Bâ na lukwikulu ti Yehova nge kazololo

1. Mu bungu dia nti watihana kwe Yehova? (Tala mpe tifwani.)

NGANO tilumbu ti watihana kwe Yehova tia tabambukila? Nzengolo yo wayizi bonga mu bungu ti walongoka mu zaba na mu zolo Yehova. Kani wasa kwe Yehova, dia tûla luzolo lwandi ha tibuka tia ntete mu luzingu lwaku, mpe dia tatamana mu mu zolo mu mutima’aku wawansoni, mu tilundi tiaku, mu mbanzulu zaku na mu ngolo zaku zazansoni. (Mak. 12:30) Tûka tilumbu tîna, luzolo lwaku mu yandi lwatomo kula. Ntia mvutu hana tala ti muntu ku yuriri, “Ngano lukwikulu lwe naku ti Yehova yandi zololo?” Ntembe kani mbo vutula, “Yandi nzololo yôka tima ni tima peleko muntu ni muntu!”

2-3. Ntia musamu Yehova kazololo ti tabâ na lukwikulu mpe nti tulongoka mu timoko ti? (Yeremi 31:3)

² Kâ, ntia mvutu hana tala muntu ku yuriri, “Ngano lukwikulu lwe naku ti Yehova, nge kazololo?” Ngano mbo kekama mu hana mvutu bu banza ti, kampe ka wufwanane’â ko ti Yehova kakuzolo? Mpangi yimosi ya yikento yi bakurisila mu mpila ya kondo luzolo tûka buleke bwandi yitêle: “Lukwikulu lwe nani ti ntomono zolo Yehova mu mutima’ani wawansoni. Kâ ntangu zakaka ntembe zibâka nani ti Yehova meno kazololo.” Buna nti bilendi ku bakisa mu zaba ti Yehova nge kazoloko?

³ Yehova zololo ti wabâ na lukwikulu ti nge kazololo. (Tanga Yeremi 31:3.) Musamu wa matieleka ni wena’eti, Yehova wakubenda kwe Yandi. Mpe mu ntangu yi watihana kwe Yandi mpe bu wabatusu, wayizi baka tima tiyôkele ntalu tiatûka kwe Yehova—luzolo lwandi lwa kwikama. Wuzololo tâ, Yehova nge katomono zolo mpe kani kabwe kakubika ko. Luzolo lo mbo lumutumaka kamona bisari biandi bia kwikama—na nge mpe mu kati—ntiana “tima tia ntalu.” (Mal. 3:​17, NWT; note) Yehova zololo ti wabâ na lukwikulu ti nge kazololo ntiana bweri wa kwikilaka ntumwa Paulo. Watsoneka: “Diangana, lukwikulu lwe nani ti ni lubâ lufwa, luzingu, mbazi, bimfumu, misamu mia bwawu bu, misamu milanda, tuyalu, bima bia zangama, mabenga, ni tibâ tima tiakaka tia yilukulu, ka tilendi’â tiakuwubakasa ko na luzolo lwe na Nzambi mu beto lwe mu Kristo Yezu mfumu’eto.” (Rom. 8:​38, 39, NWT) Mu timoko ti, mbo tutaluzula mu bungu dia nti we mfunu mu bâ na lukwikulu ti Yehova beto kazololo mpe bwe tulendi kurisila lukwikulu lo.

