tihambula kwandi mu mazu ma batsonekena Bibila kumonekaka. Yehova wakanisina ti mu ntangu ya mansukina “luzabu lwa matieleka” me mu Bibila mbo lwaketi kwizi bâ lwa sampa. Bantu babingi baketi kwizi bakula matieleka ma Bibila. (Dan. 12:4) Luzabu lo lwayizi sampa mu bungu ti bayizi bangula, bayizi dukisa, mpe bayizi kaba Bibila na mabuku masikamanaka mu Bibila. Tii lumbu ti, kanda dia Yehova diabangula Bibila, dia mukaka peleko dia tibuku, mu mazu yôka 240, mpe muntu ni muntu lendi dia baka dia ofele. Buna, bantu ba nsi zazansoni batambulaka nsangu za mbote za Timfumu ntete nsuka yatûla. (Mat. 24:14) Nzambi’eto ya buderede zololo mu hana bweso kwe bantu babingi bwa mu zaba bu bakwe tangi Bibila. Mpila yo kasilaka mu bungu ti beto bansoni kazololo. w23.02 5 par. 11-12

Ngano buderede bwa zololo? Ntembe kâni bwa zololo. Kâ, beto bansoni bantu ba masumu twena, mpe tala ti ka tusiri’â keba ko, mpila yi bongelaka nza buderede yilendi kulu tu sobesa. (Iza. 5:20) Bu bazonzelaka muntu we na buderede, bantu babingi babanzaka ti ni muntu wuzebi miamiansoni, wufundisaka, peleko wubanzaka ti yôkele bantu babansoni. Kâ, Nzambi ka zololo’â bifu bia mpila yo ko. Yezu bu keri ha mutoto, watomo telamana mfumu za mabundu za mu ntangu’andi zeri hanaka misiku mia bawu beni mu musamu wutariri buderede. (Ekl. 7:16; Like 16:15) Muntu wuyirikaka misamu mi tâka Yehova nsayi, buderede bwe nandi mpe ka banzaka ko ti yôkele bampwana’andi. Buderede tifu tia mbote tiena. Wuzololo tâ, ni mu yirika misamu mia sungama ha meso ma Nzambi’eto Yehova. Mu Bibila, ntelo ya “buderede” tifu tia landa mitieno mia Yehova yizolo zonzelaka. w22.08 27 par. 3-5

Yezu lukwikulu lweri nandi mu milongoki miandi ntono makuba mawu. (Za 15:16) Mu ntangu Zaki na Za balomba tibuka tia mfunu kwe Yezu mu Timfumu, Yezu ka bâ na ntembe ko mu misamu mieri ba tumaka mu sarila Yehova, peleko ka balosa ko mu mu lembo vutu bâ bantumwa. (Mak. 10:​35-40) Ha manima, milongoki miandi miamiansoni miamuyambirika. (Mat. 26:56) Kani kabwe, Yezu ka bika ko mu ba sila lukwikulu. Yandi wazaba ti bantu ba masumu bena; kâ wabazolo tii ku nsuka. (Za 13:1) Bu kavumbuka kwe ba fwa, Yezu wahana kwe ntumwa zandi za 11 za kwikama dema dia dinene dia twarisa tisalu tia kubika milongoki na dia kipa bimeme biandi bia ntalu. (Mat. 28:​19, 20; Za 21:​15-17) Misamu mia mbote mieri mu tumaka mu tûla lukwikulu lwandi mu bantu bô ba masumu. Babansoni basala na kwikama kwakwansoni tii ku nsuka ya luzingu lwawu ha mutoto. Diangna, Yezu wahana tifwani tia mbote tia kwikila bantu babâ na masumu. w22.09 6 par. 12

Bu tubâka na lukwikulu ti Yehova beto kazololo—ni ke na beto—Tulendi nunga ngolo zi sarilaka Satana mu tutâ bunkuta. Mu tifwani, titsoniki tia Mikunga 118 tiabwabana na misamu mia nguria mia mpasi. Mbeni zazingi zeri nandi, mu kati na bantu ba nsangu (verse 9, 10). Ntangu zakaka, tiya twatwingi beri mu saka (verse 13). Yandi wabaka mpe nsembolo ya ngolo yatûka kwe Yehova (verse 18). Kâ titsoniki tia Mikunga tiatanga: ‘Meno ka nibâ na bunkuta ko.’ Yandi wazaba ti ni bu sa ti Yehova wamusemba, Yandi keri zoloko. Yandi lukwikulu lweri nandi ti mu musamu ni musamu waketi mu tûrila, Nzambi’andi ya luzolo mbo yaketi mu bakisa. (Mik. 118:29) Tufweti bâ na lukwikulu ti Yehova muna muntu mu beto kazololo. Lukwikulu lo mbo lutubakisa mu telamana misamu mitatu mitutâka bunkuta: 1) bunkuta bwa lembo bâ na lenda dia kipa kanda dieto, 2) bunkuta bwa bantu, na 3) bunkuta bwa lufwa. w22.06 15 par. 3-4

