August

Lilembo lya Kulumbaisha 34:19 lyaamba pashiteente shobilo ishi shiyandika: (1) Bantu baluleme baleenda mumapensho aanji. (2) Yehova alatufuna mumapensho esu oonse. Ino Yehova alatufuna buyani? Nshila yomwi mbwaacita boobo nkwiinda mukutucafwa kushiba ayi ndyetuli mucishi cino inga tweenda mumapensho ngotwatalinga kulangila. Yehova wakatushomesha ayi tulaakunosangalala ndyeshi tukanoomusebensela. Nacibi boobo, taakwe kutushomesha ayi teshi tunookwiinda mumapensho pacecino ciindi. (Isa. 66:14) Alatuyuminisha kubikila maano kubuumi mbweshi bukabe kunembo, paciindi ndyeshi tukekale kwamuyayaya kweelana ambwaasuni. (2 Koli. 4:​16-18) Sombi pacecino ciindi alatucafwa kutolelela kumusebensela bushiku abushiku. (Mali. 3:​22-24) Ino nshiinshi nsheenga tweeya kuswa kushakubonenaako sha basebenshi bakwe Yehova bashomeka bakale kale aba munshiku shino? Mpashi inga tweenda mumapensho ngotwatalinga kulangila. Sombi na twacinka manungo muli Yehova ananootucafwa lyoonse.—Kulu. 55:22. w23.04 mape. 14-15 mapa. 3-4

Kuli nsheenga tweeya kuswa kucakubonenaako cakwe Josefu a Maliya, abo bakalinga kulibambite kunyumfwila beendeleshi nabi ndyecakalinga ciyumu kucita boobo. (Luka 2:​1-6) Maliya ndyaakalinga kucite lifumo mpashi lya myeenshi 9, mfulumeende yakabika mulawo wakalinga uyumu kunyumfwila kuli Maliya a Josefu. Agasitasi mweendeleshi waku Loma wakabika mulawo wakwaamba ayi muntu uli woonse alyeelete kuya mukulembesha kundabala inemishaabo. Josefu a Maliya bakalinga kweelete kwiinda munshila yakalinga kucite tulundu kuya ku Betileemu. Mushinso uyu wakalinga wa makilomita ali 150. Lweendo ulu lwakalinga luyumu, bunene bunene kuli Maliya. Mpashi bakalinga kulisukama kuyeeya sheenga shacitika na Maliya watumbuka kabaciya. Alimwi bakalinga kulisukama kuyeeya mbweenga bashitilisha mwaana uyo wakalinga kusa mukuba Mesiya wakashomeshekwa. Sa ishi shakapa kwaamba ayi basalewo kutanyumfwila mulawo wa mfulumeende? Nabi kwaamba ayi kuli shimwi shakalinga kupa Josefu a Maliya kulisukama, bakanyumfwila mulawo wa mfulumeende. Ceebo cakwaamba ayi bakanyumfwila mfulumeende, Yehova wakasangalala alimwi wakabalama kabotu. Maliya wakashikabo kabotu ku Betileemu akutumbuka mwaana uli kabotu, alimwi wakaabanamo lubasu mukukumanisha bushinshimi bumwi bwamu Baibo!—Mika 5:2. w23.10 pe. 8 pala. 9; pe. 9 mapa. 11-12

Ino nshiinshi nsheenga mwaciita na mulaloonda kukumbulawo kumabungano? Amulibambile kabotu. (Tus. 21:5) Na mwaashiba kabotu makani eshi akabandikweewo, teshi mukaloonde abuumbi kukumbulawo kumabungano. Alimwi ndyemutokumbula, amwaambe shikumbulo shifwiifwi. (Tus. 15:23; 17:27) Kwaamba cikumbulo cifwiifwi, kulaakumucafwa kutaloonda bunene ndyemusuni kukumbulawo. Kwaamba cikumbulo cifwiifwi mumaswi anu, kulaakutondesha ayi mwakalibambila kabotu alimwi mwakanyumfwisha kabotu makani ngomutokwiiya. Ano ino nshiinshi nsheenga mwaciita na mwatolelela kuloonda kukumbulawo mankanda aanji nabi pesule lya kukonkela nshetwabandikaawo? Amushibe kwaamba ayi Yehova alalumba pa kweelesha cankusu kwanu kwaamba ayi mukumbulewo. (Luka 21:​1-4) Yehova taatulwiiti kucita nsheenga tatucikoonshi. (Filip. 4:5) Amusale nsheenga mwaciita, mbweenga mwashikumanisha, akupaila kwaamba ayi Yehova amucaafwe kukalika moyo. Mpashi pakutaanguna inga mwasalawo kukumbulawobo linkanda lyomwi akwaamba cikumbulo cifwiifwi. w23.04 pe. 21 mapa. 6-8

Mutumwi Paulo wakatukoshanisha ku bashilumamba abo balibambite alimwi bafwete shakufwala sha nkoondo. Bantu balalangila shilumamba kuba ulibambite kulwana paciindi cili coonse na kuli nkoondo. Ubu mbocibete akulindiswe. Tulatolelela kuba balibambite kusa kwa bushiku bwakwe Yehova kwiinda mukufwala cakulishitilisha ca pacaamba ca lushomo alusuno, alimwi a cimpoompo cakulangila. Cakulishitilisha ca ceela ca pacaamba, cakalinga kushitilisha moyo wakwe shilumamba. Kuba alushomo alimwi alusuno kulatucafwa kushitilisha moyo wesu wacikoshanyo. Alimwi mibo iyi ilaakutucafwa kutolelela kusebensela Yehova akukonkela cakubonenaako cakwe Yesu. Kuba alushomo kulatucafwa kushoma ayi Yehova alaakutupa cilambu ceebo cakumuyandoola amoyo wesu woonse. (Ebu. 11:6) Alimwi kuba alushomo kulaakutucafwa kutolelela kushomeka kuli Yesu mutanjilili wesu nabi ndyetutokwiinda mumapensho. Inga twayumya lushomo lwesu kwaamba ayi tucikoonshe kuliyumya ndyetutokwiinda mumapensho, kwiinda mukwiiya kushakubonenaako sha munshiku shino shabaabo bakatolelela kushomeka nabi ndyebakalinga kupenshekwa na kwiinda mulipenshi lya kubula maali. Alimwi inga twaleya koose kakusunishisha shintu shakumubili kwiinda mukukonkela cakubonenaako ca baabo bakasalawo kukala buumi bwakutalila shiinji kwaamba ayi babike sha Bwaami panembo. w23.06 pe. 10 mapa. 8-9

