June

Yehova wakabapa shoolwe Beneklistu bakutaanguna ndyebakalinga kushibila bukaalo bupya. Liinji bakalinga kupenshekwa. Cimwi ciindi ishi mpashi shakalinga kucitika paciindi ndyebatakalinga kulangila kupenshekwa. Amuyeeye shakacitikila Banabasi alimwi amutumwi Paulo paciindi ndyebakalinga kushimikila ku Lisitila. Pakutaanguna, bantu bakabatambula kabotu akukutika kuli mbabo. Sombi ndipakeenda ciindi, beshikupikisha “bakayungoola bantu,” alimwi bamwi pabantu abo bakooma Paulo mabwe akumukwelela pansengwe lya ndabala kabayeeya ayi wafwa. (Milimo 14:19) Sombi Banabasi a Paulo bakaya kumusena kumwi akutolelela kushimikila. Ino nshiinshi shakaswaamo? Bakacafwa bantu ‘baanji kuba bashikwiiya’ alimwi cakubonenaako cabo anshebakaamba shakayuminisha bashominyinaabo. (Milimo 14:​21, 22) Baanji bakacafwikwa ceebo cakwaamba ayi Banabasi a Paulo bakatolelela kushimikila nabi kwaamba ayi bakalinga kupenshekwa. Aswebo na twatolelela kusebensa ncito Yehova njaakatupa, alaakutupa shoolwe. w23.04 mape. 16-17 mapa. 13-14

Mubuumi bwakwe boonse, Defedi wakeenda mumapensho aanji ayumu. Alimwi liinji wakalinga kusenga lucafwo kuli Yehova mumupailo. Defedi wakalinga kushomete cakutatoonsha kwaamba ayi Yehova wakalinga kunyumfwa, akukumbula mipailo yakwe. Amwebo inga mwashoma ayi Yehova alanyumfwa akukumbula mipailo yanu. Baibo ilatucafwa kushoma ayi Yehova inga watupa busongo, akutupa nkusu nshotuyandika kwaamba ayi tucikonshe kuliyumya. Alimwi inga wasebensesha bamakwesu abenankashi na abo batamulambili kwaamba ayi batucaafwe ndyetutokwiinda mumapensho. Nabi kwaamba ayi teshi lyoonse Yehova ndyeenga wakumbula mipailo yesu kweelana ambotutolangila, tulicishi kwaamba ayi alaakwiikumbula. Alaakutupa nshotuyandika alimwi paciindi ceelete. Aboobo amutolelele kupaila akushoma kwaamba ayi Yehova alaakunomubikilako maano pacecino ciindi alimwi ayi mucishi cipya alaakumupa shoonse ‘nshomulila mumoyo.’—Kulu. 37:4. w23.05 pe. 8 pala. 4; pe. 13 mapa. 17-18

Amubikile maano kushoolwe nsheenga mwacaana na mwakumanisha ncomwakasala kucita. Ino nshoolwe nshi nsheenga mwabikilako maano ndyemusuni kukumanisha ncomwakasala kucita? Na ncomwakasala kucita nkubelenga Baibo nabi kupaila, amuyeeye mbweenga shayumya bushicibusa bwanu a Yehova. (Kulu. 145:​18, 19) Na ncomwakasala kucita nkwiiya kuba amubo umwi wa Bwineklistu, amubikile maano ku mbweenga kuba amubo uyo kwamucafwa kuba abushicibusa buyumu abamwi. (Kolo. 3:14) Mpashi inga mwalemba sheebo shoonse shimupa kusuna kukumanisha ncomwakasala kucita. Ciindi aciindi munoolanga pamulongo uyo. Alimwi amucane ciindi cakuba pomwi abaabo beenga bamuyuminisha. (Tus. 13:20) Cimwi ciindi, soonse inga twalinyumfwa kutasuna kukumanisha ncotwakasala kucita. Ano sa ici cilaamba ayi inga tatukumanishi ncotwakasala kucita? Sobwe. Aswebo inga tweelesha kukumanisha ncotwakasala kucita nabi ndyetutasunishishi kucita boobo. Nabi kwaamba ayi kucita boobo inga tacibi cuubu, mulaakusangalala na mukakumanishe ncomwakasala kucita. w23.05 mape. 27-28 mapa. 5-8

Kushiba ayi ngumukuli wesu pashintu nshotusalawo kucita, inga kwatupa kulyaambilila shibiibi shesu, kusebensela pashilubo shesu, alimwi akuleya kubooshawo kucita shilubo isho. Kucita boobo inga kwatucafwa kutolelela kucica mulubilo lwakubuumi. Ino nshiinshi nsheenga mwaciita na mwakasalawo kucita cintu citabete kabotu? Tamweelete kusebensesha ciindi ankusu shanu kulifuninina ayi ncomwakacita cakalingabo kabotu na kupa mulandu bamwi pacilubo ncomwakacita. Muciindi cakucita boobo, amusumine shilubo nshomwakacita akweelesha cankusu kucita nsheenga mwacikonsha pacecino ciindi. Na mutolinyumfwa cibiibi pacilubo ncomwakacita, cakuliceesha amupaile kuli Yehova akusumina cilubo ncomwakacita, alimwi akumusenga kwaamba ayi amulekelele. (Kulu. 25:11; 51:​3, 4) Amusenge kulekelelwa kubaabo mbomwakakalasha, alimwi na kaciyandika, amusenge lucafwo kubamanene. (Jemu. 5:​14, 15) Amwiiye kuswa kushilubo shanu, alimwi akuleya kubooshawo kucita shilubo isho. Na mwacita boobo, inga mwashooma ayi Yehova alaakumutondesha nkuumbu alimwi akumupa lucafwo ndomutooyandika.—Kulu. 103:​8-13. w23.08 mape. 28-29 mapa. 8-9

