Makani Akusebensesha amu Kabuku Kamabungano Abuumi Anciito
OCTOBER 7-13
BUBONI BUCANIKA MUMASWI AKWE LESA | JEMUSI 3-5
“Amucite Shitondesha ayi Muli Basongo”
(Jemusi 3:17) Sombi busongo buswa kwiculu cakutaanguna tabucite kampenda, bulicite luumuno, mbubombu kwaaluka, bulilibambite kunyumfwila, bulicite nkumbu alimwi ashisepo shibotu, tabusalululi, tabwaambi comwi akucita cimwi.
cl-CG 221-222 mapa. 9-10
Sa Mulatondesha “Busongo Buswa Kwiculu”Mubuumi Bwanu?
9 “Cakutaanguna tabucite kampenda.” Kuba utacite kampenda cilaamba kuba usalalite mukati akunsengwe. Baibo ilakoshanisha busongo kumoyo, ano busongo bwa kwiculu inga tabukali mumoyo wakabishikwa amiyeeyo ibiibi, lunkumbwa ashakusuna kucita. (Tushimpi 2:10; Mateyo 15:19, 20) Nacibi boobo, na moyo wesu ulisalalite—nkokwaamba ayi kweelana ambweenga twacikonsha mbuli bantu batasalalite —tulaakucikonsha “kuleya shibiibi akucita shibotu.” (Kulumbaisha 37:27; Tushimpi 3:7) Aboobo sa taceeleli kwaamba ayi kubula kampenda ngumubo wakutaanguna pamibo yabusongo? Mukwiinga sa inga twacikonsha kutondesha mibo imwi pamibo yabusongo buswa kwiculu na katutabete basalalite mumibo alimwi alwakumushimu?
10 “Bulicite luumuno.” Busongo buswa kwiculu bulatupa kuba bantu beshiluumuno, ulo lubete cisepo ca mushimu wakwe Lesa. (Bene Galatiya 5:22) Tulacita nsheenga twacikonsha kwaamba ayi tutapilinganyi “cicatanya luumuno” lucite bantu bakwe Yehova. (Bene Efeso 4:3) Alimwi tuleelesha cankusu kuboosha luumuno na lwapilinganishikwa. Ino nceebonshi ncotuyandikila kucita boobo? Baibo ilaamba ayi: “Kamunyumfwana, mwikale muluumuno; lyalo Lesa shilusuno ulaakuba amwebo.” (2 Bene Kolinto 13:11) Aboobo Lesa shilusuno ulaakuba andiswe, na twatolelela kukala muluumuno. Mbotukala abashominyineesu bulakuma bushicibusa bwesu a Yehova. Ino inga twatondesha buyani ayi tuli beshiluumuno? Atubandike cakubonenaako.
(Jemusi 3:17) Sombi busongo buswa kwiculu cakutaanguna tabucite kampenda, bulicite luumuno, mbubombu kwaaluka, bulilibambite kunyumfwila, bulicite nkumbu alimwi ashisepo shibotu, tabusalululi, tabwaambi comwi akucita cimwi.
cl-CG 224 pala. 12
Sa Mulatondesha “Busongo Buswa Kwiculu” Mubuumi Bwanu?
12 “Mbubombu kwaaluka.” Ino maswi aya alaamba nshi? Kweelana abeshikwiiya bunene shamu Baibo, muci Giliki maswi aya ngotucana pa Jemusi 3:17 ngayumu kusansulula. Basansulushi bamwi balaasansulula ayi “kubomba,” “kukalika moyo,” alimwi “akuyeyelaako bamwi.” Ano futunoti yamu Baibo ya New World Translation ilaamba ayi maswi aya alasansulula “kuba mubombu kwaaluka.” Ino inga twatondesha buyani ayi tulicite mubo uyu?
cl-CG 224-225 mapa. 14-15
Sa Mulatondesha “Busongo Buswa Kwiculu” Mubuumi Bwanu?
