Adi nga nǎ do ro Sadoki bbai

1-2. Sadoki ká ngʉe ie? (1 Mambo ya Nyakati 12:22, 26-28)

ADDINGA i lo djo. Dada 340 000 djolu ná kpetsi kpa nju ndima tso nja ndima li Daudi ndi é Waisraeli djó pɨ d’e. Fø kpetsi kpa dingʉe gbo cha chøchø ngʉe Hebroni nǎ ro ná dju kʉ ró ná glʉ djó. Kpa ngʉ ngagbo, kpa ngʉ loti ndirigoti kpa ngʉ Yova madha dhi dyi ngo. (1 Ny. 12:39) Sadoki ró dho kʉ ná jadda ke ngʉe fø kpa kana, bí kʉ ná ndrŭ ka ndima é ngʉe nzá ndima nja ke ro. Ro, Yova njangʉe ke nja ndirigoti ke jiri ko churi nari kʉ Sadoki ma ngʉe føga ddi. (Azø 1 Mambo ya Nyakati 12:22, 26-28.) Nde, Sadoki ká ngʉe ie?

² Sadoki ngʉe kuhani ndirigoti kpa ngʉ adi njínji Bbò Kuhani Abiatari na. Føri kina Mungu bbʉngʉe nyodyu bbo Sadoki dho ndirigoti ke bbʉngʉe ndi ji ná lo ke famu na ná kpakpanga maddi ke dho. (2 Sa. 15:27) Ndrŭ ka ndima sie nyodyu dhi shauri ko Sadoki tso ndima dhó lo u le tsotsokodha ná saa na. Føri kina ke ngʉe nga nǎ do ro ngʉe ná kpetsi ke. I lo nǎ ko si lochu ngbaribbai ma Sadoki dhongʉe ndi nga nǎ do ro nari djo.

3. (a) Yova dzá njí dhi ndrŭ dho ká ringani ndima é nga nǎ do ro addudho? (b) I lo nǎ ká ko si loti ngbá lo djo?

³ Ngasini ná i saa na, Shetani rine bbo ndi sa ko kana kau Yova na anziro nga djolu. (1 Pe. 5:8) Kodhó lo ri u ko é nga nǎ do ro ndiro ko ve ngatso kpø Yova si Shetani ma, i dz’ ma na tso d’ø ná nga djo. (Zb. 31:24) Akonja Sadoki ngʉe nga nǎ do ro nari ko ka ko dyø lu ná gbo kʉ ná chu.

AKO MUNGU DHÓ PIDHINGA TSOTSO

4. Ká addudho Yova dzá ndrŭ dhó lo uri ndima é nga nǎ do ro ndiro ndima kó Mungu dhó Pidhinga tsotso d’e? (Anja ji maddi.)

⁴ Yova dzá ndrŭ ko kʉ ro, ko adi Mungu dhó Pidhinga tsotso kó ko thí nǎ ro krʉ, ro bí ina ri adi ngani ko é nga nǎ do ro ndiro ko njiri fø d’e. (Mt. 6:33) Loroji na, che kʉ ná i dz’ djó, ringani ko é nga nǎ do ro ndiro ko dyø Yova dhó yadha kodhó maisha nǎ ndirigoti ko d’ra Pidhinga dzá hwé lo-i d’e. (1 Te. 2:2) Føri kina dz’ djó ndrŭ nanga ndoni bbo politiki dhi lo kana. Føri dzá lo dho ringani ko é nga nǎ do ro ndiro nzɨ ko tsu ko ro ddikpa nga laidjo ma ró. (Yoh. 18:36) Yova dzá ndrŭ kana bí kʉ ná ndrŭ adi bani mbø dhi kpakpalo na, nja kpa ndrŭ adi nzanza inga nja kpa ndrŭ adi tsu prizo na ndima nzɨ ndima tsu politiki dhi lo na inga ndima gʉ sødda dzá njí djo ndima ra nari gʉ nari djó.

