Kani kabwe ka twena beto kaka ko

1-2. a) Mu bungu dia nti tulendi tâ ti ka tubâka beto kaka ko bu tubwabanaka na mpasi? b) Nti tuzonzela mu timoko ti?

MU NTANGU yi tubwabanaka na mpasi za ngolo, tulendi banza ti beto kaka kwa twena, mpe bu tutuba mamba ku manima, muntu kâni yaka mo. Kâ, ka twena beto kaka ko. Tata’eto die ku zulu mpasi zeto za kamonaka mpe tu kanisini ti mbo katubakisa mu telamana zo. Yehova tu kanisini na luzolo lwalwansoni: “Mbo nikubakisa.”—Iza. 41:​10, NWT.

² Timoko ti mbo titusongela bwe Yehova katubakisilaka 1) bu katutwarisaka, 2) bu kakipaka nsatu zeto, 3) bu katukengerelaka, mpe 4) bu katutindisaka. Yehova tu heni lukwikulu ti misamu ni misamu mituturila mu luzingu, kani kabwe yandi ka tu zimbakana ko. Kani kabwe ka tu yambirika ko. Buna ka tusa bâ beto kaka ko.

YEHOVA BETO KATWARISAKA

3-4. Bwe Yehova katutwarisilaka? (Mikunga 48:14)

³ Tanga Mikunga 48:14. Yehova ka kêlaka ko ti tatitwarisa beto beni. Bwe katwarisilaka bisari biandi bia kwikama lumbu ti? Mpila yimosi yi kasarilaka ni Bibila. (Mik. 119:105) Mu nzila ya Zu diandi, Yehova mbo katubakisaka mu bonga nzengolo za mbote na mu kurisa bifu bia mbote bitubakisa lumbu ti mu bâ na luzingu lwa mbote, na mu baka luzingu lwa mankululu mu bilumbu bita kwiza.a Mu tifwani, mbo katulongesaka mu lemvokela bantu bakaka na mu lembo lunda nkesi mu bawu, mu bâ na bunsungu mu misamu miamiansoni, na mu zolo bampangi mu mutima’eto wawansoni. (Mik. 37:8; Ebr. 13:18; 1 Pi. 1:22) Bu tusongelaka bifu bio bia mbote, mbo tukwizi bâka bibuti bia mbote, bakala peleko mukento wa mbote, na ndiku ya mbote.

⁴ Mu Zu diandi Yehova watûla binsamu bia bantu babwabana na misamu, mpe beri na mabanza ntiana ma beto. (1 Kor. 10:13; Zaki 5:17) Bu tutangaka binsamu bio mpe bu tulandaka bifwani biawu, mbo tubakilaka bio ndandu mu mpila zole. Ntete, mbo tubakula ti ka beto kaka ko tuta bwabana na mpasi za luzingu. Bantu bakaka mpe babwabana na mpasi za mpila yo, mpe balenda mu telamana zo na lubakusu lwa Yehova. (1 Pi. 5:9) Wa nzole, mbo tulongoka mu telamana mpasi zeto.—Rom. 15:4.

5. Yehova nani kasarilaka mu tu twarisa mu nzila ya luzingu?

⁵ Yehova wakubika mpe misamu ngatu bisari biandi biakaka biatutwarisa.b Mu tifwani, minkengi mia bizunga mbo mikwe tari bimvuka ntangu zazansoni mu tu tindisa. Binzonzi biawu mbo bikurisaka timinu tieto mpe mbo bitubakisaka mu kengerela bumosi bweto. (Bis. 15:40–16:5) Bakuluntu mbo basarilaka ngolo mu bakisa bampangi mu tatamana mu bâ penepene na Yehova. (1 Pi. 5:​2, 3) Bibuti mbo bibakisaka bala bawu mu zolo Yehova, mu bonga nzengolo za ndwenga na mu bâ na luzingu lwa mbote. (Bin. 22:6) Mpe Bakristo ba bakento ba yela mbo babakisaka batwenia ba bakento mu tifwani tiawu, mu malongi mawu ma mbote, na mu lutindusu lu babahanaka.—Tite 2:​3-5.

6. Nti tufweti sa mu bakila lutwalusu lwa Yehova ndandu?

⁶ Yehova wasa miamiansoni mu tu hana lutwalusu lwe neto nsatu. Bwe tulendi songela ti yangalala tuyangalalaka mu mio mi kasaka mu bungu dia beto? Bingana 3:​5, 6 (NWT) yitêle: “Tûla lukwikulu lwaku mu Yehova mu mutima’aku wawansoni mpe kusikirilandi mayela maku.” Tamana sila bo, “mbo kasungika nzila [zeto],” wuzololo tâ, mbo katubakisa mu dioka misamu miamingi na mu bâ na luzingu lwa mbote. Mbo tutomo tondaka Yehova mu malongi ma katuhanaka ma luzolo na matu delakane!—Mik. 32:8.

