Yehova mbo kadingaka mpila zi kalendi songela kwe kanda diandi ti bawu kazololo mpe mbo kayangalalaka mu bawu. Bibila mbo dizonzelaka mbala zole zi katâ kwe Yezu ti yandi katomo zolo, mpe Mwana’andi wena wu katambula. (Mat. 3:17; 17:5) Zololo wawâ Yehova bu kakutêlaka ti nge katambulaka? Yehova ka tuzonzelaka ko tûka ku mazulu, kâ mbo katuzonzelaka mu nzila ya mikanda mia Zu diandi. Tulendi wirikila Zu dia Yehova bu katutêlaka ti beto kazololo, bu tutangaka misamu mia tâ Yezu mu Evanzile. Yezu mbo katomo landaka timuntu tia Tata’andi mu mpila ya lunga. Buna bu tutangaka binsamu bia Yezu mu ntangu yi katêla milongoki miandi mia kwikama kâ mieri na masumu ti bawu keri tambulaka, tulendi banza Yehova ta tu têla misamu mio. (Za 15:​9, 15) Tala ti mu mpasi twena, ka wuzololo’â tâ ko ti Nzambi ka ta vutu tu tambula ko. Kâ, mbo katuhanaka bweso bwa mu songela ti luzolo lwa ngolo lwe neto mu Yandi, mpe Yandi tu sikirilaka.—Zaki 1:12. w24.03 28 par. 10-11

Tala ti nge tibuti tiena, bakisa bala baku mu kubika mvutu za toma zidelakane na mvula ze nawu. Ntangu zakaka, mbo bazonzelaka misamu mia minene mu ndongokolo, ntiana mitariri makwela peleko ndiatulu, kâ kulendi bâ paragrafe yimosi peleko zole zi lendi hanina mwana mvutu. Bakisa mpe bala baku mu bakula mu bungu dia nti balendi lembo ba sola bu banangunaka moko. Bu sila bo, mbo wubabakisa mu lembo nôka bu basolaka bantu bakaka ni bu sa ti moko bananguni. (1 Tim. 6:18) Beto bansoni tulendi kubika mvutu zikembesa Yehova mpe zitindisa mpangi zeto. (Bin. 25:11) Ni bu sa ti lenda dibâka neto dia zonzela luzingu lweto, tufweti saka keba mu vulu zonzelaka misamu mieto. (Bin. 27:2; 2 Kor. 10:18) Kani tasila bo, mbo tuvulu zonzelaka Yehova, Zu diandi na kanda diandi.—Nza. 4:11. w23.04 24-25 par.17-18

Luzolo mfunu lwena mu tatamana mu bâ na meso ma tia na mu lunda mpila’eto ya mbote ya mwina misamu. (Mat. 22:​37-39) Luzolo mu Nzambi mbo lutubakisaka mu vivirila mu tisalu tia samuna ntono misamu mi tilendi tu natina. (2 Tim. 1:​7, 8) Mu bungu ti mbo tusongelaka luzolo lweto kwe bô balembo sarilaka Yehova, mbo tutatamanaka mu samuna, ni bu sa ti mu nzila ya telefone na ya mikanda. Mbo tubâka na tivuvu ti bantu ba tubâka mbuka mosi mbo bawkizi soba mpe mbo babatika mu yirika misamu mia sungama. (Ezk. 18:​27, 28) Mbo tuzoloko mpe mpangi zeto. Mbo tusongelaka luzolo lo bu tukwe titindisi na bu tukwe yikasane ngolo beto na beto. (1 Tes. 5:11) Ntiana binwani binwanaka mu tintwari, mbo tutitindisaka beto na beto. Ka tulendi’â tawaya ko mu yirika mbi kwe mpangi zeto peleko tabakarisila mbi yi batuyirikiri. (1 Tes. 5:​13, 15) Mbo tusongelaka mpe luzolo bu tuzitisaka mpangi zitwarisaka timvuka.—1 Tes. 5:12. w23.06 10 par. 6; 11 par. 10-11