Matayo

8 Ngøtsɨ djó ro ke thʉ nari goti birobiro kʉ ná ndrŭ rangʉe ke ulu. 2 Ndirigoti anja! korøkorø kʉ ró ná ddikpa ke singʉe koni ke nji ndirigoti ke pongʉeri: “Bboke, njati rie ngbà ni jiri ró, aliri ma tsetse.” 3 Føro ke ddangʉe ndi thó, ke løngʉe ke ronga ndirigoti ke pongʉeri: “Ma jiri ngbà! Atsetse.” Føro thei ke ró korøkorø singʉeni si. 4 Føro Yesu pongʉeri ke dho: “Nzɨ d’ra fø lo ro ddikpa le dho maddi, ro ara ni dho bbakuhani dho ndirigoti ara Musa jangʉe ná bbʉdha bbʉ ndiri dhǒ ni ró dhe sini nari kpa dho d’e.”

5 Kapernaumu na ke singʉe ro, bbasøddá djó bbonga ngʉe ná ddikpa ke singʉe ddoni ke ró. 6 Ndirigoti ke pongʉeri ɨ: “Bboke, madzá njí dhi ke yi adza ddo ndi ndí ddoni ro ndirigoti ke nzani bbo.” 7 Yesu pongʉeri ke dho: “Følu ma si ró, ma si ke gø nì.” 8 Bbasøddá djó bbonga pongʉeri: “Bboke, ma ro nzá ka nja ni tsu mabbá dza na d’e ri, ró apo ddikpa lo ro dhé ndiro madhó njí dhi ke gøgø d’e. 9 Dhonalo ma maddi kʉ ma djó bbonga na ndirigoti madzá bbonga tsena ma kʉ nja bbasøddá ddi. Ma pori ddi ke dho, ‘Ara!’ ró fø ke adi rara ndirigoti ma pori nja ke dho, ‘Asi!’ ró fø ke adi sisi, ndirigoti ma pori madzá njí dhi ke dho, ‘Anjiri ɨ!’ ró fø ke adi rinji fø dhé.” 10 Fø lo ndi rr ro, Yesu nanga kengʉeni bbo ndirigoti ke pongʉeri ndi una ngʉ ra ná ndrŭ dho: “Bbʉbbʉ dhé ma ripo ni dho, Israeli nǎ nzá ma d’e føbø dhó udha kʉ ná ndrŭ ro ba ri. 11 Ndirigoti ma ripo ni dho, bí kʉ ná ndrŭ si si dyi si ná nga ma, dyi tsu ná nga ma na laidjó ro ndirigoti kpa si di mesa tso ro Abrahamu ma, Yakobo ma, Isaka ma na na ra nǎ Pidhinga nǎ. 12 Ro, Pidhinga ddui le si bu bbaidjo, tɨtɨnga na. Følu i kpa ka ve di dzzdzz ndirigoti ndima kudjo kǎ.” 13 Føri goti Yesu pongʉeri bbasødda djó bbonga dho: “Angʉ ni bba. Ndirigoti ri njini ni dho ni uri nari bbai.” Ndirigoti kedhó njí dhi ke gøngʉe fø saa nganga na thei.

14 Føri goti Yesu rangʉe Petro bba, ro ke singʉe Petro dhi djana ro yi ndi yí ro dhonalo le dhe ngʉ nji.* 15 Føro ke løngʉe le thó ronga ro, le ró dhe gøngʉe thei ndirigoti le dangʉeni ro, le ngangʉe nyo ridha tso ke dho. 16 Fø dyi ngasdjó, ndrŭ singʉe gó kʉ nǎ ná bí kʉ ná ndrŭ na ke dhi ngana, ná fø ndrŭ nǎ gó ke dingʉe ndi tso nǎ lo na dhé ndirigoti ke gøngʉe dhe ngʉ nji ná ndrŭ krʉ gø. 17 Ke njingʉeri fø ndiro nabi Isaya pongʉe ná i lo njini d’e: “Ke dzingʉe ko ró dhe ndirigoti ke d’ungʉe kodhi nzadha.”