YEHOVA NSATU ZETO KAKIPAKA

7. Mu ntia mpila Yehova kalungisilaka nsatu zeto? (Bisi-Filipe 4:19)

⁷ Tanga Bisi-Filipe 4:19. Yehova ka sukinaka ko kwa mu tu twarisa, mbo kasakumunaka ngolo zi tusarilaka mu baka tima tia dia, binkuti, na mbuka ya bêla. (Mat. 6:33; 2 Tes. 3:12) Ni bu sa ti ka wena musamu wa mbi ko mu bâ na lwaka mu bungu dia nsatu zeto za tinsuni, Yehova mbo katutindisaka mu lembo bâ na lwaka lwa yôka mu bungu dia musamu wo. (Tala mpe note ya Matie 6:25.) Mu bungu dia nti? Mu bungu ti kani kabwe Tata’eto ka yambirika bisari biandi bia kwikama ko. (Mat. 6:8; Ebr. 13:5) Tulendi mu kwikila bu katâ ti mbo kakipa nsatu zeto.

8. Yehova nti kasa mu bungu dia Davide?

⁸ Tataleno bwe Yehova kabakisila Davide. Mu mivu mia mpasi Davide mi keri kwe dioke Sawule, Yehova wamuhana yandi na bantu bandi bima bieri nawu nsatu mu bâ ba moyo. Davide bu keri banzaka bwe Yehova keri mu bakisilaka mu ntangu yîna, yandi watâ: ‘Bu ndieri ntwenia, bwawu bu nunini, ka namweni’â muntu wa sungama ko wu bayambirikiri, peleko bala bandi bata yinga dimpa.’ (Mik. 37:25) Kampe mu luzingu lwaku, wayizi mona mu ntia mpila Yehova kakipilaka na luzolo lwalwansoni nsatu za bisari biandi bia kwikama.

9. Lumbu ti bwe Yehova kalungisilaka nsatu za bisari biandi mu ntangu ya katastrofe? (Tala mpe bifwani.)

⁹ Yehova mbo kakipaka mpe nsatu za bisari biandi mu ntangu ya katastrofe. Mu tifwani, mu ntangu nsatu ya ngolo yatulumuka mu mbandu ya ntete, Bakristo ba ku nsi za swaswana batambika bima kwe bampangi beri na nsatu lubakusu. (Bis. 11:​27-30; Rom. 15:​25, 26) Kanda dia Yehova ni bo mpe disarilaka lumbu ti. Mu ntangu katastrofe bu yi bwaka, Yehova mbo kasaka ti kanda diandi diahana na luzolo lwalwansoni bima bia mfunu ntiana bidia, mamba, binkuti mpe na bilongo ku mbuka zibwiriri katastrofe. Bampangi basalaka tisalu tia ntungulu mbo batungaka Nzo za Nsambululu na nzo za bampangi zimwangane. Bisari bia Yehova bia kubama bibâka mu hana mbombolo na lutindusu mu nzila ya Bibila kwe bô bahombese nzo na bantu ba bazololo.c

10-11. Nti tuta longoka mu tifawni tia Borys?

¹⁰ Yehova na nsayi mpe kalungisaka nsatu za bô balembo mu sarilaka. Beto mpe, mbo tudingaka mpila za songela nsayi kwe bô balembo sarilaka Yehova. (Nga. 6:10) Musamu wo timbangi tia mbote wuvulu hanaka. Tataleno tifwani tia Borys bâka ku Ukraine we directeur ya lukolo. Ni bu sa ti Borys kena Mbangi ya Yehova ko, na nsayi keri bongelaka bala ba lukolo beri Mbangi za Yehova, mpe mbo keri zitisaka nkwikulu zawu. Mu ntangu Borys yi kabonga nzengolo ya dioka muzingu weri ku mbuka yi keri bêlaka mu kwenda ku nsi ya dzuna, mpangi zeto za mu bakisa. Ha manima, Borys wayiza ku Mbambukulu ya lufwa lwa Yezu. Bu kadimbitila mu misamu mi kabwabana na mio, Borys têle: “Mbangi za Yehova zakumbelokela lwaka mpe zatomo kunkipa. Mbo ni tomo batondaka.”