Liinji liswi lya kulikasha lilasansulula kuleya kucita cintu cibiibi. Sombi kulikasha ngu mubo uyandika kwaamba ayi tucite cintu cibotu, bunene bunene na ncetusuni kucita nciyumu nabi na katutasunishishi kucicita. Mutaluubi kwaamba ayi kulikasha ncisepo ca mushimu usalashi. Aboobo amusenge mushimu usalashi kuli Yehova kwaamba ayi umucaafwe kuba amubo uyu uyandika. (Luka 11:13; Gala. 5:​22, 23) Mutalindili ayi shintu shikabe kabotu. Mucishi cino inga tatulangili shintu kuba kabotu. Na katulindila ayi shintu shikabe kabotu, teshi tukakumanishe ncotwakasala kucita. Na ncomwakasala kucita citoboneka ciyumu abuumbi, mpashi inga kamutasunishishi kucikumanisha. Na ubo mbocibete kuli ndimwe, sa inga mwatalika paniini paniini kukumanisha ncomwakasala kucita? Na mwakasalawo kwiiya kuba amubo umwi wa Bwineklistu, inga mwataanguna kunotondesha mubo uyo mu mbasu shiniini niini. Na mwakasalawo kubelenga Baibo yoonse, mpashi inga mwataanguna kunobelengabo Baibo kwaciindi ciniini. w23.05 pe. 29 mapa. 11-13

Munshiku shino shakweelaako, Yehova watolelela kusebensesha libunga lyakwe kutupa shakulya shakumushimu kwaamba ayi atucaafwe soonse kutolelela kweenda mu “Nshila Isalalite.” (Isa. 35:8; 48:17; 60:17) Inga twaamba ayi na muntu wasumina kutalika kwiiya Baibo, nkokwaamba ayi waba acoolwe cakutalika kweenda mu “Nshila Isalalite.” Bamwi baleendakobo mushinso ufwiifwi akuswaamo munshila iyi. Lyalo bamwi balishinishite kutolelela kweenda munshila iyi kushikila bakashiike nkobatooya. Ino nkuli nkobatooya? Kubaabo bacite coolwe cakuya kwiculu, “Nshila Isalalite” ilaakubatola mu “paladaiso yakwe Lesa” kwiculu. (Ciyu. 2:​7, NWT) Kubaabo batolangila kukala pacishi, nshila iyi inene ilaakubatola kumamanino a Buleelo Bwakwe Klistu bwa Myaaka 1,000, paciindi muntu uli woonse ndyeshi akabe umaninite. Na mutokweenda munshila iyi pacecino ciindi, mutakaswiimo kushikila mukashike kumamanino alweendo lwanu! w23.05 pe. 17 pala. 15; pe. 19 mapa. 16-18

Na mwayeeya pashintu shoonse Yehova nshaakamucitila, mulaakumulumba akusuna kwaaba buumi bwanu kuli nguwe. (Kulu. 116:​12-14) Baibo ilaamba lushinisho ndyeyaamba ayi Yehova Ngootupa “shipo shoonse shibotu shitacite kampenda.” (Jemu. 1:17) Cipo ciinditeewo ncaakatupa ngumulambu wakwe Yesu, Mwanaakwe. Amuyeeyebo cipo ici mbocilibetele! Cilubula cakapa kwaamba ayi cikonsheke kuli ndimwe kuba abushicibusa buyumu a Yehova. Alimwi wakamupa coolwe cakulangila kuba abuumi butamaani. (1 Joni 4:​9, 10) Kwaaba buumi bwanu kuli Yehova ninshila ibotu abuumbi mbweenga mwatondesha kulumba palusuno lwiinditeewo ndwaakamutondesha, kwiilikaawo a pashoolwe shimwi shoonse nshaakamupa.—Duto. 16:17; 2 Koli. 5:15. w24.03 pe. 5 pala. 8

Na twaboona shintu shibiibi bantu nshebatoocita munshiku shino, tulalinyumfwa bweenka mbwaakalinyumfwa Loti. “Wakalinga kupenshekwa abuumbi ceebo ca buumi butaluleme” bwa bantu bakalingaako paciindi cilya, mukwiinga wakalinga kucishi ayi Ishiwesu wakwiculu alipatite shintu shibiibi. (2 Pit. 2:​7, 8) Kuloonda alimwi akusuna Lesa kwakacafwa Loti kupata shintu shibiibi bantu nshobakalinga kucita paciindi cilya. Aswebo tulekala abantu batalemeki na batakonkeli njiisho shakwe Yehova shaamba pamakani akulilemeka. Nacibi boobo, inga twatolelela kuba amibo ibotu na twatolelela kusuna Lesa akwiiya kunoomulemeka abuumbi. Kwaamba ayi Yehova atucaafwe kucita boobo, alatulwiita makani ayuminisha ngotucana mulibuku lya Tushimpi. Kwiiya makani abusongo acanika mulibuku ili inga kwacafwa Beneklistu boonse, inga caba ayi mbasankwa, mbanakashi, mbacanike na mbacinene. Na katuloonda Yehova, tulaleya kuba bushicibusa abantu bacita shibiibi. w23.06 pe. 20 mapa. 1-2; pe. 21 pala. 5

