Luka

2 Fø ddo kana Kaisari jangʉeri dz’ djó di ná ndrŭ krʉ rá ndima ró dho ndi.* 2 (Ya kwanza ndrŭ rangʉe ndima ró dho ndi* Kirenio ngʉe guvener Siria nǎ ná saa na.) 3 Krʉ kʉ ná ndrŭ ngʉ ra ndima ró dho ndi* ndima bbá bba gʉ dhé. 4 Yosefu maddi rangʉe Galilea dhi ngø nǎ Nazareti dhi bba gʉ ro, nja ndi dji Yudea dhi ngø nǎ Daudi dzá vile Betelehemu na d’e. Yosefu rangʉe følu dhonalo ke ngʉe Daudi ma bbá familia nǎ ke ndirigoti Daudi nǎ gø. 5 Ke ma rangʉe ndibbá le Maria ma na ndirigoti le ngʉe chøchø ndi si ngba ba. 6 Følu kpa ngʉe ro ngba le ka ndi gøe ná saa singʉe. 7 Le gøngʉe ndidzá sidjó kpetsi ngba ndirigoti le kungʉe ngba ronga tso rù na ndirigoti le langʉe ngba miya ngʉ adi nganyo nǎ ná no na dhonalo lʉ dhó dza nǎ nga ngʉe kpa di ná nga ro ri.

8 Fø bba gʉ ngʉe miya ró rø ná kpa, ná fø kpa ngʉe bbaidjó ndima dhó miya ronga ndima b’o kuna ro. 9 Chʉ Yova* dzá malaika tøngʉeni kpa nji ndirigoti Yova* dhó kadha ingʉe nga kpa ro lu gbru nari dho, do løngʉe kpa bbo. 10 Ro, malaika pongʉeri ɨ: “Nzɨ ni nji do, dhonalo aninja! Ma si bbò kʉ ná hwè lo-i d’ra ni dho ndirigoti ri kʉ ndrŭ krʉ si hwè ba dho ná lo, 11 njʉ Daudi dzá bba gʉ gødha ba gøni ni dho, føri i kʉ Bboke Kristo. 12 Ngba nyi ni si chu ró nari kʉ i ri: Ni si kalʉ ngba ro ku le ku ndi ronga tso ro, zǎ adi nganyo nǎ ná no nǎ le la ndi ro.” 13 Føro thei fø malaika kuso bí kʉ ná malaiká dhongʉe ndima ndirigoti kpa ngʉ Mungu má ɨ ndima ripo ro: 14 “Madha Mungu dho bbo pli ngbeni ná ngana ndi kʉ ro ndirigoti ngoi dz’ djó bblo kʉ ná ngaddidha na kʉ ná ndrŭ dho.”*

15 B’lo malaiká ngʉ ra na nari goti, miya ró ngʉ rø ná kpa ngʉ riti ɨ ndima kana: “Akora Betelehemu dhi bba gʉ ndiro ko nja Yova* d’ra ko dho ná nji njini ná fø lo d’e.” 16 Føro thei kpa rangʉe ndirigoti kpa singʉe Maria ma ro Yosefu ma na, zǎ adi nganyo nǎ ná no nǎ ndima la kalʉ ngba ro. 17 Fø lo ndima nja ro, kpa d’rangʉe kalʉ ngba djo le d’rae ndima dho ná lo. 18 Ndirigoti miya ró rø ná fø kpa d’rangʉe ná lo dho krʉ kʉ ná ndrŭ nanga kengʉeni ke. 19 Maria ngʉ adi fø lo krʉ ronga b’o ndi thí nǎ ndirigoti le ngʉ adi ngaddi bbo ri djo. 20 Føri goti miya ró ngʉ rø ná kpa ngʉngʉe ngʉ ndirigoti kpa ngʉ Mungu má rr ndima rr ndirigoti nja ndima nja ná lo dho, dhonalo ri njingʉeni kpa dho ri pongʉeni nari nganga bbai.

21 Ddo 8 djó le rangʉe ngba krrkrr, føro le lingʉe ngba ró dho Yesu, ná fø dho malaika lingʉe nzá ngba dzá mama d’e lɨnga ba ro.

22 Musa dhó Sheria pongʉeri nari bbai, kpa ka ndima ráe rili ndima tsetse Mungu nyǒ djó ná saa singʉe ro, kpa mbangʉe ngba Yerusalemu na ndiro ndima rá ngba dho Yova* nji d’e. 23 Yova dzá Yadha nǎ ri ndingʉeni nari bbai: “Ya kwanza gøni ná kpetsi nzø* krʉ ringangʉeni le nzí takatifu kʉ Yova* dho ri.” 24 Føro kpa bbʉngʉe bbʉdha ddiddi Yova* dzá Yadha pongʉeri nari bbai: “liri dhi rè aro inga jadda kʉ ná pijo aro.”