Jeoiyada wakacafwa Mwaami Joashi kuba muntu uli kabotu. Aboobo Mwaami Joashi ndyaakalinga mwanike, wakalinga kusuni kusangalasha Yehova. Sombi Jeoiyada ndyaakafwa, Joashi wakatalika kukutika ku bacinenenene abo batakalinga kukonkela milawo yakwe Lesa. (2 Maka. 24:​4, 17, 18) Nabi kwaamba ayi nshobakacita shakakalasha Yehova abuumbi “wakatolelela kutuma bashinshimi kwaamba ayi bacenjeshe bantu abo ayi baboolele kuli nguwe, sombi bantu abo tabakwe kubanyumfwila.” Tabakwe kunyumfwila nabibo kuli Sekaliya mwanaakwe Jeoiyada, uyo wakalinga mushinshimi wakwe Yehova, mupailishi alimwi mupyala wakwe Joashi. Alimwi Mwaami Joashi wakapa kwaamba ayi Sekaliya acaikwe. (2 Maka. 22:11; 24:​19-22) Joashi taakwe kutolelela kuloonda Yehova munshila yeelete. Yehova wakaamba ayi: ‘Ndanyaansha baabo bansebaanya.’ (1 Samwe. 2:30) Mukuya kwaciindi, bashilumamba baniini bene Silya bakakoma “bashilumamba baanji” bakwe Joashi alimwi ‘bakamucisa abuumbi.’ (2 Maka. 24:​24, 25) Joashi wakacaikwa ku basebenshi bakwe ceebo cakucaya Sekaliya. w23.06 mape. 18-19 mapa. 16-17

Mutumwi Paulo kaatana kwaangwa, wakekalaako mu Efeso kaashimikila akwiisha bantu makani abotu. (Milimo 19:​1, 8-10; 20:​20, 21) Wakalinga kubasuni abuumbi bashominyina alimwi wakalinga kusuni kubacafwa kutolelela kushomeka kuli Yehova. Bene Efeso bakalinga kushoma njiisho shakubeca shabupailishi akucita sha masalamushi. Bantu bakalinga kukala mu Efeso bakalinga kucita shintu shibiibi abuumbi alimwi tabakalinga kunyumfwaawo ansooni. Liinji bakalinga kwaamba pamakani akoonana ndyebakalinga kucita shisekano andyebakalinga kucita shakusekelela sha bupailishi. (Efe. 5:3) Baanji bakalinga ‘bacileka kunyumfwa nsoni,’ maswi asansulula ayi “bakalinga bacileka kulinyumfwa cibiibi pa shintu isho.” (Efe. 4:​17-19) Kabatana kwiiya panjiisho shakwe Yehova shaamba pashiluleme ashitaluleme, njeelacaamba yabo tayakalinga kubapenshaawo na babisha. Aboobo Paulo wakaamba ayi “miyeeyo yabo ili mumunshinshe. . . Tababeteko lubasu kubuumi ubo Lesa mbwaapa.” Nacibi boobo, bene Efeso bakaswaamo mumunshinshe. w24.03 pe. 20 mapa. 2, 4; pe. 21 mapa. 5-6

Gidyoni ndyaakalinga kusebensa mbuli Moomboloshi wakalinga kuyandika kusebensa cankusu. Bene Midyani ndyebakacica nkoondo iyo yakalingaako mashiku, Gidyoni wakabatandaanya kuswa kucinyika ca Jesiliilu kuya mukushika Kumulongo wa Joodani. (Boombo. 7:22) Sa Gidyoni wakaboolelaamo ndyaakashika pamulonga wa Joodani? Sobwe! Nabi kwaamba ayi lakwe abasankwa bakwe bali 300 bakalinga kulemete, bakasubuka mulonga wa Joodani akutolelela kutandaanya balwani babo. Mukweelaako, bakacana bene Midyani akubakoma. (Boombo. 8:​4-12) Gidyoni wakalinga kushomete ayi Yehova alaakumupa nkusu. Alimwi ncakwiila Yehova wakamupa nkusu. (Boombo. 6:​14, 34) Paciindi cimwi, Gidyoni abasankwa bakwe bakalinga kutandaanya bamaami bobilo ba bene Midyani abo mpashi bakalinga kutantite pa ngamela. (Boombo. 8:​12, 21) Sombi Lesa wakacafwa Gidyoni abasankwa bakwe kucana bamaami ba bene Midyani akubacaya. Bamanene abalo inga bacinka manungo muli Yehova mukwiinga “taaleemi nabi kukopoka.” Alaakubapa nkusu na balinyumfwa kulema.—Isa. 40:​28, 29. w23.06 pe. 6 mapa. 14, 16

Inga twatolelela kunyumfwila Lesa nabi twiinde mumapensho ali buyani. Aboobo amucinke manungo muli Yehova. Amuyeeye Balaki mbwakacikonsha kukoma balwani ceebo cakucinka manungo mubutanjilishi bwakwe Yehova. Paciindi ici, bene Isilaeli tabakalinga kulibambiteewo kulwana alimwi tabakalinga kuciteewo ashilwanisho. Nacibi boobo, Yehova wakalwiita Balaki kuya mukulwana Sisela mutanjilili wabashilumamba bene Kenani pomwi abashilumamba bakwe abo bakalinga kucite shilwanisho shiinji. (Boombo. 5:8) Debola mushinshimi mwanakashi wakalwiita Balaki kuswa pakalundu akuya pamusena peelenebo mukulwana Sisela abaabo bakalinga mu shikoci shankondo shili 900. Cakalinga kusa mukuba ciyumu bene Isilaeli kulwana baabo bakalinga mu shikoci shankondo pamusena peelenebo mukwiinga cakalinga cuubu kweensha shikoci. Nacibi boobo, Balaki wakanyumfwila Yehova. Bashilumamba bakwe Balaki ndyebakalinga kukunkuluka Kalundu ka Tabo, Yehova wakalonsha mfula inene abuumbi. Shikoci shankondo shakwe Sisela shakatalika kucatwa mumatipa, alimwi Yehova wakapa kwaamba ayi Balaki akome. (Boombo. 4:​1-7, 10, 13-16) Aswebo tulaakucikonsha kukoma na katucinka manungo muli Yehova alimwi amubutanjilishi mbwaatupa kwiinda mulibunga lyakwe. w23.07 pe. 19 mapa. 17-18

