SOMO 19
Yova dzá Dimu ká kʉ bbʉbbʉ Wakristo i nì?
Ko Yova dzá Dimu, ko uri u ko kʉ bbʉbbʉ Wakristo. Ká addudho? Anja ko u ná lo, ko ró pekee kʉ ná dho, ndirigoti ko kana ko kʉ na ná jidha.
1. Yova dzá Dimu dhó udha ká tørieni ngbá lo djo?
Yesu pongʉeri: “[Mungu] dzá lo kʉ bbʉbbʉ.” (Yohana 17:17) Ddiddi Yesu ngʉ adi rinji nari bbai, Yova dzá Dimu u ná lo krʉ adi si Biblia nǎ ro. Anja kodhó saa na adi njini ná lo. Karne 19 dzá mwisho na, wanafunzi wa Biblia le ngʉ nzi ná kpa dhó kikundi ngangʉe bblo ndima Biblia nǎ longa ne nari tso. Kpa ngʉ ndima dhó udha li Biblia nǎ ro si ná lo djo dhé, ni mai fø lo ngʉe dini nǎ ndrŭ ngʉ nji ná lo ró ro njonjo ro. Ndirigoti kpa ngangʉe ndima chu ná lo ndima d’ra nja ndrŭ dho nari tso.a
2. Yova dzá Dimu ká ko adi ko nzi addudho?
Yova adi ndidzá njí dhi kpa nzi ndidzá Dimu dhonalo kpa adi bbʉbbʉlo d’ra ke djo. (Waebrania 11:4–12:1) Loroji na drrdrr, Mungu pongʉeri ndidzá ndrŭ dho: “Ni kʉ madzá Dimu.” (Azø Isaya 43:10.) Yesu le adi nzi “Chi kʉ ná Dimu.” (Ufunuo 1:5) Fø lo dho, cho 1931 djó ro ko adi ko nzi Yova dzá Dimu. Ko adi ko mbu bblo fø dho na le ko nzi nari dho.
3. Yova dzá Dimu ká adi Yesu dhó jidha dyø ngbaribbai?
Yesu jingʉe ndi unakpa bbo, føri dho ke ngʉ kpa nja ndidzá familia bbai. (Azø Marko 3:35.) Føri bbai Yova dzá Dimu kʉ dz’ djolu gble ddi ndima tso gbani ro ndirigoti ddikpa familia bbai. (Filemoni 1, 2) Ko adi ngarr ɨ yadha dho maddi: “Anidho jidha nju tso njuni ná le djoi krʉ dho.” (1 Petro 2:17) Yova dzá Dimu adi fø jidha dho njonjo kʉ ná chulu, loroji na kpa adi dz’ djolu gble kʉ ná ndima lai Wakristo tsotso kó uhitaji dhi saa na.
ANE LONANGA BBO
Aneri ni chulo bbo Yova dzá Dimu dhó historia djo, ndirigoti aneri ni chu ko kʉ bbʉbbʉ Wakristo nari dhǒ ná nja lo.
Bbʉbbʉ Wakristo adi Biblia nǎ lo ú ndirigoti kpa adi ri nǎ lo d’ra nja ndrŭ dho maddi
4. Ko adi kodhó udha li Biblia nǎ ro si ná lo djo
Yova d’rangʉeri Biblia nǎ lo nanga si tuni pʉlʉpʉlʉ. Azø Danieli 12:4 ndirigoti maelezo ya chini, ndirigoti anitilo i ngadhudha djo:
Mungu dzá ndrŭ vé di ra Biblia nǎ longa ndima ne nari na anzi ró, ká ngbá lo ka ndi “bae nga bbo”?
Anja ngbaribbai ma Wanafunzi wa Biblia ngʉ Mungu dzá longane nari, loroji na fø kpa kana ddike ngʉe Charles Russell. Aninja VIDEO, ndirigoti anitilo i ngadhudha djo.
Video nǎ ni njari nari bbai, Charles Russell ma ká ngʉ adi Biblia nǎ longane ngbaribbai ndi lai kpa ma na?
Ni ká churi ngbà?
Nja saa na, ko u ná nja lo thika ki ko adi thɨ vi. Ká addudho? Ddiddi dyi si nari tso adi ra dzodzo ndi ve dz’ djó nga lø lú nari bbai, Mungu liri ko famu ndidzá lo dzodzo. (Azø Mezali 4:18.) Føri dho, nzɨ mai Biblia nǎ lo thika adi leni ro, ko adi ko u ná lo thika thɨ Biblia nǎ lo ko famu nari ró ro.
