Luka

4 B’lo ndi nanga li roho takatifu na nari goti, Yesu rangʉe ra Yordani dhi dda tso ró ro, ndirigoti roho ddangʉe chutso ke dho ngødja na. 2 Ke njingʉe ddo 40 ngødja nǎ, ná følu Diabolo mbungʉe ke. Fø ddo tso d’yani nari goti, ù løngʉe ke dhonalo ke nzá nyongʉe ddikpa ritsi ro maddi ri. 3 Føro Diabolo pongʉeri ke ni: “Njati rie nì ni kʉ Mungu ddù ri ró, apori i dju ngʉ mukati.” 4 Ro, ke ngʉngʉe logoti: “Ri ndini, ‘Ndrŭ dho nzá ringani ndi di shi mukati na dhé ri.’”

5 Føri goti Diabolo mbangʉe ke ngbe ngbeni ná ngana ndirigoti ke dhongʉe dz’ djó pidhinga krʉ ke dho sese saa kana dhé. 6 Føro, Diabolo pongʉeri ke dho: “Afø bbonga krʉ ma, ridzá kadha ma na ma si bbʉ ni dho, dhonalo ri le bbʉrie ma dho ndirigoti ma adi ri bbʉ ri ma ji ma bbʉ dho ná le dho. 7 Føri dho, njati ni njí ddikpa lo ni bbʉ na madha ma dho ró, føri krʉ si che ni dho.” 8 Yesu ngʉngʉe logoti ke dho: “Ri ndini, ‘Ringani ni má Yova* nidzá Mungu ndirigoti ri kʉ ke ddiro dho dhé ringani ni njí takatifu kʉ ná njí ri.’”

9 Føri goti ke mbangʉe ke Yerusalemu na, ndirigoti ke d’ungʉe ke hekalu djó bbo ngbeni ná ngana, ndirigoti ke pongʉeri: “Njati rie nì ni kʉ Mungu ddù ri ró, atini gʉna, 10 dhonalo ri ndini, ‘Ke si loja ndidzá malaiká dho ni djo ndiro kpa b’o ni ronga d’e,’ 11 ndirigoti ‘Kpa si ni d’u ndima thó thina ndiro nzɨ ddikpa dju ma b’ɨ ni kó ro ddi ró.’” 12 Yesu ngʉngʉe logoti ke dho: “Ri poni ɨ: ‘Ni dho nzá ringani ni mbu nidzá Mungu Yova* ri.’” 13 B’lo ndi d’ya ke mbudha tso krʉ nari goti, Diabolo bbangʉe ke ngbà thonga ná nja d’i saa ki dho.

14 B’lo ndi nanga li roho takatifu na nari goti, Yesu ngʉngʉe Galilea na. Ndirigoti ke djo ndrŭ ngʉ ti ná bblolo nanga plingʉeni fønga tsotso lu kʉ ná ngø krʉ lu. 15 Føri goti ke ngangʉe longaddidha tso sinagogi lu ndirigoti ke dho ndrŭ krʉ ngʉ adi heshima bbʉ.

16 Føri goti ke rangʉe ndi dhingʉe ná ngana Nazareti na ndirigoti nì ke ngʉ adi rinji Sabato ddo dyina nari bbai, ke tsungʉe sinagogi na ndirigoti ke dangʉeni røna ngazødha dho. 17 Føro, ndrŭ bbʉngʉe Isaya dzá unabi le ndi nǎ ná kú nanga le ku ná buku ke dhona. Ke wengʉe ri nanga ro, ke singʉe ɨ le ndiri ná nga ro: 18 “Yova* dzá roho kʉ ma djó dhonalo ke d’ri ma ché na ndiro ma d’ra hwè dhi lo-i njedha dhi ndrŭ dho d’e. Ke cho ma ndiro ma d’rari nari kʉ, prizo nǎ kʉ ná ndrŭ si kloni klo, nzɨ nyǒ nganja ná ndrŭ si nganja, d’ri nanga d’rini ná ndrŭ si kloni klo, 19 ndirigoti ndiro ma d’ra Yova dzá zølo dhi cho d’e.” 20 Føri goti ke kungʉe fø buku nanga kú, ke ngʉngʉe ri njí dhi ke dhona ndirigoti ke rangʉe di gʉna. Føro sinagogi nǎ ndrŭ krʉ ngʉ ke nja chøø. 21 Føri goti ke ngangʉe ri podha tso ɨ ndrŭ dho: “Kpadjo ni rr ná fø andiko njini nji njʉ.”