Kukalika moyo kulayandika kwaamba ayi tukapuluke. Bweenka mbuli basebenshi bakwe Lesa bashomeka bakale kale, tulayandika kulindila cakukalika moyo, kwaamba ayi Lesa akumanishe shishomesho shakwe. (Ebu. 6:​11, 12) Baibo ilatukoshanisha ku mulimi. (Jemu. 5:​7, 8) Mulimi alasebensa cankusu kushanga akutilila shishango shakwe, sombi taashibiiwo ndyeshi shikakomene. Aboobo mulimi alalindila cakukalika moyo, akushoma kwaamba ayi alaakutebula. Aswebo tulatolelela kubikila maano kukucita shintu shakumushimu, nabi kwaamba ayi ‘tatucishiwo bushiku Mwaami wesu ndyeshi akese.’ (Mate. 24:42) Tulalindila cakukalika moyo, katushomete cakutatoonsha kwaamba ayi paciindi ceelete, Yehova alaakukumanisha shoonse nshaakatushomesha. Na twaalilwa kukalika moyo, inga twalema kulindila akutalika kuswa kuli Yehova paniini paniini. Alimwi inga twatalika kubikila maano kushintu nshotuyeeya ayi inga shatupa kusangalala pacecino ciindi. Sombi na katukalika moyo, inga twatolelela kuliyumya kushikila kumamanino akupulushikwa.—Mika 7:7. w23.08 pe. 22 pala. 7

Na tweelanya bushinshimi mbotucana pa Danyelo 2:​41-43 ku bushinshimi bumwi bulembetwe mulibuku lyakwe Danyelo alya Ciyubululo, inga twaamba ayi shimpanta shileemikaninaako buleelo bucite nkusu abuumbi pacecino ciindi, bwa Anglo-America. Kwaamba pa buleelo ubu bucite nkusu abuumbi nsengwe yoonse, Danyelo wakaamba ayi “buleelo ubu bulaakuba buyumu mushipansha shimwi alimwi butacite nkusu mumwi.” Ino nceebonshi tabucite nkusu mumwi? Mukwiinga bantu batapukite na bantubo, abo beemikaninwaako abulongo, balapa kwaamba ayi buleelo ubu bwaalilwe kusebensesha bunene nkusu nabi kuba buyumu abuumbi bweenka mbuli nshimbi. Tuleeya makani aanji ancine kuswa ku ciloto ca cibumbwabumbwa Danyelo ncaakasansulula. Cakutaanguna, buleelo bucite nkusu abuumbi nsengwe yoonse bwa Anglo-America bwatondesha ayi bulicite nkusu. Kucakubonenaako, buleelo ubu bwakalinga kucite lubasu luyandika abuumbi mukukoma Nkondo Yapacishi Coonse Yakutaanguna alimwi a Yabili. Nacibi boobo, buleelo ubu tabucite nkusu mushipansha shimwi alimwi bulaakutolelela kutaba ankusu mushipansha shimwi ceebo cakwaamba ayi balelwa balalwana beene abeene alimwi akulwana mfulumeende. Cabili, buleelo ubu mbobuleelo bwakweelaako kweendelesha, Bwaami bwakwe Lesa kabutana kunyonyoola maleelo abantu amwi oonse. w23.08 mape. 10-11 mapa. 12-13

Pashiindi shimwi, Defedi wakalinyumfwa kulefuka ceebo ca mapensho amwi apusenepusene ngaakalinga kwiindaamo. (Kulu. 18:​4, 5) Nacibi boobo, mukwiinga Yehova wakalinga kumutondesha lusuno akumubikilako maano, wakaba ankusu. Yehova wakatanjilila shicibusa wakwe ulefukite ku “mafulo acite mweemfu” akumisena kwakookeshela kuli “maanshi abotu atafundeene.” Aboobo Defedi wakayuminishikwa alimwi wakacikonsha kutolelela kusebensela Yehova calusangalalo. (Kulu. 18:​28-32; 23:2) Amunshiku shino, lusuno lutamaani lwakwe Yehova lulatucafwa kuliyumya nabi twiinde mumapensho ali buyani. (Mali. 3:22; Kolo. 1:11) Liinji Defedi wakalinga kuba mubukaalo buloondesha alimwi wakalinga kucite balwani baanji bacite nkusu. Nacibi boobo, lusuno lwakwe Yehova lwakamupa kulinyumfwa kushitilishikwa. Defedi wakalinga kulinyumfwa ayi Yehova wakalinga anguwe mubukaalo buli boonse alimwi ayi wakalinga kumuyuminisha. Aboobo wakeemba ayi: “Boowa boonse mbondakalinga kucite [Yehova] wakabumana.” (Kulu. 34:4) Nabi kwaamba ayi shimwi shiindi Defedi wakalinga kuloonda abuumbi, wakacikonsha kucileka kuloonda ceebo cakushiba kwaamba ayi Yehova alimusuni. w24.01 pe. 30 mapa. 15-17

