Luka

5 Ddikpa cha Genezareti* dhi jʉdda tso ró Yesu ngʉe ro, birobiro kʉ ná ndrŭ ngʉ Mungu dzá lo ke ddi nari rr, ndirigoti ndrŭ b’ʉngʉeni ke ro lu gbru. 2 Føro ke njangʉe aro kʉ ná bbú jʉdda tso ro, ndirigoti ri nǎ ro bbè pɨ ná kpa thʉngʉeni b’lo ndirigoti kpa ngʉ ndima dhó bbè-mbi ronga thɨ. 3 Føro ke djingʉe fø bbú kana ddikpa ri na, føri ngʉe Simoni dhó bbú, ndirigoti ke pongʉeri Simoni ndri ri ronga ro sese dda tso ró ro. Føri goti ke ngangʉe longaddidha tso birobiro kʉ ná ndrŭ dho bbú nǎ ndi di ná ngana ro. 4 B’lo ke d’ya lotidha tso nari goti, ke pongʉeri Simoni dho: “Andri bbú ronga da dda nanga kʉ ná ngana ndirigoti anidjo nidhó bbè-mbi bbè pɨdha dho.” 5 Ro, Simoni ngʉngʉe logoti: “Mwalimu, ko njinjí kpakpanga na kuna b’u, ro ko nzá lø bbè ro ddikpa maddi ri. Ro, ri ni po nari dho i ma djo mbi dda na nì.” 6 Bbè-mbi kpa djo ro, kpa løngʉe bbè bí bbo nari dho, bbè-mbi nanga dingʉe thani tha. 7 Føri dho kpa wíngʉe ndima lai nja bbú nǎ ngʉe ná kpa ndima tsotsokodha dho. Kpa si ro, kpadhó aro kʉ ná bbú krʉ na bbè lingʉe pɨpɨ nari dho, bbú ngʉe chøchø ndi koko dda na. 8 Fø lo ndi nja ro, Simoni Petro kongʉeni Yesu nji ndi d’eti djo ndirigoti ke pongʉeri: “Atuni ma kuso ro Bboke, ma kʉ chenga dhi ke ró.” 9 Dhonalo ke ma, ndi lai kpa ma na nanga kengʉeni bbo pli ndima løngʉe ná bbè dho, 10 ndirigoti Simoni lai kpa, Zebedayo ddui Yakobo ma, Yohani ma na maddi nanga kengʉeni bbo pli. Ro, Yesu pongʉeri Simoni dho: “Abba do ni nji nari tso dhonalo kpadjonga djó ro ni di ndrŭ pɨ shi ndima kʉ ro.” 11 Føro, kpa ngʉngʉe ndima dhó bbú dda tso ro, kpa bbangʉe ndima dhó ritsi krʉ ndirigoti kpa rangʉe Yesu ulu.

12 Ddikpa cha, ddikpa vile nǎ Yesu ngʉe ná saa na, fø bba gʉ ngʉe lu ndí che korøkorø ná ke. Føro Yesu ke nja ro, ke kongʉeni ndi d’eti djo dz’ djo ndi nganja ro ndirigoti ke ngʉ ddoni ke ró ɨ: “Bboke, njati rie ngbà ni jiri ró, aliri ma tsetse.” 13 Føro ke ddangʉe ndi thó, ke løngʉe ke ronga ndirigoti ke pongʉeri: “Ma jiri ngbà! Atsetse.” Føro thei ke ró korøkorø singʉeni si. 14 Føro Yesu pongʉeri ke dho nzɨ ke d’ra fø lo ro ddikpa le dho maddi ndirigoti ke jangʉeri ke dho ɨ: “Ro, ara ni dho bbakuhani dho ndirigoti ara Musa jangʉe ná bbʉdha bbʉ ndiri dhǒ ni ró dhe sini nari kpa dho d’e.” 15 Ro, ke djó lo ngʉ ga bbo pli ndirigoti birobiro kʉ ná ndrŭ ngʉ ndima tso gbá ndiro ndima rr ke ti ná lo ndirigoti ke gø ndima ró dhe d’e. 16 Nì mai ri kʉ fø ro, ke ngʉ adi ra bí ina nga ndrŭ ro kʉ ná ngana ndiro ndi rá sala nji d’e.

