“Anivʉ . . . ie dho ma ni njínji nari”

1. Ko dho ká ringani ko njí addu ndiro ko é bbʉbbʉ hwè na d’e ndirigoti addudho? (Isaya 48:17, 18)

KODHI ra nǎ Baba jirie ko bbo, ke adi riji ko é hwè na njʉ ndirigoti gosi ná saa na. (Muh. 3:12, 13) Ke norie ko, ké dho le nanga ka ndi keni ná bí kʉ ná ritsi njidha dhi kpakpanga na. Nì mai ri kʉ fø ro, ke nzá bbʉ ko ka ko nyopi ko djo inga bblolo ma, chelo ma na nanga ko ka ko vʉ na ná kpakpanga ko dho ri. (Muh. 8:9; Yer. 10:23) Ke churi chu nari kʉ, ndiro ko é bbʉbbʉ hwè na d’e, ringani ko njínjí ndi dho ndirigoti ko rrnga ndidhó yadha dho.​—Azø Isaya 48:17, 18.

2. Shetani ká jirieri ko u ngbá lo, ro Yova ká njingʉeri ngbǎ?

² Shetani adi riji ko uri nari kʉ, ko ka ko é hwè na rié nzɨ ko njínji Yova dho ró inga ndrŭ ka ndima di bblo pli rié ndima ro kpa pinyo ndima djo ró. (Mwa. 3:4, 5) Nja ndi dhǒ Shetani kʉ kali ba nari d’e, Yova bbari ndrŭ nyopi ro ndima djo sese saa kana. Ro, ndrŭ dhó pidhinga djolu lo sisi nari ko nja pʉlʉpʉlʉ. Føri ró ro njonjo, Biblia tilo hwè na ngʉe Yova dho ndima njínji nari dho ná bí kʉ ná kpetsi kpa ma, isɨ ndrŭ ma na djo. Fø ndrŭ kana Yesu Kristo ngʉe hwè na bbo pli. Ya kwanza, akonja addudho ma ke vʉngʉeri ndi njínjí Yova dho nari. Føri goti, ko si addudho ma ringani ko má kodhi ra nǎ Baba Yova nari nja. Ya mwisho, ko si ngʉ addudho ma ko vʉrieri ko njínjí Yova dho ná lo ro djolu.

ADDUDHO MA YESU VɄNGɄERI NDI NJÍNJÍ YOVA DHO NARI

3. Shetani ká bbʉngʉe addu Yesu dho ndirigoti Yesu ká vʉngʉeri ndi njiri ngbǎ?

³ Dz’ djó ndi ngʉe ro, Yesu vʉngʉe ie dho ma ndi njínji nari. Batiso Yesu ba nari goti tse, Shetani pongʉeri ndi bbʉ dz’ djó pidhinga krʉ ke dho njati ke njí ndi ka ndi bbʉ madha ndi dho na ná lo ro ddikpa dhé ró. Yesu ngʉngʉe logoti: “Atuni, Shetani! Dhonalo ri ndini: ‘Ri kʉ Yova nidzá Mungu dho i ringani ni bbʉ madha ri ndirigoti ri kʉ ke ddiro dho dhé ringani ni njí takatifu njí ri.’” (Mt. 4:8-10) Yesu ká vʉngʉeri fø addudho? Akonja fø ke njingʉeri dho ná nja lo ro di.

4-5. Yesu ká vʉngʉeri ndi njínjí Yova dho ngbá lo dho mai?

⁴ Yesu vʉngʉeri ndi njínjí Yova dho, dho ná bbo na mana kʉ ná lo kʉ, ke jingʉe Yova bbo ndirigoti ke jingʉe ndidzá Baba bbo pli. (Yoh. 14:31) Føri kina, Yesu adi njínji Yova dho dhonalo føri kʉ ngbà kaka le njí ná lo. (Yoh. 8:28, 29; Ufu. 4:11) Ke churi chu nari kʉ, Yova kʉ shinga tø ná nga, Ke djo ko ka ko li ko thí li ndirigoti ke adi bí kʉ ná bblo ritsi bbʉ ko dho. (Zb. 33:4; 36:9; Yak. 1:17) Yova ngʉ bbʉbbʉlo dhé d’ra Yesu dho ndirigoti Yesu dhó kʉ ná ritsi krʉ Yova bbʉngʉe ke dho. (Yoh. 1:14) Nì mai ri kʉ fø ro, Shetani e njonjo Yova ró ro, ke lingʉeri ndrŭ njí chenga ndirigoti ndrŭ cheni che. Ke kʉ kali dhi ke, dya dhi ke ndirigoti ndindiro ji ndi ná ke. (Yoh. 8:44) Yesu chungʉe Yova ma, Shetani ma na bblo pli. Ke nzá jingʉeri ndi é Shetani bbai ndirigoti ndi tsá Yova ro ri.​—Flp. 2:5-8.

