Roma

11 Føri dho ma ridhu, nde, Mungu ká bba ndidzá ndrŭ bba? Ri nga kʉ fø ri! Dhonalo ma maddi kʉ Israeli nǎ ke, Abrahamu nǎ gø ndirigoti Benjame dhó bbu nǎ ke. 2 Mungu nzá bba ndidzá ya kwanza ndi vʉngʉe ná ndrŭ ro ri. Ni ká chu ndi ndini ná lo po Eliya djo ná lo nzá ndirigoti ngbaribbai ma ke bbøngʉe Israeli nga Mungu dho nari nzá? Ke pongʉeri ɨ: 3 “Yova,* kpa che nidzá bbanabi krʉ; kpa d’rɨ nidzá mazabahu d’rɨ. Ma gʉ ma ddiro dhé ndirigoti kpadjo kpa rine ndima hwi ma.” 4 Nde, Mungu ká ngʉngʉe kedhó logoti ngbǎ? “Ma b’o kpetsi kpa ronga ma dho ma maro 7 000, ná fø kpa nzá ma Baali ro ri.” 5 Kpadjo maddi ri kʉ fø. Vʉ vʉni ná ndrŭ gʉ di sese dhé, Mungu dhó nzá tso ka ndi koe le djo ná zølo dzá lo dho. 6 Nde, rie Mungu dzá nzá tso ka ndi koe le djo ná zølo dzá lo dho ró, føro nga ri ka ndi é njí ko nji ró ná ritsi ri. Dhonalo rie fø ró, kedzá nzá tso ka ndi koe le djo ná zølo nga kʉ nzá tso ka ndi koe le djo ná zølo ri.

7 Nde, fø lo djo ká ko ka ko po ngbá lo? Israeli bbá ndrŭ nzá bangʉe ndima jingʉe ná ritsi nganga ro ri. Vʉ vʉni ná sese kʉ ná ndrŭ dhé bangʉe ri. Ro, nja ndrŭ gʉngʉe ri gʉ. 8 Ddiddi ndi ndini ná i lo pori nari bbai: “Mungu chingʉe bbò kʉ ná ddo kpa djo, ndiro nzɨ kpa nyǒ njanga ndirigoti nzɨ kpa bɨ rrnga kpø njʉnga djo ró.” 9 Godhé Daudi pori: “Abbari kpadhó fete ngʉ mutego ndirigoti ngapɨdha dhi mbi ndiro kpa bʉni ri na ndirigoti kpa ba malipizi d’e. 10 Aliri kpa nyǒ djó nga tɨ mbi ndiro nzɨ kpa njanga d’e ndirigoti aliri kpa dzi nanga d’oni d’ó bbò kʉ ná no kʉ ndima djó nari dho.”

11 Ma ridhu ɨ: “Wayaudi kó ri b’ɨngʉe ro, ká kpa bʉngʉeni theinga dho? Nzá! Ro, ri kʉ kpa kó ri b’ɨ ná føri dzá lo dho i nja ndrŭ tsɨ ba gødha ri, ná føri liri Wayaudi njí dda. 12 Kpa kó ri b’ɨ nari liri dz’ bɨni bɨ ndirigoti kpa ngʉ aluti nari liri nja ndrŭ tsɨ ba mali bbo. Ndiro ledha gʉ sie bbo Wayaudi krʉ ma tso si gbani ndrŭ tsɨ na ná saa na d’e.

13 Kpadjo ma loti nga kʉ Wayaudi ná ndrŭ ni dho. Ma kʉ ndrŭ tsɨ dho le cho ná ke nari dho, ma adi ma nji ná fø njí nja mana na bbo. 14 Føri kina, ma riddi njaro ma i liri kobbá ndrŭ ngá dda njidha tso ni ba ná ritsi djotsina, ndiro kpa kana nja kpa ba gødha d’e. 15 Kpa le bbabba ná føri i liri dz’ djó nja kʉ ná ndrŭ ngʉ Mungu dzá kau. Njati ke ú kpa tso ki vi kpadjo ró, ri sie ddiddi che kpa cheeni ro, le ngʉ kpa ki shi vi nari bbai. 16 Godhé, njati mukati dhi dzi ro le kle le bbʉ ya kwanza le bbʉ Mungu dho ná ritsi, nari é takatifu ró, fø dzi gʉ di nari maddi kʉ takatifu. Føri goti njati ddikpa tsú tɨtɨ é takatifu ró, fø tsú ró lerr maddi kʉ takatifu.