14 “Bulilibambite kunyumfwila.” Maswi a muci Giliki aya alacanikabo palilembo lyeenka ili mu Malembo oonse a Beneklistu aci Giliki. Kweelana a umwi wakeeya abuumbi, aya ngamaswi “liinji ngobasebensesha ndyebatoolulika bashilumamba.” Lilasansulula “kuba muntu utashuupi kunyumfwila” alimwi “ukonkela nshaalwitikwa.” Muntu utanjililwa abusongo buswa kwiculu ulakonkela Malembo nshaamba. Teshi muntu ushibikitwe ayi alasala shakucita, lyalo akukaka kwaaluka na kuli makani amwi atoopikisha sheesho nshaasala. Sombi ngumuntu, ufwambaana kwaaluka na watondeshekwa kuswa mu Malembo ayi taakwe kusala kabotu. Sa amwebo mbomushibikitwe ubo?
“Bulicite Nkumbu Alimwi Ashisepo Shibotu”
15 “Bulicite nkumbu alimwi ashisepo shibotu.” Inkumbu ngumubo uyandika abuumbi wa busongo buswa kwiculu, mukwiinga busongo ubu bulasansululwa ayi “buliswite nkumbu.” Alimwi na mwaboona, lilembo lyaamba ayi bulicite “nkumbu” alimwi “ashisepo shibotu.” Cileelela kwaamba boobo, mukwiinga maswi akwaamba ayi inkumbu, liinji alasansulula kucita cimwi citondesha ayi tutoyeyelaako bamwi. Inkumbu ngumubo utulengesha kucitila bamwi shintu shibotu. Libuku limwi lilaamba ayi inkumbu “nkulinyumfwa cibiibi ceebo cakubona umwi ubete mubukaalo buyumu akweelesha kumucafwa.” Aboobo busongo buswa kuli Lesa teshi mubo utacite lusuno na wakutayeyelabo. Sombi, bulayuminisha, bulaswa panshi lya moyo, alimwi bulayeyelaako bamwi. Ino inga twatondesha buyani ayi tulicite nkumbu?
(Jemusi 3:17) Sombi busongo buswa kwiculu cakutaanguna tabucite kampenda, bulicite luumuno, Mbubombu kwaaluka, bulilibambite kunyumfwila, bulicite nkumbu alimwi ashisepo shibotu, tabusalululi, tabwaambi comwi akucita cimwi.
cl-CG 226-227 mapa. 18-19
Sa Mulatondesha “Busongo Buswa Kwiculu” Mubuumi Bwanu?
18 “Tabusalululi.” Busongo buswa kuli Lesa tabucitewo mushimu wakusalulula mishobo na kulisumpula ceebo ca musena muntu nkwaakaswa. Na tulicite mushimu wakasalulushi, tulasebensa cankusu kuukusha kwaamba ayi utameeni miyanda mumoyo wesu. (Jemusi 2:9) Tatutondeshi bamwi bulemu kwiinda bamwi ceebo cakwaamba ayi bakeeya kwiinda bamwi, na mpashi balicite maali kwiinda bamwi, na ceebo cakwaamba ayi balicite mukuli umwi mulibungano; nabi kubona bashominyineesu ayi taakuwo mbobabete ceebo ca mbobaboneka. Na Yehova wakabatondesha lusuno lwakwe, nkokwaamba ayi aswebo tulyeelete kubatondesha lusuno.
19 “Tabwaambi comwi akucita cimwi.” Maswi aya muci Giliki inga asansulula “shikucita cisekano.” Kale kale, beshikucita shisekano ba Giliki abene Loma bakalinga kufwala shakulifweka pameenso ndyebatoocita shisekano. Aboobo muci Giliki maswi akwaamba ayi “waamba comwi akucita cimwi” inga asansulula muntu ufwala cakulifweka pameenso, na waamba nshaataciti. Lubasu lwa busongo buswa kuli Lesa ubu, bulyeelete kukuma mbotucita ku bashominyineesu ambotulinyumfwa pali mbabo.