Tufweti sa ti nsambululu ya Yehova yabâ ha tibuka tia ntete mu luzingu. Bu ke Mvangi’eto, ni Yehova fwanane mu baka nsambululu’eto. (Nza. 4:11; 14:​6, 7) Buna, nsambululu yi tumusilaka yifweti bâ ha tibuka tia ntete, mpe tufweti ya mu sila mu mpila yi kazololo, ‘mu mpeve na mu butieleka.’ (Za 4:​23, 24) Tuzololo ti mpeve santu ya Nzambi yatwarisa nsambululu’eto ngatu yabâ tintwari na matieleka ma tubakaka mu Zu diandi. Nsambululu’eto yifweti bâ ha tibuka tia ntete ni bu sa ti ku hata di balembo tomo haninaka tisalu tieto nzila tubâka, peleko ku hata di bayiminaka tio. Bwawu bu, mpangi yôka 100 ze ku boloko mu bungu ti Mbangi za Yehova zena. Ntono musamu wo, na nsayi yayansoni ngolo zawu zazansoni basarilaka mu sambila, mu longoka na mu zonzela Nzambi na Timfumu tiandi kwe bantu. Bu batuyiminaka peleko bu batukwamisaka, tulendi bâ mu nsayi mu bungu ti tuzebi ti Yehova na beto kena, mpe mbo katusenda.—1 Pi. 4:14. w22.10 9 par. 13

Mu mukanda wa Bingana, Yehova malongi kahanaka ma lembo wâka mfunu, mpe matomesaka luzingu lweto tala ti tusariri mo. Tataluzula bifwani biole bitariri malongi mo ma ndwenga. Ntete, yangalala mu bio bie naku. Bingana 23:​4, 5 malongi ema yihanaka: ‘Kufwilandi kwa mu baka timvwama. [. . .] Mu mbwetolo meso, ka tisiri’â hô ko. Mu bungu ti tizebi tihana mahayi! Ntiana bu pulumukaka mbemba, mbo tipulumuka ku zulu.’ Kâ, lumbu ti bamvwama na bamputu mbongo zazingi badingaka mu baka. Vula-vula, nsatu mbongo yo bawu yinataka mu diatila mu mpila yibebesaka nkumbu’awu, bindiku biawu na tikolela tiawu. (Bin. 28:20; 1 Tim. 6:​9, 10) Musamu wa nzole, banza ntete wazonza. Tala ti kusiri’â keba ko, lendi mwisa bantu mpasi zazingi mu nzonzolo’aku. Bingana 12:18 yitêle: “Misamu mi balembo banzaka miena ntiana bu bawindaka mbele, kâ ludimi lwa bankwa ndwenga mbo luwasisaka.”—Bin. 12:​18, NWT. w22.10 21 par. 14; 22 par. 16-17

Ezekiele wafweti tomo bakula nsangu zi kaketi samuna. Yandi wafweti bâ na lukwikulu mu nsangu zo mu baka ngolo za samuna. Ha manima, tima tia nzitukulu tiayilama. Ezekiele wabakula ti rulo luwu yabâ ntiana kwa ‘mafuta ma niosi’ (miel). (Ezk. 3:3) Mu bungu dia nti? Kwe Ezekiele, bweso bwa monekesa Yehova, musamu wa mbote wabâ. (Mik. 19:​8-11) Yandi watonda Yehova bu kasa ti kabâ mbikuri’andi. Ha manima, Yehova watêla Ezekiele: ‘Tambula mu mutima’aku mpe wâ mu makutu maku misamu miamiansoni mi nita ku têla.’ (Ezk. 3:10) Yehova watuma Ezekiele mu sa nsimu mu misamu miatsonama mu rulo, mpe kadimbitila mio. Ezekiele bu kasila bo, timinu tiandi tiayizi yikama ngolo. Buna, wabaka mpe nsangu za ngolo zi kaketi samuna kwe bantu. (Ezk. 3:11) Na nsangu za Nzambi mu mutima’andi na mu bikoba biandi, Ezekiele wa kubama weri mu tambula dema diandi na mu lungisa dio. w22.11 6 par. 12-14

