Matayo

10 Ndi una 12 kʉ ná kpa ke nzi nari goti, ke bbʉngʉe kpakpanga kpa dho ndiro kpa di gó ndrŭ nǎ ro ndirigoti kpa gø njonjo kʉ ná dhe ma, tsútsu ná ndrŭ ma na d’e.

2 Yesu chongʉe ná 12 ngʉe ná kpa ró dho kʉ ena: Ya kwanza ri kʉ Simoni, Petro le ndi nzi ro ndirigoti kedhi djona Andrea; føri goti kʉ Zebedayo ddui Yakobo ma, Yohani na; 3 Filipo ma, Bartolomayo na; Tomas ma, Matayo kitas tso njudha dhi ke na; Yakobo Alfayo ddù; ndirigoti Tadayo; 4 Simoni Mukananayo;* ndirigoti Yuda Iskariote, luti ndi dzingʉe Yesu nanga ro.

5 Yesu chongʉe 12 kʉ ná fø kpa ná saa na, ke jangʉe i lo kpa dho: “Nzɨ ni ra ndrŭ tsɨ dhi ngana ndirigoti nzɨ ni ro tsu Samaria nǎ ddikpa vile na maddi.” 6 Føri rɨngana anira ni né Israeli bbá vivi ná chembø dhé. 7 Chu lu ni bbi ná saa na, anid’rari: “Ra nǎ Pidhinga kʉ chøchø.” 8 Anigø dhe, aniga bʉ, aniliri korøkorø dhi ndrŭ tsetse ndirigoti anidi gó. Ni ba ri pá, ró anibbʉ ri ndrŭ dho pá. 9 Nzɨ ni d’u or ma, mbøkpa ma, kuivre ma, 10 nyo dhi kpʉ ma ni dhona chu nǎ bbi dho, rù lai ma, ss ma, gongo ma nzɨ ddi. Dhonalo njí dhi ke dho ka ná nyo ringani le bbʉbbʉ ke dho.

11 Ni tsu ddikpa vile na inga vilaje na ró, anine ngbà jiri ndi rr nidhó lo ná ke ndirigoti anidi fø bba gʉ kpø ni tuni ná nga djo. 12 Ddikpa dza na ni tsu ró, anizʉ fø dza kʉ ná ndrŭ ronga. 13 Njati kpa jiri ndima rr ni ngbà ró, kpa ba ni jie kpa ba ná ngoi, ro kpa rr ni nzá ró, nidhi ngoi ngʉ ni dhi ngana. 14 Ddikpa dza nǎ ndrŭ inga ddikpa vile nǎ ndrŭ kó ni nzá inga ndrŭ rr ni d’ra ná lo nzá ró, fø dza inga fø vile nǎ ro ni ra ró, anicho ni kó ró hø. 15 Bbʉbbʉ dhé ma ripo ni dho, Lod’idha dhi ddo dyina Sodomu ma, Gomora ma na nǎ ndrŭ dhó lo ro sie bblo fø bba ndrŭ djolu.

16 Anirr di! Ma ni cho chembø bbai tsó nǎ tsɨ kana. Føri dzá lo dho, anidi krr su bbai ndirigoti nga nǎ kosa ro bbǎna bbai. 17 Anib’o ni ronga ndrŭ ró, dhonalo ndrŭ si kʉ ni mba bba kalu kʉ ná tribinale nji ndirigoti ndrŭ si kʉ ni dhɨ ndima dhó sinagogi lu. 18 Ni ndrŭ si mba guverner ma, pikpa ma na nji lu ma djotsina ndiro lo d’rani kpa ma, ndrŭ tsɨ ma na dho d’e. 19 Lod’idha dhi nga lu ndrŭ ni mba ná saa na, nzɨ ni bbari rid’o ni nanga ni si po ná lo ma, ngbaribbai ma ni si ripo nari ma na dho, dhonalo ni si po ná lo le si bbʉ ni dho fø saa na. 20 Dhonalo loti nari nga kʉ ni dhé ri. Ro, ri kʉ nidhi Baba dhó roho i loti ni chulu ri. 21 Godhé, nja ke si ndidhi djona bbʉ le hwihwi, ngba dzá baba si ndidzá ngba bbʉ ndirigoti nzø si tsa ndima dhó gø dhi ndrŭ ro, ndirigoti ndima liri le che fø ndrŭ ché. 22 Krʉ kʉ ná ndrŭ si kʉ ni ndrondro ma ró dho djotsina. Ro, ngbà ve ngatso kpø mwisho djo ná ke si gødha ba. 23 Ndrŭ nzá ni i vile nǎ ró, aninyinga nja vile na. Dhonalo bbʉbbʉ dhé, ma ripo ni dho, ni nzɨ dya Israeli bbá vile kpari tso ro krʉ nzá ndrŭ Ddù d’e si ro ri.

