Lo dho chutso ddá ná Baraza nǎ aro kʉ ná wø si ná kpa
BI 10 DDO 5, 2024 na, cho dhi njudha nǎ le njingʉe pekee kʉ ná i matangazo: Le-djoi Jody Jedele ma, Jacob Rumph ma na le vʉ ndima é Yova dzá Dimu dhó Lo dho chutso ddá ná Baraza nǎ kpa. Fø le-djoi aro krʉ njinjí Yova dho chi ndima tøni ro cho bí kana.
Jody Jedele ma, ndibbá le Damaris ma na
Le-djo Jedele gøngʉeni Missouri na, États-Unis na ndirigoti kedzá gø dhi ndrŭ ngʉe Yova dzá Dimu. Ke abba ndrŭ ngʉ di nga Yova dzá Dimu kʉ bí ná ngana. Føri dho, ke njungʉe njonjo ngalu ro ngʉ si lod’radha dho fø ngana ná le-djoi ma, le-vei ma na na. Fø le-djoi ngʉ dhǒ ná jidha ma, ddi ndima tso gbani nari ma na løngʉe ke thí ronga bbo. Ke bangʉe batiso bi 10 ddo 15, 1983 na go ndi ngʉe jadda ro. Ke jingʉe lod’radha dhi njí bbo nari dho bbò darasa tso ke d’yangʉe nari goti, ke ngangʉe painia dhi njí tso bi 9, 1989 na.
Go le-djo Jedele ngʉe jadda ro, kedzá gø dhi ndrŭ ngʉ adi ke ma, kedhi vena ma na mba ndiro kpa ra Beteli ronga be d’e. Føri lingʉeri nzø ji Beteli na ndima ra njínji nari bbo ndirigoti luti kpa krʉ rangʉe Beteli na. Le-djo Jedele singʉe Wallkill nǎ Beteli na bi 9, 1990 na. Ya kwanza, ke njingʉe njí usafi dhi departema na ndirigoti luti dawa dhi departema na.
Fø saa na, Espagnol dhi luga dhi kutaniko kparɨ tso ngangʉeni chøchø kpa ngʉe ná nga ró ro ndirigoti ri ungʉe le-djoi si nga tsotso ko. Føri dho, le-djo Jedele tsungʉe ddikpa ri na ndirigoti ke ngangʉe Espagnol dhi luga ndi jifunza nari tso. Føri goti tse, ke njungʉe le-ve Damaris na, painia ndi ngʉe fø muzunguko nǎ ro. Kpa chingʉe ndoa ndirigoti le maddi tsungʉe Beteli na.
Cho 2005 na, kpa rangʉe Beteli nǎ ro ndiro ndima ra ndima dhi gø dhi ndrŭ ronga b’o d’e. Fø saa na, kpa ngʉngʉe bbapainia wa kawaida. Le-djo Jedele ngʉe mwalimu bbapainia dhó darasa na, ke njingʉe njí Hopitale dhi lo djó nga adi nja ná komité na ndirigoti ngachidha dhi njí dhi komite na.
Cho 2013 na, le-djo Jedele ma, ndibbá le ma na ki le nzingʉe vi Warwick nǎ Beteli chidha dhi njí dho. Fø nga djó ro, kpa njingʉe njí Patterson nǎ ndirigoti Wallkill nǎ maddi. Le-djo Jedele ngʉ njínji ngachidha dhi departema nǎ ndirigoti Hopitale dhi lo djó nga adi nja ná departema nǎ. Cho 2023 na, bi 3 na, ke le lingʉe ndiro ndi é njí dhi komité tsotso kó ná ke d’e. Krʉ ke nji ná njí djo ke ddinga ro, føri liri ke pori ɨ: “Njati le bbʉ wø njí ni dhona ró, ni adi ri nja nzá ni ka ni njí ri nari bbai. Ro, fø saa na ri kʉ bblo ni li ni thí Yova djo dhonalo ke adi ko tsotso kó ndiro ko njí ko dhona ndi bbʉ ná njí d’e.”
Jacob Rumph ma, ndibbá le Inga ma na
Le-djo Rumph gøngʉeni Californie na, États-Unis na. Jadda ke ngʉe ro, kedzá mama nzɨ ngʉ adi lod’ra ndirigoti le nzɨ ngʉ adi si njudha dhi ngana maddi ri. Nì mai ri kʉ fø ro, le njingʉe kpakpanga ndiro ndi ddi Biblia nǎ bbʉbbʉlo nga ke dho d’e. Føri kina, krʉ cho ró ke ngʉ adi ra chi ngʉ tøni Yova dho ná ndidzá bbò mama ronga be. Le lingʉeri ke ji bbʉbbʉlo bbo ndirigoti 13 kedhó cho ngʉe ro, ke ngangʉe Biblia ndi jifunza nari tso. Bi 9 ddo 27, 1992 na ke bangʉe batiso go ndi ngʉe jadda ro. Ro, luti kedzá mama ngangʉe lo ndi d’ra nari ma, njudha dhi ngana ndi si nari ma na tso ki vi. Ndirigoti ke abba familia nǎ ndrŭ njingʉe maendeleo ndirigoti kpa bangʉe batiso.
Go le-djo Rumph ngʉe jadda ro, ke njangʉe ngbaribbai ma bbapainia kʉ hwè na nari. Føri dho, bbò darasa tso ke d’yangʉe ro, ke ngangʉe painia dhi njí tso bi 9, 1995 na. Cho 2000 na, ke rangʉe lod’ra bbo uhitaji kʉ ná ngana, Equateur na. Følu, ke njungʉe painia ngʉe ná le-ve Inga na, Canada nǎ ro ndi singʉe ro ndirigoti kpa chingʉe ndoa. Ndoa goti, kpa njingʉe njí Equateur nǎ ddikpa vile nǎ sese wahubiri dhó hesabu ngʉe ná kikundi nǎ. Njʉ, fø kutaniko nǎ wahubiri kʉ bí.
Luti, le-djo Rumph ma, ndibbá le ma na ngʉngʉe bbapainia wa pekee ndirigoti luti kpa njingʉe njí muzunguko nǎ. Cho 2011 na, le nzingʉe kpa Gileadi nǎ 132 ri si na ná darasa na. Diplome kpa ba nari goti, kpa njingʉe njí dz’ djó njonjo ngalu ndirigoti njonjo njí kana. Loroji na, Beteli nǎ, misionere dhi njí kana ndirigoti muzunguko nǎ. Le-djo Rumph ngʉe mwalimu Masomo ya Waeneza Injili wa Ufalme nǎ maddi.
COVID-19 dzá lo dho, le-djo Rumph ma, ndibbá le ma na ngʉngʉe États-Unis na. Kpa le nzingʉe Wallkill nǎ Beteli na, føga le-djo Rumph ngʉ mazoezi ba njí dhi departema nǎ. Luti, le chongʉe kpa ki vi Equateur na ndirigoti le-djo Rumph le lingʉe Tawi nǎ komite nǎ ke. Cho 2023 na le chongʉe kpa Warwick na. Cho 2024 nǎ bi 1 na, le-djo Rumph le lingʉe ndi é njí dhi komite tsotso kó ná ke. Njonjo ngalu ndi njinjí nari djo ndi ddinga ro, ke pori ɨ, “Bbo na mana kʉ nari nga kʉ njí ni nji ná nga ri, ro njí ni nji na ná ndrŭ.”
Ko nanga jini bbo fø le-djoi nji ná kpakpa njí dho ndirigoti ko “ra anzi heshima ko bbʉ fø di ná kpa dho” nari na.—Flp. 2:29.