Marko

8 Fø ddo kana maddi birobiro kʉ ná ndrŭ njungʉe ndima tso Yesu kuso, ro ndrŭ nyo ná ritsi ro nga ngʉeri. Føro ke nzingʉe ndi unakpa ndirigoti ke pongʉeri kpa dho: 2 “I ndrŭ dhi ri zø ma njinji dhonalo ndrŭ ma na ko di ddinga iga ddo 3 b’lo ndirigoti ndrŭ nyo ná ritsi ro kʉ nga. 3 Njati ma chó fø ndrŭ ndima bba lu ù na ró, ndrŭ ka ndima rá rrni ù dho chu na, dhonalo ndrŭ kana nja ri kʉ dada nga lu ro si ná ndrŭ.” 4 Ro, ke unakpa ngʉngʉe logoti ɨ: “Nga tsotso kʉ ná i ngana ká le ka le ba fø ndrŭ krʉ o ka ndi li na ná nyo ngbaga ro?” 5 Føro ke dhungʉeri kpa tso: “Nidhó ká mukati kʉ thɨ?” Kpa pongʉeri: “Saba.” 6 Føri goti ke jangʉeri birobiro kʉ ná ndrŭ di gʉna. Ndirigoti ke dzingʉe saba ngʉe ná mukati, ke pongʉe mbai, ke d’rɨngʉe ri nanga ndirigoti ke bbʉngʉe ri ndi unakpa dhona ro, kpa ndongʉe ri birobiro kʉ ná ndrŭ dho. 7 Kpadhó ngʉe nini bbè djú maddi, Yesu lengʉe ri ronga nari goti, ke pongʉeri kpa ndó føri maddi ndrŭ dho. 8 Ndrŭ nyongʉe nga ndima o li ná ngatsi ndirigoti kpa gbangʉe nyo tso kúkú tso pɨpɨ d’yó* saba. 9 Fø nyo nyongʉe ná kpetsi kpa ngʉe chøchø 4 000. Føri goti ke pongʉeri ndrŭ rará.

10 Føri goti thei, ke ma djingʉe ndi unakpa ma na bbú na ndirigoti kpa rangʉe Dalmanuta nǎ eneo na. 11 Føga Bbafarisayo nyangʉeni Yesu dhi ngana ndirigoti kpa ngangʉe ke na ndima ddani nari tso. Føri goti kpa ngʉ rinzi ke tso ke njí ra nǎ ro si ná ddikpa ddù, ndiri na ndima mbu ke d’e. 12 Fø lo bbʉngʉe njedha bbo ke thí dho nari dho ke pongʉeri: “I gø ká ddù ne addudho? Bbʉbbʉ dhé ma ripo ni dho, i gø nzɨ si ddikpa ddù ro ma nja ddi ri.” 13 Føro ke bbangʉe kpa bba ndirigoti ke ki djingʉe bbú na, føri goti ke dangʉe dda djolu adzɨ.

14 Ro, kpa ró mukati ndima d’u nari nga vingʉe vi, kpadhó ngʉe mukati ddikpa dhé bbú nǎ. 15 Ke jangʉe i lo kpa dho pʉlʉpʉlʉ: “Aniwe ni nyǒ tso, anib’o ni ronga Bbafarisayo ma, Herodi ma na dhó thì* ró.” 16 Føro kpa ngangʉe gʉ tso ndima kana ndima dhó mukati ro kʉ nga nari dho. 17 Fø lo utso Yesu d’i ro ke dhungʉeri kpa tso: “Ni ká gʉni nidhó mukati kʉ nga nari djó addudho? Ni djǒ ká lo d’e lø nzá dhé go? Ni ká ngaddi nzɨ? Ni thí ká o lɨ godhé lo ni famu nari dho? 18 ‘Nì mai ni nyǒ kʉ ro, ni ká nganja nzɨ? Nì mai ni bɨ kʉ ro, ni ká ngarr nzɨ?’ Ni ká ri nga no nzɨ? 19 Mbʉ kʉ ná mukati nanga ma d’rɨe nari 5 000 kʉ ná kpetsi kpa nyoe, ro ri tso kukú tso le nju nari ká sie dyó thɨ lu pɨpɨ? Kpa ngʉngʉe logoti: “Kumi na mbili.” 20 “Saba kʉ ná mukati nanga ma d’rɨe 4 000 kʉ ná kpetsi kpa dho ro, ri tso kukú gʉ ma nari ká sie bbobbo d’yó* thɨ lu pɨpɨ? Kpa ngʉngʉe logoti: “Saba.” 21 Føro ke dhungʉeri kpa tso: “Ni ká d’e lo famu nzá dhé go?”