5. Sadoki dho ká ringangʉeni ndi é nga nǎ do ro nja ndi kó Daudi tsotso d’e addudho?

⁵ Sadoki nzá rangʉe Hebroni na nja ndi njí Daudi ngʉ pi nari dhi fete dhé ri. Ro, ke ngʉe ndidhó là njidha dhi no na ndirigoti tayari lɨ njidha dho. (1 Ny. 12:38) Ke ngʉe tayari ndima rá Daudi ma na lɨ dhi ngana nja ndi njí Israeli djó lɨ d’e. Sadoki ka ndi é nzá ndi chungʉe lo bbo lɨ njidha djo ro, ro ke ngʉe nga nǎ do ro ngʉe ná kpetsi ke.

6. Daudi ká bbangʉe bblo kʉ ná loroji nga nǎ do ro le kʉ nari kana Sadoki dho ngbaribbai? (Zaburi 138:3)

⁶ Nde, addui ká lingʉeri Sadoki é nga nǎ do ro? Ke chungʉe lo ndidhó saa na ngʉe ná kpakpa ngʉe ndirigoti nga nǎ do ro ngʉe ná kpetsi kpa dhó ro. Bbʉbbʉ dhé, ke chungʉe lo bbo kpadhó loroji nǎ ro. Daudi ngʉe nga nǎ do ro ngʉe ná ke ndirigoti ke ngʉe bblo sødda ná føri dho Waisraeli krʉ jingʉeri ndima li ke ndi é pi. (1 Ny. 11:1, 2) Daudi ngʉ adi ndi thí li Yova djo nja ke kó ndi tsotso ndi si ndidhó mbubai djolu d’e. (Zb. 28:7; azø Zaburi 138:3.) Føri kina, Sadoki chungʉe lo ndidhó saa na ngʉe ná nga nǎ do ro ngʉe ná kpetsi kpa dhó ro, føri i kʉ Yehoyada ma, ndidhi dduna sødda ngʉe ná ke Benaya ma na ndirigoti 22 ngʉe ná bbobbonga Daudi tsotso ndima ngʉ kó ro. (1 Ny. 11:22-25; 12:26-28) Fø kpetsi kpa krʉ vʉngʉeri ndima li Daudi ndi é pɨ ndirigoti ndima b’o ke ronga b’o.

7. (a) Njʉ ndima dhǒ nga nǎ do ro ná kpadhó lo nǎ ro ká ko ka ko ba ngbá somo? (b) Video nǎ le tilo djo ná le-djo Nsilu dhó lo nǎ ro ká ko ka ko ba ngbá somo?

⁷ Njati ko di ngaddi ngbaribbai ma nja ndrŭ dhongʉe ndima nga nǎ do ro ndiro ndima tøni chi Yova ma, kedhó Pidhinga ma na dho nari djo ró, føri adi ko ronga cho ndiro ko maddi dhǒ ko nga nǎ do ro d’e. Kodhi Pi Kristo Yesu nyingʉe Shetani dhó i dz’ djó politiki dhi lo na ndi ndi tso tsu nari bbo i dz’ djó ndi ngʉe ná saa na. (Mt. 4:8-11; Yoh. 6:14, 15) Krʉ ddo ró ke ngʉ adi ndi thí li Yova bbʉ ndi dho ná kpakpanga djo. Føri kina i ddo ró kʉ gʉgʉ sødda dzá njí ma, politiki dhi lo na ndima ndima tso gba nari ma na ná jadda kpa dhó loroji bí. Azø kpa dalu ná lo jw.org djó.a

AKO NI DJOI TSOTSO

8. Wazee dhó lo ká uri ndima é nga nǎ do ro ngbá saa na ndiro ndima kó ndima djoi tsotso d’e?

⁸ Yova dzá ndrŭ jirie ndima tsotso ndima kó ndima kana nari ji. (2 Ko. 8:4) Nì mai ri kʉ føro, ddikpa saa na ri adi ri u le é nga nǎ do ro ndiro le njiri fø d’e. Loroji na, lɨ dhi saa djo wazee adi ndima djoi ma, ndima vei ma na li kpakpa. Føri kina, kpa adi ndima djoi tsotso kó kiroho nǎ ndirigoti kimwili nǎ. Wazee jirie ndima djoi ma, ndima vei ma na bbo, føri dzá lo dho i kpa adi kpa dhó lo u ná ritsi bbʉ kpa dho, njati rie hatari ma fø ndima rinji nari kʉ ri ró. (Yoh. 15:12, 13) Fø chu nǎ kpa adi Sadoki dhó loroji dyø nga nǎ do ro ndi ngʉe ro.