Kuli nsheenga mweeya kushintu shitabete kabotu Joashi nshaakasalawo kucita. Pesule lyakwaamba ayi Jeoiyada Mupailishi Munene wafwa, Joashi wakasalawo kuba bushicibusa abantu batabete kabotu. (2 Maka. 24:​17, 18) Wakatalika kukonkela nshobakalinga kumulwiita bamatanjilili ba baJuda abo batakalinga kusuni Yehova. Mpashi amwebo mutoosumina ayi Joashi takalinga kweelete kuba bushicibusa abantu abo bakalinga kucita shibiibi. Wakasalawo kunokutika kumiyeeyo itabete kabotu njobakalinga kumulwiita. Alimwi Sekaliya mupyala wakwe ndyakeelesha kumululika, Joashi wakalwiita bantu ayi bamucaaye. (2 Maka. 24:​20, 21; Mate. 23:35) Wakacita cintu cibiibi abuumbi alimwi cabuluya! Pakutaanguna Mwaami Joashi wakalinga kushomeka kuli Yehova, sombi mukuya kwaciindi wakapondoka akuba mucayi. Mukweelaako, basebenshi bakwe bakamucaya. (2 Maka. 24:​22-25) Ishi shoonse naakwiinga tashikwe kumucitikilaawo, naakwiinga wakatolelela kukutika kuli Yehova akubaabo bakalinga kusuni Yehova! w23.09 pe. 9 pala. 6

Yesu wakalinga kucishi ayi mutumwi Pita alaakutolelela kushomeka kuli Yehova. Aboobo cankuumbu Yesu wakalwiita Pita ayi “utaloondi.” Ceebo cakwaamba ayi Yesu wakalinga kumushoma Pita, Pita wakaalula nshaakalinga kubona kuyandika mubuumi bwakwe. Mukuya kwaciindi, Pita alimwi a Andulu mukwabo bakacileka kucaya nswi akutalika kusebensa ncito yakushimikila pomwi a Yesu. Lyalo Yehova wakabapa shoolwe shiinji. (Maako 1:​16-18) Kuli shintu shiinji Pita nshaakabona ceebo cakwaamba ayi wakasalawo kuba shikwiiya wakwe Klistu. Wakabonaako Yesu ndyaakalinga kushilika balwashi, kukusha shibanda alimwi akubusha bafu. (Mate. 8:​14-17; Maako 5:​37, 41, 42) Alimwi mucili anga nciloto Pita ncaakabona, wakabona bulemu Yesu mbwaakalinga kusa mukubaabo mu Bwaami bwakwe Lesa. Pita taakwe kulubaawo nshaakabona. (Maako 9:​1-8; 2 Pit. 1:​16-18) Ncakwiila, Pita wakabona shintu nshaatakalinga kulangilaawo ayi inga wabona mubuumi bwakwe. Ncakutatoonsha kwaamba ayi wakalinga kusangalete abuumbi kutambula shoolwe ishi ceebo cakusalawo kuba shikwiiya wakwe Klistu nabi kwaamba ayi kuli shintu shimwi nshaatakalinga kucita kabotu! w23.09 pe. 21 mapa. 4-5

Munkalata yakutaanguna Mutumwi Pita njaakalemba, wakasebensesha maswi akwaamba ayi “amusunane cankusu.” Lusuno ulu ‘lulafweka pa shibiibi shiinji.’ (1 Pit. 4:8) Mpashi Pita wakeebaluka nshakeeya kuswa kuli Yesu pamakani akulekelela bamwi. Paciindi Pita ndyaakeeya makani aya kuswa kuli Yesu, alyeelete wakalinga kushoma ayi na walekelela muntu “mankanda ali 7,” nkokwaamba ayi ngumuntu uli kabotu. Sombi Yesu wakamwiisha ayi alyeelete kulekelela bamwi “mankanda ali 77,” kusansulula ayi taaelete kucileka kulekelela bamwi. Alimwi aswebo Yesu ncakatwiisha. (Mate. 18:21) Na cilamuyumina kulekelela bamwi, mutalefuki! Basebenshi bakwe Yehova boonse batamaninite, cimwi ciindi cilabayumina kulekelela bamwi. Cintu ciyandika ncomweelete kucita pacecino ciindi, nkucita nsheenga mwacikonsha kwaamba ayi mulekelele mushominyinaanu akuba muluumuno anguwe. w23.09 pe. 29 pala. 12

Ndyaakalinga mumala mwaciswi, Jona wakaana alimwi wakalinga kushomete ayi Yehova atookutika mupailo wakwe akumucafwa. Yehova wakapulusha Jona alimwi mukuya kwaciindi wakaba ulibambite kusebensa ncito njaakapekwa. (Jona 2:10–3:4) Sa paciindi ndyemutokwiinda mumapensho mulalisukama abuumbi cakwaamba ayi mulaalilwa kupaila kuli Yehova? Nabi sa mulalinyumfwa kulema abuumbi cakwaamba ayi mwaalilwa kucita ciiyo capalwaanu? Munokwiibaluka ayi Yehova alanyumfwishisha kabotu bukaalo mbomutokwiindaamo. Aboobo nabi mwapailabo mupailo ufwiifwi, inga mwashooma ayi alaakumupa nkusu nshemutoyandika. (Efe. 3:20) Na camuyumina kubelenga akwiiya ceebo cakuciswa, kulema na kulisukama abuumbi, inga mwakutika ku maswi amu Baibo akalekodwa na amu mabuku esu aamba shamu Baibo. Alimwi mpashi inga mwakutika nyimbo shesu shimwi na kweebela vidyo pa jw.org. Yehova inga wamucafwa kuliyumya na mwapaila kuli nguwe alimwi akulangoola shikumbulo mu Baibo amu shakulya shimwi shakumushimu nshaatupa. w23.10 pe. 13 pala. 6; pe. 14 pala. 9