Mpashi bamumukwashi wanu bakalinga kumupikisha na mpashi mwakalyaaba kutaba amaali ashintu shiinji lwakumubili kwaamba ayi mubike sha Bwaami panembo. (Mate. 6:33) Na ubo mbocibete, amushibe kwaamba ayi Yehova alicishi shoonse nshomwakamucitila. (Ebu. 6:10) Mpashi amwebo mwakabona ayi maswi Yesu ngakaamba ngancine, ndyakaamba ayi: ‘Ndushinisho ntoomulwiita ayi taaku muntu uyo wakashiya Ŋanda yakwe nabi wakashiya banandumi, banankashi shakwe, banyina, baishi, baana nabi myuunda ceebo ca ndime alimwi a makani abotu eshi akabule kutambula myaanda ya shintu paciindi cino, nkokwaamba ayi maanda, banandumi, banankashi shakwe, banyina, baana alimwi amyuunda, sombi alaakutambula alimwi amapensho. Ono sombi muciindi citoosa, alaakutambula buumi butamaani.’ (Maako 10:​29, 30) Shoolwe nshomwakacana shiliindite pakulyaaba kuli koonse nkomwakacita.—Kulu. 37:4. w24.03 pe. 9 pala. 5

Ndyekwakaba nsala inene ku Beneklistu baku Judeya, bashominyinaabo bamulibungano lyaku Antyoki, “bakasalawo kwaamba ayi womwi awomwi atume lucafwo ku bashominyinaabo abo bakalinga kukala ku Judeya kweelana ambwaakalinga kukonsha.” (Milimo 11:​27-30) Nabi kwaamba ayi bashominyinaabo bakakumwa kunsala bakalinga kukala kulaale abuumbi, Beneklistu baku Antyoki bakalinga kushinishite kubacafwa. (1 Joni 3:​17, 18) Aswebo pacecino ciindi inga twatondesha nkumbu kubashominyineesu na twanyumfwa ayi bacitikilwa mapensho akuteengashila. Tulafwambaana kulyaaba kucafwilisha mpashi kwiinda mukwiipusha bamanene na inga twaya mukucafwilisha kumusena uko kwacitika mapensho, kupa maali akucafwilisha ncito yansengwe yoonse, na kupaililaako baabo bakacitikilwa mapensho akuteengashila. Alimwi bamakwesu abenankashi inga bayandika kucafwikwa kwaamba ayi babe ashintu nshebayandika. Na Klistu Yesu Mwaami wesu akese mukoombolosha bantu, aakatucaane katutondesha nkumbu alimwi akutulwiita ayi ‘amwiinjile mu Bwaami.’—Mate. 25:​34-40. w23.07 pe. 4 mapa. 9-10; pe. 6 pala. 12

Yesu wakalinga kukonkela cakubonenaako cakwe Yehova cakutayumininabo pacintu comwi. Wakatumwa pacishi capanshi kusa mukushimikila “mbelele shisowekete sha mushobo wa bene Isilaeli.” Sombi wakatondesha ayi taakalinga kuyumininabo pacintu comwi ndyaakalinga kusebensa ncito yakushimikila. Paciindi cimwi, mwanakashi umwi watakalinga mwine Isilaeli wakamusenga ayi ashilike mwanaakwe mwanakashi uyo ‘wakalinga kucite bashikaswa.’ Yesu wakatondesha nkumbu mwanakashi uyu akushilika mwanaakwe mwanakashi kweelana ambwakamusenga. (Mate. 15:​21-28) Amuyeeye pacakubonenaako acimwi. Yesu ndyaakatalika kushimikila, wakaamba ayi: “Uyo weenga wankaka . . . , anebo ndaakumukaka.” (Mate. 10:33) Ano sa wakamukaka Pita uyo wakamukaka mankanda otatwe? Sobwe. Yesu wakashiba ayi Pita wakaana panshaakacita alimwi wakalinga muntu ushomeka. Pesule lyakubushikwa, Yesu wakabonekela kuli Pita alimwi cilyeelete wakamulwiita ayi wakamulekelela alimwi ayi wakalinga kumusuni. (Luka 24:​33, 34) Yehova Lesa alimwi a Yesu Klistu tabayumininibo pacintu comwi. Aswebo Yehova alatulangila kutayumininabo pacintu comwi. w23.07 pe. 21 mapa. 6-7

Ino nshiinshi nsheenga twalwiitako bamwi kwaamba ayi tubacaafwe kushoma ayi ici cilaakucitika? Cakutaanguna, Yehova mwiine ngowakatushomesha. Libuku lya Ciyubululo lilaamba ayi: “Ukala pacuuna ca bwaami wakaamba ayi: ‘Amubone! Ono bulya shintu shoonse ntooshipanga cipya!’” Alicite busongo, nkusu alimwi alusuno lwakukumanisha ncaakashomesha. Cabili, Yehova alicishi kwaamba ayi nshaakaamba shilaakucitika. Nceceeco ncaakaambila ayi: ‘Maswi aya alyeelete kushomwa alimwi ngalushinisho. . . . Shakumanishikwa!’ Catatu, na Yehova watalika kucita cintu cimwi, alashinisha kwaamba ayi wacikumanisha. Nceceeco ncaakaambila ayi: “Nebo ndime Matalikilo (na Alufa) alimwi aMamanino (na Omega).” (Ciyu. 21:6) Yehova alaakutondesha ayi Satana ngumubeshi alimwi inga taapi kwaamba ayi Yehova aalilwe kukumanisha luyaando lwakwe. Aboobo na umwi akaambe ayi, “Nshomwaamba nshibotu, sombi nshishomiwo ayi shilaakucitika?” inga mwamubelengela vesi 5 a 6 lyalo akumusansulwita. Amumucaafwe kushiba Yehova mbwaashinishite kukumanisha cishomesho ici.—Isa. 65:16. w23.11 pe. 7 mapa. 18-19

