Matayo

9 Yesu djingʉe bbú na ndirigoti ke dangʉe dda djolu adzi, ro ke rangʉe ndima bbá vile na. 2 Ndirigoti anja! ndrŭ d’ungʉe ddo ndí ddoni ná ddikpa ke Yesu dhi ngana kipoyi* djó. Fø ke dhó udha ndi nja ro, Yesu pongʉeri ke dho: “Ao kpakpa, madzá ngba! Dhonalo nidzá chenga sani sa.” 3 Føro nga ndi ná nja kpa ngʉ ripo ndima thí nǎ: “Fø ke Mungu dhu.” 4 Yesu chungʉe kpa thí nǎ kʉ ná lo chu nari dho, ke dhungʉeri kpa tso: “Ni ká che kʉ ná lo ddi ni thí nǎ addudho? 5 I lo kana sʉsʉ pli podha kʉ nari ká kʉ ngbá lo: ‘Nidzá chenga sani sa’ inga ‘Adani ndirigoti abbi?’ 6 Ro, ndiro ni chu ndrŭ Ddù kʉ kpakpanga na ndi sa ndrŭ dhi chenga i dz’ djó nari d’e—” føri goti ke pongʉeri ddo ndí ddoni ná ke dho: “Adani, adzi nidhó kipoyi* ndirigoti angʉ ni bba.” 7 Føro ke dangʉeni ndirigoti ke ngʉngʉe ndi bba. 8 Birobiro kʉ ná ndrŭ njangʉe fø lo ro, do løngʉe ndrŭ ndirigoti ndrŭ mangʉe Mungu, ke bbʉ fø di ná kpakpanga ndrŭ dho nari dho.

9 Føga ro Yesu ra nari goti ke njangʉe Matayo ró dho ngʉe ná ddikpa ke kitas dhi biro nǎ ndi ngʉ di ro, ndirigoti Yesu pongʉeri ke dho: “Angʉ ma unake.” Føro Matayo dangʉeni ndirigoti ke rangʉe Yesu ulu. 10 Luti, adzá ke ngʉ nganyo ná saa na, kitas tso nju ná bí kʉ ná kpa ma, chenga dhi ndrŭ ma na singʉe ndirigoti kpa ngangʉe nganyodha tso Yesu ma, ke unakpa ma na. 11 Ro, fø lo Bbafarisayo nja ro, kpa dhungʉeri ke unakpa tso: “Nidhó mwalimu ma ká nganyo kitas tso nju ná kpa ma, chenga dhi ndrŭ ma na na addudho?” 12 Fø lo ndi rr ro Yesu pongʉeri: “Ri nga kʉ bblo ndí kʉ ná ndrŭ i adi munganga ne ri, ro ri kʉ dhe dhi ndrŭ. 13 Anira i lo na mana ne: ‘Ma ji zølo, nga bbʉdha ri.’ Dhonalo ma nzá singʉe chølo dhi ndrŭ nzi ri, ro chenga dhi ndrŭ.”

14 Føri goti Yohani unakpa singʉe ke dhi ngana ndirigoti kpa dhungʉeri: “Ko ma, Bbafarisayo ma na ko adi nyo chi, ro ni unakpa ká adi nyo chi nzɨ addudho?” 15 Føro Yesu ngʉngʉe kpadhó logoti: “Ndoa ba dzá bbakau nga ka ndima é vodha na go kpa é ke na ró ri, ri ká kʉ nga fø ri? Ro, ddikpa cha le si ndoa ba tutu kpa kana ro, ná fø dyi kpa si kʉ nyo chi nì.” 16 Ddikpa le ma nzá ddi ka ndi ro ndi ró rù koko nanga ro wø rù tsodjo na ri. Njati le njiri fø ró, wø rù tsodjo ka ndi drr rù koko nanga ndirigoti ri nanga gʉ ka ndi thani bbo pli. 17 Wø divai nzɨ ndrŭ adi li kødha na le thɨ ná ngó ngʉ ná ddø na ri. Njati le njiri fø ró, fø ddø nanga ka ndi táta ndirigoti divai ka ndi d’røni d’rø ndirigoti fø ddø ka ndi sani sa. Ro, ndrŭ adi wø divai li kødha na le thɨ ná wø ddø na ndiro ri krʉ ronga b’oni b’o d’e.

