Ciiyo 17

Bushicibusa Nga Bwatolelela Na Mutonyumfwana Amubyanu

Bashicibusa balyeelete kusunana. Na mweeya shiinji shakwe Yehova, lusuno lwanu kuli nguwe lulaakukomena. Na ulo lusuno lwakomena, mulaakunoyandisha kusebensela Lesa. Aboobo mulaakuyanda kuba bashikwiiya bakwe Yesu Klistu. (Mateyo 28:19) Na mukabe beshikamukowa a Bakamboni bakwe Yehova, mulaakuba bashicibusa bakwe Lesa muyayaya. Ino nshiinshi nshomweelete kucita?

Mulyeelete kutondesha lusuno kuli Lesa kwiinda mukunyumfwila milawo yakwe. “Kusuna Lesa, nkukonkela milawo yakwe. Milawo yakwe Lesa teshi iyumu.”—1 Joni 5:3.

Munocita nshomutokwiiya. Yesu wakaamba likani litondesha ayi tunocita nshotwiiya. Muntu ucite maano wakayakila ng’anda yakwe pa libwe. Muntu muluya wakayakila ng’anda yakwe pa museese. Cipuupu cinene ndicakesa, ng’anda yakayakilwa pa libwe taikwe kuwa, sombi ng’anda yakayakilwa pa museese yakawa. Yesu wakaamba ayi abo boonse banyumfwa a kucita nshobeeya bali anga ngu muntu ucite maano wakayakila pa libwe. Sombi abo banyumfwa a kutacita nshobeeya bali anga ngu muntu muluya wakayakila ng’anda pa museese. Ino mwebo nguli wenga mwayanda kukosha?—Mateyo 7:24-27.

Kulyaaba. Na muntu walyaaba ulyeelete kupaila kuli Yehova kumwaambila ayi ulisuni kucita kuyanda kwakwe muyayaya. Kucita kuyanda kwakwe Lesa kulatondesha ayi ndimwe bashikwiiya bakwe Yesu Klistu.—Mateyo 11:29.

Kubombekwa. “Ulumbaishe liina lyakwe, ubombekwe, Lesa akusalashe kwaamba ayi shibiibi shako shilekelelwe.”—Milimo ya Batumwi 22:16.

Munosebensela Lesa a nkusu shanu shonse. “Mutabi batolo, sombi amusebense cankusu. Amulibeenge amyoyo yoonse mukusebensela Lesa.”—Bene Loma 12:11.