MU BUNGU DIA NTI TUFWETI BÊLA NA LUKWIKULU TI YEHOVA BETO KAZOLOLO

4. Bwe tulendi telamana Satana?

⁴ Bu tutambula ti Yehova beto kazololo, mbo tutelamana mosi wa ‘mitambu’ za Satana. (Efz. 6:11) Satana mbo kasa miamiansoni mi kalenda, mu tu kabakasa mu sarila Yehova. Mpila yimosi yisarilaka Satana ni mu tu songela ti Yehova ka tu zololo’â ko. Kuzimbakanandi ti Satana, muntu wena wudingaka ntangu yifwanane mu ku wubakasa. Bibila, Satana difwanakasaka na ngo-mbulu. (1 Pi. 5:8, 9) Ngo-mbulu, bibulu bilembolo na ngolo mpe bibâka ha bawu kaka kadingaka mu bwila. Mpila mosi mpe, Satana beto kanwanisaka bu tubâka ba nôka, bu tulembo bâka na ngolo peleko mu tiari mu bungu dia misamu mia mpasi miatutûrila mu ntama, misamu mia mpasi mi tuta bwabana lumbu ti peleko, mu bungu dia bunkuta bwa bilumbu bia ku matu. (Bin. 24:10) Satana mbo kadingaka tatomo bâ ba nôka ngatu tabîka mu sarila Yehova. Kâ tulendi “telamana” Satana na bifu biandi bia mbi, bu tusa miamiansoni mi tulenda mu bâ na lukwikulu ti Yehova beto katomono zolo.—Zaki 4:​7, NWT.

5. Mu bungu dia nti tufweti mona ti Yehova beto katomono zolo?

⁵ Tamana ba na lukwikulu ti Yehova beto kazololo, tindiku tieto na yandi mbo titomo kula. Mu bungu dia nti tuta wa têla? Mu bungu ti Yehova wasala bantu na nsatu ya songela luzolo mpe ya mona ti bawu bazololo. Mu ntangu muntu yi katusongelaka luzolo, tîmina dibâka neto mu songela ti yandi tuzololo. Ntiangu, bu tumonaka ti Yehova beto katomono zolo, beto mpe mbo tumuzoloko. (1 Za 4:19) Luzolo lweto mu bungu dia Yandi bu lutomo kula, luzolo lwandi mpe mu bungu dia beto, mbo lutomo kula. Bibila mbo ditutêlaka: “Pusaneno kwe Nzambi mpe yandi mbo kapusana kwe beno.” (Zaki 4:​8, NWT) Bwe tulendi kurisila lukwikulu lweto ti Yehova beto kazololo?

NTI BILENDI TU BAKISA MU KWIKILA TI YEHOVA BETO KAZOLOLO?

6. Mu kwikila ti Yehova nge kazololo nti lendi sa?

⁶ Tatamana mu sambila Yehova kakubakisa mu bakula mu bungu dia nti kakuzoloko. (Like 18:1; Rom. 12:12) Tala ti wufwanane lomba mbala zazingi kwe Yehova kakubakisa mu timona buna Yandi kakumwinaka. Ntangu zakaka mpasi wena mu mona ti Yehova beto kazoloko tala ti mutima’eto semba wutusembaka. Kâ bambuka ti Yehova yôkele mutima’aku. (1 Za 3:​19, 20) Tomono ku zaba yôka nge beni; mpe mbo kamonaka mio mi lembo monaka kwe nge. (1 Sam. 16:7; 2 Nta. 6:30) Buna kukekamandi mu mu têla mabanza maku mamansoni, bu mu lomba kakubakisa mu tambula ti nge kazololo. (Mik. 62:8) Ha manima ma lusambulu lwaku mfunu wena mu sarila misamu emi mita landa.

7-8. Bwe Mikunga mituhaninaka lukwikulu ti Yehova beto kazololo?

