Tatambula na kuluka kwakwansoni misamu mi tulembolo zaba

1. Ntia lenda Yehova katuhana mpe mu bungu dia nti?

YEHOVA watusala na lenda dia banza, dia longoka, dia kurisa mayela meto na diabâ na ndwenga. Mu bungu dia nti katusarila mu mpila yo? Mu bungu ti zololo ti tabaka luzabu lwa Nzambi, mpe tamusarila na mayindu meto.—Bin. 2:​1-5; Rom. 12:1.

2. a) Ntia ndilu ze neto? (Yobe 37:​23, 24) (Tala mpe tifwani.) b) Mu bungu dia nti we mfunu mu bakula ti ka twena na nsatu ya zaba misamu miamiansoni ko?

² Ka tulendi’â tazaba misamu miamiansoni ko ni bu sa ti, lenda die neto dia longoka. (Tanga Yobe 37:​23, 24.) Tataleno tifwani tia Yobe. Yehova wayula biyuvu biabingi kwe Yobe, mu mu bakisa mu bakula ti misamu miamingi ka lembo zaba. Musamu wo wayizi mu bakisa mu bâ wa kuluka mpe mu soba mbanzulu zandi. (Yobe 42:​3-6) Musamu wa mbote wena kwe beto mu bakula ti ka tuzebi’â misamu miamiansoni ko. Bu tubambukaka ti misamu miamingi tulembolo zaba, mbo wutubakisaka mu bâ ba kuluka, mpe mu bâ na lukwikulu ti Yehova mbo katutêla mio mie neto nsatu mu zaba na mu mbonga nzengolo za mbote.—Bin. 2:6.

3. Nti tuzonzela mu timoko ti?

³ Mu timoko ti, mbo tuzonzela misamu mi tulembolo zaba mpe na mpasi zilendi tulumuna kondo kwa zaba misamu mio. Mbo tumona mpe mu bungu dia nti we musamu wa mbote mu lembo zaba misamu miakaka. Bu tukwe zonzele misamu mio, mbo tukurisa lukwikulu lweto mu Yehova, ‘Yandi we na luzabu lwa lunga,’ mpe tutêlaka mio mie neto nsatu mu zaba.—Yobe 37:16.

KA TUZEBI’Â KO KA NTIA NTANGU NSUKA YIKWIZA

4. Ntiana buta wasongela Matie 24:​36, ntia musamu tulembolo zaba?

⁴ Tanga Matie 24:​36, NWT. Ka tuzebi’â ko ka ntia ntangu nsuka ya nza yi yitûla. Bu kabâ ha mutoto, Yezu mpe ka zaba “tilumbu na ntangu ko.”a Ha manima Yezu watâ kwe bantumwa bandi ti, Yehova ni yandi kwa “wena nswa,” ya bonga nzengolo ya ntangu yi fweti tûla misamu. (Bis. 1:​6, 7) Yehova watikubikila ntangu yi kwiza nsuka ya nza yi, kâ beto ka twena na lenda ko dia zaba ntangu yo.

5. Mu bungu ti ka tuzebi’â ntangu yi tûla nsuka ko, ntia misamu milendi tu tûrila?

⁵ Tintwari na mio mia tâ Yezu, ka tuzebi’â ko ntangu zikwa tufweti kêla ntete nsuka ya nza yiza. Buna tulendi kwizi kondo luvivululu mpe tulendi nôka nsungula tala ti tûka ntama tukêlaka tilumbu tia Yehova. Wulendi kwizi ba musamu wa mpasi mu korela mitsotso mia bantu ba kanda dieto peleko mia bantu bakaka. (2 Pi. 3:​3, 4) Tulendi banza ti, tala ti tuzebi tilumbu tikwiza nsuka, tulendi tomo bâ na luvivululu mpe mbo tubâ na lenda dia tomo korela mitsotso.

6. Mu bungu dia nti we musamu wa mbote mu lembo zaba ntangu yi kwiza nsuka?

⁶ Bu kalembo tu têla ntangu yikwiza nsuka, Yehova watuhana bweso bwa mu songela ti yandi tusarilaka mu bungu ti yandi tuzololo mpe yandi tukwikilaka. Ka tuzololo’â ko kwa tasarila Yehova tii ntangu yitûla nsuka, kâ tuzololo mpe tamusarila ntangu zazansoni. Kani tatûla mabanza meto mu ntangu yikwiza ‘tilumbu tia Yehova,’ musamu wa mbote wubâ mu tûla mabanza meto mu mio miyôka ha manima ma tilumbu tio. Buna, mbo tutatamana mu kurisa kwikama kweto mu Nzambi mpe mbo tusa miamiansoni mi tulenda mu mu yangirika.—2 Pi. 3:​11, 12.

