Roma

12 Le-djoi, Mungu dho ndidzá zølo ni dho nari dho, ma rinzi ni bbʉ ni ndí ndi é takatifu kʉ ná ngbà tso Mungu u ná shi di ná bbʉdha. Føri kina, aninji njí nidhó ngaddidha dhi kpakpanga na ke dho ni njínji nari kana. 2 Nzɨ ni bbari i dz’* lé ni nyi ki. Ro, anibbari Mungu lé ngbaribbai ma ni ngaddi nari thí ndiro ni neri ni niro ni chú Mungu ji ná lo, bblo ndi kʉ ro, u ndi tso uni ro ndirigoti ka ndi ka ro.

3 Mungu dhongʉe nzá tso ka ndi koe le djo ná zølo ma dho nari djotsina, ma rija ni krʉ dho, nzɨ ni di ngaddi ni djo ni dho ringani ná nga djolu. Ro, aniddinga ni djo ngbà thonga nari bbai ndirigoti ni d’ilo ni djo Mungu bbʉ* ni dho ná udha ró ro. 4 Dhonalo le ndí ró sehemu e bí, ro ri krʉ i nzɨ adi ddikpa njí nji ri. 5 Føri nganga bbai, nì mai ko kʉ bí ro, ko krʉ chɨ ddikpa le ndí, ddi ndi tso gbani Kristo na ro. Ro, ko ddiddi ro, ko kʉ le ndí ró sehemu, nja ri kʉ nja ri lai. 6 Ko krʉ kʉ ritsi njidha dhi njonjo kʉ ná kpakpanga na, Mungu dho nzá tso ka ndi koe le djo ná zølo ko dho nari bbai. Føri dho, njati ko é unabi d’radha dhi kpakpanga na ró, akod’ra unabi kodhó udha kʉ ná ngatsi; 7 njati rie njí bbʉni kodhó ri ró, akonji ri nji; rie longa ko ddi ri ró, akoddi longa; 8 inga rie kpakpa ni nja ndrŭ li ri ró, ali ndrŭ kpakpa; rie ritsi ni ndo* nja ndrŭ dho ri ró, ando* ri ngadhi d’ya ro; rie ndrŭ njí ni adi tøni* ri ró, anjiri fø klø na;* rie zølo ni dhǒ ndrŭ dho ri ró, anjiri fø hwè na.

9 Ringani ni é bbʉbbʉ kʉ ná jidha na. Anindro che kʉ ná ritsi ndirigoti anichini bblo kʉ ná lo na. 10 Anijini ni kana ddikpa familia nǎ ndrŭ bbai ndirigoti anidho bbʉbbʉ kʉ ná jidha ni kana. Heshima ni dhǒ ni dho ni kana nari nǎ anidi ya kwanza.* 11 Aninji njí kpakpanga* na; nzɨ ni nji tss.* Anibbari roho takatifu bbʉ klø ni dho. Aninji njí Yova* dho ni thí nǎ ro krʉ. 12 Anibbari nidhó ngab’odha bbʉ hwè ni dho. Anive kpakpalo tso ndirigoti nzɨ ni bba sala njidha tso. 13 Anibbʉ nidhó ritsi ro Mungu dzá ndrŭ dho, kpadhó lo u ri ró. Anine lʉ ni ka ni kó ná chu ro. 14 Anile nza ni nzá ná ndrŭ ronga; anile kpa ronga le, ro nzɨ ni wa kpa wa. 15 Hwè nji ná ndrŭ na aninji hwè; dzzdzz ná ndrŭ na anidzz dzz. 16 Anidi ngaddi nja ndrŭ djo, ni djo ni adi ngaddi nari nganga bbai. Nzɨ ni di nga gʉ ddi ni djo i pli, ro anibbari nyenyenga dhi ngaddidha ddá chutso ni dho. Nzɨ ni ngʉ nyod’yu ni nganga nyǒ djó.

17 Nzɨ ni wø chelo be ro chelo ró ddikpa le dho maddi. Anidi rine ni chú ndrŭ krʉ nyǒ djó kʉ bblo nari ká kʉ ngbá lo nari. 18 Rie ngbà ri ka ri ró, ni dho ri ka ndi ka ná ngatsi, aninji ngoi ndrŭ krʉ na. 19 Madzá ji dhi ndrŭ, nzɨ ni wø ni be ni niro, ro anibbanga Mungu dzá thø dho; dhonalo ri ndini ɨ: “‘Le be wødha kʉ madzá ri, ma i si kʉ ri be ngʉ,’ Yova* pori.” 20 Føri ró ro njonjo, “njati nidhó mbuba é ù na ró, abbʉ nyo ke nyó, ke é dda d’yu na ró, abbʉ dda ke jø; dhonalo fø ni rinji nari na ni kazz lɨlɨ tso nju ke djǒ djo.”* 21 Nzɨ bbari chelo si ni djolu, ro adi si chelo djolu bblolo na.