⁷ Bâ na lukwikulu mu misamu mi tâka Yehova. Yehova wahana mpeve santu’andi kwe bantu mu tsoneka Bibila ngatu babangula ntia mpila Nzambi kena. Mu mukunga wumosi Davide wasongela mu ntia mpila Yehova katufwilaka tiari. Watâ: ‘Yehova penepene kena na bô bê na mitima mia lwala; Yandi bô bê ba nôka kavûkisaka.’ (Mik. 34:​18, note) Bu baka wa nôka lendi banza ti nge kaka wena. Kâ Yehova ku kanisini ti ni ke naku mu ntangu zo, mu bungu ti mona kata mona ti lubakusu lwandi lwe naku nsatu. Mu mukunga wakaka, Davide watsoneka: ‘Tûla mansangaza mani mu nkalu’aku.’ (Mik. 56:8) Bu tubâka mu tiari mpe bu tumonaka mpasi Yehova mona kamonaka. Nge katomo belokelaka lwaka mpe ka baka mu nsayi ko bu tubwabanaka na mpasi. Ntiana kwa muna têla dia mamba die mfunu mu bungu dia muntu wuta sa nzietolo ku sese, mpila mosi mpe mansangaza ma tudukisaka mfunu mena kwe Yehova, mpe ntangu zazansoni zi tubwabanaka na mpasi Yehova za kabambukilaka. Mbo tutangaka mu Mikunga 139:3: ‘Nzila zani [Yehova] za tomono zaba.’ Yehova misamu miaku miamiansoni mi yirikaka mia kamonaka, kâ mabanza mandi katûlaka mu misamu mia mbote mi yirikaka. (Ebr. 6:10) Mu bungu dia nti? Mu bungu ti ngolo zisarilaka za katomo zoloko.a

⁸ Yehova verse ze mu Bibila zitindisaka kasarilaka mu tu têla ti beto kazoloko mpe beto kabelokelaka lwaka. Ntiana bu tutêle wo ku mbatukulu, Satana zololo takwikila ti Yehova ka tu zololo’â ko. Tala ti ntangu zakaka ntembe zibaka naku, bonga ntangu ya tiyula, “ngano nani nikwikila—‘tata dia bungungu’ peleko ‘Nzambi ya matieleka’?”—Za 8:44; Mik. 31:5.

9. Ntia lukwikulu Yehova kata hana kwe bô bamuzoloko? (Ndukulu 20:​5, 6)

⁹ Dimbitila bwe Yehova kamonaka mu bungu dia bantu bamusongelaka luzolo. Taleno misamu mia tâ Yehova kwe Mose na kwe bala ba Israele. (Tanga Ndukulu 20:​5, 6.) Yehova kanisini mu tatamana mu songela luzolo lwandi lwa kwikama kwe bô bamusongelaka luzolo. Mu bungu ti Yehova luzolo lwa kwikama lwe nandi, tulendi bâ na lukwikulu ti kani kabwe Yehova ka bîka ko mu zolo muntu wumusongelaka luzolo. (Neh. 1:5) Buna tala ti weka bâ na ntembe ti Yehova nge kazololo, bonga ntangu ya tiyula, ‘ngano meno Yehova yandi nzololo?’ Tala ti Yehova yandi zololo mpe miamiansoni saka mu mu yangirika, lendi bâ na lukwikulu ti Yandi mpe nge katomono zolo. (Dan. 9:4; 1 Kor. 8:3) Mu ntêlo zakaka tala ti lukwikulu lwe naku ti Yehova yandi zololo, mu bungu dia nti bêla na ntembe ti Yehova nge kazololo? Lendi bâ na lukwikulu ti Yehova mbo katatamana mu ku zolo mpe kani kabwe ka kubika ko.

10-11. Bwe Yehova kata dingila beto tabongela nkûlulu? (Bisi-Ngalate 2:20)

¹⁰ Dimbitila mu nkûlulu. Yehova kabu dia dinene kasa kwe bantu, bu kahana mwana’andi Yezu Kristo kafwa mu bungu dia beto. (Za 3:16) Ngano kabu dio, dia nge mpe diena? Ye! Tataleno tifwani tia Paulo. Tabambuka ti masumu ma manene kasa ntete kabâ Mukristo mpe ntangu zazansoni wafweti nwana na nitu’andi ya masumu. (Rom. 7:​24, 25; 1 Tim. 1:​12-14) Kâ lukwikulu lweri nandi ti nkûlulu kabu dieri dia muhana Yehova. (Tanga Bisi-Ngalate 2:20.) Bambuka ti Yehova wasarila Paulo mu zonzela kabu dio mu Bibila. Mpe Yehova watsonekesa mio mu Bibila mu tu longesa. (Rom. 15:4) Misamu mia tâ Paulo mbo misongelaka mu ntia mpila Yehova kazoloko nge wabongela nkûlulu—ntiana kabu Yandi di kaheni kwe nge. Wamana bongela nkûlulu mu mpila yo, mbo kwizi bâ na lukwikulu ti Yehova nge katomono zolo.