7. Ntia misamu tuzebi?

⁷ Mfunu wena mu dimbitila mu misamu mio mi tuzebi—tuzebi ti bilumbu bia mansukina mu 1914 biabatika. Yehova wahana mbikululu za Bibila zisongelaka ti bilumbu bia mansukina mu 1914 biabatika, mpe watuhana bidimbu biabingi bisongelaka bwe misamu mibâ ha manima ma muvu wo. Ntiangu twe na lukwikulu ti ‘tilumbu tia tinene tia Yehova tieka penepene.’ (Sof. 1:14) Tuzebi mpe nti Yehova kazololo beto tasa, zololo ti tasamuna ‘nsangu za mbote za Timfumu’ kwe bantu babingi. (Mat. 24:14) Nsangu zo, basamuni zo mu nsi 240 mpe mu mazu yôka 1000. Ka twena na nsatu ko ya zaba “tilumbu na ntangu” yitûla nsuka ngatu tasala tisalu tio na luhemo lwalwansoni.

KA TUZEBI’Â KO BWE YEHOVA KALENDI SARILA

8. Ngano ‘tisalu tia Nzambi ya matieleka’ ni nti? (Ekleziaste 11:5)

⁸ Ntangu zazansoni ka tuzabaka ‘tisalu tia Nzambi ya matieleka’ ko. (Tanga Ekleziaste 11:5.) Ntêlo yo, misamu mi yirikaka Yehova yitarilaka peleko misamu mi kahaninaka nzila mu lungisa luzolo lwandi. Ka tulendi’â tazaba na lukwikulu ko, mu bungu dia nti Yehova kabikilaka misamu mia tu tûrila peleko ntia misamu kayirika mu tu bakisa. (Mik. 37:5) Mpasi wena mu zaba misamu mio, ntiana bu tulembo zabaka bwe mwana wukurilaka mu moyo wa nguri’andi, basiantifike mpe ka batomo’â bakulaka ko bwe mwana wukurilaka mu moyo wa nguri’andi.

9. Mu bungu ti ka tuzebi’â mpila yi sarilaka Yehova ko, ntia nkwamusu tulendi bwabana na zo?

⁹ Mu ntangu yi tulembo zabaka ka bwe Yehova katubakisilaka, tulendi kwizi kekama mu bonga nzengolo zakaka. Tulendi kekama mpe mu sala bwabwingi mu tisalu tieto tia samuna, mu tifwani, mu lembo bâ na luzingu lwa nkaka peleko mu kwenda ku mbuka ze na nsatu bisamuni bia Timfumu. Tulendi tiyula mpe tala ti, Nzambi beto katambulaka mu ntangu yi tulembo lungisaka makani meto ma timpeve, mu ntangu yi tulembo monaka ndandu za mbote mu ngolo zi tusarilaka mu tisalu tieto tia samuna, peleko bu tubwabanaka na nkwamusu mu bisalu bi batuhanaka mu timvuka.

10. Mu bungu ti ka tuzebi’â ko bwe Yehova kakwizi sarila, ntia bifu musamu wo wutubakisaka mu kurisa?

¹⁰ Lembo zaba mpila yi sarilaka Yehova, mbo yitubakisaka mu kurisa bifu bia mbote ntiana: tifu tia kuluka na tia zaba ndilu zeto. Mbo tukwizi bakulaka ti, mpila Yehova yi kamwinaka misamu yiyôkele mpila beto yi tumwinaka misamu. (Iza. 55:​8, 9) Lukwikulu lwalwingi lu kwizi baka neto mu Yehova, ni Yandi tusikirilaka ngatu talenda misamu mieto. Mu ntangu yi tubakaka ndandu za mbote mu tisalu tieto tia samuna, peleko mu bisalu bi batuhanaka mu timvuka Yehova tukumbisaka. (Mik. 127:1; 1 Kor. 3:7) Tala ti misamu ka mita yôkela mu mpila yi tuta mia kekolo ko, tufweti bambukaka ti misamu miamiansoni Yehova mia kazebi. (Iza. 26:12) Mbo tusaka mio miamiansoni mi tulenda na lukwikulu ti, Yehova mbo katatamana mu tubakisa. Tuzebi ti mbo katuhana lutwalusu lwe neto nsatu ni bu sa ti ka sa bimangu ko ntiana bu keri bwasilaka mu ntama.—Bis. 16:​6-10.