Kulangoola Buboni Bwakumushimu
(Jemusi 4:5) Ano sa mulayeeya ayi malembo alabeca ndyaamba ayi: “Mushimu uli muli ndiswe ulicite cilabo cakusunishisha kuba amunyono”?
w08-CG 11/15 pe. 20 pala. 6
Shiteente Shinene Shitocanika Munkalata Yakwe Jemusi a Yakwe Pita
4:5—Ino ndilembo nshi Jemusi nkwaakakusha maswi aya? Jemusi taakalinga kwaamba maswi akaswa mulilembo lili lyoonse. Nacibi boobo, maswi akatanjililwa amushimu aya, alyeelete akaswa kumakani ashiteente shinene nshetucana mumalembo mbuli Matalikilo 6:5; 8:21; Tushimpi 21:10; alimwi a Bene Galatiya 5:17.
(Jemusi 4:11, 12) Amucileeke kufuyana, nobamakwesu. Uyo ufuya nabi woombolosha mushominyina, ulacobola akoombolosha Milawo yakwe Lesa. Ono na woombolosha Milawo, inga wacileka kwiikonkela, akuba shikuyoombolosha. 12 Kulibo Shikupa Mulawo alimwi a shikoombolosha womwibo, uyo ucikonsha kupulusha akunyonyoola. Sombi ino webo ndiwaani, pakoombolosha muntunyoko?
w97-CG 11/15 mape. 15-16 pala. 8
Lushomo Lulatucafwa Kuba Bakalika Moyo Akupaila
8 Nkubisha kufuya mushominyineesu. (Jemusi 4:11, 12) Nacibi boobo bamwi balaamba shibiibi pa Beneklistunyinaabo, mpashi ceebo ca kulibona anga balo baliluleme na ceebo cakusuna kulibika peculu kwiinda babyaabo. (Kulumbaisha 50:20; Tushimpi 3:29) Muci Giliki liswi lyakwaamba ayi ‘kufuya’ lisansulula bulwani akubekesha mulandu muntu ngwaatana kucita. Ico cisansulula cintu comwi akupa mukwesu mulandu unene. Ino kucita boobo kulyeelene buyani ‘akufuya alimwi akucobola mulawo wakwe Lesa’? Balembi aba Falisi bakashiya milawo yakwe Lesa akutalika kukonkela milawo yabo. (Maako 7:1-13) Aswebo na katoombolosha bamakwesu Yehova mbwaatana koombolosha, nkokwaamba ayi twacobola mulawo wakwe Lesa akutondesha ayi waceya. Alimwi koombolosha mukwesu munshila itabete kabotu, takutondeshi ayi tulakonkela mulawo walusuno.—Bene Loma 13:8-10.
Kubelenga Baibo: (Jemusi 3:1-18)
OCTOBER 14-20
BUBONI BUCANIKA MUMASWI AKWE LESA | 1 PITA 1-2
“Mulyeelete Kuba Basalalite”
(1 Pita 1:14, 15) Mbuli baana banyumfwila, amucileeke kukonkela lusuno lwa shintu shibiibi isho nshomwakalinga kukonkela mukutashiba kwanu, 15 sombi bweenka mbuli wooyo Usalalite wakamwiita, amube basalalite mubukaalo bwanu boonse,
w17-CG.02 pe. 9 pala. 5
Cilubula—“Cipo Citacite Kampenda” Cakatupa Ishiwesu
5 Ino inga twatondesha buyani ayi tulisuni liina lyakwe Yehova? Kwiinda mushintu nshetucita. Yehova alisuni kwaamba ayi tube bantu basalalite. (Amubelenge 1 Pita 1:15, 16.) Nkokwaamba ayi tulyeelete kupaila Yehova eenkabo akumunyumfwila amoyo wesu woonse. Nabi ndyetutoopenshekwa, tulyeelete kusebensa cankusu kwaamba ayi tunookonkela njiisho shakwe amilawo yakwe. Inga twabonesha mumuni wesu akulemeka liina lyakwe Yehova kwiinda mukucita shintu shiluleme. (Mate. 5:14-16) Mbuli bantu bakwe Yehova basalalite, inga twatondesha ayi milawo yakwe Yehova njibotu alimwi Satana nshaamba nshakubeca kwiinda mushintu nshetucita mubuumi bwesu. Na twaciita cilubo mbuli bantu batasalalite, tulyeelete kwaana kuswa panshi lya moyo akucileka kucita shintu shitalemeki Yehova.—Kulu. 79:9.