¹¹ Beto mpe tulendi landa tifwani tia Tata’eto we na tiari tia mutima, bu tusongela luzolo kwe bantu bê na nsatu lubakusu ni bu sa ti ka batambulaka nkwikulu zeto ko. (Like 6:​31, 36) Tivuvu tie neto ti ngolo zi tusaka mu songela luzolo kwe bantu mbo zibabakisa mu kwizi bâ milongoki mia Yezu. (1 Pi. 2:12) Ni bu sa ti bizi bâ Mbangi za Yehova peleko kâni, mbo tubâ na nsayi, mu bungu ti kaba kuyôkele nsayi na baka.—Bis. 20:35.

YEHOVA BETO KAKENGERELAKA

12. Bwe Yehova kakwizi kengerela kanda diandi? (Mikunga 91:​1, 2, 14)

¹² Tanga Mikunga 91:​1, 2, 14. Lumbu ti, Yehova kanisini ti mbo kakengerela kanda diandi mu mio milendi bebesa tindiku tiawu na yandi. Kani kabwe ka bîka ko ti Satana kabebesa nsambululu ya verela (Za 17:15) Mpe mu ntangu ya “mpasi ziyôkele” tulendi bâ na lukwikulu ti Yehova mbo kalungisa kani diandi dia tu bakisa mu lunda timinu tia ngolo na mu tu vukisa.—Nza. 7:​9, 14.

13. Bwe Yehova kakengerelaka muna muntu mu beto?

¹³ Bwe Yehova kakengerelaka muna muntu mu beto? Mu nzila ya Matsonoko Yehova mbo katubakisaka mu swasikisa mbi na mbote. (Ebr. 5:14) Bu tusarilaka mio mi tulongokaka mu Bibila, mbo tukengerelaka tindiku tieto na Yehova, mpe mbo tubongaka nzengolo zitubakisaka mu bâ na luzingu lwa nkatika lwa mbote na lwa toma. (Mik. 91:4) Yehova mbo katukengerelaka mpe mu nzila ya timvuka. (Iza. 32:​1, 2) Bu tuyôkesaka ntangu na bantu bazololo Yehova na balandaka mitieno miandi, ngolo na lutindusu tubakaka mu telamana misamu mia mbi.—Bin. 13:20.

14. a) Mu bungu dia nti Yehova ka lembo tu kengerelaka mu mpasi zazansoni? b) Ntia lukwikulu Mikunga 9:10 yita tu hana? (Tala mpe note.)

¹⁴ Mu ntama, ntangu zakaka Yehova bisari biandi keri kengerelaka ngatu balembo lwala peleko balembo fwa. Kâ, ntangu zazansoni ka silaka bo ko. Ntangu zakaka mbo tubwabanaka na misamu mi tulembo kekoloko. (Ekl. 9:11) Kampe, Yehova wabika ti bamwisa bisari biandi mpasi, mpe babahonda mu songala ti Satana ngungu yena. (Yobe 2:​4-6; Mat. 23:34) Mpila mosi mpe na lumbu ti. Ni bu sa ti Yehova ka katulaka mpasi zeto ko, tulendi bâ na lukwikulu ti kani kabwe ka yambirika bô bamuzololo ko.d—Mik. 9:10.

YEHOVA BETO KATINDISAKA

15. Bwe lusambulu, Bibila, na bampangi batutindisilaka? (2 Bisi-Korente 1:​3, 4)

¹⁵ Tanga 2 Bisi-Korente 1:​3, 4. Ntangu zakaka, mu tiari, mu lwaka, na mu bukaka tubâka. Kampe mbo ta bwabana na misamu mita sa ti wabâ mu bukaka. Ngano muntu we kô wuta bakula misamu mita mona? Yee, Yehova mia kata bakula. Yehova mpasi zeto kabakulaka, kâ mpe “mbo katubombaka mu ntontolo za mpila na mpila.” Mu ntia mpila? Mu ntangu yi tulemberelaka Yehova mu lusambulu, mbo katuhanaka “tidzunu tia Nzambi tiyôkele mabanza mamansoni.” (Flp. 4:​6, 7, NWT) Mbo tubakaka mpe ngolo bu tutangaka misamu mi tu têlaka Yehova mu Bibila. Mu nzila ya Bibila Yehova mbo katutêleka mu ntia mpila katuzololo, mbo katulongesaka mu bâ na ndwenga, mpe tivuvu katuhanaka. Tukutakanu ngolo tu tu hanaka, na bampangi bê na nsayi ba tu tindisaka mu nzila ya Bibila.