17 Ddikpa cha, longa Yesu ngʉ ddi ro, Bbafarisayo ma, Yadha nga ngʉ adi ddi ndrŭ dho ná kpa ma na singʉe Galilea ma, Yudea ma na nǎ krʉ kʉ ná bba gʉ lu ro ndirigoti Yerusalemu nǎ ro ndirigoti kpa ngʉ di føga. Føro Yova* dzá kpakpanga ngʉe ke djó ndrŭ gødha dho. 18 Ndirigoti anja! ndrŭ singʉe ddo ndí ddoni ná ke na kipoyi* djó ndima d’u ke ro, kpa ngʉ riji ndima si ke na Yesu dhi ngana ndirigoti ndima li ke ke nji. 19 Ro, birobiro kʉ ná ndrŭ dzá lo dho nzá ri kangʉe kpa si ke na Yesu dhi ngana ri. Føri dho, kpa djingʉe dza djo, b’lo kpa we dza djotsi nanga ro nari goti, kpa thʉngʉe ke kipoyi* djó ndrŭ kana Yesu nji. 20 Fø kpa dhó udha ndi nja ro, Yesu pongʉeri ke dho: “Nidzá chenga sani sa.” 21 Føro, nga ndi ná kpa ma, Bbafarisayo ma na ngangʉe ri ddidha tso ɨ ndima thí nǎ: “Føri ká kʉ ngbà di ná ke Mungu dhu ri? Ndrŭ dhi chenga zø ká ie ka ndi njí, rie nga Mungu dhé ri ró?” 22 Ro, Yesu d’ingʉe kpa thí nǎ kpa ddi ná lo utso ro, ke pongʉeri kpa ni: “Ni ká addu ddi ni thí nǎ? 23 I lo kana sʉsʉ pli podha kʉ nari ká kʉ ngbá lo: ‘Nidzá chenga sani sa’ inga ‘Adani ndirigoti abbi?’ 24 Ro, ndiro ni chu ndrŭ Ddù kʉ kpakpanga na ndi sa ndrŭ dhi chenga i dz’ djó nari d’e—” føri goti ke pongʉeri ddo ndí ddoni ná ke dho: “Ma ripo ni dho, adani, adzi nidhó kipoyi* ndirigoti angʉ ni bba.” 25 Føro ke dangʉeni nì ndrŭ njanja ro, ke dzingʉe ndi ngʉ yí djó ná kipoyi* ndirigoti ke ngʉngʉe ndi bba Mungu ndi má ro. 26 Fø lo kengʉe ndrŭ krʉ nanga bbo, ndrŭ ngangʉe Mungu madha tso, ndirigoti ndrŭ do løngʉe bbo nari dho ndrŭ ngʉ ripo ɨ: “Njʉ ko nja nzá ro ko d’erie nja ná lo!”

27 Føga ro ndi tuni nari goti, ke njangʉe Lawi, kitas tso ngʉ adi nju ná ke, kitas dhi biro nǎ ndi di ro ndirigoti Yesu pongʉeri ke dho: “Angʉ ma unake.” 28 Føro ke bbangʉe krʉ kʉ ná ritsi ndirigoti ke dangʉeni ro, ke ngangʉe Yesu ulu ndi ra nari tso. 29 Føri goti, Lawi njingʉe bbò kʉ ná fete ke dho ndi bba. Ndirigoti kitas tso nju ná birobiro kʉ ná ndrŭ ma, nja ndrŭ ma na ngʉ nganyo ddironga kpa na. 30 Føri dho, Bbafarisayo ma, nga ndi ná kpa ma na ngangʉe chelo ndima ti ke unakpa djo nari tso ndirigoti kpa ngʉ ripo: “Ni ká nganyo ndirigoti nga ma jø kitas tso nju ná kpa ma, chenga dhi ndrŭ ma na na addudho?” 31 Yesu ngʉngʉe logoti ɨ: “Ri nga kʉ bblo ndí kʉ ná ndrŭ i adi munganga ne ri, ro ri kʉ dhe dhi ndrŭ. 32 Ma nzá singʉe chølo dhi ndrŭ nzi ri, ro ma singʉe chenga dhi ndrŭ nzi ndima leni le d’e.”

33 Kpa pongʉeri ke ni: “Yohani unakpa ma, Bbafarisayo unakpa ma na adi nyo chi ndirigoti ddo nǎ le ddoni ná sala nji bí ina, ro ni unakpa nga ma nyo, nga ma jø.” 34 Yesu ngʉngʉe logoti kpa dho: “Ni nzá ka ni liri ndoa ba dhó bbakau chi nyo, go ndoa ba kʉ ndima kana ro ri, ri ká nga fø ri? 35 Ro, ddikpa cha le si ndoa ba tutu kpa kana ro, ná fø dyi kpa si kʉ nyo chi nì.

36 Føri kina ke bbʉngʉe i loroji kpa dho: “Ddikpa le ma nzɨ ddi adi wø rù tsodjo krr nari na ndi ro ndi ró rù koko nanga ri. Njati le njiri fø ró, wø rù tsodjo adi rù koko nanga drrdrr ndirigoti ri tso ro nzɨ gbani rù koko na ri. 37 Godhé, ddikpa le ma nzɨ ddi adi wø divai ro li kødha na le thɨ ná ngó ngʉ ná ddø na ri. Njati le njiri fø ró, wø divai ka ndi tha fø ddø nanga tha ndirigoti divai ka ndi d’røni d’rø ndirigoti fø ddø ka ndi sani sa. 38 Ro, wø divai ringani le li kødha na le thɨ ná wø ddø na. 39 Ddikpa le ma nzɨ ddi adi riji ndi jø wø wa ro drrdrr wa ndi jø nari goti ri, dhonalo ke adi ripo, ‘Drrdrr wa kʉ bblo pli.’”