5. Ko adi ko ró dho na gbani ná lo nji
Ko ká le adi nzi Yova dzá Dimu addudho? Aninja VIDEO, ndirigoti anitilo i ngadhudha djo.
Yova dzá Dimu le le nzi nari ká thonga bbo addudho?
Yova ká vʉngʉe ndrŭ ndidzá Dimu addudho? Kpa ka ndima d’ra ke kʉ bbʉbbbʉ Mungu nari, dhonalo ke djo ndrŭ adi kali sha bbo. Akonja fø kali ro aro.
Bí kʉ ná dini adi riddi ndima dhó dini nǎ ndrŭ dho, Mungu jiri le bbʉ madha ndi dho ritsi ró ji chulu. Ro azø Mambo ya Walawi 26:1, ndirigoti anitilo i ngadhudha djo:
Bbʉbbʉ ri ká kʉ ngbá lo? Yova ká adi ndi mbu sanamu dho ngbaribbai?
Dini nǎ nja bbobbonga adi riddi ndrŭ dho, Yesu kʉ Mungu. Ro azø Yohana 20:17, ndirigoti anitilo i ngadhudha djo:
Bbʉbbʉ ri ká kʉ ngbá lo? Mungu ma, Yesu ma na ká kʉ ddikpa ke?
Yova cho ndidzá Dimu ndiro kpa d’ra bbʉbbʉlo ndi djo ndirigoti Yesu djo nari ni chu nari dho ká ni ni mbu ngbaribbai?
6. Ko jirieni ji ko kana
Biblia ddi Wakristo le ndí ró njonjo kʉ ná sehemu na. Azø 1 Wakorintho 12:25, 26, ndirigoti anitilo i ngadhudha djo:
Bbʉbbʉ Wakristo ká adi rinji ngbǎ ndima lai Wakristo di nzani nza ró?
Ni njari nari bbai, Yova dzá Dimu ká adi jidha dho ndima kana ngbaribbai?
Nja nga lai djó Yova dzá Dimu di nzani nza ró, dz’ djolu gble kʉ ná nja kpa e tayari ndima kó kpa tsotso. Ndiro ni nja ddikpa loroji d’e, aninja VIDEO. Ndirigoti anitilo i ngadhudha djo.
Yova dzá Dimu adi ndima lai ndrŭ tsotso kó kpakpalo dhi saa na, føri ká kpa kʉ na ná jidha dhǒ ngbaribbai?
Bbʉbbʉ Wakristo adi jidha dhǒ uhitaji na kʉ ná ndrŭ dho
NJA NDRŬ ADI RIPO: “Yova dzá Dimu kʉ ø si ná dini.”
Yova ká ngangʉe ndidzá njí dhi kpa ndi nzi Dimu nari tso ngbá saa djó ro?
LO DZÁ DɄNGA
Yova dzá Dimu kʉ nì bbʉbbʉ Wakristo ri. Dz’ djolu gble ko kʉ ddi tso gbani ná familia, ko u ná lo krʉ adi si Biblia nǎ ro ndirigoti ko adi bbʉbbʉlo ddi Yova djo.
Lo djolu le ngʉ nari
Ko ká adi ko nzi Yova dzá Dimu addudho?
Ko ká adi njini ko kana ngbaribbai?
Ni ká riddi Yova dzá Dimu kʉ nì bbʉbbʉ Wakristo ri?
NI KA NI CHU NÁ NJA LO
Aneri ni chulo bbo kodhó historia djo.
Mashahidi wa Yehova—Watu Wanaotenda kwa Imani, Sehemu ya 1: Kutoka Katika Giza (1:01:27)
Anja ddikpa loroji ndiro ni chu ngbaribbai ma Yova dzá Dimu nyangʉe kali dhi mafundisho djó nga nari d’e.
Aneri ni ba jibu Yova dzá Dimu djo ni ka ni dhu ná lo djo.
“Maulizo Yenye Watu Wanaulizaka Sana juu ya Mashahidi wa Yehova” (Jw.org djó kʉ ná lo)
Stephen ngʉ adi che bbo kʉ ná lo nji. Anja ngbaribbai ma Yova dzá Dimu kana ke njangʉe ná lo chongʉe ke ronga ndi le ndidhó lo thika nari.
“Maisha Yangu Yaliendelea Kuwa Mubaya Sana” (Munara wa Mulinzi, 1 Mwezi wa 7, 2015)
a Cho 1879 na, le ngangʉe pʉlʉpʉlʉ le Biblia nǎ longa tu nari tso kodhó Dzamu dhi Munara chulu.