11. Ntia misamu mia mfunu tuzebi?

¹¹ Tuzebi ti Yehova Nzambi ya luzolo, ya buderede na ya ndwenga yena, buna tadimbitilaka mu musamu wo. Tuzebi ti, Yehova yangalala kayangalalaka mu mio mi tusaka mu bungu dia Yandi na mu bungu dia mpangi zeto mu timvuka. Tuzebi mpe ti, bo batatamanaka mu bâ ba kwikama kwe yandi, kasendaka.—Ebr. 11:6.

KA TUZEBI’Â MISAMU MITÛLA MBAZI KO

12. Tintwari na Zaki 4:​13, 14, ntia misamu tulembolo zaba?

¹² Tanga Zaki 4:​13, 14. Musamu wa matieleka ni wena’eti ka tuzebi’â ko bwe misamu mibêla mu bilumbu bita kwiza, “misamu mitu lembo kekoloko tubwabanaka na mio”. (Ekl. 9:​11, NWT) Buna, ka tuzebi’â ko tala ti makani meto mbo tulungisa mo peleko mbo tubâ ba moyo mu lungisa mo.

13. Bwe tubâka mu ntangu yi tulembo zabaka misamu milendi tula ku matu?

¹³ Wulendi bâ musamu wa mpasi mu korela, mu bungu ti ka tuzebi’â misamu mitûla ku matu ko. Mu bwe? Tulendi bâ na lwaka mu bungu dia misamu milendi tûla, mpe milendi sa ti talembo bâ mu nsayi. Tulendi bâ mu tiari, mpe tulendi bâ ba nôka mu bungu dia misamu mia mpasi, mpe mitu lembolo kekolo. Buna, bu tulembo lungisaka makani meto, tulendi kwizi nionga mpe tulendi bâ ba nôka.—Bin. 13:12.

14. Ngano nsayi’eto ya matieleka kwe yitûkaka? (Tala mpe bifwani.)

¹⁴ Mu ntangu yi tutelamanaka nkwamusu, lenda dibâka neto dia songela ti, Tata’eto die ku zulu tusarilaka mu bungu ti yandi tuzololo. Binsamu bia Bibila mbo bisongelaka ti, ka tufweti’â takêlaka ko ti Yehova katukengerela mu mpasi zazansoni, mpe ka tikubikilaka misamu mitûla mu luzingu lweto ko. Zebi ti tulendi bâ mu nsayi ni bu sa ti, ka tuzebi’â misamu mitûla ku matu ko. Mu bungu ti nsayi’eto mbo yisikamanaka mu mpila yi tudingilaka lutwalusu lwandi na yi tumutumamanaka. (Yer. 10:23) Bu tudingaka lutwalusu lwandi mu bonga nzengolo, mbo wubâka ntiana’eti beto tutâka: ‘Tala ti Yehova zololo, mbo tuzinga mpe mbo tuyirika musamu ewu peleko ewu.’—Zaki 4:15.

15. Nti tuzebi mu mio mitariri bilumbu bia ku matu?

¹⁵ Ka tuzebi’â misamu mitunatina muna tilumbu ko. kâ, tuzebi ti Yehova tu kanisini luzingu lwa mankululu—ni bu sa ku zulu peleko ha mutoto. Tuzebi ti ka lendi’â ka huna ko mpe ka kwena tima ko tilendi mu kabakasa mu lungisa makani mandi mamansoni. (Tite 1:2) Ni yandi kwa “lendi zabikisa nsuka, mpe tuka ntangu za ntama misamu mieka lembo yilama.” Misamu miamiansoni mi katâ mu ntama mialungana, mpe misamu mi katâ mu bungu dia bilumbu bita kwiza mbo milungana mpe. (Iza. 46:​10, NWT) Lukwikulu lwe neto ti ka kwena tima ko tilendi kabakasa Yehova mu tu zolo. (Rom. 8:​35-39) Mbo katuhana ndwenga, lutindusu, na ngolo ze neto nsatu mu korela misamu miamiansoni milendi tu tûrila. Tulendi kwikila ti Yehova mbo katubakisa mpe mbo katusakumuna.—Yer. 17:​7, 8.