Yehova wakapangana cipangano a Abulaamu ndyaakalinga kucite myaaka 75, katacitewo nabi mwaana. Sa Abulaamu wakabonaako kukumanishikwa kwa cishomesho ici? Teshi shoonse nshaakabona kashikumanishikwa. Pesule lyakusubuka Mulonga wa Yufuletisi akulindilaako kwamyaaka 25, Abulaamu wakabona cankaamiko Isaki mwanaakwe ndyaakashalwa. Alimwi ndyepakeenda myaaka 60, wakabona Esau a Jakobo beshikulu bakwe ndyebakashalwa. (Ebu. 6:15) Sombi Abulaamu taakwe kubonaako bamulunyungu lwakwe ndyebakaba mushobo unene, akupyana Cishi Cakashomeshekwa. Nacibi boobo, musankwa uyu ushomeka wakalinga kucite bushicibusa buyumu a Mulengi wakwe. (Jemu. 2:23) Alimwi na Abulaamu akabushikwe, alaakusangalala abuumbi kushiba ayi ceebo calushomo akukalika moyo kwakwe, mishobo yoonse yapacishi yakatambula shoolwe! (Mata. 22:18) Ino nciinshi ncetutokwiiyawo? Mpashi teshi shintu shoonse Yehova nshaakatushomesha, nsheenga twaboona kashikumanishikwa pacecino ciindi. Nacibi boobo, na katukalika moyo bweenka mbuli Abulaamu, inga twashooma ayi Yehova alaakutupa shoolwe pacecino ciindi alimwi ayi alaakutupa shoolwe shiinji mucishi cipya ncaakatushomesha.—Maako 10:​29, 30. w23.08 pe. 24 pala. 14

Mwaami Usiya ndyaakalinga wacanike, wakalinga kuliceesha. Wakeeya kusebensela Lesa wancine cakushomeka. Alimwi Yehova wakamupa shoolwe mushintu shiinji nshaakacita kwamyaaka 68 njaakekala pacishi. (2 Maka. 26:​1-4) Usiya wakakoma balwani bakwe baanji akushinisha kwaamba ayi Jelusalemu yashitilishikwa kabotu. (2 Maka. 26:​6-15) Ncakutatoonsha kwaamba ayi Usiya wakalinga kusangalete mushintu shoonse Yehova nshaakamucafwa kukumanisha. (Shiku. 3:​12, 13) Mwaami Usiya wakalinga washibila kulwiita bantu shakucita. Mpashi ici cakamupa kunoyeeya ayi inga wacita cintu cili coonse ncaasuni. Bumwi bushiku, Usiya wakenjila mu tempele yakwe Yehova kwaamba ayi ateente tunukila kabotu pacipaililo, sombi uyu tawakalinga mukuli wa bamaami. (2 Maka. 26:​16-18) Asaliya mupailishi munene ndyakeelesha kumululika, Usiya wakakalala abuumbi. Cakabicaako ncakwaamba ayi, Usiya taakwe kutolelela kushomeka alimwi Yehova wakapa kwaamba ayi aciswe bulwashi bwa manata. (2 Maka. 26:​19-21) Ishi naakwiinga tashikwe kumucitikilawo naakwiinga wakatolelela kuliceesha! w23.09 pe. 10 mapa. 9-10

Kuli shintu shimwi mutumwi Pita nshaatakwe kucita kabotu nabi pesule lyakwaamba ayi waba Mwineklistu unanikitwe. Kucakubonenaako, mu 36 C.E., Lesa wakatuma Pita kuya kuli Konelyasi uyo watakalinga mu Juda. Lyalo Lesa wakananika Konelyasi mushimu usalashi ico cakatondesha patuba ayi “Lesa taasalululi” alimwi ayi baswamashi abalo inga baba mulibungano lya Beneklistu. (Milimo 10:​34, 44, 45) Kuswawaawo, Pita wakatalika kulinyumfwa kwaanguluka kulita pomwi abaswamashi, cintu ncaatakwe kucitawo kale mubuumi bwakwe. Nacibi boobo, Beneklistu baJuda bamwi bakalinga kubona ayi tabeelete kulita pomwi abaswamashi. Beneklistu bamwi bakalinga kubona ayi tabeelete kulita pomwi abaswamashi ndyebakaya ku Antyoki, Pita wakacileka kulita pomwi abashominyina baswamashi, mpashi ceebo cakuloonda kukalasha Beneklistu baJuda. Mutumwi Paulo wakabona ayi Pita taakwe kucita kabotu, aboobo wakamululika pameenso abantu. (Gala. 2:​13, 14) Ano nabi kwaamba ayi Pita wakacita cilubo ici, wakatolelela kusebensela Yehova. w23.09 pe. 22 pala. 8

