Luka

1 Bí kʉ ná ndrŭ vʉeri ndima ngá ngandidha tso u nganga ko urie ná i lo djo, 2 kpa ndi ri, ddiddi nja njaeri ritso ngani ná nga nǎ ro ndirigoti lod’radha dhi njí bbʉngʉeni dhó ná kpa d’rari ko dho nari nganga bbai, 3 ná føri dho, ma maddi ma vʉeri ma ndí fø lo ni dho ri kpeni nari nganga bbai bboke Teofilo, dhonalo ma neeri ma chú fø lo krʉ dzá d’ʉnga ritso ngani ná nga djó ro. 4 Ndiro ni chú ni dho le d’rae le tso na ná lo krʉ dzá bbʉbbʉnga d’e.

5 Herodi* ngʉe Yuda nǎ pi ná cho nǎ, ddikpa kuhani ró dho ngʉe Zekaria, fø ke ngʉe nǎ ná kikundi le ngʉ adi nzǐ Abiya. Kebbá le ngʉe Haruni dzá sinzø kana ddi singba, ná fø le ró dho ngʉe Elizabeti. 6 Kpa aro ro krʉ ngʉe chølo dhi ndrŭ Mungu nyǒ njí, dhonalo Yova* ja ná lo ma, yadha ma na krʉ kpa ngʉ adi dyø nga nǎ kosa ro. 7 Ro, kpadhó nga ngʉe nzø ro ri, dhonalo Elizabeti nzɨ ngʉ adi nzø ro ba ri ndirigoti kpa aro ro krʉ dhó cho rangʉe anzi bbo b’lo.

8 Ddikpa cha Zekaria ma ngʉ kuhani dzá njínji ndima dhó kikundi na Mungu njí, 9 bbakuhani dhó njí kpengʉeni* nari bbai ro, ri tso singʉe ke djo ndiro ke tsu Yova* dzá takatifu kʉ ná ngana ndi rá uvumba bɨ d’e. 10 Føro uvumba ke ngʉ bɨ ná saa na, birobiro kʉ ná ndrŭ kpari krʉ ngʉ nganzi bbaidjó. 11 Føro Yova* dzá malaika dhongʉe ndi ke dho ndirigoti malaika tøngʉeni uvumba dhi mazabahu dzá thá djó ro. 12 Malaika ndi nja ro Zekaria ronga rɨngʉeni rɨ ndirigoti ke do løngʉe bbo. 13 Ro, malaika pongʉeri ke dho: “Zekaria, nzɨ nji do, dhonalo nidhó ddo nǎ ni ddoni Mungu ró ná sala ke rrrr, nibbá le Elizabeti si kpetsi ngba gø ni dho, ndirigoti ringani ni li ngba ró dho Yohani. 14 Ni sie hwè na bbo pli ndirigoti bí kʉ ná ndrŭ nanga si jini ji fø ngba gøni nari dho, 15 dhonalo ke sie bbo pli Yova* nyǒ njí. Ro, ke dho nzá ringani ndi jø wa inga rǐ le rǐ ná ddikpa ritsi ro maddi ri ndirigoti ke nanga si lili roho takatifu na gø ke gøni nari njí ma krʉ ddi,* 16 ndirigoti ke si Israeli ddui kana bí kʉ ná kpa ki ngʉ vi kpadhi Mungu Yova* ro. 17 Føri kina, ke si bbi Mungu njí Eliya djó ngʉe ná roho ma, kpakpanga ma na na, nja ndi ngʉ nzø bai thí nzø djo ndirigoti ke si nzɨ ngarr ná ndrŭ tsotso ko ndima njinjí nyod’yu na chølo dhi ndrŭ bbai, ndiro ndi tayarisha nì kʉ tayari ná ndrŭ tsɨ Yova* dho d’e.”