22 Ndrŭ krʉ ngʉ bblolo ti ke djo ndirigoti ndrŭ nanga ngʉ keni ke ke tso nǎ ro si ná lo ngʉ ndrŭ thí ronga lølø nari dho. Føri dho, ndrŭ ngʉ riti ɨ ndima kana: “I ri kʉ Yosefu ddù, ri ká nga fø ri?” 23 Føri goti ke pongʉeri kpa dho: “Bbʉbbʉ dhé ni si ripo ɨ ma ni, ‘Munganga, agø ni ni niro. Anji Kapernaumu nǎ ko rr e ni njie ná chá lo ro iga nibbá bba gʉ maddi.’” 24 Ke pongʉeri ki: “Bbʉbbʉ dhé ma ripo ni dho, ddikpa nabi ro ma nzɨ ddi ndrŭ adi ú ndima bbá bba gʉ ri. 25 Loroji na, bbʉbbʉ dhé ma ripo ni dho, Eliya dhó saa na Israeli nǎ che bbá kpa cheni ná isɨ ndrŭ ngʉe bí, ra tso chingʉeni cho gbo na bi aza kana ndirigoti ù chingʉe fø ngø lu na ná saa na. 26 Føro mai, Eliya ro nzá le chongʉe fø isɨ ndrŭ kana ddikpa le dhi ngana maddi ri, ro Sidoni nǎ Sarefati dhi ngø nǎ ngʉe ná dhe bbá ke dhengʉe ná le dhi ngana dhé. 27 Godhé, Nabi Elisha dhó saa na, Israeli nǎ korøkorø dhi ndrŭ ngʉe bí, ro i, fø ndrŭ kana ddikpa le ró korøkorø ro ma nzá ddi gøngʉeri, ro Siria nǎ Naamani dhé.” 28 Fø lo ndima rr ro, sinagogi nǎ ngʉe ná ndrŭ krʉ nanga kangʉeni bbo. 29 Føri dho, ndrŭ dangʉeni ro, ndrŭ drrngʉe ke lele vile nǎ ro arugu. Ndrŭ rangʉe ke na ndima bbá vile le chi djó ná ngøtsɨ djo ndiro ndima dze ke førø ro, agʉ ndima le ke djǒ ro d’e. 30 Ro, ke dangʉe ndrŭ kalu ro, ke rangʉe ra ndi dho.

31 Ke thʉngʉe Galilea nǎ Kapernaumu le nzǐ ná vile na ndirigoti ke ngʉ longaddi ndrŭ dho sabato ddo dyina, 32 ndirigoti ndrŭ nanga kengʉeni bbo kedhó longaddidha dho. Dhonalo ke ngʉ longaddi bbonga na kʉ ná ke bbai. 33 Føro sinagogi nǎ ngʉe gó kʉ nǎ ná ke, ná fø ke ngʉ ndi nanga jø ɨ: 34 “Ah! Ni ma na ká ri di ngbǎ ko kana, Nazareti nǎ Yesu? Ni ká si ko sadha dho? Ma chu ni ká kʉ ie nari bblo pli, ni kʉ Mungu dzá Takatifu kʉ ná Ke.” 35 Ro, Yesu tangʉe ri djó ɨ: “Ago ddi ndirigoti avʉ fø ke nǎ ro!” Føri dho, b’lo gó bʉ ke kpa kana nari goti, ri vʉngʉe vʉ ke nǎ ro, nzá ndi nji chelo ro ke ró ro. 36 Fø lo kengʉe ndrŭ nanga bbo ndirigoti ndrŭ ngʉ riti ndima kana: “Føri ká kʉ ngbà di ná lo? Ke loja bbonga na ndirigoti kpakpanga na gó dho ndirigoti ri vʉvʉ ndrŭ nǎ ro!” 37 Føri dho, ke djó lo ngʉ ga fø ngø nǎ krʉ kʉ ná ngalu.

38 Sinagogi nǎ ro ke vʉ nari goti, ke rangʉe Simoni bba. Ndirigoti Simoni dhi djana fievre dhi dhe ngʉ nji bbo nari dho, kpa nzingʉeri ke kó le tsotso. 39 Føro Yesu ndringʉeni le kuso ro, ke tangʉe le ró ngʉe ná fø dhe djó, nari goti fø dhe singʉe si le ró ro. Føro thei le dangʉeni ndirigoti le ngangʉe nyo ridha tso kpa dho.

40 Dyi tsu nari goti, njonjo dhe kʉ ró ná ndrŭ kʉ bbá ná ndrŭ krʉ singʉe dhe nji ná fø ndrŭ na Yesu dhi ngana. Ke gøngʉe fø ndrŭ krʉ ndi thó ndi li kpa djo ddiddi ro nari na. 41 Føri kina, gó nyangʉeni bí kʉ ná ndrŭ nǎ ro ndirigoti ri ngʉ ndima nanga jø ɨ: “Ni kʉ Mungu Ddù.” Ro, ke ngʉ tá ri djó ta ndirigoti ke nzɨ ngʉ ribba ri tilo ri dhonalo ri chungʉe ke kʉ Kristo nari chu.

42 Bbʉtso kukú, ke dangʉeni ro, ke rangʉe di nga ndrŭ kʉ ná ngana. Ro, birobiro kʉ ná ndrŭ ngangʉe ke nedha tso. Ke ro ndima si ro, ndrŭ mbungʉeri ndima cho ke tso cho ndiro nzɨ ke ra ndima kʉ ná nga nǎ ro d’e. 43 Ro, ke ngʉngʉe logoti: “Ringani ma d’ra Mungu dhó Pidhinga dzá hwè lo-i nja vile lu maddi, dhonalo føri i kʉ ma le chongʉe dho ná lo.” 44 Føri dho, ke rangʉe lod’ra Yudea nǎ ngʉe ná sinagogi lu.