Amulilange lange akushiba mbasu nshomutoyandika kusebenselaawo, sombi tamweelete kulefuka. “Mwaami [Yesu] ngushiluse,” alimwi alaakumucafwa kusebensela pa mbasu nshomutatoocita kabotu. (1 Pit. 2:3) Mutumwi Pita wakatushomesha ayi: ‘Lesa . . . alaakumanisha lwiiyo lwanu. Alaakumuyumya.’ Pakutaanguna Pita wakalinga kulinyumfwa ayi taatokweelela kuba pomwi a Yesu. (Luka 5:8) Sombi kwiinda mulucafwo lwakwe Yehova alimwi a Yesu, Pita wakacikonsha kutolelela kuba shikwiiya wakwe Yesu. Aboobo Pita wakapekwa coolwe cakunjila ‘mu Bwaami butamaani bwa Mwaami alimwi Mupulushi wesu, Yesu Klistu.’ (2 Pit. 1:11) Wakatambula cilambu cibotu abuumbi! Na mwatolelela kusebensela Yehova bweenka Pita mbwaakacita akusuminisha Yehova kwaamba ayi amanishe lwiiyo lwanu, amwebo mulaakutambula cilambu ca buumi butamaani. Lesa ‘alaakupulusha buumi bwanu kwiinda mulushomo lwanu.’—1 Pit. 1:9. w23.09 pe. 31 mapa. 16-17

Pa tente ya baJunda yakulambililaako pakalinga lubaansa lwakalinga kushingulukitwe alubumbu, umo bapailishi mobakalinga kusebensela ncito shabo. Mulubaansa momwakalinga cipaililo cinene ca mukuba mpobakalinga kutentela tununkila kabotu alimwi acakubikamo maanshi camukuba, bapailishi mobakalinga kusamba kumaansa akumyeendo kwaamba ayi balisalashe kabatana kuya mukusebensa ncito yabo isalalite. (Kulo. 30:​17-20; 40:​6-8) Pacecino ciindi, bamakwesu bananikitwe balasebensa cakushomeka mu lubaansa lwa mukati lwa tempele yakumushimu. Cakubikamo maanshi cinene cakalinga kuba pa tente yakulambililaako amu ma tempele, ncintu ciyandika cibeebalusha ayi balyeelete kutolelela kuba basalalite lwakumubili alwakumushimu. Alimwi Beneklistu boonse mbobeelete kunoocita. Ino nkuli bamu “likoto linene” nkobasebensela Yehova? Mutumwi Joni wakababona kabeemfwi ‘kunembo lya cuuna ca bwaami . . . Balasebensela [Lesa] incito isalalite malumwi amashiku.’ Bamu likoto linene balacita boobo pano pacishi mu lubaansa lwa kunsengwe lwa tempele yakumushimu. (Ciyu. 7:​9, 13-15) Tulalumba abuumbi pacoolwe ncotucite cakulambila Yehova mu tempele yakwe inene yakumushimu! w23.10 pe. 28 mapa. 15-16

Nshila yomwi Yehova mbwatuyuminisha, nkwiinda mukusebensesha bamanene. (Isa. 32:​1, 2) Aboobo na mwalisukama, amulwiiteko munene umwi mbomutolinyumfwa. Alimwi tamweelete kuwayawaya kutambula lucafwo ndweenga bamanene bamupa. Yehova inga wasebensesha mbabo kwaamba ayi amuyuminishe. Shishomesho shamu Baibo inga shatupa kulangila kukala kwamuyayaya kwiculu nabi kukala kwamuyayaya mu paladaiso pacishi capanshi—alimwi inga shatupa nkusu. (Loma. 4:​3, 18, 19) Kulangila kwesu kulatucafwa kuliyumya ndyetutokwiinda mumapensho, kushimikilako bamwi makani abotu, alimwi akusebensela bamakwesu abenankashi mulibungano. (1 Tesa. 1:3) Kulangila uku nkokwakayuminisha amutumwi Paulo. Pashiindi shimwi wakalinga kupenshekwa, kutoonsha akucisikwa. Alimwi pashiindi shimwi buumi bwakwe bwakalinga mumapensho. (2 Koli. 4:​8-10) Paulo wakaba ankusu shakuliyumya ceebo cakubikila maano kukulangila nkwaakalinga kucite. (2 Koli. 4:​16-18) Wakatolelela kubikila maano kukulangila nkwaakalinga kucite. Kulangila kwa kukala buumi butamaani kwiculu kwakalinga kulibetele abuumbi kuli Paulo, cakwaamba ayi wakalinga kulibambite kuliyumya mumapensho ali woonse kwaamba ayi akatambule cilambu cakwe. Paulo wakalinga kukutumana kuyeeya pakulangila uku, aboobo kwakamucafwa kuba ankusu shakuliyumya bushiku abushiku. w23.10 mape. 15-16 mapa. 14-17

Ndyemutopaila, amuyeeye na ncociindi Yehova ndyaeelete kukumbula mupailo wanu. Mpashi inga katulinyumfwa ayi mipailo yesu itoyandika kukumbulwa cakufwambaana. Nacibi boobo, Yehova alicishi ciindi ceelete ndyeenga watucafwa. (Ebu. 4:16) Na Yehova taana kutupa ncetwamusenga peenkaapo, inga twatalika kuyeeya ayi wakaka kutupa ncetwasenga. Sombi mpashi inga kaasuni ayi tulindileeko. Kucakubonenaako, mukwesu umwi wacanike wakalinga kupaila ayi oole kubulwashi mbwaakalinga kuciswa. Sombi taakwe koolawo. Naakwiinga Yehova wakamoolesha munshila yacaankamiko, naakwiinga wakaamba ayi mukwesu uyu watolelela kusebensela Yehova ceebo cakwaamba ayi wakamoolesha. (Jobo 1:​9-11; 2:4) Kwiilikaawo, Yehova wakabika kale ciindi ndyeshi akamane malwashi oonse. (Isa. 33:24; Ciyu. 21:​3, 4) Kushikila ciindi ico cikashiike, inga tatulangili Yehova kutoolesha munshila ya caankamiko. Aboobo mukwesu wakalinga kweelete kusenga Yehova kwaamba ayi amupe nkusu shakuliyumya kubulwashi mbwaakalinga kuciswa aluumuno lwamumiyeeyo kwaamba ayi atolelele kumusebensela cakushomeka. w23.11 pe. 24 pala. 13