22 Føri goti Yesu singʉe Betsaida na. Føga ndrŭ mbangʉe nzɨ nyǒ nganja ná ddikpa kpetsi ke ke dhi ngana ndirigoti ndrŭ ngʉ rinzi Yesu lø fø ke ronga. 23 Ke løngʉe nzɨ nyǒ ngʉ nganja ná fø ke thó ndirigoti ke rangʉe ke na ra bba kana ro. B’lo ke ze sadda ke nyǒ djo nari goti, ke lingʉe ndi thó ke djo ndirigoti ke dhungʉeri ke tso: “Ni ká ddikpa ritsi ro nja ddi?” 24 Ke ngbengʉe ndi nyǒ ro, ke pongʉeri: “Ma ndrŭ nja, ro ri njini tsú bbí nari bbai.” 25 Føro Yesu lingʉe ndi thó ki ke nyǒ djo ro, ke njangʉe nga pʉlʉpʉlʉ. Ke nyǒ gøngʉe gø; ke ngʉ krʉ ritsi nja bblo pli. 26 Føro Yesu pongʉeri ke ngʉ ndi bba ndirigoti ke pongʉeri ki: “I bba kana i nzɨ ni ki ngʉ.”

27 Føri goti Yesu ma rangʉe ndi unakpa ma na Filipi nǎ Kaisaria nǎ bbaka kpari na. Føro chu lu kpa ra ro, ke dhungʉeri ndi unakpa tso: “Ndrŭ ká ripo ma kʉ ie.” 28 Kpa pongʉeri: “Yohani Mubatizaji, ro, nja ndrŭ ripo Eliya, ndirigoti nja ndrŭ ripo ddikpa nabi.” 29 Føro ke dhungʉeri kpa tso: “Nde, ni ká ripo ma kʉ ie?” Petro ngʉngʉe logoti: “Ni kʉ Kristo.” 30 Føri goti ke jangʉeri ndi unakpa dho li ndi li ndi dyu ro nari kʉ, nzɨ kpa d’a fø lo ronga ro ddikpa le dho maddi. 31 Føri kina, ke ngangʉe ri ddidha tso kpa dho nari kʉ, ndrŭ Ddù dho ringani ndi dá bí kʉ ná nzadha lu ndirigoti ngó kpa ma, bbakuhani djó bbobbonga ma, nga ndi ná kpa ma na si ke gʉgʉ ndirigoti kpa si ke hwihwi, ro ddo gbo djó ke si gaga. 32 Fø lo ke ngʉ adi d’ra kpa dho pʉlʉpʉlʉ. Ro, Petro dzingʉe Yesu nga mbess ndirigoti ke ngangʉe o ndi o ke na nari tso. 33 Ro, Yesu lengʉe ndi thí ro, ke njangʉe nga ndi unakpa dhi ngana ndirigoti ke ongʉe Petro na ɨ ndi ripo ro: “Ada ma goti, Shetani! dhonalo ni nzɨ ngaddi Mungu bbai ri, ro ndrŭ bbai.”

34 Føri goti ke nzingʉe birobiro kʉ ná ndrŭ ma, ndi unakpa ma na ndi dhi ngana ndirigoti ke pongʉeri kpa dho: “Njati ddikpa ke jiri ndi rá ma ulu ró, fø ke dho ringani ndi gʉ ndi ndi ndiro, ndi d’ú ndidhó nzadha dhi tsú* ndirigoti ndi di ma dyø. 35 Njati ddikpa le di rine ndi gø ndidhó shinga* gø ró, fø le si ri vivi, ro ddikpa le vi ndidhó shinga* ma djotsina ndirigoti hwè lo-i djotsina ró, fø le si ri gøgø. 36 Njati ddikpa ke dho ngø ché lu, ro ke vi ndidzá shinga* i vi ró, føri dzá bblonga ká kʉ addu? 37 Ddikpa ke ka ndi bbʉ ndidzá shinga* ødha dho ná ritsi ro ká kʉ ddi? 38 Dhonalo, njati ddikpa ke djo do di pá ma djotsina ndirigoti madzá lo djotsina, nzɨ tøni chi Mungu dho ndirigoti chenga dhi i gø kana ró, ndrŭ Ddù djo maddi do si pa fø ke dzá lo dho, ndidzá Baba dzá kadha nǎ ndima si si ndidzá takatifu kʉ ná malaiká na ná dyi.”