KA TULENDI’Â TA TOMO BAKULA MPILA YITUZOLOLO YEHOVA KO

16. Ngano Yehova nti kazebi mu beto mpe bwe tumonaka ku mutima?

¹⁶ Tanga Mikunga 139:​1-6. Mvangi’eto tomono tu zaba; zebi mu bungu dia nti tubanzilaka mpe tuyirikaka misamu ntiana bu tumwinaka mio. Misamu mi tutâka na mi tumonaka ku mutima mia kazebi; zebi mpe misamu miamiansoni mi tuyirikaka mpe mu bungu dia nti tusilaka bo. Ntiana bwa songela wo mutinu Davide, Yehova beto kakengerelaka, mpe kani kabwe ka bâka mala na beto ko. Ngano bwe monaka ku mutima, mu zaba ti Nzambi we Nkwa-Ngolo-Zazansoni, we wa zangama mpe wayirika bima biabiansoni nge kabelokelaka lwaka? Davide watâ: ‘Mayela mo ka ndendi’â na bakula mo ko, mutela wula kwa mena, ka nilenda mu baka moko.’—Mik. 139:​6, note.

17. Mu bungu dia nti wulendi bâ musamu wa mpasi kwe beto, mu tambula ti Yehova beto katomono zaba?

¹⁷ Kampe mu bungu dia kanda dieto, tikulu tieto, peleko nkwikulu zeto za mu ntama, musamu wa mpasi wena kwe beto mu mona Yehova ntiana Tata dia luzolo ditukipaka. Tulendi banza ti mu bungu dia makuba meto ma mu ntama, Yehova kalendi’â ka tu zaba ko mpe mala kena na beto. Ntangu zakaka Davide mbanzulu mpe ni zo zeri nandi. (Mik. 38:​18, 21) Muntu wuta ndinga mu soba mpila’andi ya bêla, mpe mu landa misiku mia Nzambi lendi tiyula: “Tala ti Nzambi meno kabakulaka, mu bungu dia nti kata dinga na losa ndiatulu ye mpasi kwe meno mu bika?”

18. Ntia ndandu tubâka tamana tambula ti Yehova beto ka tomono zaba yôka beto beni? (Tala mpe bifwani.)

¹⁸ Tulendi longoka mu tambula ti Yehova beto katomono zaba yôka beto beni, mpe lendi mona kwe beto mbote yi tuta lembo mona. Kâ, ni bu sa ti makuba meto ma kamonaka, zebi ka ntia mpila muntu tuta dinga tabâ mpe beto kazololo. (Rom. 7:15) Bu tutomo bakulaka lenda di monaka Yehova mu beto, tulendi kurisa lukwikulu lwe neto nsatu, mu sarila Yehova na kwikama kwakwansoni mpe na nsayi.

19. Nti tuzebi mu Yehova?

¹⁹ Tuzebi ti Yehova nkwa luzolo. Ka twena na ntembe ko mu musamu wo. (1 Za 4:8) Tuzebi ti mio miamiansoni mi katutêlaka mu sa na mu lembo sa, ni mu bungu ti beto kazololo mpe zololo ti tabâ na luzingu luyôkele bubote. Tuzebi ti Yehova zololo tabâ na luzingu lwa mankululu. Ntiangu kahana nkûlulu ngatu musamu wo walungana. Kabu dia Nkûlulu lukwikulu dituhanaka ti tulendi lenda ntono makuba meto. (Rom. 7:​24, 25) Mpe tuzebi ti ‘Nzambi yôkele mitima mieto, mpe bima biabiansoni bia kazebi.’ (1 Za 3:​19, 20) Misamu mieto miamiansoni, Yehova mia kamonaka mpe lukwikulu lwe nandi ti mbo tulenda mu sarila luzolo lwandi.

20. Nti bi tu bakisa mu lembo bâ na lwaka lwa yôka?

²⁰ Yehova ka tu swekela na kani musamu ko wu twe na wo nsatu. Tamana tambula musamu wo na kuluka kwakwansoni, ka tubâ na nsatu ko yabâ na lwaka mu bungu dia musamu wu tulembolo zaba. Kâ, mbo tutûla mabanza meto ‘mu misamu miyôkele mfunu.’ (Yobe 36:4) Buna, mbo tusongela ti lukwikulu tutûlaka mu Yehova we walunga mu luzabu. Ni bu sa ti ka twena na lenda dia zaba misamu miamiansoni ko, na timina tuta kêla mu longoka misamu mia mona mitariri Nzambi’eto ya Zangama ntangu zazansoni.—Ekl. 3:11.