Samusoni wakacita cilubo cinene, sombi taakwe kucileka kusebensela Yehova. Wakeelesha kucana nshila mbweenga wakumanisha ncito Yehova njaakamupa yakulwana bene Filisiti. (Boombo. 16:​28-30) Wakasenga Yehova ayi: ‘Aambooshe cishole ku bene Filisiti.’ Lesa wancine wakakumbula kusenga kwakwe Samusoni akumupa nkusu shilibetele alimwi. Aboobo bantu Samusoni mbaakacaya pakufwa bakeenda baabo mbaakacaya kaacili muumi. Nabi kwaamba ayi Samusoni wakeenda mumapensho anene ceebo ca cilubo ncaakacita, taakwe kucileka kweelesha kucita kuyanda kwakwe Yehova. Aswebo na twaciita cilubo lyalo twalulikwa na kunyaikwa mukuli umwi mulibungano, tatweelete kucileka kusebensela Yehova. Munookwiibaluka ayi Yehova alilibambite kutulekelela. (Kulu. 103:​8, 9) Nabi kwaamba ayi tulacita shilubo, Yehova inga watupa nkusu shakucita kuyanda kwakwe bweenka mbwaakacita kuli Samusoni. w23.09 pe. 6 mapa. 15-16

Na mwatolelela kuliyumya mulasangalasha Yehova. Ano ici tacaambi ayi Yehova alasangalala na mutokwiinda mumeelesho nabi mumapensho. Sombi alasangalala ceebo cakwaamba ayi mwatolelela kuliyumya cakushomeka. Cilayuminisha abuumbi kushiba ayi na twatolelela kuliyumya, Yehova alasangalala! (Kulu. 5:12) Amwiibaluke ayi Abulaamu wakeenda mumapensho alimwi ndyaakaliyumya cakushomeka, Yehova wakasangalala. Yehova wakamubona ayi ngushicibusa wakwe alimwi ayi aliluleme. (Mata. 15:6; Loma. 4:​13, 22) Ubu mbweenga caba akuli ndiswe. Lesa alasangalala pali ndiswe kuteshi ceebo ca ncito njotumusebensela na mikuli njetucite. Sombi alasangalala pali ndiswe na twatolelela kushomeka ndyetutokwiinda mumapensho. Alimwi tacicite mulandu aciimo ncotubetewo, bukaalo na nshetucikonsha kucita, soonse inga twacikonsha kuliyumya. Sa kuli lipenshi ndyemutokwiindaamo ndyemutoliyumya cakushomeka? Na mboboobo, amushibe kwaamba ayi mutosangalasha Lesa. Na twashiiba ayi tutosangalasha Lesa, kulangila kwesu kulayuminaako mushishomesho nshaakatushomesha. w23.12 pe. 11 mapa. 13-14

Musankwa Mwineklistu alyeelete kwiiya kubandika kabotu. Ici cilaamba ayi alyeelete kukutika akunyumfwishisha bamwi nshebatoyeeya ambobatolinyumfwa. (Tus. 20:5) Inga weeya kushiba muntu mbwaatoyeeya ambwatolinyumfwa kwiinda mukunyumfwa liswi mbolitonyumfwika, mbwaatoboneka paciwa alimwi ambwatosebensesha mubili. Inga tamucikoonshi kwiiya kucita boobo kwakubula kunoocana ciindi cakuba pomwi abantu. Na liinji mulabandika abamwi kusebensesha fooni na tabuleti mbuli kwiinda mukutuma mameseji na nshila shimwi, cilaakumubeta ciyumu kunobandika abantu na muli pomwi ambabo. Aboobo, amweeleshe kucana nshila sha mbweenga mwabandika abamwi ndyemuli pomwi ambabo. (2 Joni 12) Kwiilikaawo, musankwa Mwineklistu ushimpite lwakumushimu alyeelete kuba muntu weenga wacikonsha kulilama mwiine akulama mukwashi wakwe. (1 Timo. 5:8) Cili kabotu kwiiya bwakucita shintu shimwi sheenga shamucafwa kucana ncito. (Milimo 18:​2, 3; 20:34; Efe. 4:28) Amube muntu bamwi ngobeshi ayi alasebensa cankusu akushinisha ayi mwamanisha ncito njeenga mwapeekwa. Na mwacita boobo, cilaakumubeta cuubu kucana ncito akutolelela kusebensa. w23.12 pe. 27 mapa. 12-13

Na Baibo yaamba pa “bushiku bwakwe Yehova,” ilaamba paciindi Yehova ndyeshi akanyonyoole balwani bakwe akupulusha bantu bakwe. Kale kale, Yehova wakaanishawo bantu bamwi. (Isa. 13:​1, 6; Esek. 13:5; Sefa. 1:8) Munshiku shino, “bushiku bwakwe Yehova” bulaakutalika paciindi mfulumeende ndyeshi shikalwane Babiloni munene alimwi bulaakutolelela kushikila apa nkoondo ya Amagedoni. Cino ncociindi ndyetweelete kulibambila kwaamba ayi tukapuluke “bushiku” ubu. Alimwi Yesu wakaamba ayi tulyeelete ‘kwikala katulibambite’ ndyetutolindila “mapensho anene”. (Mate. 24:21; Luka 12:40) Munkalata yakutaanguna mutumwi Paulo njaakalembela Beneklistu baku Tesalonika, wakasebensesha shikoshanyo shipusenepusene kwaamba ayi abacaafwe kwikala kabalibambite ndyebakalinga kulindila kusa kwa bushiku bunene bwa boomboloshi bwakwe Yehova. Paulo wakalinga kucishi kwaamba ayi bushiku bwakwe Yehova teshi bukese paciindi ndyaakabalembela nkalata. (2 Tesa. 2:​1-3) Nacibi boobo, wakayuminisha bashominyina kulibambila kusa kwa bushiku ubu anga bulaakusa ciilo. Alimwi makani ngaakabalembela inga atucafwa aswebo. w23.06 pe. 8 mapa. 1-2

