Bwe Yezu katuvukisila?
Mvutu ya Bibila
Yezu wavukisa bantu ba kwikama bu kahana luzingu lwandi mu nkûlulu. (Matie 20:28) Ntiangu Bibila dimutâka “Muvukisi wa nza.” (1 Za 4:14) Bibila ditêle mpe ti: “Ka kwena mvukulu ko mu muntu wakaka, mu bungu ti ka kwena nkumbu yakaka ko ku nsi’a zulu yi bahana kwe bantu yitufweti bakila mvukulu.”—Bisalu 4:12.
Yezu ‘wabimba lufwa’ mu bungu dia bô babansoni basarila timinu mu yandi. (Bahebre 2:9; Za 3:16) Ha manina, “Nzambi wamuvumbula kwe ba fwa,” mpe Yezu wakâla ku zulu ntiana tivangu tia timpeve. (Bisalu 3:15) Kûna, Yezu lenda die nandi “dia tomo vukisa bô bapusanaka kwe Nzambi mu nzila ya yandi, mu bungu ti ntangu zazansoni wa moyo kwa wena mu ba zonzela.”—Bahebre 7:25.
Mu bungu dia nti twena na nsatu ti Yezu katuzonzela?
Beto bansoni bankwa masumu twena. (Bisi-Rome 3:23) Masumu tikaku masaka ha kati dia beto na Nzambi, mpe ku lufwa matunataka. (Bisi-Rome 6:23) Kâ Yezu “nzonzi” yena kwe bô basarilaka timinu mu mukayulu’andi ngatu bavuka. (1 Za 2:1, note) Bawu kazonzelaka, kwe Nzambi kalombaka kawâ tusambululu twawu na mu lemvokela masumu mawu mu nzila ya mukayulu’andi. (Matie 1:21; Bisi-Rome 8:34) Nzambi ndombolo zo kahaninaka mvutu mu bungu ti tintwari ze na luzolo lwandi. Nzambi watambika Yezu ha mutoto “ngatu nza yavuka mu nzila ya yandi.”—Za 3:17.
Ngano wufweni mu kwikila mu Yezu mu vuka?
Kâni. Diangana, kwikila mu Yezu mfunu kwena mu vuka, kâ ka wufweni’â ko. (Bisalu 16:30, 31) Bibila ditêle ti: “Ntiana kwa nitu yilembolo na mpeve yafwa yena, mpila mosi mpe timinu tilembolo na nsalulu tiafwa tiena.” (Zaki 2:26) Mu mvuka, tufweti:
Longoka mu zaba Yezu na Tata’andi Yehova.—Za 17:3.
Songela timinu tieto bu tukwe tumamane ntumunu zawu. (Like 6:46; 1 Za 2:17) Yezu walongesa ti ka bô babansoni’â ko bamutâka “Mfumu” bakwizi vuka, kâ “bô kwa basarilaka luzolo lwa Tata’andi we ku zulu.”—Matie 7:21.
Tatamana mu songela timinu ntono nkwamusu. Yezu watomo songela musamu wo bu katâ: “Wo korela tii ku nsuka mbo kavuka.”—Matie 24:13.