9. 2 Samweli 15:27-29 nǎ ká Daudi pongʉeri Sadoki njiri ngbǎ? (Anja ji maddi.)

⁹ Akonja ngbaribbai ma Sadoki vʉngʉeri ndi kó ndi djoi tsotso kpakpalo dhi saa na nari. Daudi dhi dduna Absalomu vʉngʉeri ndi hwi Daudi hwi ndirigoti ndi ngʉ pi ke rɨngana. (2 Sa. 15:12, 13) Daudi dho ringʉngani ndi tuni Yerusalemu nǎ ro lele! Ke nzingʉe ndidhó njí dhi kpa: “Anidani ndirigoti ko d’ad’a dhonalo Absalomu nzɨ si ko kana ddikpa le ro ma bba shi ddi ri!” (2 Sa. 15:14) Ra kpa ngʉ ra ná saa na Daudi rangʉe ri utso d’i, rie ngani ndima kana ddikpa ke mae ma ndi ke si Absalomu kpe ná lo d’ra ndi dho d’e. Føro ke chongʉe Sadoki ma nja bbakuhani ma na ndima ra Absalomu kpe ná lo utso d’i. (Azø 2 Samweli 15:27-29.) Kpadhó lo ungʉeri ndima é krr bbo dhonalo Absalomu kpe ná lo utso le ne le d’ɨ ná føri ngʉe hatari bbo kʉ ná lo. Absalomu ngʉe bbo tsi sani ná ke, dya dhi ke ndirigoti ke dzingʉe ndidzá baba nganga nanga. Addinga ke ráe ri utso d’i nari kʉ Sadoki ma, nja bbakuhani ma na le cho ndima si ndi kpe ná lo utso d’ɨ ró ke ka ndi njie kpa ró ná lo djo!

10. Sadoki ma, ndima ngʉe na ná kpa ma na ká b’ongʉe Daudi ronga ngbaribbai?

¹⁰ Daudi nzingʉeri Sadoki ma, Hushai ma na tso kpa kó ndi tsotso ndiro ndi chu Absalomu kpe ná lo d’e. (2 Sa. 15:32-37) Hushai njingʉe ndi Absalomu tsotso ko nari bbai ndirigoti ke bbʉngʉe shauri Absalomu dho ngbaribbai ma ke ka ndi tae lɨ Daudi tso ro nari djo. Ná føri bbangʉe saa Daudi dho ndiro ke tayarisha ndi lɨ dho d’e. B’lo Absalomu rr Hushai dhó shauri nari goti, Hushai d’rangʉe ndima kpe ná lo Sadoki ma, Abiatari ma na dho. (2 Sa. 17:8-16) Ndirigoti aro fø kpetsi kpa d’rangʉe Absalomu kpe ná lo Daudi dho. (2 Sa. 17:17) Yova dhó le tsotsokodha chulu, Sadoki ma, nja bbakuhani ma na b’ongʉe Daudi dhó shinga ronga b’o.​—2 Sa. 17:21, 22.

11. Sadoki ngʉe nga nǎ do ro nari ká ko ka ko dyø ngbaribbai ko djoi tsotso ko kó ná saa na?

¹¹ Njati le nziri ko kó ko djoi tsotso kpakpalo dhi saa na ró, ká ko ka ko dhǒ ko Sadoki bbai nga nǎ do ro ngbaribbai? (1) Adyø chutsoddadha. Kpakpalo dhi saa na, ri kʉ bbo na mana kʉ ná lo ko rrnga ndiro ko tso gbani ddi d’e. Ringani ko rrnga kodhó tawi dhó ro si ná chutsoddadha dho. (Ebr. 13:17) Ngbaribbai ma le ka le tayarisha le chʉ adi ngaba ná lo dho nari ma, addu ma le ka le nji chʉ adi ngaba ná lo dhi saa na nari ma na djo tilo ná lojadha ringani wazee di zø bí ina. (1 Ko. 14:33, 40) (2) Adi nga nǎ do ro ndirigoti krr. (Mez. 22:3) Addinga vi lo ni nji nari njí. Ab’o ni ronga ngbà ri ka ró. (3) Ali ni thí Yova djo. Anonga nari kʉ Yova adi riji ni ma, ni djoi ma na ni ronga b’oni b’o. Ke ka ndi kó ni tsotso ko ndiro ni b’o ni djoi ronga d’e.