25 Føro anja! Yerusalemu nǎ ngʉe ddikpa kpetsi ke, ná fø ke ró dho ngʉe Simeoni. Føri ngʉe chølo dhi ke ndirigoti nì Mungu do nji ná ke. Ke ngʉ adi Israeli iso si pɨni nari b’o ndirigoti roho takatifu ngʉe nì ke djó. 26 Føri kina, ke dho Mungu dhongʉeri roho takatifu chulu nari kʉ, ke nzɨ dhe nzá ndi d’e Yova* dzá Kristo nja ró ri. 27 Roho dda chutso ndi dho ro, ke tsungʉe hekalu na Yesu dzá gø dhi ndrŭ singʉe Yesu dzá kalʉ na ndiro ndima njí Yadha nzingʉe ndima tso ná lo d’e ná saa na. 28 Ke d’ungʉe ngba ndi iso ndirigoti ke ngʉ Mungu má ɨ ndi ripo ro: 29 “Bbo pli kʉ bbonga na ná Bboke, kpadjo ni ka ni bbari nidzá njí dhi ke rá ngoi na, ni pongʉeri nari bbai, 30 dhonalo ma nja gødha bbʉ ná ke ma nyǒ nganga na, 31 fø ke ni tayarisha krʉ ndrŭ nyǒ njí, 32 ke kʉ, ndrŭ tsɨ nyǒ djó nga tso tsi ná kitambala si tu ná kadha ndirigoti ke kʉ nidzá ndrŭ Israeli dzá madha.” 33 Ndirigoti ngba dzá baba ma, ngba dzá mama ma na nanga ngʉ adi keni ke ngba djo ndrŭ ngʉ adi po ná lo dho. 34 Føri kina, Simeoni lengʉe kpa ronga ndirigoti ke pongʉeri ngba dzá mama Maria dho: “Anja! I ngba le vʉ nja kedzá lo djotsina Israeli kana nja ndrŭ bʉni bʉ inga bí kʉ ná ndrŭ dani da d’e ndirigoti ke sie che kʉ ná lo ndrŭ si tɨ djo ná alama, 35 (bbʉbbʉ dhé, da kʉ ná sà si ni nanga tø pluu) ndiro bí kʉ ná ndrŭ ddi ndima thí nǎ ná lo djó nga nyani d’e.”

36 Føri goti føga ngʉe ddikpa isɨ nabi maddi, Ana ndi ró dho kʉ ro. Føri ngʉe Fanueli dzá singba, Asheri dzá bbu nǎ le ndi kʉ ro. Fø le ngʉngʉe ngó b’lo ndirigoti le ma dingʉe ndibbá ke na cho 7 dhé ke na ndima chi ndoa nari goti. 37 Dhe bbá ke dhe ná fø le dhó cho ngʉe fø saa na 84. Le ro nzɨ ngʉ adi má hekalu nǎ ro ngbá dyi maddi ri. Le ngʉ adi takatifu njí nji kuna ma, dyina ma, ddironga nyo ndi chi nari ma, ddo nǎ ndi ddoni Mungu ró ná sala ndi nji nari ma na chulu. 38 Fø saa na thei, le ndringʉeni ndirigoti le ngangʉe mbai ndi po Mungu dho nari tso ndirigoti le ngangʉe lotidha tso fø ngba djo Yerusalemu dhó gødha ngʉ adi b’o ná ndrŭ krʉ dho.

39 B’lo ndima nji Yova* dhó Yadha nzingʉe ndima tso ná lo krʉ nari goti, kpa ngʉngʉe Galilea na, ndima bbá vile Nazareti na. 40 Ndirigoti fø jadda ngba ngʉ dhidhi ndirigoti ngba ngʉ ngʉ kpakpa. Kedhó nyod’yu ngʉ ra anzi ndirigoti ke tso ngʉ uni u Mungu na.

41 Krʉ kʉ ná cho ró Yesu dzá gø dhi ndrŭ ngʉ adi ra Yerusalemu na Pasaka dhi fete dho. 42 Føro 12 kedhó cho ngʉe ro, ke ma djingʉe fete dho, ddiddi ri nzingʉeni kpa tso nari bbai. 43 Fete dhi ddo tso d’yani nari goti, kpa ngʉ ngʉ ndima bba ro, jadda ke Yesu i mangʉe kpa goti Yerusalemu na ndirigoti kedhó gø dhi ndrŭ nzá d’ingʉe fø lo utso ro ri. 44 Kpa ngʉ riddi ke kʉ chu lu ndima ngʉ ra na ná birobiro kʉ ná ndrŭ kana. Ro, b’lo kpa bbi ddikpa cha blii nari goti, kpa vengʉe ke nedha tso nga ndima dhó familia ma, chu na ndima chuni ná ndrŭ ma na kalu. 45 Ro, kpa bangʉe ke nzá nari dho, kpa ngʉngʉe kpø Yerusalemu na ndirigoti kpa ngʉ ngba ne krʉ ngalu. 46 Ddo gbo goti, kpa vengʉe ra ke ba hekalu na, walimu kana ndi di ro. Ke ngʉ kpa rr ndirigoti ke ngʉ ngadhu kpa tso. 47 Ke ti ná lo ngʉ rr ná ndrŭ krʉ nanga ngʉ keni ke kedhó nyod’yu ma, ngbaribbai ma ke logoti ngʉ nari ma na dho. 48 Kedhó gø dhi ndrŭ nja ke ro, ndrŭ nanga kengʉeni bbo. Ndirigoti kedzá mama pongʉeri ɨ: “Madzá ngba, ni ká njiri ko ró fø addudho? Nidzá baba ma, ma ma na ko nanga rie d’o bbo ndirigoti ko ne ni krʉ ngalu.” 49 Ro, ke pongʉeri kpa ni: “Ni ká e ma ne addudho? Ni ká chu ma dho ringani ma é madzá Baba dzá dza nǎ nari nzá?” 50 Ro, kpa nzá famungʉe ke po ná lo ro ri.

51 Ke ma ngʉngʉe kpa ma na Nazareti na ndirigoti ke rangʉe anzi kpa dho ndi djøni* nari na. Føri kina, ledzá mama ngʉ adi fø lo krʉ ronga b’ob’o ndi thí nǎ. 52 Ndirigoti Yesu ngʉ dhi ndidhó nyod’yu ró ndirigoti ndi ndí ró, føri goti ke tso ngʉ uni Mungu na ndirigoti ndrŭ na.