Tente yakulambililaako yakalinga kukoshenye mukati a tempele iyo yakesa mukuyakwa mu Jelusalemu. Yakalinga kucite shipinda shobilo—“Musena Usalalite” a “Musena Usalalite Wiindaawo.” Shipinda ishi shakalinga kupansaanishikwa acisani cishitilisha. (Ebu. 9:​2-5; Kulo. 26:​31-33) Mu Musena Usalalite mwakalinga cakubikaawo lilampi ca golodi, cipaililo cakutentelawo tununkila kabotu alimwi atebulu apo mpobakalinga kubika cimaande cacitondesho. ‘Bapailishi bakananikwa’ beenkabo mbobakalinga kusuminishikwa kunjila mu Musena Usalalite kwaamba ayi basebense ncito shabo shabupailishi. (Shakube. 3:​3, 7, 10) Mu Musena Usalalite Wiindaawo mwakalinga libokoshi lya cipangano lya golodi ilyo lyakalinga kutondesha ayi Yehova mwaali. (Kulo. 25:​21, 22) Mupailishi munene eenkabo ngowakalinga kusuminishikwa kunjila mu Mumusena Usalalite Wiindaawo linkanda lyomwibo pa mwaaka, pa Bushiku bwa Kusalashikwa Kuswa Kushibiibi. (Lefi. 16:​2, 17) Wakalinga kunjila mumusena uyu abulowa bwa shinyama kwaamba ayi alekelelwe shibiibi shakwe asha bene Isilaeli boonse. Mukuya kwaciindi, Yehova wakacafwa bantu bakwe kunyumfwishisha shintu shakalinga mu tente yakulambililaako ncoshakalinga kwimikaninaako.—Ebu. 9:​6, 7. w23.10 pe. 27 pala. 12

Lyoonse Maswi akwe Lesa alatuyuminisha ayi tulyeelete ‘kusunana.’ (Joni 15:12; Loma. 13:8; 1 Tesa. 4:9; 1 Pit. 1:22; 1 Joni 4:11) Nacibi boobo, lusuno ngumubo wa mukati kamoyo ngweenga bantu tababoni. Aboobo ino inga twatondesha buyani ayi tulibasuni bamakwesu abenankashi? Inga twacita boobo kwiinda mushintu nshetwaamba anshetucita. Kuli nshila shiinji mbweenga twatondesha lusuno kubamakwesu abenankashi. Nshila shimwi nsheeshi: “Kamwaamba calushinisho kumuntu womwi awomwi.” (Seka. 8:16) ‘Amwikale muluumuno ababyanu.’ (Maako 9:50) ‘Amube kunembo mukutondesha bulemu kubamwi.’ (Loma. 12:10) “Amutambulane camaansa obilo.” (Loma. 15:7) ‘Amutolelele . . . kulekelelana camoyo woonse.’ (Kolo. 3:13) ‘Amutolelele kucafwana kunyamuna shimulemena.’ (Gala. 6:2) ‘Amutolelele kuyuminishanya.’ (1 Tesa. 4:18) ‘Amutolelele . . . kuyakana.’ (1 Tesa. 5:11) ‘Kamupaililana.’—Jemu. 5:16. w23.11 pe. 9 mapa. 7-8

Bushiku abushiku tulasalawo shakucita nshotuyandika kutondesha ayi tulicite lushomo luyumu. Kucakubonenaako, tulayandika kusalawo shakucita pamakani mbuli beshicibusa, shakulikondelesha, lwiiyo ndweshi tukeeye, kuba mucikwati nabi sobwe, kuba abaana nabi sobwe alimwi anciito njeshi tukanoosebensa. Aboobo inga twaliipusha ayi: ‘Sa nshonsalawo kucita shilatondesha ayi ndashoma ayi conoonobo Lesa alakwaalula cishi cino kuba cishi cipya? Nabi sa ndasalawo kucita shintu shicita baabo batashomi ayi inga bekala kwamuyayaya?’ (Mate. 6:​19, 20; Luka 12:​16-21) Tulaakunosala shakucita shili kabotu na twayumya lushomo lwesu mucishomesho cakwaamba ayi cishi cipya cili pafwiifwi abuumbi. Alimwi tuleenda mumeelesho ngotuyandika kutondesha ayi tulicite lushomo luyumu. Mpashi inga twayandika kuliyumya ndyetutopenshekwa, ndyetwaciswa bulwashi bunene na ndyetutokwiinda mubukaalo bumwi bweenga bwatupa kulefuka. Pakutaanguna inga twalinyumfwa ayi tutoocikonsha kuliyumya mulipenshi ndyetutokwiindaamo. Sombi na lipenshi lyatolelela, tulaakuyandika lushomo luyumu kwaamba ayi tucikonshe kuliyumya akutolelela kusebensela Yehova calusangalalo.—1 Pit. 1:​6, 7. w23.04 pe. 27 mapa. 4-5

Yehova alatulangila kucitawo comwi na twapaila kuli nguwe. Kucakubonenaako, mukwesu inga wasenga Yehova kwaamba ayi munene wancito amusuminishe kucanika kukubungana kunene. Ino Yehova inga waukumbula buyani mupailo wakwe? Inga wacafwa mukwesu kutaloonda kuya mukubandika amunene wancito. Sombi mukwesu alyeelete kuya ku munene wancito mukubandikaakwe. Alimwi mpashi inga wayandika kubandikaakwe mankanda aanji pamakani aya. Kwiilikaawo, mpashi inga wabandika aumwi ngwaasebensaakwe kwaamba ayi bakacinjanye bushiku bwakusebensa na inga wasalawo ayi bakamupekobo maali aniini mumweenshi uyo pamaali ngaafola. Yehova alatulangila kutolelela kupailila pashintu nshetusuni isho nshotubona ayi shilayandika. Yesu wakaamba ayi mipailo yesu imwi inga taikumbulwi peenkaapo. (Luka 11:9) Aboobo mutacileeki kupaila! Amutolelele kupaila kuswa paanshi lya moyo. (Luka 18:​1-7) Na twacita boobo, tulatondesha ayi ncetutopaililaawo cilayandika abuumbi kuli ndiswe. Alimwi tulatondesha ayi tulicite lushomo lwakwaamba ayi inga watucafwa. w23.11 pe. 22 mapa. 10-11