12-13. Viktor ma, Vitalii ma na dalu ná lo nǎ ro ka ni ba ngbá somo? (Anja ji maddi.)

¹² Addinga Viktor ma, Vitalii ma na dhó loroji djo. Fø le-djoi ngʉ adi nyo ma, dda ma na mba Ukraine nǎ le-djoi dho. Viktor pori, “Ko nengʉe nyo krʉ kʉ ná ngalu. Krʉ saa ró ko ngʉ adi sø ndrŭ dza ko kuso lu nari rr. Ddikpa le-djo bbʉngʉe nyo ndidhó depo nǎ ro. Fø nyo kongʉe bí kʉ ná wahubiri tsotso. Fø nyo ko ngʉ d’u masuwa na ná saa na, kpa ssngʉe rokete nari d’engʉe 20 metre djo ko kuso ro kʉ ná ngana. Fø dyi ma nzingʉeri Yova tso ke ko ma tsotso ma é nga nǎ do ro ndiro ma rá anzi ma djoi tsotso ma kó nari na d’e.”

¹³ Vitalii pori, “Kodhó lo ungʉeri ko é nga nǎ do ro bbo. Ya kwanza ma bbingʉe saa 12 kana. Chu nǎ ma nji ná saa krʉ kana ma ngʉ nga dhé nzi Yova tso.” Vitalii ngʉe nga nǎ do ro ndirigoti ke ngʉe krr maddi. Ke pori ki: “Ma ngʉ rinzi Yova bbʉ nyodyu ma, kiasi ma na ma dho. Ma bbingʉe masuwa na ngbà bbobbokpa u ritso le bbi ná chulu dhé. Madhó udha ngʉngʉe kpakpa ngbaribbai ma le-djoi ma, le-vei ma na njínji ddinga nari ma njangʉe ro. Kpa tungʉe ma ronga tso ka ndi choe ná ritsi krʉ chu nǎ ro. Kpa d’ungʉe nyo ma, ru ma, bbo na mana kʉ ná nja ritsi ma na masuwa na ndirigoti kpa bbʉngʉe nyo ma, didha dhi nga ma na ko dho Viktor na.”

ATØNI CHI YOVA DHO

14. Ji ko ji ná ddikpa le bbá Yova bba nari ká ka ndi lø ko ronga ngbaribbai?

¹⁴ Kodhó familia nǎ le inga ji ko ji ná le bbá Yova nari adi ko thí bʉ bbo pli. (Zb. 78:40; Mez. 24:10) Rié bbo ko jie fø le ri ró, fø lo tso ko ve nari mae kpakpa ddi. Njati rie b’lo ni ro barieni fø di ná kpakpalo na ri ró, Sadoki dhó loroji ka ndi li ni kpakpa.

15. Sadoki dhó lo ká ungʉeri ndi é nga nǎ do ro ndiro ndi tøni chi Yova dho d’e addudho? (1 Wafalme 1:5-8)

¹⁵ Sadoki tøngʉeni chi dhé Yova dho bba ndidzá kau Abiatari bbangʉe chi ndi tøni Yova dho nari tso ná saa na. Fø lo njingʉeni chøchø Daudi dhó pidhinga tso si d’ø ná saa na. Daudi ngʉe ngó ná saa na kedzá ngba Adoniya mbungʉeri ndi dhʉ pidhinga dhʉ ngbà mai Yova bbʉngʉeri le ddù Sulemani dho ro. (1 Ny. 22:9, 10) Abiatari vʉngʉeri ndi kó Adoniya tsotso. (Azø 1 Fa. 1:5-8.) Fø ndi njingʉeri nari na, Abiatari nzá bbangʉe Daudi dhé ri, ro ke bbangʉe Yova maddi! Addinga ngbá ngatsi ma Sadoki thí bʉngʉeni nari djo. Ke ma ngʉe b’lo ndima njingʉe kuhani dzá njí Abiatari na cho 40 djolu ro. (2 Sa. 8:17) Kpa ngʉ adi “bbʉbbʉ Mungu dhó Sanduku” d’u ddinga. (2 Sam. 15:29) Kpa aro ro krʉ ngʉ adi Daudi tsotso kó ndirigoti kpa njingʉe bí kʉ ná njí Yova ndima má nari kana.​—2 Sa. 19:11-14.