24 “Longa le ddi dho ná ke ro nzá darie ndidhó mwalimu djolu ri, ndirigoti noke ro nzá darie ndidzá bboke djolu ri. 25 Njati longa le ddi dho ná ke si ndidhó mwalimu tsi ndirigoti noke si ndidhó bboke tsi ró, føri kaka. Nde, njati dza dhi bboke ndrŭ nzi Belzebuli* ró, dza nǎ kʉ ná ndrŭ gʉ ká ndrŭ ka ndima nzi fø dho na ngbá ngatsi? 26 Føri dzá lo dho, nzɨ ni nji kpa do, dhonalo ruruni ná lo krʉ si keni ke ndirigoti nzá d’e chuni ná lo krʉ si chuni chu. 27 Tɨtɨnga nǎ ma d’ra ni dho ná lo anid’ra kadha nǎ, ndirigoti bbølobbølo nǎ ma d’ra ni dho ná lo anira jø dza djó ro. 28 Ndirigoti nzɨ ni nji le ndí hwi ná ndrŭ do, nzá ndima ka ndima hwi nafsi* ro. Føri rɨngana, aninji do nari kʉ nafsi ma, le ndí ma na krʉ ka ndi sa Gehena* na ná ke. 29 Aro kʉ ná wanyoí nanga ká le adi dzi sese dhó valer kʉ ná mbøkpa* ddikpa ró nzɨ? Føro mai, ri kana ddikpa ri ro ma nzɨ ddi adi chi gʉna nzá nidhi Baba chu ndi ro ri. 30 Bbʉbbʉ dhé, ni djoká ma krʉ nanga zøni zø. 31 Føri dho, nzɨ ni nji do dhonalo nidhó valer dada bí kʉ ná wanyoí kpari djolu.

32 “Njati ddikpa ke dhǒ ndi kʉ ma unake nari ndrŭ nyǒ njí ró, ma si ke kʉ ma unake nari dho madzá ra nǎ Baba nyǒ njí. 33 Njati ddikpa ke gʉ ma ndrŭ nyǒ njí ro, ma maddi si kʉ ke gʉ madzá ra nǎ Baba nyǒ njí. 34 Nzɨ ni di ridya nari kʉ ma si ngoi li i dz’ djo; ma nzá si ngoi li ri, ro ma si sà li. 35 Dhonalo ma si kpetsi ngba ma kana nga ndo ndidzá baba na, singba ngba ma kana nga ndo ndidzá mama na ndirigoti møle ma kana nga ndo adjandi na. 36 Bbʉbbʉ dhé, ddikpa ke dzá mbubai ka sie ke ma bbá adzá ndrŭ nganga. 37 Njati ddikpa le ji ndidzá baba inga ndidzá mama ma djolu pli ró, fø le nzá ka ma dho ri; ndirigoti ddikpa le ji ndidzá kpetsi ngba inga ndidzá singba ngba ma djolu pli ró, fø le ma nzá ddi ka ma dho ri. 38 Njati ddikpa le d’u ndidhó nzadha dhi tsú* nzá ndirigoti ndi rá ma ulu ró, fø le nzá ka ma dho ri. 39 Njati ddikpa le di rine ndi b’o ndidhó shinga* ronga ró, fø le si ri vivi, ro ddikpa le vi ndidhó shinga* ma djotsina ró, fø le si ri baba.

40 “Ddikpa le kó ni ró, fø le ko ma maddi; ndirigoti ddikpa le kó ma ró, fø le ko cho chongʉe ma ná Ke maddi. 41 Ddikpa le kó nabi ri kʉ nabi nari dho ró, fø le si ndi kobe ba nabi ba ri ná ngatsi; ndirigoti ddikpa le kó chølo dhi ke, ri kʉ chølo dhi ke nari dho ró, fø le si ndi kobe ba chølo dhi ke ba ri ná ngatsi. 42 Ndirigoti ddikpa le bbʉ sʉsʉ djø ná dda ro kopo ddikpa dhé rere afø kpa kana ddikpa ke jø ke kʉ ma unake nari dho ró, bbʉbbʉ dhé ma ripo ni dho, fø le nzɨ ka ndi kobe ro vi ri.”