⁵ Yesu vʉngʉeri ndi njínjí Yova dho, dho ná nja lo kʉ, ke ngʉ ngaddi chi ndi tøni ro ndi njínji ke dho ná ri nǎ ro si si ná bblolo djo. (Ebr. 12:2) Ke chungʉeri njati ndi tøni chi ró, ndi si rili ndidzá Baba ró dho tsetse ndirigoti chenga ma, dhe ma na sini si.

ADDUDHO MA RINGANI KO MÁ YOVA NARI

6-7. Njʉ ká bí kʉ ná ndrŭ adi njínji Yova dho nzɨ addudho? Nde, ko dho ká ringani ko má Yova dhé addudho?

⁶ Njʉ bí kʉ ná ndrŭ nzɨ adi njínji Yova dho dhonalo kpa nzá churie kedhó bblo pli e ná sifa ma, ke nji kpa dho ná bblolo ma na ro ri. Kpa kʉ ddiddi Atene nǎ mutume Paulo d’rangʉe lo dho ná ndrŭ na. Kpa maddi nzá chungʉe Mungu ri.​—Mdo. 17:19, 20, 30, 34.

⁷ Paulo pongʉeri Atene nǎ ndrŭ dho nari kʉ, bbʉbbʉ Mungu adi “shinga ma, he ma, krʉ kʉ ná ritsi ma na bbʉ ndrŭ krʉ dho.” Ke pongʉeri ki: “Ri kʉ ke chulu ko di shi, ko ko ronga ja ndirigoti ko kʉ nì.” Mungu kʉ nono ritsi ná ke, “ddikpa ke nǎ ro ke nongʉe krʉ kʉ ná ndrŭ tsɨ,” føri dho, ko dho ringani ko má ke dhé.​—Mdo. 17:25, 26, 28.

8. Nzɨ ro Yova si nji ngbá dyi maddi nari ká kʉ ngbá lo? Aturinga.

⁸ Ke kʉ nono ritsi ná ke ndirigoti bbo pli kʉ bbonga na ngø djó ná ke nari dho, Yova ka ndi choe ndrŭ kpakpanga na maddi ndrŭ má ndi d’e. Ro, Yova nzɨ nji fø di ná lo ro ngbá dyi maddi ri. Føri rɨngana, ke adi ndi kʉ nì ndirigoti ndi ji ko kana nja le ddiro bbo nari dhǒ bí kʉ ná njonjo lo chulu. Ke adi riji ngbà ri ka ró, bí kʉ ná ndrŭ é ndidzá bbakau cho ró nŭnŭnga dho. (1 Ti. 2:3, 4) Ndiro fø lo njini d’e, Yova adi mazoezi bbʉ ko dho nja ko ddi longa ndrŭ dho ndi kpe ná lo djo ndirigoti ko tilo ndrŭ dho gosi ná saa na ndi si nji ndrŭ tsɨ dho ná lo djo. (Mt. 10:11-13; 28:19, 20) Ndirigoti ke li kutaniko ndiro ko di madha bbʉ ndi dho ndirigoti ko di le tsotsokodha ba jiji ko ná wazee dhó ro d’e.​—Mdo. 20:28.

9. Yova ká adi jidha dhǒ ndrŭ krʉ dho ngbaribbai?

⁹ Yova dhó bbo pli kʉ ná jidha adi dhoni pʉlʉpʉlʉ, ngbaribbai ma ke adi njini nzá u ndi ná ndrŭ na nari chulu. Addinga i lo djo: Cho bí kana, bí kʉ ná ndrŭ vʉrieri ndima njí ndima ddi bblo inga che kʉ ri ná lo, Yova dho ndima rr é nga nari rɨngana. Føro mai, jidha na Yova adi kpadhó lo u ndiro kpa di shi ndirigoti kpa ba hwè d’e ná ritsi bbʉbbʉ dhé kpa dho. (Mt. 5:44, 45; Mdo. 14:16, 17) Ke djotsina, kpa ka ndima é bbakau ma, jiji kpa ná familia ma, nzø ma, njí ma na na ndirigoti kpa ka ndima é hwè na ndima dhó maisha nǎ. (Zb. 127:3; Muh. 2:24) Føri ridho pʉlʉpʉlʉ nari kʉ, kodhi ra nǎ Baba jirie krʉ ndrŭ ji. (Kut. 34:6) Kpadjo akonja addudho ma ko vʉrieri ko njínjí Yova dho nari ndirigoti ngbaribbai ma ke adi ndi dho vʉri ndima njínjí ná ndrŭ ronga le nari.