16. Njaro ká addu kongʉe Sadoki tsotso ndiro ke tøni chi d’e?

¹⁶ Ngbà mai Abiatari vʉngʉeri ndi bbá Yova bba Daudi nanga ndi dzingʉe nari na ro, Sadoki tøngʉeni chi dhé Yova dho. Daudi chungʉeri nari kʉ, ndi ka ndi lie ndi thí li Sadoki djo. Adoniya ngʉ kpe ná lo djonga nyangʉeni nari goti, Daudi vʉngʉe Sadoki ma, Natani ma, Benaya ma na ndima li Sulemani pi d’e. (1 Fa. 1:32-34) Njaro kpakpa lingʉe Sadoki nari kʉ chi ngʉ tøni Yova dho ná kpa dho loroji, føri i ngʉe Natani ma, chi ngʉ tøni Daudi dho ná nja kpa ma na. (1 Fa. 1:38, 39) Sulemani ngʉngʉe pi ná saa na, ke “lingʉe Sadoki kuhani, Abiatari rɨngana.”​—1 Fa. 2:35.

17. Ni ká ka ni dyø Sadoki ngbaribbai njati ji ni ji ná ddikpa le bbá Yova bba ró?

¹⁷ Ni ká ka ni dyø Sadoki ngbaribbai? Njati ji ni ji ná ddikpa le vʉri ndi bbá Yova bba ró, adhori Yova dho ni jiri ni tøni chi ke dho. (Yos. 24:15) Yova si nidhó lo u ndiro ni njí bblo lo d’e ná kpakpanga bbʉ ni dho nì. Ali ni thí Yova djo sala chulu ndirigoti adi chøchø chi tøni ke dho ná Wakristo kuso. Yova adi chi ni tøni nari nja mana na bbo ndirigoti ke si ni ronga lele føri dzá lo dho.​—2 Sa. 22:26.

18. Marco ma, Sidse ma na dalu ná lo nǎ ro ká ni ba ngbá somo?

¹⁸ Addinga Marco ma, ndibbá le Sidse ma na dhó loroji djo. Kpadhó aro sinzø nzø bbangʉe Yova bba. Marco pori: “Nzø ni gø ná nga djó ro ni jirie kpa bbo. Ni adi ni dho ka ná lo nji krʉ ndiro ni b’o kpa ronga d’e. Føri dho njati kpa vʉri ndima bbá Yova bba nari adi le thí bʉ bbo.” Ke pori ki: “Yova kongʉe ko tsotso bbo ndiro ko ve fø lo tso d’e. Ke lingʉeri nga ma ró klø kʉ ná saa na, mabbá le ró klø é nì ndirigoti nga le ró klø kʉ ná saa ma é kpakpa.” Sidse ndrɨ ri ki: “Fø lo tso ro nzá ka ndi veeni ko dho ri njati Yova bbʉe kodhó lo u ná kpakpanga ko dho nzá ró. Ma ngʉe njedha na bbo ndirigoti ma ngʉ riddi nzø bba Yova dho ndima njínji nari tso ná føri kʉ madhó kosa, føri dzá lo dho ma d’rangʉe ngbaribbai ma má ma mbu nari Yova dho. Føri goti tse nzá nyi ro ma d’engʉe nja bicha ná le-ve singʉe madhi ngana ndirigoti le lingʉe ndi thó ma kù djo, le njangʉe ma nyǒ nga ndirigoti le pongʉeri, ‘Sidse, anonga nari kʉ føri nga kʉ nidhó kosa ri!’ Yova dhó le tsotsokodha chulu ma bangʉe kpakpanga ndiro ma ra anzi ke dho ma njínji nari na d’e.”

19. Ni ká vʉri ni njí addu?

¹⁹ Yova adi riji ndidzá njí dhi ndrŭ é nga nǎ do ro Sadoki bbai. (2 Ti. 1:7) Ro, ke nzɨ adi riji ko li ko thí kodhó kpakpanga djo ri. Ke adi riji ko li ko thí ndi djo. Føri dzá lo dho ni bani na ná lo uri ni é nga nǎ do ro ró, ali ni thí Yova djo. Ni ka ni uri u nari kʉ ke si rili ni é nga nǎ do ro Sadoki bbai!​—1 Pe. 5:10.