18 Zekaria dhungʉeri malaika tso: “Fø lo kʉ bbʉbbʉ nari ká ma ka ma chu ngbaribbai? Dhonalo ma kʉ ngó ndirigoti mabbá le maddi ngʉ ngó.” 19 Malaika ngʉngʉe logoti: “Ma kʉ Gabrieli, Mungu njí adi tøni ná ke ndirigoti ma le cho ma tilo ni na, nja ma d’ra i hwè dhi lo-i ni dho d’e. 20 Ro, anja! Ni tso si chini chi ndirigoti ni dho nzɨ lo ro tini kpø fø lo si njini ná nga djo ri, dhonalo ni nzá u ma tso nǎ lo ri, ndi dho le li ná saa na ndi si njini ro.” 21 Fø saa kana ndrŭ ngʉ Zekaria dhé b’o, ro ndrŭ nanga ngʉ keni ke, ke dingʉe dree takatifu kʉ ná ngana nari dho. 22 Arugu ke ve si ro, ke tsori lotidha gʉngʉe gʉ, føro ndrŭ d’ingʉe ri utso nari kʉ ke nja ddikpa ddù* takatifu kʉ ná ngana. Ke ngʉ loddi ndrŭ dho ndi thó na dhonalo ke dho nzɨ lo ro ngʉ tini ri. 23 Kedhó takatifu njí dhi ddo tso d’yangʉeni ro, ke ngʉngʉe ngʉ ndi bba.

24 Fønga djó ro ddo ro da sese ro, kebbá le Elizabeti bangʉe lɨnga ndirigoti le rungʉeni bi mbʉ kana dhonalo le ngʉ ripo ɨ: 25 “I ri kʉ ma dho Yova* nji i ddo kana ná lo. Ke li ndi d’yu ma ro ndirigoti ke tu do adi pá dho ma djo ndrŭ kana ná lo ma djó ro.”

26 Bi aza Elizabeti dhó lɨnga singʉe ro, Mungu chongʉe malaika Gabrieli Galilea na, Nazereti dhi vile na, 27 nzá ro d’e ddo kpetsi ke na ná ddikpa singba ngba dhi ngana, fø ngba ró dho ngʉe Maria ndirigoti ngba ngʉ si køni Daudi dzá dza nǎ Yosefu ró dho ngʉe ná ddikpa ke dho. 28 Malaika tsungʉe le dhi ngana ro, ke pongʉeri: “Yambø, bbo pli kʉ ná bblolo njini dho ná le, Yova* kʉ ni na nì.” 29 Fø lo hwingʉe le djǒ bbo pli ndirigoti le ngʉ rine ndi chú fø zʉdha nǎ ká kʉ ngbá lo nari. 30 Føro malaika pongʉeri le dho: “Maria, nzɨ nji do dhonalo nidzá lo tho Mungu nyǒ tho. 31 Arr di! ni si lɨnga ba ndirigoti ni si kpetsi ngba gø, ná fø ngba ró dho ringani ni li Yesu. 32 Ke sie bbo kʉ ná ke ndirigoti ke le si nzi Bbo pli ngbeni ná ngana kʉ ná Ke dhi Dduna ndirigoti Yova* Mungu si le bbu Daudi dhó pi dhi kiti bbʉ ke dho. 33 Ke si pinyo Yakobo dzá dza djo theinga dho ndirigoti kedhó Pidhinga tso ro nzɨ si d’ø ri.”

34 Ro, Maria dhungʉeri malaika tso: “Føri ká ka ndi njini ngbaribbai? Dhonalo ma ro nza d’erie ddo kpetsi ke na ri ró.” 35 Malaika ngʉngʉe logoti le dho: “Roho takatifu si si ni djo, ndirigoti Bbo ngbeni ná ngana kʉ ná Ke dzá kpakpanga si ni djó nga tso tsi ndidzá sʉsʉ na. Ri kʉ føri dzá lo dho i le si gø si gøni ná fø ngba nzi takatifu kʉ ná ke ndirigoti Mungu Ddù ri. 36 Anja nidhó familia nǎ le Elizabeti maddi kʉ lɨnga na, ndidzá ngó djó, ledhó lɨnga kʉ b’lo ndi si bi aza ro, føri kʉ nzɨ adi nzø ba ri ndrŭ ngʉ nzǐ ná le; 37 dhonalo nzá ka Mungu dho ná lo* ro nga kʉ ri.” 38 Føro Maria pongʉeri: “Anja! Ma kʉ Yova* dzá njí dhi le! Nde, abba ri njini ma ró, ni po nari bbai.” Føro malaika rangʉe ra le kuso ro.