Mu 1978, mutauni ya Tokyo mucishi ca Japan, mwakayakwa ŋanda ilaamfu abuumbi. Bantu bakalinga kutoonsha na ŋanda iyi teshi ikawe mukwiinga mutauni iyi mwakalinga kucitika shitentaanshi abuumbi. Ino bakaiyaka bakacita buyani kwaamba ayi itakawi nabi kwesa citentaanshi? Bakaiyaka munshila yakwaamba ayi na kwesa citentaanshi inga yasendamabo kwakubula kuwa alimwi mbasu shimwi inga shasena kwakubula kupasuka. Beneklistu abalo inga bakoshanishikwa kuŋanda ilaamfu iyi. Munshila nshi? Mwineklistu alyeelete kweelanya kabotu shintu pamakani akuyuma mulushomo akutayuminina pacintu comwi. Alayandika kuba alushomo luyumu lwakwaamba ayi kukonkela milawo yakwe Yehova nkubotu. ‘Alilibambite kunyumfwila’ alimwi taapwayi milawo yakwe Lesa. Nacibi boobo, taeelete kuyumininabo pacintu comwi na bukaalo kabusuminisha kucita cintu cimwi munshila ipuseneeko. (Jemu. 3:17) Mwineklistu wakeeya kweelanya kabotu shintu pamakani aya, tayumininibo pacintu comwi na kusuminisha bantu kunoocita shintu shitabete kabotu. w23.07 pe. 14 mapa. 1-2

Yesu wakalinga kweelete kukaka meelesho akwe Satana uyo wakalinga kusuni kwaamba ayi abishe, akucileka kushomeka kuli Lesa. (Mate. 4:​1-11) Satana wakalinga kushinishite kupa kwaamba ayi Yesu abishe kwaamba ayi atacikoonshi kwaaba buumi bwakwe mbuli cilubula. Kuli mapensho aamwi Yesu ngaakaliyumya ndyaakalinga kusebensa ncito yakushimikila. Balwani bakwe bakamupensha alimwi bakalinga kusuni kumucaya. (Luka 4:​28, 29; 13:31) Wakalinga kweelete kuliyumya ceebo ca shintu shimwi bashikwiiya bakwe nshobatakalinga kucita kabotu. (Maako 9:​33, 34) Ndyebakalinga kumoombolosha bakamupensha akwaamba shibiibi palinguwe. Lyalo wakafwa lufu lucisa abuumbi alimwi lulensha nsoni. (Ebu. 12:​1-3) Ndyaakalinga pafwiifwi akufwa pacisamu cakupenshesha, wakalinga kweelete kuliyumya kwakubula kushitilishikwa a Yehova. (Mate. 27:46) Ncakutatoonsha kwaamba ayi, Yesu wakapenga abuumbi kwaamba ayi atupe cilubula. Na twayeeya pashintu shoonse Yesu nshaakacita kwaamba ayi aabe buumi bwakwe mbuli cilubula, tulamusuna abuumbi. w24.01 mape. 10-11 mapa. 7-9

Kukalika moyo kulatucafwa kwaamba ayi tube abushicibusa bubotu abamwi. Kulatucafwa kukutika cakubikila maano bamwi ndyebatokwaamba. (Jemu. 1:19) Alimwi kukalika moyo kulayuminisha luumuno. Kulatucafwa kuleya kucita shintu cakwiingana na kwaamba maswi atabete kabotu ndyetwalisukama. Alimwi na katukalika moyo, teshi tukafwambaane kukalala na umwi watukalasha. Muciindi cakuboosha cibiibi pacibiibi, ‘tulaakutolelela kunyumfwilana nkumbu akulekelelana camoyo woonse.’ (Kolo. 3:​12, 13) Kwiilikaawo, kukalika moyo inga kwatucafwa kunoosala kabotu shakucita. Muciindi cakwiingana kusalawo shakucita, tulaakucana ciindi cakulangoola makani akuyeeya pasheesho nshetusuni kucita. Kucakubonenaako, na tutoolangoola ncito, mpashi inga twasumina kunjila ncito ili yoonse njeenga twacaana. Nacibi boobo, na katukalika moyo, tulaakutaanguna kuyeeya ncito iyo mbweshi ikakume mukwashi wesu abushicibusa bwesu a Yehova. Na katukalika moyo, inga twaleya kusala kucita shintu shitabete kabotu. w23.08 pe. 22 mapa. 8-9

Inga mwalinyumfwa kulefuka ceebo cakulwana lunkumbwa lutabete kabotu. Nacibi boobo, kuyeeya pa ncomwakashomesha Yehova ndyemwakaaba buumi bwanu kuli nguwe, kulaakumucafwa kuba bashinishite kukaka meelesho. Munshila nshi? Na mwaaba buumi bwanu kuli Yehova, mulashiya akusuula shintu shoonse shimusangalasha. Ici cilaamba ayi mulasalawo kucileka kucita shintu nshomusuni anshomukuumbwa sheenga shakalasha Yehova. (Mate. 16:24) Aboobo na mweeleshekwa, teshi mukatalike kuyeeya nshomweelete kucita. Mulaakunocishi kale shakucita, nkokwaamba ayi kutolelela kushomeka kuli Yehova. Mulaakutolelela kuba bashinishite kusangalasha Yehova. Mulaakuba anga ngu Jobo. Nabi kwaamba ayi wakeenda mumapensho ayumu abuumbi, wakaamba cakutatoonsha ayi: ‘Kushikila nkafwe, teshi nkacileke kushomeka!’—Jobo 27:5. w24.03 pe. 9 mapa. 6-7