18 Yesu njangʉe birobiro kʉ ná ndrŭ nju ndima tso ndi kuso nari ro, ke jangʉeri ndi unakpa dho kpa da jʉdda djolu adzɨ. 19 Føri goti nga ndi ná ddikpa ke singʉe ke dhi ngana ndirigoti ke pongʉeri: “Mwalimu, ma si ra ni ulu ni bbi nanga krʉ lu.” 20 Ro, Yesu pongʉeri ke dho: “Nzerr e ndima dhó bbù na, rakpa ró rè e ndima dhó dza na, ro ndrŭ Ddù la ndi djǒ nanga ro nga kʉ ri.” 21 Føri goti Yesu unakpa kana ddikpa ke pongʉeri ke dho: “Bboke, abbari ma rá madzá baba d’ø vi.” 22 Yesu ngʉngʉe kedhó logoti: “Asi ma ulu, ndirigoti abba che cheni ná ndrŭ d’ø ndima dhi che cheni ná ndrŭ.”

23 Føri goti Yesu djingʉe bbú na ndirigoti ke unakpa rangʉe ke ulu. 24 Ro, anja! ddikpa bbò vʉvʉ tangʉe jʉdda djo, ná ri dho dda-gru ngʉ meni bbú na ndirigoti Yesu ngʉ ddoddo. 25 Kpa ndrini ke kuso nari goti kpa ngʉ ke ché ɨ ndima ripo ro: “Bboke, agø ko, ko kʉ chøchø ko cheni che ró.” 26 Ro, ke pongʉeri kpa ni: “Ni ká do nji bbo addudho, ni sese dhó udha kʉ ná kpa?” Føro ke dangʉeni ndirigoti ke tangʉe vʉvʉ ma, jʉdda ma na djó, føri goti nga gongʉe kɨlɨ. 27 Kpa nanga kengʉeni bbo ndirigoti kpa pongʉeri: “I ri ká kʉ ngbǎ di ná ke? Ke dho vʉvʉ ma, dda ma na krʉ ngarr rr.”

28 Gadare dhi ngø* na ke dangʉe ro, kpa njungʉe gó kʉ nǎ ná aro kʉ ná kpa na, kabuli* kana ro ndima si ro. Fø kpa tsɨ sangʉeni bbo nari dho, ddikpa le ma nzɨ ddi ngʉ adi ri ro mbu ndi da fø chu lu ri. 29 Ndirigoti anja! kpa ngʉ ndima nanga jø ɨ ndima ripo ro: “Mungu Ddù, ni ma na ká ri di ngbǎ ko kana? Ni ká si ko nzadha dho, nzá ri dho le li ná saa d’e ka ro?” 30 Fø lo ngʉ njini ná nga nǎ ro da ronga bí kʉ ná djø ngʉ nganyo. 31 Føro gó kpari ngangʉe ke ró ndima ddoni nari tso ɨ ndima ripo ro: “Njati rie di ni ko di ró, acho ko afø djø kpari na.” 32 Ndirigoti ke pongʉeri gó ni: “Anira!” Føro gó kpari nyangʉeni kpa nǎ ro ndirigoti ri rangʉe meni djø na. Ndirigoti anja! djø kpari krʉ mongʉe nga ngø iso* ro jʉdda na ndirigoti ri chengʉeni che. 33 Ro, djø ró ngʉ rø ná kpa nyingʉe nga nyi ndirigoti kpa rangʉe tsu vile na. Ndirigoti kpa d’rangʉe nji njini ná fø lo krʉ, gó ngʉe nǎ ná kpa djó lo ma na. 34 Ndirigoti anja! fø bba gʉ ndrŭ krʉ mongʉe nga ndima rá nju Yesu na. Føro ke na ndima nju ná saa na, ndrŭ nzingʉeri ke tso ke rárá ndima bbá ngø nǎ ro.