Yehova wakashomesha Abulaamu shicibusa wakwe ayi mishobo yoonse yapacishi ilaakupekwa shoolwe kwiinda mu womwi wamu lunyungu lwakwe. (Mata. 15:5; 22:18) Mukwiinga Abulaamu wakalinga kucite lushomo luyumu muli Lesa, wakalinga kushomete cakutatoonsha ayi alaakukumanisha nshaakamushomesha. Nacibi boobo, nabi paciindi Abulaamu ndyaakalinga kucite myaaka 100 lyalo mukaakwe kaacite myaaka 90, beebene aba bashomeka tabakalinga kuciteewo mwaana. (Mata. 21:​1-7) Sombi Baibo ilaamba ayi: “Abulaamu wakashoma akulangila nakubi kwaamba ayi cakalinga kuboneka anga teshi cikacitike. Aboobo wakaba mushali wa mishobo yoonse.” (Loma. 4:18) Mulicishi kwaamba ayi Abulaamu ncaakalinga kulangila cakakumanishikwa. Wakaba a Isaki mwaana musankwa, uyo ngwaakalinga kulangila kwaciindi cilaamfu. Ino nceebonshi Abulaamu wakalinga kushomete ayi Yehova alaakukumanisha nshaakamushomesha? Ceebo cakwaamba ayi Abulaamu wakalinga kucite bushicibusa buyumu a Lesa, “wakalinga kushoma cancinencine” ayi Lesa alaakukumanisha nshaakamushomesha. (Loma. 4:21) Yehova wakalinga kukondetwe pali Abulaamu alimwi wakamubona ayi aliluleme ceebo calushomo lwakwe.—Jemu. 2:23. w23.12 pe. 8 mapa. 1-2

Mukwesu wacanike bamwi ngweenga bashoma, alasebensa cankusu kukumanisha mikuli yoonse njeenga wapekwa. Amuyeeye pacakubonenaako cibotu Yesu ncaakatondesha. Taakalinga kushicitilamobo shintu. Sombi wakakumanisha mikuli yoonse Yehova njaakamupa nabi ndyecakalinga ciyumu kucita boobo. Wakalinga kubasuni bantu—bunene bunene bashikwiiya bakwe—alimwi wakalyaaba kubafwita. (Joni 13:1) Kwaamba ayi mukonkele cakubonenaako cakwe Yesu, amusebense cankusu kukumanisha mukuli uli woonse ngweenga mwapekwa. Na tamucishi kabotu mbweenga mwakumanisha mukuli ngomwapekwa, amuliceeshe akusenga lucafwo ku bamakwesu bashimpite lwakumushimu. Mutabi batolo, sombi amusebense cankusu. (Loma. 12:11) Na kamusebensa ncito ili yoonse kamucishi ayi ‘mutoocitila Yehova kuteshi bantu,’ mulaakweelesha kusebensa kabotu ncito iyo akwiikumanisha. (Kolo. 3:23) Ncakwiila tamumaninite, aboobo munooliceesha akusumina na mwaciita cilubo.—Tus. 11:2. w23.12 pe. 26 pala. 8

Cilasangalasha abuumbi na twabombekwa akuba lubasu lwa mukwashi wakwe Yehova. Ncoolwe cilibetele kuba abushicibusa buyumu a Yehova. Tulalinyumfwa bweenka shikulumbaisha Defedi mbwaakalinyumfwa ndyaakaamba ayi: ‘Balisangalete abo mbomwakasala akusenya kuli ndimwe [no Yehova], abo mbomwakaleta ayi bekale mumusena wanu usalalite.’ (Kulu. 65:4) Ino mbantu ba buyani Yehova mbwaasuminisha kuba lubasu lwa mukwashi wakwe? Alasalawo baabo batondesha ayi balisuni kuba abushicibusa buyumu anguwe. (Jemu. 4:8) Na mwaaba buumi bwanu kuli Yehova akubombekwa, inga mwashoma cakutatoonsha ayi pesule lya kubombekwa, ‘alaakumupuumwita shoolwe shiinji cakwaamba ayi mukabule apakushibika.’ (Mala. 3:10; Jele. 17:8) Kubombekwa ngamatalikilobo akusebensela Yehova. Mulaakusuna kucita nsheenga mwacikonsha kwaamba ayi mutolelele kushomeka kuli Yehova ndyemweeleshekwa kucita shibiibi nabi ndyemuli mubukaalo buyumu. (Shiku. 5:​4, 5) Mbuli shikwiiya wakwe Yesu, mulaakutolelela kweelesha cankusu kukonkela cakubonenaako cakwe amilawo yakwe.—Mate. 28:​19, 20; 1 Pit. 2:21. w24.03 pe. 8 mapa. 1-3