Yehova “Lesa shilusuno,” ali andiswe! (2 Koli. 13:11) Alabikila maano kumuntu womwi awomwi. Tulishomete cakutatoonsha ayi ‘tulaakunoofunwa ceebo ca lusuno lwakwe lutamaani.’ (Kulu. 32:10) Na liinji katukutumana kuyeeya Yehova mbwaatutondesha lusuno, tulabona mbwaatubikilako maano alimwi tulalinyumfwa kuba pafwiifwi anguwe. Inga twapaila kuli nguwe kuswa paanshi lyamoyo akumusenga ayi anootutondesha lusuno. Inga twamulwiita shoonse shitootupa kulisukama ceebo cakushiba kwaamba ayi alanyumfwishisha mbotulinyumfwa alimwi alisunishishi kutucafwa. (Kulu. 145:19) Bweenka mulilo mboupa kwaamba ayi tunyumfwe kabotu na kuli mpewo, lusuno lwakwe Yehova lulatuyuminisha ndyetutokwiinda mumapensho. Aboobo amusumine lusuno lwakwe Yehova ulo lweenga lwamuyuminisha akumupa kuba aluumuno. Alimwi soonse atusumine lusuno lwakwe kwiinda mukwaamba ayi: ‘Yehova ndimusuni’!—Kulu. 116:1. w24.01 pe. 31 mapa. 19-20

Yesu taakwe kweelabo pakulwiita bantu ayi liina lyakwe Lesa ngu Yehova. BaJuda Yesu mbaakalinga kwiisha bakalinga kulishi kale liina lyakwe Lesa. Sombi Yesu wakaba panembo mukulengesha ayi Baishi bashibikwe. (Joni 1:​17, 18) Kucakubonenaako, Malembo a ciEbulu alatondesha ayi Yehova alicite luse ankuumbu. (Kulo. 34:​5-7) Yesu wakasansulula kabotu cancine ici ndyaakaamba cikoshanyo ca mwaana wakaashuka a baishi mbobakamutambula. Tulabelenga ayi baishi ndyebakabona mwanaabo wakaana “kaacilibo palaale,” bakamucicilila, bamukumbata akumulekelela kuswa paanshi lyamoyo. Makani aya alatucafwa kunyumfwishisha ayi Yehova alicite luse ankuumbu abuumbi. (Luka 15:​11-32) Yesu wakacafwa bamwi kushiba kabotu Baishi mbobabete. w24.02 pe. 10 mapa. 8-9

Yehova alayuminisha akucafwa baabo batokwiinda mumapensho. Ino cakubonenaako cakwe Yehova cakutondesha nkuumbu akuyuminisha bamwi inga twacikonkela buyani? Nshila yomwi nkwiinda mukuba amibo yeenga yatucafwa kutondesha nkuumbu akuyuminisha bamwi. Ino njimibo nshi? Ino nciinshi ceshi cikatucaafwe kutolelela kusunana a ‘kuyuminishanya’ bushiku abushiku? (1 Tesa. 4:18) Tulyeelete kuba amibo icafwa mbuli kuyeeyelako bamwi, kuba alusuno lwa bwanabwankashi alimwi akubota moyo. (Kolo. 3:​12, NWT; 1 Pit. 3:8) Ino mibo iyi ilaakutucafwa buyani? Na katubanyumfwila nkuumbu bamakwesu akubabikilako maano, tulaakusunishisha kubayuminisha ndyebatokwiinda mumapensho. Yesu wakaamba ayi, “muntu ulaamba ciswite mumoyo wakwe. Muntu uli kabotu ulaamba shintu shibotu isho shili mumoyo wakwe.” (Mate. 12:​34, 35) Aboobo nshila iyandika abuumbi mbweenga twatondesha ayi tulisuni bamakwesu abenankashi, nkwiinda mukubayuminisha. w23.11 pe. 10 mapa. 10-11

Tulyeelete kusenga lucafwo kwaamba ayi tunyumfwishishe bushinshimi bwamu Baibo. Amuyeeye pacikoshanyo ici. Amuyeeye kwaamba ayi mwaya kumusena nkomuteshi kabotu, sombi shicibusa wanu ngomwayaakwe lakwe alikwishi kabotu. Alicishi kabotu pamusena mpomubete alimwi alicishi kabotu nshila yomwi ayomwi nkoitooya. Ncakutatoonsha inga mwasangalala ceebo cakwaamba ayi shicibusa wanu wakasumina kwaamba ayi muyaakwe. Yehova alakwe ali mbuli shicibusa uyu. Alicishi kabotu sheshi shikacitike kunembo. Aboobo kwaamba ayi tucikonshe kunyumfwishisha bushinshimi bwamu Baibo, tulyeelete kuliceesha akusenga Yehova kwaamba ayi atucaafwe. (Danye. 2:28; 2 Pit. 1:​19, 20) Bweenka mbuli mushali uli oonse uli kabotu, Yehova alisuni kwaamba ayi bana bakwe bakabe abuumi bubotu. (Jele. 29:11) Sombi mubupusano amushali uli oonse, Yehova inga watulwiita sheshi shikacitike kunembo alimwi lyoonse nshaamba shilacitika. Yehova wakasala basankwa kulemba bushinshimi mu Maswi akwe kwaamba ayi tucikonshe kushiba shintu shiyandika, kashitana kucitika.—Isa. 46:10. w23.08 pe. 8 mapa. 3-4