16. Nti tuta longoka mu tifwani tia Nathan na Priscilla?

¹⁶ Mu bakula bwe Yehova kahaninaka ngolo na lutindusu mu nzila ya Zu diandi, tataluzuleno tifwani tia Nathan na Priscilla babâka ku États-Unis. Babonga nzengolo ya kwe bâ ku mbuka yeri na nsatu bisamuni bia Timfumu. Nathan têle: “Lukwikulu lweri neto ti Yehova mbo kaketi sakumuna ngolo zeto.” Kâ, bu batula kûna bayizi bwabana na bimbevo, mpe ka beri’â bakaka tisalu ko mu lungisa nsatu zawu. Buna wafwanana bakâla ku mbuka yi beri bâka, mpe batatamana mu bâ na mbaya. Nathan têle: “Mbo ndieri tiyulaka mu bungu dia nti Nzambi kalembo tu sakumuna buna bu tweri bwa banzilaka.” Nathan vutulu tâ: “Nayizi batika mpe mu tiyula tala ti disumu nasa.” Ntangu bu yeri kwe yôke, Nathan na Priscilla bayizi bakula ti Nzambi ka bayambirika ko mu ntangu yo ya mpasi. Nathan têle: “Mu ntangu yo ya mpasi, Bibila diayizi bâ ntiana ndiku yeri na ndwenga yeri tu hanaka lutindusu na malongi. Bu tatûla mabanza meto mu mpila Yehova yi katubakisila mu korela, kani tatûla mo mu mpasi zeto, tayizi bâ ba kubama mu telamana mpasi zi tûla ku matu na timinu tiatiansoni.”

17. Bwe mpangi yimosi ya yikento ye na nkumbu Helga yabakila lutindusu? (Tala mpe tifwani.)

¹⁷ Mpangi zeto mpe zilendi tu tindisa. Mu ntia mpila? Tabongeno tifwani tia Helga bâka ku Hongrie. Tûka mivu miamingi wayizi bwabana na misamu mia sa ti kabâ mu lwaka mpe kabanza ti kena salu ko. Bu kabanzaka ntangu yo, mbo kabakulaka ti Yehova wasarila bampangi mu timvuka mu mu tindisa. Têle: “Yehova bakisa keri kumbakisaka bu ndieri lembo vutu sâlaka na ngolo mu bungu dia tisalu tiani, mu bungu dia mwana’ani weri na malari wu ndieri kipaka, na mu bungu dia misamu miakaka. Ka kweri’â na kani tilumbu ko tûka mvula 30 Yehova kalembo lungisa kani diandi dia kuntindisa. Mbo kavulu kundiyikaka ngolo mu nzila ya bampangi bakunzonzelaka mu mpila yi tindisaka. Mikanda nivulu bakaka mi tindisaka mu ntangu yi nibâka na mio nsatu.”

18. Bwe tulendi tindisila bantu bakaka?

¹⁸ Bweso bwe neto bwa landa tifwani tia Nzambi’eto bu tutindisa bantu bakaka. Bwe tulendi bwa sila? Tulendi tomo bawirikila, tulendi bazonzela mu mpila yi bombaka, mpe tulendi bahana lubakusu lwe nawu nsatu. (Bin. 3:27) Ngolo tusarilaka mu tindisa bô babansoni bata mona mpasi, ni bu sa ti ka basarilaka Nzambi ko. Mu ntangu bampwana’eto yi babâka mu tiari, yi babâka na malari, peleko na lwaka, mbo tukwe batalaka, mbo tubawirikilaka, mpe mbo tukabanaka mabanza ma tindisaka me mu Bibila. Bu tulanda tifwani tia Yehova, “Nzambi ya mbombolo,” tulendi bakisa mpangi zeto mu korela mpasi zawu, kampe tulendi bakisa bô balembo sarilaka Nzambi mu dinga mu mu zaba.—Mat. 5:16.

YEHOVA NI KE NETO

19. Yehova nti kasaka mu bungu dia beto, mpe bwe tulendi landila tifwani tiandi?

¹⁹ Yehova bô bamuzololo katomo belokelaka lwaka. Ka tu yambirikaka ko bu tubâka mu mpasi. Ntiana kwa tibuti tizoloko mu kipa mwana’andi, Yehova mbo kakipaka bisari biandi bia kwikama. Mbo katutwarisaka, mbo kakipaka nsatu zeto, mbo katukengerelaka, mpe mbo katutindisaka. Tifwani tia Tata’eto we na luzolo tulandaka, bu tutindisaka mpe bu tubakisaka bantu bakaka mu mpasi zawu. Ni bu sa ti mpasi na maniongo tuta bwabana na mo, tulendi bâ na lukwikulu ti Yehova ni ke neto. Watukanisina: “Kubândi na bunkuta, mu bungu ti ni ndie naku.” (Iza. 41:​10, NWT) Kani dio lukwikulu dita tu hana ti na Yehova, kani kabwe ka tusa bâ beto kaka ko!