Tala ti nsobolo za organizasio zikotese kwikama kwaku mu ntontolo, nti fweti sa? Tomo singasa nzobolo za organizasio. Mu nzietolo’awu ku sese, bala ba Kehate bakaka bafweti nata nkela ya luwawanu (arche de l’alliance) ku matu ma kanda diadiansoni. (Lut. 3:​29, 31; 10:33; Yos. 3:​2-4) Diangana bweso bwa bunene bwabâ! Kâ, misamu miayizi soba kwe bawu, bala ba Israele bu bayizi kota ku Mutoto wa Kani. Ka wavutu’â sâla mfunu ko mu sobaka mbuka yeri bâka nkela. Buna, bala ba Kehate bayizi ba tûla mu bisalu biakaka. (1 Nta. 6:​31-33; 26:​1, 24) Ka kwena musamu ko wusongelaka ti bala ba Kehate banionga peleko badinga mu sala tisalu tia mfunu mu bungu ti dema dia mfunu beri nataka mu ntama. Ntia malongi tuta baka? Mu mutima wawansoni, singasa nsobolo zi saka organizasio ya Yehova, ni bu sa ti tisalu tiaku zitarilaka. Mona nsayi mu tisalu ni tisalu ti bakuhanaka. Bambukaka ti ka tisalu tiaku’â ko tisaka ti wabâ ntalu kwe Yehova. Kwe Yehova lutumamanu lwaku luyôkele mfunu, ka madema ko. w22.11 23 par. 10-11

Onezifore wadinga ntumwa Paulo mpe bu kamumona, yandi wadinga mpila zi kaketi mu bakisila. Bu kasila bo, Onezifore wayizi tûla luzingu lwandi mu mpasi. Ntia malongi tuta baka? Ka tufweti’â tabika bantu ko batutâ bunkuta mpe batukabakasa mu bakisa mpangi zeto ze mu nkwamusu. Tabanwanina mpe tababakisa. (Bin. 17:17) Nsatu luzolo lweto ye nawu na lubakusu lweto. Taleno bwe mpangi ze ku Russie zayizi bakisila mpangi zawu ze ku boloko. Mu ntangu yi bafundisaka bakaka, mpangi zazingi zikwizaka ku nzo ya mfundusu mu ba yika moko. Ntia malongi tuta baka? Bu bahunisinaka mpangi ze na madema misamu, bu babakangaka peleko bu babakwamisaka, ka tubâkandi na bunkuta. Sambilaka mu bungu dia bawu, kipaka kanda diawu, mpe dinga mpila zakaka zi lendi ba hanina lubakusu.—Bis. 12: 5; 2 Kor. 1:​10, 11. w22.11 17 par. 11-12

Bakuluntu dema die nawu dia tindisa bampangi mu nzila ya Bibila na mu bakisa bô bê na lwaka. (1 Pi. 5:2) Bu kubâka katastrofe, bakuluntu bafweti toko dinga mu zaba tala ti muna mpangi ha mbuka ya mbote yena mpe tala ti bima bia dia bie, binkuti na tibuka tia bwila tolo bie nandi. Kâ ha manima ma ngonda zazingi, kampe bampangi mbo babâ na nsatu lubakusu lwa timpeve na ya lutindusu. (Za 21:15) Harold, we mu Komite ya filiale mpe wayizi bwabana na mpangi zazingi zabwila katastrofe, têle: “Ntangu yifwanane mu vutu baka ngolo. Bawu balendi kwizi batika mu kârila luzingu lwawu ntiana mu ntama, kâ balendi tatamana mu bambukila muntu wu bahombese, fwa dia ntalu peleko mpasi zi bamona. Mbambukulu ya misamu mia mpila yo yilendi vutu ba kotesa mu tiari. Ka kwena kondo kwa timinu ko, kâ nitu ya muntu wa sungama yisarilaka bo.” Bakuluntu sarilakeno malongi ma: “Dileno na bo bata dila.”—Rom. 12:15. w22.12 22 par. 1; 24-25 par. 10-11

Yehova na nsayi yayansoni katuhanaka mpeve santu ngatu talenda mu nunga mpaka zi tunwanaka mu yirika misamu mia mbote. Bu tulongokaka Zu dia Nzambi, mpeve santu tubikaka yatutwarisa. Mpeve santu mpe tubakaka bu tukwendaka ku tukutakanu. Ku tukutakanu to twa Bakristo, tulendi kwizi yôkesa ntangu na mpangi zeto zisarilaka ngolo mu yirika misamu mia mbote, ntiana kwa beto; butindi tubakaka. (Ebr. 10:​24, 25; 13:7) Bu tupusanaka kwe Yehova mu lusambulu lwa bunsungu mpe bu tumulombaka katubakisa mu telamana tifu tia mbi, mpeve santu katuhanaka yituyikaka ngolo ngatu tatatamana mu nwana. Ni bu sa ti misamu mio ka mikatula nsatu zeto za mbi ko, beto mibakisa mu lembo dinga mu lungisa zo. Bu tumana kwizi bâ na programe ya mbote ya misamu mia timpeve, mbo wubâ musamu wa mbote mu tatamana mu landa yo na mu tatamana mu bâ na nsatu za mbote. w23.01 11 par. 13-14

