Roma

13 Ringani ko di ngarr bbobbonga na kʉ ko djo ná kpa* dho, dhonalo ddikpa bbonga ro ma nga ddi ka ndi é nzá Mungu u ri tso ró ri. Kpa kʉ na ná bbonga kʉ ndi dho Mungu li ná mupaka na. 2 Njati ko di ddani kpadhó bbonga tso ró ró, ko ddani Mungu kpe ná lo tso ró. Fø lo kpedha tso ró tøni ná ndrŭ djo lo si d’ini. 3 Bblolo nji ná ndrŭ nǎ nga e leta bbá bbobbonga do ro ri, ri kʉ chelo nji ná ndrŭ i adi kpa do nji ri. Ni dho nzá ringani ni njí bbobbonga do ri dhonalo njati rie bblolo ni nji ró, kpa si ni ma ma. 4 Kpa kʉ Mungu dzá njí dhi kpa, nidhi bblonga dho. Ro, njati ni njí chelo ró ni kpa do nji dho ná lo kʉ nì. Bbonga ma, kpakpanga ma na bbʉni kpa dhó ndiro ndima bbʉ malipizi chelo nji ná ndrŭ dho d’e. Kpa kʉ Mungu dhó njí dhi kpa ndiro ndima di malipizi bbʉ chelo nji ná ke dho d’e.

5 Ni kʉ bblo kʉ ná sababu na ni rrnga kpa dho, ro ri nga kʉ nja ni b’o ni ronga kpadhó thø ró dhé d’e ri, ro nja ni é bblo kʉ ná zamiri na d’e. 6 Ri kʉ fø lo dho i ni adi palata ma wø ddi ri, dhonalo kpa kʉ Mungu dhó njí dhi kpa ndrŭ krʉ dhi bblonga dho ndirigoti kpa adi njínji krʉ saa ró fø kusudi dho. 7 Kpa krʉ dho anibbʉ kpa dho ngani ná ri: Palata wø ná ke dho anibbʉ palata; kitas wø ná ke dho anibbʉ kitas, ndi do ji le njí ná ke do aninji nji, heshima ji ná ke dho anibbʉ heshima.

8 Nzɨ ni ro ma ddikpa le dzá ddeni na maddi; rie nga ji ni jini ni kana nari dhé ri ró, dhonalo ddikpa ke ji ndi lai ró, fø ke nji yadha nǎ kʉ ná lo. 9 Dhonalo yadha pori ɨ: “Ni dho nzá ringani ni njí uzinifu* ri, ni dho nzá ringani ni hwi ndrŭ ri, ni dho nzá ringani ni njí gbʉ ri, ni dho nzá ringani ni tamani nja ndrŭ dhó ritsi ri,” ndirigoti Yadha nǎ kʉ ná nja lojadha krʉ nanga le ngʉ dʉ chu nǎ ɨ: “Ringani ni ji ni lai ni nganga ni ji nari bbai.” 10 Jidha nzɨ adi chelo ro nji ndi lai ró ri; føri dho jidha kʉ krʉ le nji yadha nǎ kʉ ná lo ri.

11 Ni dho ringani ni njí fø lo dho nari kʉ, nidhó saa kaka nja ni che ddo nǎ ro d’e. Kodhó gødha kʉ chøchø pli lo ko ungʉe ro ri ngʉe ná nga djolu. 12 Kunanga nanga ra da b’lo ndirigoti nga bbʉ ná saa kʉ chøchø, føri dho akobba tɨtɨnga nǎ ndrŭ adi nji ná nyi tso, ro akotho kadha nǎ le adi njínji na ná là njidha dhi ritsi. 13 Akonjini bblo, dyina ritsi nji ná ndrŭ bbai: Nzɨ ko di nga djolu le nji ná fete nji ndirigoti nzɨ ko di wa rɨ, nzɨ ko nji uasherati ndirigoti ndá le nji ná nzɨ dho do pá le djo ná nyi* ma, gʉ le gʉni nari ma, dda le nji nari ma na. 14 Føri rɨngana, anidyø Bboke Kristo Yesu dhó loroji, ndirigoti nzɨ ni kpe ni ndí dzá ù tso gbadha nzina.