ADDUDHO MA KO VɄRIERI KO NJÍNJÍ YOVA DHO NARI

10. (a) Ko ká adi njínji Yova dho bbo na mana kʉ ná ngbá lo djotsina? (Matayo 22:37) (b) Yova dhó ngatsovedha nǎ ro ká ni ba bblonga ngbaribbai? (Zaburi 103:13, 14)

¹⁰ Yesu bbai ko adi njínji Yova dho, dho ná bbo na mana kʉ ná lo e, ko jirie ke bbo pli. (Azø Matayo 22:37.) Yova dhó sifa djo ko lochu ná saa na, ko adi ko mbu chøchø kʉ ke kuso nari bbai. Loroji na, Addinga ke adi ngatsovedha dhǒ ko dho nari djo. Waisraeli rrngʉe nga nzá ke dho ná saa na, ke nzingʉeri kpa tso: “Anile ni tso, kirikiri, nidhó che kʉ ná chu nǎ ro.” (Yer. 18:11) Yova adi ngano nari kʉ, ko kʉ nzá kaka ná ndrŭ ndirigoti ko kʉ dz’ hø. (Azø Zaburi 103:13, 14.) Yova dhó ngatsovedha ma, kedhó nja bblo sifa ma na djo ni ngaddi ná saa na, føri ká nzɨ adi ni ronga cho ni njínjí ke dho theinga dho ri?

11. Ri ká kʉ nja ngbá lo adi rili ko vʉri ko njínjí kodhi ra nǎ Baba dho?

¹¹ Føri kina, ko adi njínji Yova dho dhonalo ri kʉ bblo ko njiri fø. (Mt. 4:10) Godhé, ko churi chu njati ko tøni chi Yova dho ró, ke si bí kʉ ná nja bblo ritsi nji ko dho. Chi ko tøni nari adi rili Yova ró dho tsetse, ko dhori Ibilisi kʉ kali ba ndirigoti ko liri kodhi Baba thí ba hwè. Ndirigoti njati ko vʉri ko njínjí Yova dho njʉ ró, ko si riji ko njínjí ke dho theinga dho!​—Yoh. 17:3.

12-13. Ko ká ba ngbá somo Jane ma, Pam ma na dhó lo nǎ ro?

¹² Go ko kʉ jadda ro, ko ka ko chu ngbaribbai ma le ka le ji Yova bbo nari ndirigoti ke ko ji nari si ngʉ kpakpa ko dhi nari bbai. Akotilo aro kʉ ná le-vei Jane ma, Pam ma na dhó loroji djo.a Jane dhó cho ngʉe 11 ndirigoti Pam dhó cho ngʉe 10 Biblia ndima jifunza nari tso ndima ngangʉe ná saa na. Nzá mai kpadhi gø dhi ndrŭ nanga jingʉeni Biblia kpa jifunza nari dho ro, kpa ungʉeri tso Jane ma, Pam ma na dho kpa di Biblia jifunza Yova dzá Dimu na njati rié nì kpa di ra ndima dhó familia ma na dradza na ró. Jane pori: “Yova dzá Dimu ddingʉe ma dho Biblia nǎ ro ná lo kongʉe ma tsotso ma tøni ma lai jadda kpa ngʉ adi ma cho rɨ le rɨ ná ritsi ma, uasherati njidha ma na dho nari tso ró.”

¹³ Karnga goti dhé, fø sinzø nzø ngangʉe lod’radha tso. Luti, kpa ngangʉe painia dhi njí tso ndima dhi gø dhi ngó ndrŭ ronga ndima b’o nari kana. Fø lo djo ndi ngaddi ro, Jane pori: “Ma chungʉeri nari kʉ, Yova adi ndidzá bbakau ronga b’ob’o, ddiddi 2 Timoteo 2:19 adi ripo nari bbai, ‘Yova chu ndidzá ndrŭ chu.’” Bbʉbbʉ dhé, krʉ ddo ró Yova adi ngbà ji ndi ndirigoti ngbà vʉri ndima njínjí ndi dho ná ndrŭ ronga b’ob’o!