Ni bu sa ti Bibila ka diena buku ko dizonzelaka bwe tufweti kipila tikolela tieto mpe nti tufweti dia, mabanza ma Yehova mu misamu mio dituzonzelaka. Mu tifwani, Yehova beto katindisaka mu losa misamu mia mbi milendi bebesa nitu’eto. (Ekl. 11:10) Bundiafu bwa dila na bwa nwina bulendi nata ku lufwa, mpe bifu bio bia kayimina. (Bin. 23:20) Yehova zololo ti tasarilaka tifu tia tiyimina bu tubongaka nzengolo ya zaba nti, mpe bwe tudila peleko tunwina. (1 Kor. 9:25) Tulendi bonga nzengolo ya songela ti matondo tuvutulaka mu kabu dia luzingu dia tu hana Nzambi, bu tusarila lenda dieto dia banza. (Mik. 119:​99, 100; Bin. 2:11) Mu tifwani, nsololo za mbote tusaka mu bima bi tudiaka. Tala ti bidia bie kô tuzololo, kâ tuzebi ti timbevo bitutâka, mabanza ma delakana mbo matutuma mu lembo vutu bia dia. Mabanza ma delakana mabâka neto bu tubwaka tolo twa fwanana, bu tuvulu saka sport, bu tutatamanaka mu kipa nitu’eto, na bu tukipaka nzo’eto. w23.02 21 par. 6-7

Bwe lendi bakila bimvwama bia timpeve bu tangaka Bibila? Tataleno mio mi tâka 2 Timote 3:​16, 17. Verse yitêle: “Miamiansoni miatsonoko [. . .] salu [.  .  .] miena’ 1) mu longesa, 2) mu semba, 3) mu sungika na 4) mu longa. Lendi baka ndandu mu mpila zo za ziyà ni bu sa ti mabuku ma Bibila ma lembo vulu sarilaka ta tanga. Tomo taluzula tinsamu mu mona nti tita ku longesa mu Yehova, mu makani mandi, peleko mu mitieno mia Nzambi. Tala bwe tie mfunu mu semba. Mu sila bo, tala bwe verse zita ku bakisila mu mona na mu katula bifu bia mbi, na mu tatamana mu bâ wa kwikama kwe Yehova. Tala bwe lendi sarila verse mu sungika mabanza ma tengama, kampe mabanza ma zonzele muntu mu tisalu tia samuna. Mu verse zi tengi, dinga malongi malendi ku bakisa mu bâ na mabanza ma Yehova. Bu bâ na mabanza mô ma mayà mu mutu, mbo baka bimvwama bia timpeve bilendi ku bakisa mu baka ndandu mu ntangulu’aku ya Bibila. w23.02 11 par. 11

Mbikululu ye mu buku dia Daniele yatâ ti Yezu mbo kaketi bâ Mutinu wa Timfumu ku nsuka ya ntangu 7. Ngano tulendi zaba ntangu Yezu yi kayizi bâ Mutinu? (Dan. 4:​10-17) “Ntangu nsambwari” mivu 2 520 zimonekesaka. Ntangu yo yabatika mu 607 N.M.B., Bisi-Babilone bu bakatula mutinu wa mansukina weri monekesaka lutumu lwa Yehova ku Yerusaleme. Ntangu yo yayizi suka mu 1914 M.B., Yehova bu katumba Yezu Mutinu wa Timfumu tia Nzambi, yandi we na nswa wa delakana. (Ezk. 21:​25-27) Ntia ndandu tulendi baka mu mbikululu yo? Tala ti tubakuri mbikululu ya ntangu 7, lukwikulu lukwizi bâ neto ti Yehova makani mandi kalungisaka mu ntangu yifwanane. Yehova wabonga nzengolo yatûla Yezu Mutinu mu ntangu yi kawaya, mpe ntangu yîna bu yatûla, Yandi wayirika wo; buna tuzebi ti Yehova mbo kalungisa makani mandi makaka mu ntangu yi kawaya. Yee diangana, tilumbu tia Yehova ka tilandila ko!—Hab. 2:3. w22.07 3 par. 3-5