17 Ro, tsú ró nja kʉ ná lerr le krrngʉe krr. Ndirigoti nì mai ni kʉ tsó nǎ muzeituni dhi tsú ro, ni le lingʉe ma gʉ ma tsú ro ná lerr kina. Kpadjo ni nyo nari kʉ muzeituni dhi tsú tɨtɨ bbʉ ná bblo kʉ ná nyo. 18 Ro, nzɨ ni di riddi nari kʉ, ni kʉ bblo pli nja lerr djolu.* Njati ni di riddi nari kʉ, ni kʉ bblo pli nja lerr djolu* ró, aninonga nari kʉ, ri nga kʉ ni i tsú tɨtɨ tsotso kó ri; ro tsú tɨtɨ i ni tsotso kó. 19 Ni kana nja ndrŭ si ripo: “Nja tsú lerr kpari le krrngʉe ndi ngana le zʉ ma d’e.” 20 Føri kʉ bbʉbbʉ! Kpa le krrngʉe kpa ngʉe udha na nga nari djotsina, ro ni kʉ føga ni kʉ udha na nari dho. Føri dho, nzɨ ni nji nodha; ro anidi do na. 21 Njati rie nzá Mungu b’oe tø tøe tsú ró ro ná lerr nganga ronga ma ri ró, ni ká riddi ni ronga i ke ka ndi b’ob’o ri? 22 Ni njari ngbà nari kʉ Mungu kʉ zølo na, ro makali maddi. Ke e makali laidjo nari kʉ, ndima kʉ udha na nga nari dho bʉni ná ndrŭ. Ro, ke sie zølo na ni laidjo njati ni rá anzi ngbà kedzá zølo nǎ ró. Ni njiri fø nzá ró, ni nganga ma le si krrkrr i tsú ró ro. 23 Njati Wayaudi ngá udha dhodha tso ki vi ró, le si kpa ki ngʉ vi tsú ro, dhonalo Mungu ka ndi ngʉ kpa ki ngbà føga. 24 Ni le krrngʉe tsó nǎ muzeituni tsu ró ro, nari goti le zʉngʉe ni abba muzeituni tsu ro, nzá Mungu nongʉeri nari bbai. Nde, føro ri gʉ kʉ sʉsʉ bbo, le ngʉ nì ngʉe abba muzeituni tsu ró ná lerr ki ndima ngʉe ró ná tsú ro!

25 Dhonalo ma jiri le-djoi, ni chu takatifu i siri chu ndiro nzɨ ni ngʉ nyod’yu ni nganga nyǒ djó ró: “Israeli nǎ nja ndrŭ d’yungʉe ndima djǒ kpakpa kpø nja ndrŭ tsɨ krʉ ndima tso gba ná nga djo, 26 ndirigoti føri i kʉ ngbaribbai ma Bbaisraeli si kʉ gødha ba nari. Ddiddi ndi ndini ná lo pori ná i ri bbai: “Gødha ba si si Sioni nǎ ro ndirigoti ke si che kʉ ná lo tu krʉ Yakobo nǎ gø kana ro. 27 Ndirigoti føri i kʉ kpa na ma si kʉ nji ná koddo, kpadhó chenga ma si kʉ tu da ná saa na.” 28 Bbʉbbʉ dhé, Wayaudi kana nja kpa kʉ hwè lo-i ró mbubai, ná føri bbʉ faida ni dho. Ro, ri kʉ kpa i Mungu vʉngʉeri ndirigoti ke ji kpa ji kpa bbui djotsina. 29 Mungu nanga ro nzɨ b’lo ndi bbʉngʉe ná kado si d’o ri ndirigoti ke nzi ndrŭ nari nzɨ si kʉ ke nanga ro d’o ri. 30 Dhonalo ni nzɨ ngʉ adi nga ro rr Mungu dho ri, ro ni dho zølo dhoni Wayaudi rrnga nzá nari djotsina. 31 Kpadjo Wayaudi i kʉ nzɨ ngarr ná kpa, ná føri dho i zølo dhoeni ni dho. Ro, ke ka ndi dhǒ zølo ki kpa dho maddi, ni dho ndi dhoe ri nari bbai. 32 Dhonalo Mungu liri kpa krʉ é nzɨ le ngarr nari dhi prizo nǎ ndiro ndi dhǒ zølo kpa krʉ dho d’e.

33 Mungu dhó mali ma, nyod’yu ma, lochudha ma na kʉ bbo pli! Kedhó lod’idha nanga ro nzá ka ndi neni ri ndirigoti kedzá chu ro nzá le ka le famu ri! 34 Nde, ie i ká chu Yova* dhó ngaddidha ndirigoti ke dho ká ie ka ndi bbʉ shauri?” 35 Inga “ie i ká wøngʉe ritsi nji Mungu dho, ná ndiri i Mungu ngʉ ke dho d’e?” 36 Dhonalo krʉ kʉ ná ritsi si Mungu dhó ro, ri si ke chulu ndirigoti kedzá lo dho. Ke ka madha dho theinga dho. Amina.