Marko

9 Føri kina ke pongʉeri kpa dho: “Bbʉbbʉ dhé, ma ripo ni dho, iga kʉ ná ndrŭ kana nja ndrŭ ro nzɨ cheni, nzá ndima d’e Mungu dhó Pidhinga si kpakpanga na nari nja ro ri.” 2 Ddo aza goti, Yesu dzingʉe Petro ma, Yakobo ma, Yohani ma na ndirigoti ke ma rangʉe bbo ngbeni ná ddikpa ngøtsɨ djo, kpa ma na dhé. Føro ke nyi lengʉeni kpa nji. 3 Ke ró arugu rù ngʉ chacha ndirigoti ri ngʉngʉe sawø bbo pli, nzá i dz’ djó ddikpa le ma ka ndi ngʉ ri ro ddi sawø nari bbai. 4 Føri goti, Eliya ma, Musa ma na dhongʉe ndima kpa dho ndirigoti kpa ngangʉe lotidha tso Yesu na. 5 Føro Petro pongʉeri Yesu dho: “Rabi, ri kʉ bblo ko di iga. Føri dzá lo dho, abbari ko chi bbadza gbo iga; ddikpa ri ni dho, ddikpa ri Musa dho, ndirigoti ddikpa ri Eliya dho.” 6 Bbʉbbʉ dhé, ke nzá chungʉe addu ma ndi ka ndi po nari ro ri, dhonalo kpa do ngʉ nji bbo. 7 Føri goti ddikpa ndundu singʉe nari tsɨngʉe kpa djó nga tso nari nǎ ro ddikpa lechu singʉe nari pongʉeri: “I ri kʉ, madhi Dduna bbo ma ji ná ke, anirrnga ke dho.” 8 Føro thei kpa njangʉe nga ndima ro lu gbru ro, kpa nzá njangʉe ddikpa le ro maddi ri, rie nga Yesu dhé ri ró.

9 Ngøtsɨ djó ro kpa ngʉ thʉ ro ke jangʉeri kpa dho li ndi li ndi dyu ro, nzɨ kpa d’ra ndi ká kʉ ie nari ro ddikpa le dho maddi, kpø ndrŭ Ddù ga che cheni ná ndrŭ kana ro ná nga djo. 10 Kpa b’ongʉe fø lo ronga ndima thí nǎ,* ro kpa ngʉ loti ndima kana ke ripo ndi si gaga ná føri na mana ká kʉ addu ma nari djo. 11 Føro kpa ngangʉe ri dhudha tso ke tso ɨ: “Ká addu dzá lo dho nga ndi ná kpa adi ripo, ringani Eliya i si vi?” 12 Ke ngʉngʉe logoti: “Ringani Eliya i si vi ndiro ndi thɨ krʉ kʉ ná lo thika d’e; nde, ká ngbaribbai ri ndini ndrŭ Ddù dho ringani ndi dá bí kʉ ná nzadha lu ndirigoti ndrŭ bé ndi pá? 13 Bbʉbbʉ dhé ma ripo ni dho, Eliya sie b’lo, ro kpa nji ndima thí ji ná lo krʉ ke ró, ddiddi ri ndingʉeni ke djo nari bbai.”

14 Yesu ma ngʉ ndi una nja kpa dhi ngana ro, ke ma singʉe birobiro kʉ ná ndrŭ d’e kpa ronga tso ro ndirigoti nga ndi ná kpa ngʉ ndima tso nanga lé kpa ma na. 15 Føri goti birobiro kʉ ná ndrŭ njangʉe ke ná saa na, ndrŭ nanga kengʉeni ke, nari goti ndrŭ d’angʉe ke dhi ngana ke ronga zʉdha dho. 16 Føro Yesu dhungʉeri ndrŭ tso: “Ni ká e ni tso nanga lé kpa ma na addu djó?” 17 Birobiro kʉ ná ndrŭ kana ro ddikpa ke ngʉngʉe logoti: “Mwalimu, ma sie madhi dduna na ni dhi ngana dhonalo ke nǎ kʉ ná gó rili nzɨ ke tilo. 18 Ri ngá ngba nzadha tso ró, ri adi ngba nanga bu gʉna, b’usa adi vʉ ngba tso nǎ ro, ngba adi ndi kùdjo ka ndirigoti ri adi ngba ró klø sisi. Ma nzieri ni unakpa di fø gó ngba nǎ ro, ro kpa tsonga ri gʉe gʉ.” 19 Ke ngʉngʉe logoti kpa dho: “Nga dhó udha kʉ ná i gø! Ni na ká ma di kʉ thɨcha? Ni tso ká ma ve kʉ thɨcha? Anisi ke na ma dhi ngana.” 20 Føro ndrŭ singʉe ngba na ndirigoti Yesu ndi nja ro, ri jangʉe ngba nanga che sani nari goti ri bʉngʉe ngba gʉna, ná føri dho ngba ngʉ ndi dze gʉgʉlu b’usa ra ndi nǎ ro ro. 21 Yesu dhungʉeri ngba dzá baba tso: “Ri ká nji ke thɨcha b’lo?” Ke ngʉngʉe logoti: “Ke dzá renga djó ro. 22 Bí ina ri lø ngba ró, ri adi ngba bʉ kazz na inga dda na ndiro ndi hwi ke hwi d’e. Ro, njati rie ngbà ni ka ni njí ddikpa lo ro ri ró, kirikiri abe zø ko djo ndirigoti ako ko tsotso. 23 Føro Yesu pongʉeri: ‘‘Ká addudho ni ripo, ‘Njati rie ngba ri ka ni dho ró’! Krʉ kʉ ná ritsi kaka nì kʉ udha na ná ke dho.” 24 Føro ngba dzá baba høngʉe ɨ: “Ma kʉ udha na nì! Ako ma tsotso njati rie vʉ madhó udha tso vʉni ri ró!”