18 Go ke ngʉ fø lo po ro, ddikpa bbonga singʉe koni ke nji ndirigoti ke pongʉeri: “Kpadjo madzá singba ngba kʉ b’lo ndi dhedhe ro, ró asi ni li ni thó ngba djo ndiro ngba ngʉ shi d’e.”

19 Føro Yesu dani ro, ke ma rangʉe ddinga ndi unakpa ma na fø bbonga ulu. 20 Føro anja! ju ra le ró ro nari dho nzani cho 12 ná ddikpa isɨle ndringʉeni ke kuso aluti lú, ndirigoti le løngʉe ke ró arugu rù tsodjo ronga. 21 Dhonalo le ngʉ ripo ɨ ndi thí nǎ: “Njati ma lø ke ró arugu rù ronga kpali ma ró, ma gøgø.” 22 Yesu lengʉe ndi thí ro, ke njangʉe le ro, ke pongʉeri le ni: “Nzɨ nji do madzá singba ngba! Nidzá udha gø ni gø.” Føro thei fø isɨle gøngʉe gø.

23 Fø bbonga bba Yesu si ro ke singʉe lí mɨ ná ndrŭ ma, makilele nji ná bí kʉ ná ndrŭ ma na ro. 24 Yesu pongʉeri: “Anivʉ i dzá ro dhonalo fø singba ngba ro nzá dhedhe ri, ro ngba ddoddo.” Føro ndrŭ ngangʉe ke gbodha tso. 25 Ndrŭ vʉ nari goti, ke tsungʉe adza, ke løngʉe ngba thó ndirigoti ngba dangʉeni da. 26 Bbʉbbʉ dhé, fø lo-i gangʉe fø bba gʉ lu gble.

27 Fø bba ro Yesu ra ro, nzɨ nyǒ nganja ná aro kʉ ná kpa ngʉ ra ke una, ɨ ndima ndima nanga jø ro: “Abe zø ko djo, Daudi Ddù.” 28 B’lo Yesu tsu adza nari goti, nzɨ nyǒ nganja ná fø kpa ndringʉeni ke kuso, føro ke dhungʉeri kpa tso: “Ni ká uri u ma ka ma njí fø lo njí?” Kpa ngʉngʉe logoti: “Njío Bboke.” 29 Føro ke løngʉe kpa nyǒ ronga ndirigoti ke pongʉeri: “Ri njini ni dho ni uri nari bbai.” 30 Kpa nyǒ tso wengʉeni we. Føri kina, Yesu jangʉeri kpa dho li ndi li ndi dyu ro: “Anirr i lo bblo, nzɨ ddikpa le ma chu fø lo ro ddi.” 31 Ro, føga ro kpa vʉ ro, kpa bbengʉe ke nji ná fø lo fø bba gʉ lu gble.

32 Føga ro kpa ngʉ tuni ná saa na, ndrŭ singʉe gó kʉ nǎ ná nzɨ tso loti ná ke na Yesu dhi ngana. 33 Nzɨ tso ngʉ loti ná fø ke nǎ ro Yesu di gó nari goti, ke tingʉelo ti. Ná fø lo kengʉe ndrŭ nanga ke ndirigoti ndrŭ pongʉeri: “Afødi ná lo ro nzá d’erie njini Israeli nǎ ri.” 34 Ro, Bbafarisayo ngʉ ripo ɨ: “Fø ke ndrŭ nǎ gó di, gó djó bbonga dhó kpakpanga na.”

35 Yesu ngʉ adi bbi krʉ kʉ ná vile ma, vilaje ma na lú, ke ngʉ adi longaddi sinagogi lu, ke ngʉ adi Pidhinga dzá hwè lo-i d’ra ndirigoti ke ngʉ adi njonjo kʉ ná dhe ma, tsù ma na gø. 36 Ndrŭ kpari ke nja ro, ke ndrŭ dhi ri zø njingʉe bbo dhonalo ndrŭ ngʉe nza nzani ndirigoti pli nanga plini ná chembø bbai, nga ndima ró rø ná ke ro kʉ ro. 37 Føro ke pongʉeri ndi unakpa dho: “Nyo o bbo, ro njí dhi ndrŭ i kʉ sese. 38 Føri dho, aninziri nyo tso njudha dhi Bboke chó njí dhi ndrŭ ki ndidzá nyo tso njudha dho.”