39 Føri goti Maria dangʉeni ro, le rangʉe lele Yudea nǎ bbobbo glʉ kʉ nǎ ná ddikpa vile na. 40 Føro le tsungʉe Zekaria bba ndirigoti le zʉngʉe Elizabeti ronga. 41 Ndi ronga Maria zʉ nari Elizabeti rr ro, Elizabeti zz nǎ ngʉe ná ngba jangʉe ndi ronga ja, ndirigoti le nanga lingʉe li roho takatifu na. 42 Ndirigoti le pongʉeri bbò ndi chu na: “Ni ronga leni le krʉ kʉ ná isɨ ndrŭ kana ndirigoti ni zz nǎ kʉ ná ngba ronga maddi leni le.” 43 Ma ká kʉ ie ndiro ma kó madzá Bboke dzá mama ma bba d’e? 44 Dhonalo anja! Nidhó zʉdha ma rr ná saa na, ma zz nǎ kʉ ná ngba jae ndi ronga hwè na. 45 Hwè na kʉ nari kʉ ni, Yova* dhó ro si ná lo ni ue ro, dhonalo fø lo krʉ si njini nji.

46 Føro Maria pongʉeri: “Madzá shinga* Yova* má, 47 ndirigoti ma thí nzɨ bba madzá Gødha ba Mungu nǎ ndi hwè nji nari tso ro ri, 48 dhonalo ke nja ndidzá njí dhi nga na mana kʉ ná le. Bbʉbbʉ dhé, kpadjonga djó ro krʉ kʉ ná gø si ma nzi hwè na kʉ ná le. 49 Dhonalo bbo pli kʉ kpakpanga na ná ke nji ké ka ndi ke le nanga ná lo ma dho, ndirigoti ke ró dho kʉ takatifu, 50 krʉ ddo ró ke adi zølo dhǒ ndi do nji ná ndrŭ dho. 51 Ke nji ké ka ndi ke le nanga ná lo ndi kù na ndirigoti nodha dhi ngaddidha na kʉ ndima thí nǎ ná ndrŭ nanga ke plipli. 52 Kpakpanga na kʉ ná ndrŭ ke thʉthʉ ndima dhó pi dhi kiti djó ro, ro nyenyenga dhi ndrŭ ke ngbengbe. 53 Ke liri ù hwi ná ndrŭ o lili bblo kʉ ná ritsi na ndirigoti ke di mali dhi ndrŭ nga thó thi ritsi ro. 54 Ke ko ndidzá njí dhi ke Israeli tsotso ko ndirigoti ke no ndidzá zølo nga, 55 ddiddi ke tsongʉeni fø lo djo ko bbui ma, Abrahamu ma, ke nǎ gø ma na dho, cho ró nŭnŭnga dho nari bbai.” 56 Maria ma dingʉe le ma na bi gbo ndirigoti Maria ngʉngʉe ngʉ ndi bba.