Ino nshiinshi nsheenga mwaciita na mwebo awooyo ngomweebenaakwe tamusangalali kuba pomwi? Amuyeeye pacakubonenaako ca mulilo. Taushikilibo kutalika kunyaka peenkapo. Inga mwayandika kubikaako tusaala lyalo akunobikaako nkuni shinene paniini paniini. Amwebo mpashi inga mwayandika kutaanguna kunoocana ciindi ciniinibo cakuba pomwi bushiku abushiku. Ndyemuli pomwi amushinishe kucita shintu shimusangalasha noonse. (Jemu. 3:18) Kucita boobo kulaakumucafwa kutalika kusunana abuumbi. Kutondeshanya bulemu kulayandika abuumbi mucikwati. Kuli anga ngu muuwo wa oxygen uyo upa kwaamba ayi mulilo unyake abuumbi. Mulilo ulashimika na taakuwo muuwo wa oxygen. Abalo beebene na bacileka kutondeshanya bulemu, inga bacileka kusunana abuumbi. Ano na beebene kabatondeshanya bulemu, balatolelela kusunana abuumbi. Nacibi boobo, mulyeelete kwiibaluka kwaamba ayi, teshi kuyeeyabo ayi mulamutondesha bulemu uyo ngomweebenaakwe, sombi alyeelete kulinyumfwa ayi mulamutondesha bulemu. w23.05 pe. 22 pala. 9; pe. 24 mapa. 14-15

Mu Baibo muli shakubonenaako sha basebenshi bakwe Yehova bashomeka, abo bakaamba mbobakalinyumfwa buumba akuloonda ceebo ca balwani babo na mapensho amwi. (Kulu. 18:4; 55:​1, 5) Aswebo inga twapikishikwa ndyetuli kucikolo, kuncito, ku bamumukwashi na kuba mumfulumeende. Alimwi mpashi inga twalisukama ayi tutoofwa ceebo ca bulwashi mbotutoociswa. Ndyetuli mubukaalo ubu, inga twalinyumfwa ayi taakuwo nsheenga twaciita bweenka mbociba kumwaana muniini. Ino Yehova alatucafwa buyani ndyetuli mubukaalo bwamushobo uyu? Alatuyuminisha akutucafwa kukalikana mumoyo. Aboobo lyoonse munoocana ciindi cakupaila kuli Yehova akubelenga Maswi akwe. (Kulu. 77:​1, 12-14) Lyalo na mwalisukama, mpashi cintu cakutaanguna nceshi munooyeeya kucita nkupaila kuli Ishiwanu wakwiculu. Amulwiite Yehova nshemutooloonda anshemutolisukama. Lyalo amukutike kuli nguwe kwiinda mukubelenga Maswi akwe, kwaamba ayi amuyuminishe.—Kulu. 119:28. w24.01 mape. 24-25 mapa. 14-16

Kusunishisha kukumanisha ncomwakasala kucita ncintu ciyandika abuumbi. Muntu usunishishi kukumanisha ncaakasala kucita aleelesha cankusu kwaamba ayi acikumanishe. Alimwi na katusunishishi kukumanisha nshotwakasala kucita, cilaakutubeta cuubu kushikumanisha. Aboobo ino nshiinshi nsheenga mwaciita kwaamba ayi musunishishe kukumanisha nshomwakasala kucita? Amupaile kwaamba ayi Lesa amucaafwe kusunishisha kukumanisha ncomwakasala kucita. Yehova inga wasebensesha mushimu wakwe kumucafwa kusunishisha kukumanisha ncomwakasala kucita. Cimwi ciindi tulasalawo cakucita mukwiinga tulicishi ayi tulyeelete kucita boobo. Alimwi kucita boobo kulibo kabotu. Sombi inga katutasunishishi kukumanisha ncotwakasala kucita. Amukutumane kuyeeya pashintu Yehova nshaakamucitila. (Kulu. 143:5) Mutumwi Paulo wakalinga kukutumana kuyeeya pankumbu Yehova nshaakamutondesha alimwi ici cakamuyuminisha kusebensa cankusu muncito yakwe Yehova. (1 Koli. 15:​9, 10; 1 Timo. 1:​12-14) Amwebo na liinji kamukutumana kuyeeya pashintu Yehova nshaakamucitila, mulaakusunishisha kukumanisha ncomwakasala kucita.—Kulu. 116:12. w23.05 pe. 27 mapa. 3-5

Tulasangalasha Ishiwesu wakwiculu na katulumbaisha liina lyakwe. (Kulu. 69:​30, 31) Ano sa ici cilaamba ayi Lesa shinkusu shoonse ali anga mbantu batamaninite abo basunibo kulumbaishikwa ceebo cakusuna kuyuminishikwa? Sobwe. Na katulumbaisha Ishiwesu wakwiculu, tulacafwilisha kutondesha ayi maswi Satana ngaakaamba pali ndiswe ngakubeca. Satana alaamba ayi taakuwo muntu weshi akatolelele kushitilisha liina lyakwe Lesa. Alimwi alaamba ayi taakuwo muntu weshi akatolelele kushomeka kuli Lesa na weeleshekwa. Kwiilikaawo, alayeeya ayi soonse inga twacileka kusebensela Lesa na katuyeeya ayi shintu inga shatubotela na twacita boobo. (Jobo 1:​9-11; 2:4) Sombi Jobo wakatolelela kushomeka kuli Lesa akutondesha ayi Satana ngumubeshi. Sa amwebo mulaakutolelela kushomeka kuli Lesa? Soonse tulicite coolwe cakusalawo kushitilisha liina lyakwe Ishiwesu wakwiculu akumusangalasha kwiinda mukutolelela kumusebensela cakushomeka. (Tus. 27:11) Ncoolwe cinene abuumbi kucita boobo. w24.02 mape. 8-9 mapa. 3-5