¹¹ Matondo tuvutulaka kwe Yehova bu katambika Yezu ha mutoto ngatu kafwa mu bungu dia beto. Kâ, musamu wakaka Yezu wu kayizila ha mutoto, ni mu tâ matieleka matariri Nzambi kwe bantu. (Za 18:37) Yezu watulongesa ka bwe Yehova kazoloko bala bandi.

BWE YEZU KATUBAKISILAKA MU TAMBULA LUZOLO LWA YEHOVA

12. Mu bungu dia nti tulendi kwikila misamu mitâka Yezu mu bungu dia Yehova?

¹² Bu kabâ ha mutoto Yezu wasongela kabwe Yehova keri. (Like 10:22) Tulendi kwikila misamu mia tâ Yezu mu bungu dia Yehova. Mu bungu dia nti? Mu bungu ti, Yezu ntangu yayingi kayôkesa ku zulu na Yehova ntete kiza ha mutoto. (Kol. 1:15) Mu luzabu lwabâ nandi mu bungu dia Yehova, Yezu wazaba kabwe Yehova kazoloko bala bandi ba kwikama. Bwe Yezu kabakisilaka bantu bakaka mu tambula luzolo lwa Nzambi?

13. Bwe Yezu kata dinga tamwina Yehova?

¹³ Yezu zololo tamwina Yehova ntiana bu kamumwinaka. Mu Evanzile Yezu watâ mbila Yehova “Tata” mbala yôka 160. Bu keri zonzaka na milongoki miandi ntêlo ya ‘Tata’eno’ peleko ‘Tata’eno die ku zulu’ keri sarilaka. (Mat. 5:16; 6:26) Note ya ndongokolo ye mu Matie 5:16 yitêle: “Bisari bia Nzambi bia ntete nkumbu zazingi beri sarilaka bu beri zonzaka na Yehova, ntiana ‘Nkwa-Ngolo-Zazansoni,’ ‘Watomo Zangama,’ na ‘Mvangi wa Wunene,’ kâ mpila Yezu yikeri sarilaka ntêlo ya ‘Tata’ mbo yisongelaka tindiku tie na Nzambi na bisari biandi.” Wa matieleka, Yezu zololo ti tamona Yehova ntiana Tata ditomono zolo bala Bandi. Tataluzuleno bifwani biole Yezu bi kasarila ntêlo ya “Tata.”

14. Bwe Yezu kasongela ti muna muntu mu beto mfunu kena ha meso ma Yehova? (Matie 10:​29-31) (Tala mpe tifwani.)

¹⁴ Tatoko’eno taluzula misamu mia tâ Yezu mu Matie10:​29-31. (Tanga.) Yezu watâ ti, Tata’andi zebi mbuka ye muna nuni ya fioti. Kâ, nuni ka zisarilaka Yehova ko mpe ka zena na luzolo mu bungu dia Yandi ko. Buna, tala ti muna nuni mfunu yena kwe Yehova, tulendi bâ na lukwikulu ti beto kabelokelaka lwaka mu bungu ti, Yandi tuzololo mpe Yandi tusarilaka! Verse 30 yitêle: ‘Nsuki zazansoni za mutu’eno mpe za tangu zena.’ Note yitariri verse yo mbo yitâka: “Luzabu lwa Yehova mu bungu dia bima bieto bia fioti-fioti mbo lutomo songelaka ti, Yehova milongoki mia Yezu katomo belokelaka lwaka.” Wa matieleka, Yezu zololo ti tabâ na lukwikulu ti muna muntu ha kati dieto mfunu kena ha meso ma Tata’eto we ku zulu.

