Tala ti nge tibuti tiena, bakisa bala baku mu kubika mvutu za toma zidelakane na mvula ze nawu. Ntangu zakaka, mbo bazonzelaka misamu mia minene mu ndongokolo, ntiana mitariri makwela peleko ndiatulu, kâ kulendi bâ paragrafe yimosi peleko zole zi lendi hanina mwana mvutu. Bakisa mpe bala baku mu bakula mu bungu dia nti balendi lembo ba sola bu banangunaka moko. Bu sila bo, mbo wubabakisa mu lembo nôka bu basolaka bantu bakaka ni bu sa ti moko bananguni. (1 Tim. 6:18) Beto bansoni tulendi kubika mvutu zikembesa Yehova mpe zitindisa mpangi zeto. (Bin. 25:11) Ni bu sa ti lenda dibâka neto dia zonzela luzingu lweto, tufweti saka keba mu vulu zonzelaka misamu mieto. (Bin. 27:2; 2 Kor. 10:18) Kani tasila bo, mbo tuvulu zonzelaka Yehova, Zu diandi na kanda diandi.—Nza. 4:11. w23.04 24-25 par.17-18

Luzolo mfunu lwena mu tatamana mu bâ na meso ma tia na mu lunda mpila’eto ya mbote ya mwina misamu. (Mat. 22:​37-39) Luzolo mu Nzambi mbo lutubakisaka mu vivirila mu tisalu tia samuna ntono misamu mi tilendi tu natina. (2 Tim. 1:​7, 8) Mu bungu ti mbo tusongelaka luzolo lweto kwe bô balembo sarilaka Yehova, mbo tutatamanaka mu samuna, ni bu sa ti mu nzila ya telefone na ya mikanda. Mbo tubâka na tivuvu ti bantu ba tubâka mbuka mosi mbo bawkizi soba mpe mbo babatika mu yirika misamu mia sungama. (Ezk. 18:​27, 28) Mbo tuzoloko mpe mpangi zeto. Mbo tusongelaka luzolo lo bu tukwe titindisi na bu tukwe yikasane ngolo beto na beto. (1 Tes. 5:11) Ntiana binwani binwanaka mu tintwari, mbo tutitindisaka beto na beto. Ka tulendi’â tawaya ko mu yirika mbi kwe mpangi zeto peleko tabakarisila mbi yi batuyirikiri. (1 Tes. 5:​13, 15) Mbo tusongelaka mpe luzolo bu tuzitisaka mpangi zitwarisaka timvuka.—1 Tes. 5:12. w23.06 10 par. 6; 11 par. 10-11

Mpila yimosi yi tulendi yikila timinu tieto ngolo ni mu dimbutila mu nkûlulu. Nkûlulu tidimbu tiena tisongelaka ti makani ma Nzambi mbo malungana. Bu tudimbitilaka mu mpila yi bafutila nkûlulu, timinu tieto mu makani ma Nzambi matariri luzingu lwa mankululu mu nza ya môna ya mbote mbo tiyikamaka ngolo. Mu bungu dia nti tulendi têla bo Ngano nkûlulu nti yisongelaka? Yehova watambika mwana’andi wa wumosi wu katomo zolo, mpe muntu wu beri nguria penepene, wizi wabutuka ha mutoto na nitu ya lunga ya tinsuni. Bu keri ha mutoto, Yezu wakorela mpasi za mpila na mpila. Ha manima wayizi timuka mpe wafwa lufwa lwa mbi. Diangana Yehova ntalu ya ngolo kafuta! Nzambi’eto ya luzolo ka yaketi’â bika mwana’andi ko wamona mpasi mpe wafwa mu tuhana kwa luzingu lwa mbote lwa ntangu fioti. (Za 3:16; 1 Pi. 1:​18, 19) Mu bungu ti wafuta ntalu yo ya ngolo, Yehova mbo kasa miamiansoni ngatu luzingu lwa mankululu mu nza ya môna lwalungana. w23.04 27 par. 8-9