Kuswabo munshiku shakwe Mose alimwi a Joshuwa, Yehova wakatalika kutanjilila bantu bakwe kwiinda mukusebensesha boomboloshi. Lyalo muciindi ca bamaami, Yehova wakasala bashinshimi kutanjilila bantu bakwe. Bamaami bashomeka bakalinga kukonkela butanjilishi kuswa ku bashinshimi. Kucakubonenaako, Mwaami Defedi wakaliceesha akusumina kululikwa kuswa ku mushinshimi Natani. (2 Samwe. 12:​7, 13; 1 Maka. 17:​3, 4) Mwaami Jeoshafati wakalinga kukonkela butanjilishi kuswa ku mushinshimi Jaasiyelo alimwi wakayuminisha baJuda ‘kushoma bashinshimi bakwe Lesa.’ (2 Maka. 20:​14, 15) Mwaami Esekiya ndyaakalisukama, wakasenga lucafwo ku mushinshimi Isaya. (Isa. 37:​1-6) Lyoonse na bamaami bakonkela butanjilishi, Lesa wakalinga kubapa shoolwe akushitilisha bantu bakwe. (2 Maka. 20:​29, 30; 32:22) Cakalinga kuboneka ayi ncakwiila Yehova wakalinga kutanjilila bantu bakwe kwiinda mubashinshimi. w24.02 pe. 21 pala. 8

Satana alisuni kwaamba ayi tube bushicibusa abantu beenga bapa kwaamba ayi citubete ciyumu kutolelela kukonkela njiisho shakwe Yehova. Nacibi boobo, tulyeelete kucenjela abuumbi kwiinda ambocakalinga ku bene Efeso, mukwiinga pacecino ciindi inga tatubibo bushicibusa abantu mbotucanikaabo, sombi abaabo mbotubandikaabo pa intaneti. Tulyeelete kweelesha cankusu kuleya kuyeeya kwa bantu bamucishi abo babona ayi kucita shibiibi kulibo kabotu. Tulishi ayi kuyeeya uko takubete kabotu. (Efe. 4:​19, 20) Nacibi boobo, cili kabotu kuliipusha ayi: ‘Sa ndeelesha cankusu kuleya kunonyumfwana bunene abantu mbonsebensaabo, mbonjiyaabo nabi bamwi abo batalemeki njiisho shakwe Yehova shiluleme? Sa cakutaloonda ndakonkela njiisho shakwe Yehova shaamba pa shiluleme a shitaluleme, nabi kwaamba ayi bamwi inga bambona ayi ndimuntu usunibo kucita shintu nshaasuni?’ Kweelana a 2 Timoti 2:​20-22, tulyeelete kucenjela andyetutosala beshicibusa mulibungano lya Bwineklistu. Tulebaluka ayi bamwi inga tabatucafwiiwo kutolelela kusebensela Yehova cakushomeka. w24.03 mape. 22-23 mapa. 11-12

Sa mwakeeleshaawo kale kuyeeya Yehova mbwaabete? Nabi kwaamba ayi Yehova inga tatumuboniiwo, Baibo ilamusansulula munshila shipusenepusene. Ilaamba ayi ali “anga ndisuba alimwi anga ndiyawo” alimwi ayi “ngumulilo unyonyoola.” (Kulu. 84:11; Ebu. 12:29) Mucili anga nciloto Esekelo ncaakabona, wakaamba ayi Yehova ali anga ndibwe lya safaya, anga nceela casalala kukulungula mumulilo alimwi anga ngumumuni wa nkongolo. (Esek. 1:​26-28) Ceebo cakwaamba ayi Yehova inga tatumuboniiwo, inga catuyumina kushoma ayi alitusuni. Bamwi balayeeya ayi Yehova inga tabatondeshiiwo lusuno ceebo ca shintu shakabacitikila mubuumi. Yehova alanyumfwishisha mbotulinyumfwa alimwi alicishi ceenga capa kwaamba ayi citubete ciyumu kuba abushicibusa anguwe. Kwaamba ayi atucaafwe kushoma ayi alitusuni, wakatupa Maswi akwe ayo atucafwa kushiba mibo ibotu njaacite. Lusuno ngo mubo unene Yehova ngwaacite. (1 Joni 4:8) Alacita shintu shoonse ceebo calusuno. Lesa alitusuni abuumbi alimwi alatondesha lusuno kubantu boonse kwiilikaawo akubaabo batamusuni.—Mate. 5:​44, 45. w24.01 pe. 26 mapa. 1-3

Yehova wakasala Mose kutanjilila bene Isilaeli kuswa mu Ijipiti, alimwi kabuli bumboni bwakatondesha ayi ngwaakalinga kubatanjilila kwiinda muli Mose. Kucakubonenaako, malumwi wakalinga kubatanjilila kwiinda mulicincilo lya likumbi lyalo mashiku kwiinda mulicincilo lya mulilo. (Kulo. 13:21) Mose abene Isilaeli bakakonkela licincilo ilyo lyakabatanjilila kuya ku Lweenge Lusalala. Sombi bene Ijipiti bakatandaanya bene Isilaeli. Aboobo bene Isilaeli bakaloonda abuumbi mukwiinga bakalinga kuyeeya ayi bene Ijipiti batoobacaya. Sombi taakwe kubisha. Yehova mwiine ngwaakatanjilila bantu bakwe kuya kumusena uyu kwiinda muli Mose. (Kulo. 14:2) Lyalo Lesa wakabapulusha munshila ikankamika abuumbi. (Kulo. 14:​26-28) Mumyaaka 40 yakakonkelaawo, Mose wakatolelela kushoma ayi Yehova atotanjilila bantu bakwe kwiinda mulicincilo lya likumbi ndyebakalinga muluyanga. (Kulo. 33:​7, 9, 10) Yehova wakabandika a Mose kuswa mulicincilo ilyo, alakwe wakalwiita bene Isilaeli Yehova nshaakamulwiita. Bene Isilaeli bakabona bumboni bukwene bwakalinga kutondesha ayi Yehova wakalinga kubatanjilila kwiinda muli Mose. w24.02 pe. 21 mape. 4-5