15. Misamu mia tâ Yezu mie mu Za 6:​44, nti mitulongesaka mu Tata’eto die ku zulu?

¹⁵ Tataleno tifwani tiakaka Yezu ti kasarila ntêlo ya “Tata.” (Tanga Za 6:44.) Ni Tata’eto we ku zulu wakubenda Yandi beni mu matieleka. Mu bungu dia nti kakubendela? Mu bungu ti, bifu bia mbote kamona kwe nge. (Bis. 13:48) Note ya ndongokolo ya Za 6:44 yisongele ti, kampe Yezu ntêlo za Yeremi kasarila zi bazonzele mu verse ya mutu-diambu’eto yitêle: “Nakubendele kwe meno mu luzolo lwa kwikama [peleko, natatamane mu ku songela luzolo lwa kwikama].” (Yer. 31:​3, NWT; na note; fwanakasa na Ozea 11:4.) Banza kabwe wuta zolo tâ. Tata’eto die ku zulu ditomono tu zolo, bifu bieto kamonaka ntangu zazansoni bi tulembo monaka beto beni.

16. a) Yezu nti katutêlaka, mpe mu bungu dia nti tufweti mu kwikila? b) Bwe tulendi kurisila lukwikulu lweto ti Yehova ni Tata di twe na dio nsatu? (Tala mpe kaku “Tata di twe na dio nsatu.”)

¹⁶ Bu kazonzela Yehova ntiana Tata, Yezu mbo keri zolo tu têlaka: “Yehova kena kwa Tata diani ko; Tata dia beno mpe diena. Wa matieleka nita lu têla, beno kazololo mpe beno katomo belokelaka lwaka.” Ntiangu tala ti ntembe ze naku ti Yehova nge kazololo, tiyula: ‘Ngano ka ndendi’â nakwikila Yezu ko, yandi tomono zaba Tata’eto mpe tâka matieleka ntangu zazansoni?’—1 Pi. 2:22.

TATAMANA MU KURISA LUKWIKULU LWAKU

17. Mu bungu dia nti tufweti tatamana mu kurisa lukwikulu lweto ti Yehova beto kazololo?

¹⁷ Tufweti tatamana mu kurisa lukwikulu lweto ti Yehova beto kazololo. Bambuka ti Satana, miamiansoni kasa mu tu kabakasa mu sarila Yehova. Mbo katatamana mu tu songela ti Yehova ka tu zololo’â ko, ngatu ka tavutu’andi bâ na ngolo za mu sarila. Ka tufweti’â kwikila bungungu bwa Satana ko!—Yobe 27:5.

18. Bwe lendi kurisila lukwikulu lwaku mu luzolo lwa Yehova?

¹⁸ Mu kurisa lukwikulu lwaku mu luzolo lwa Yehova, tatamana mu sambila ngatu kakubakisa mu timona ntiana bu kakumwinaka. Dimbitila mu mpila bitsoniki bia Bibila biazonzela luzolo lwa Yehova. Kuzimbakanandi ti Yehova mbo katatamana mu zolo muntu wo wumuzoloko. Dimbitila mu misamu misaka ti nkûlulu yabâ kabu mu bungu dia nge. Mpe bâ na lukwikulu mu misamu mia tâ Yezu ti Yehova Tata diaku diena. Buna, tala ti muntu ku yuriri: “Ngano lukwikulu lwe naku ti Yehova nge kazololo?” lendi tâ na lukwikulu lwalwansoni: “Yee, meno kazololo! Mpe bilumbu biabiansoni ngolo nisarilaka mu mu songela luzolo lwani!”