14. Ko ti ná lo ma, ko nji ná lo ma na ká ka ndi liri Yova ró dho tsetse ngbaribbai? (Anja ji maddi.)

¹⁴ Ko jiri ndrŭ churi Yova djo ndima adi rr ná chelo nga e bbʉbbʉlo ri. Anzingaddi i lo djo di: Nidhó kau e bblo kʉ ná ke, ritsi adi bbʉ ná ke ndirigoti ndrŭ zø adi nji ná ke. Ddikpa cha, ni rr ri nari kʉ, nidhó kau kʉ bbo tsɨ sani ná ke ndirigoti nzɨ adi chølo nji ná ke. Føro ká ni ka ni njiri ngbǎ? Ni ka ni tilo ke djo. Føri bbai, Shetani ma, ndi na gba ndima tso ná ndrŭ ma na di kali dhi lo nanga nyá Yova djo ná saa na, ko adi bbʉbbʉlo d’ra kpa dho Ke ró dho djo. (Zb. 34:1; Isa. 43:10) Ko adi ko jiri ko njínjí Yova dho ko thí nǎ ro krʉ nari dhǒ, ko ti ná lo ma, ko nji ná lo ma na chulu.

15. Mutume Paulo ká bangʉe ngbá bblonga ndidhó maisha thika ndi wøngʉe nari nǎ ro? (Wafilipi 3:7, 8)

¹⁵ Ji ko nanga jini ro, ko adi kodhó maisha nǎ lo thika wø ndiro ko njí Yova nyǒ tho ná lo ndirigoti ko njínjí bbo ke dho d’e. Loroji na, mutume Paulo vʉngʉeri ndi bbá Wayaudi bbá dini nǎ ndi ngʉe na ná bbonga ndiro ndi ngʉ Kristo unake ndirigoti ndi njínjí Yova dho d’e. (Gal. 1:14) Føri lingʉeri, mutume Paulo dhó maisha é bblo ndirigoti ke ba pendeleo ndima si pinyo Kristo ma na ra nǎ. Yova dho ke vʉngʉeri ndi njínjí nari nzá d’ongʉe ke nanga ro ri ndirigoti ko nanga ro ma nzá ddi ri ka ndi d’o ri.​—Azø Wafilipi 3:7, 8.

16. Julia dhó lo nǎ ro ká ko ba ngbá somo? (Anja ji maddi.)

¹⁶ Njati ko di Yova dho ko njínji nari li anziro ró, ko ka ko é bblo maisha na njʉ ndirigoti gosi ná saa na. Akotilo Julia ró dho kʉ ná le-ve dhó lo djo. Bbʉbbʉlo ndi chu nari njí, Julia ngʉ adi dyi ngo ndima dhó dradza nǎ go ndi ngʉe jadda singba ngba ro. Julia ngʉ ngoni bblo ná ri utso muziki chu bblo ná ddikpa ke d’ingʉe ná saa na, ke bbʉngʉe mazoezi Julia dho. Karnga goti, Julia chungʉeni bbo ndirigoti ngba ngʉ adi dyi ngo bbo chuni ná ngalu. Bblo ndi ka ndi chu dyi ngodha nǎ ná darasa Julia ngʉ zø ná saa na, ngba lai darasa nǎ ngba tingʉe lo ngba dho Mungu djo ndirigoti Mungu ró dho e Yova nari djo. Føri goti thei, Julia ngangʉe Biblia ndima jifunza nari tso, yenga ddi kana aro ina. Føri dho, Julia vʉngʉeri ndi li ndi thí Yova dho ndi njínji ndidhó maisha lu nǎ nari djo, ndi chueni bbo ngoni ná le nari rɨngana. Fø lonangavʉdha nga ngʉe sʉsʉ ri. “Bí kʉ ná ndrŭ pongʉeri, ma nji rrdha dyi ngodha tso ma bba ndiro ma njínjí Yova dho d’e nari na” le pori, “ro ma jingʉeri ma njínjí Yova dho madhó maisha lu nǎ.” Njʉ ká le adi ndi mbu ngbaribbai ndi vʉngʉe nanga ná fø lo dho ngbà mai cho da 30 b’lo ro? “Ma e ngoi na ndirigoti ma lirie ma thí Yova si ma jirie ná lo tso gba krʉ gosi ná saa na nari djó.”​—Zb. 145:16.