25 Føro Yesu njangʉeri birobiro kʉ ná ndrŭ si lele ndima dhi ngana ro, ke tangʉe fø gó djó ndirigoti ke pongʉeri: “Ndrŭ tso adi chi ndirigoti ndrŭ bɨ tso adi dya ná gó, ma ripo ni dho, avʉ fø ngba nǎ ro ndirigoti nzɨ ni ki ngʉ ngba na!” 26 B’lo ndi hø ndirigoti b’lo ndi ja ngba nanga bbo nari goti, gó vʉngʉe vʉ ngba nǎ ro. Ro, ngba ngʉ njani dhedhe nari bbai, føro bí kʉ ná ndrŭ ngʉ ripo: “Ngba dhedhe!” 27 Ro, Yesu løngʉe ngba thó, Yesu dangʉe ngba ndirigoti ngba dangʉeni røna. 28 B’lo ke tsu ddikpa dza na nari goti, ke unakpa singʉe ke dhi ngana ndirigoti kpa dhungʉeri ke tso nga ndrŭ kʉ ná ngana: “Fø gó ká dieni ko dho nzá addudho?” 29 Ke ngʉngʉe logoti: “Fø di ná ri adi vʉ sala chulu dhé.”

30 Føga ro ke ma ra ro, ke ma dangʉe Galilea lu, ro ke nzá jingʉeri ddikpa le ma chu fø lo ro ddi ri. 31 Dhonalo ke ngʉ adi riddi ndi unakpa dho ɨ: “Ndrŭ Ddù si bbʉni ndrŭ thó thina, ndirigoti kpa si ke hwihwi, ro ddo gbo djó ke si gaga.” 32 Ro, kpa nzɨ ngʉ adi ke po ná fø lo ro famu ri ndirigoti ke tso ndima ngadhu nari do ngʉ kpa njinji.

33 Føri goti kpa singʉe Kapernaumu na. Ro, b’lo kpa tsu adzá nari goti ke dhungʉeri kpa tso: “Ni káe ddani ni kana addu djó chu nǎ?” 34 Kpa gongʉe ddi dhonalo, chu nǎ kpa ngʉ gʉni ndima kana ie i ká kʉ bbo nari djó. 35 Føro gʉna ke di nari goti ke nzingʉe 12 kʉ ná kpa ndirigoti ke pongʉeri kpa dho: “Njati ddikpa ke jiri ndi é ya kwanza ró, fø ke dho ringani ndi é ya mwisho ndirigoti ndi é ndrŭ krʉ dhó njí dhi ke.” 36 Føri goti ke dzingʉe ddikpa re ngba nø, ke lingʉe fø ngba kpa kana, ke lingʉe ndi thó ngba kù djo ndirigoti ke pongʉeri: 37 “Ddikpa ke kó i di ná re ngba ma ró dho djotsina ró, fø ke ko ma maddi. Ndirigoti ddikpa ke kó ma ró, fø ke nzá ko ma dhé ri, ro ke ko cho chongʉe ma ná ke maddi.”

38 Yohani pongʉeri ke dho: “Mwalimu, ko njae ddikpa ke ni ró dho na ndi gó pʉ ro. Ro, ko mbueri ko gʉ ri gʉ ke dho dhonalo ke nzɨ ko dyø ri.” 39 Yesu ngʉngʉe logoti: “Nzɨ ni mburi ni gʉ fø ke tso, dhonalo ddikpa le ma nzá ddi ka ndi njí ddù ro ma ró dho na ndirigoti ndi ti chelo ma djo thei føri goti ri. 40 Dhonalo nzɨ ddani ko tso ró ná ke kʉ ko laidjó. 41 Ndirigoti ddikpa ke bbʉ dda ni jø kopo ddikpa ni kʉ Kristo unakpa nari dho ró, bbʉbbʉ dhé ma ripo ni dho, fø ke nzɨ ka ndi kobe ro vi ri. 42 Ro, njati ddikpa le liri ma djo kʉ udha na ná rere i kpa kana ddikpa ke bʉni ró, ri kʉ bblo pli le sʉ kana adi drr ná ngaudha dhi dju fø le chu ndirigoti le bu le jʉdda d’u djo.

43 “Rie ni thó rili ni bʉni ri ró, akrr ri krr ni ró ro dhonalo ri kʉ bblo ni ba shinga ddikpa ni thó kʉ ro, ni thó aro na ni ra Gehena* na, nzá ro ka ndi dheni ná kazz na nari djolu. 44* —— 45 Rie ni kó rili ni njí chelo ri ró, akrr ri krr ni ró ro dhonalo ri kʉ bblo ni ba shinga ddikpa ni kó kʉ ro, ni kó aro na le ni bu Gehena* na nari djolu. 46* —— 47 Rie ni nyǒ rili ni bʉni ri ró, abu ri da ni ró ro. Ri kʉ bblo ni tsu Mungu dhó Pidhinga na ddikpa ni nyǒ kʉ ro, ni nyǒ aro na le ni bu Gehena* na nari djolu. 48 Følu nzɨ sakpa ro adi cheni ri ndirigoti følu kʉ ná kazz ro nzɨ adi dhe ri.

49 “Nja ke ddiro na ringani le li kʉ kazz chulu. 50 Kʉ e bblo pli. Ro, njati kʉ vi ndidzá wáwanga vi ró, ká ni ka ni ngʉ ridzá wáwanga ki ngbaribbai? Ri kʉ bblo ni é kʉ na ni lu ndirigoti ni é ngoi na ni kana.”