57 Elizabeti sie ngba ba ná saa singʉe ro, le gøngʉe kpetsi ngba. 58 Føro bba kana ndrŭ ma, le ma dhó familia nǎ ndrŭ ma na rrngʉe Yova* dho zølo le dho nari ro, ndrŭ njingʉe hwè ddironga le ma na. 59 Ddo 8 djó ndrŭ singʉe ndima krr ngba krr d’e, ro ndrŭ ngʉ riji ndima li ngba dzá baba Zekaria ró dho ngba ro. 60 Ro, ngba dzá mama pongʉeri ɨ: “Nzɨ! Ke ró dho di Yohani.” 61 Føro ndrŭ pongʉeri le dho: “Nde, nidhó familia nǎ nga fø ró dho kʉ ná ndrŭ ro kʉ ri.” 62 Føro kpa dhungʉe ie ma ngba dzá baba riji le li ngba ró dho nari ke tso ndima thó na ndima lo ddi ro. 63 Føro ke kongʉe ddikpa karr tabulo nø, ná ri djo ke ndingʉeri: “Ke ró dho kʉ Yohani.” Fø lo kengʉe ndrŭ krʉ nanga ke. 64 Føro thei ke tso wengʉeni ndirigoti ke dà klongʉeni ro, ke ngangʉe lotidha tso ndirigoti ke ngangʉe Mungu madha tso. 65 Føri dho, kpa kuso lu ngʉe chøchø ná ndrŭ krʉ do løngʉe ndirigoti Yudea nǎ bbobbo glʉ ngʉe nǎ ná eneo nǎ ndrŭ krʉ ngangʉe lotidha tso fø lo djo. 66 Fø lo ngʉ rr ná ndrŭ krʉ lingʉe fø lo ndima thí na ndirigoti ndrŭ ngʉ ridhu: “Fø ngba ká si ngʉ ngbà di ná ke?” Dhonalo, bbʉbbʉ dhé Yova* ngʉe fø ngba na nì.

67 Føro ngba dzá baba Zekaria nanga lingʉe li roho takatifu na ndirigoti ke ngangʉe unabi d’radha tso, ɨ ndi ripo ro: 68 “Israeli dzá Mungu Yova* ba madha dhonalo ke be zø ndidzá ndrŭ djó ndirigoti ke klo kpa klo. 69 Ke bbʉ kpakpa kʉ ná gødha ba ko dho,* ndidzá njí dhi ke Daudi dzá dza nǎ ro. 70 Ddiddi ndi pongʉeri ndidzá takatifu bbanabi chulu drrdrrnga djó ro nari bbai. 71 Fø gødha ba si kʉ ko gø kodhó mbubai dhó ro ndirigoti ndrondro ko ná ndrŭ krʉ dhó ro. 72 Fø ke chulu Mungu si zølo dho ko dho ko bbui dho ndi pongʉeri nari bbai ndirigoti ke si ndi njingʉe ná takatifu koddo ngano. 73 Føri kʉ kodhi bbuna Abrahamu dho ke njingʉe ná tsodha 74 nari kʉ, ke si ritso u ko dho, b’lo ko kloni kodhó mbubai dhó ro nari goti, ko ba bblonga ko njí takatifu kʉ ná njí ndi dho ngadhi do ro, 75 chi ko tøni ro ndirigoti chølo ko nji ro kodhó maisha lu nǎ. 76 Ro ni, re ngba, ni le si kʉ nzi arø pli ngbeni ná ngana kʉ ná ke dzá nabi, dhonalo ni si bbi Yova* njí kedzá chu nanga thɨdha dho, 77 ndiro ni d’rari kedzá ndrŭ dho nari kʉ, ke si kpa gø kpadhó chenga zø ke si nji nari chulu, 78 kodhi Mungu dzá bbò kʉ ná zølo djotsina. Fø zølo djotsina bbʉtso kadha si si ko djo røna ro 79 nja ndi í nga tɨtɨnga nǎ di ná ndrŭ ma, dhe dhi sʉsʉ nǎ di ná ndrŭ ma na dho d’e ndirigoti ndi ddá chutso ko kó dho ngoi dhi chu lu d’e.”

80 Fø re ngba ngʉ dhidhi ndirigoti ngba ngʉ ngʉ kpakpa Mungu dzá roho chulu. Ndirigoti ngba dingʉe ngødja nǎ kpø ndi ve ndi dho Israeli bbá ndrŭ krʉ dho pʉlʉpʉlʉ ná nga djo.