ARA ANZI YOVA DHO NI NJÍNJI NARI NA

17. Kodhó saa na njini ná lo ká adi Mungu dho vʉri ndima njínjí ná ndrŭ ma, nzá d’e rivʉ ndima njiri fø ná ndrŭ ma na ronga lø ngbaribbai?

¹⁷ Ko di nga sini ná ri dzá ya mwisho ddo kana. Mutume Paulo ndingʉeri ɨ: “Karnga goti, ‘si dho riengani ndi si ná ke si si’ ndirigoti ‘ke nzɨ si rɨni rɨ ri.’” (Ebr. 10:37) Føri ká lø ko ronga ngbaribbai? Yova dho ndrŭ ka ndima vʉri ndima njínjí ná saa gʉ ma sese. (1 Ko. 7:29) Ndirigoti njati rié b’lo ko vʉri ko njínjí Mungu dho ró, ko churi chu nari kʉ, nì mai ko si kpakpalo tso ve ro, ri sie “sese pli kʉ ná saa dho dhé.”

18. Yesu ma, Yova ma na ká jiri ko njí ngbá lo?

¹⁸ Yesu lingʉe ndrŭ kpakpa ndiro ndrŭ ngʉ ndi unakpa d’e ndirigoti kpa ra anzi ndi ulu kpa ra nari na. (Mt. 16:24) Njati rié b’lo ma ko njinjí Yova dho cho bí kana ri ró, ako vʉri nzɨ ko d’i ji fø ko rinji nari ró ro. Ringani ko ra anzi kpakpanga na ko njínji Yova dho nari na. Føri nga ka ndi é sʉsʉ ri, ro ko ka ko é hwè na ndirigoti ko ka ko ba ledha kpari bí ke dho ko njínji nari nǎ ro kpadjo nga djó ro!​—Zb. 35:27.

19. Gene dhó lo nǎ ro ká ko ba ngbá somo?

¹⁹ Nja ndrŭ adi riddi nari kʉ, njati ndima njínjí Yova dho ró ndima nzá ka ndima njí ndima dhó maisha hwè ri. Njati ni é jadda ró, ni ká riddi Yova dho ni njínji nari ka ndi liri nzɨ ni nji nidhó maisha hwè? Gene ró dho kʉ ná jadda le-djo pori ɨ: “Ma ngʉ riddi Yova dzá Dimu le kʉ nari ka ndi liri nzɨ le nji maisha hwè. Ri ngʉ njani ddinga ko ngʉ dhi na ná bí kʉ ná nzø nanga ngʉ adi jini fete ma, le le tso gba le ra bbi ddinga nari ma, fudjo dhi kpà le kpa video nǎ nari ma na dho nari bbai, fø saa na ma ngʉ adi ra njʉdha na ndirigoti lod’ra.” Fø di ná ngaddidha ká løngʉe Gene ronga ngbaribbai? “Ma ngangʉe fø jadda nzø ngʉ adi nji ná nja kʉ ná chelo njidha tso,” ke pori, “ddikpa saa ro dho ma ngʉ ma mbu hwè na kʉ nari bbai. Ro, ri nzɨ ngʉ bbʉbbʉ kʉ ná hwè bbʉ ma dho ri. Ma ngangʉe Biblia po ná lo dho ma ngarr nari nǎ ro adi si ná bblonga djo ma ngaddi nari tso ndirigoti ma vʉngʉeri ma njínjí Yova dho ma thí nǎ ro krʉ. Fø nga djó ro, ri adi njani Yova adi madhó sala krʉ goti ngʉngʉ nari bbai.”

20. Ri ká ngani ko vʉri ko njí addu?

²⁰ Zaburi ndingʉe ná ddikpa ke ngongʉeni ɨ Yova dho: “Hwè na kʉ ná ke kʉ, vʉ ni vʉ ndirigoti ni liri ke si chøchø ndiro ke di nidzá bbaidjó d’e ná ke.” (Zb. 65:4) Akovʉri ko ra anzi Yoshua bbai ɨ ndi pongʉeri ro: “Ma ma, madzá dza nǎ ndrŭ ma na ko njínji Yova dho.”​—Yos. 24:15.