(1 Pita 1:16) mukwiinga kulilembetwe ayi: “Mulyeelete kuba bantu basalalite, mukwiinga nebo ndisalalite.”
lvs-CG 77 pala. 6
Mbweenga Twasala Shakulikondelesha
6 Yehova alatulwiita ayi: “mulyeelete kuba bantu basalalite, mukwiinga nebo ndisalalite.” (1 Pita 1:14-16; 2 Pita 3:11) Yehova inga watambulabo kulambila kwesu na kakusalalite nabi kutacite matombe. (Dutolonomi 15:21) Kulambila kwesu inga kwaba amatombe na katucita shintu Yehova nshaapatite mbuli bulale, kulwana, na shintu shicatene abashikaswa. (Bene Loma 6:12-14; 8:13) Alimwi Yehova inga taakondwiiwo na katweebela, kubelenga na kukutika kushintu mbuli sheeshi. Na katucita shintu sha mushobo uyu, Yehova inga taatambuli kulambila kwesu alimwi ici inga canyonyoola bushicibusa bwesu anguwe.
Kulangoola Buboni Bwakumushimu
(1 Pita 1:10-12) Kwaamba sha lupulusho ulu, balaluki bakaambila limwi sha ceeco Lesa ncaakaamba ayi ulaakumupa kwiinda munkumbu shakwe, bakalangoola akwiipusha kabotu kabotu. 11 Bakeelesha kwishiba ciindi ndyeshi cikacitike ambweshi cikacitike kweelana amushimu wakalinga mulimbabo mbowakalinga kubatondesha kulansha kuli Klistu, ndyewakalinga kubapeta limwi bumboni kulansha kukupenshekwa kwakwe Klistu alimwi abulemu bwakalinga kukonkelaawo. 12 Bakayubulwiitwa kwaamba ayi tabakalinga kulisebensela beene beenka sobwe, sombi bakalinga kusebensela ndimwe shintu isho shaambilishikwa kulindimwe abaabo bakaambilisha makani abotu kulindimwe amushimu usalashi wakatumwa kuswa kwiculu. Shintu ishi nshoshintu baanjelo nshobayandishisha kushiba.
w08-CG 11/15 pe. 21 pala. 10
Shiteente Shinene Shitocanika Munkalata Yakwe Jemusi a Yakwe Pita
1:10-12. Baanjelo balakumbwa kubona akushiba cancine cishisitwe cakaamba bashinshimi bakwe Lesa bakale kale abo bakalemba sha libungano lya Beneklistu bananikitwe. Nacibi boobo, ishi shintu shakashibikwa kabotu Yehova ndyaakatalika kusebensesha libungano ili. (Efe. 3:10) Sa aswebo tatweelete kukonkela cakubonenaako ca baanjelo akweelesha cankusu kulangoola “shintu shishisitwe shakwe Lesa”?—1 Koli. 2:10.
(1 Pita 2:25) Mukwiinga mwakalinga anga ni mbelele shakasoweka, sombi bulya mwaboola kumweembeshi amutanjilili wabuumi bwanu.
it-2-E 565 pala. 3
Mutanjilili
Mutanjilili Wiinditeewo. Pita ndyaakalemba maswi ngotucana pa 1 Pita 2:25, citooboneka ayi wakasebensesha maswi ngotucana apa Isaya 53:6 ayo akalinga kwaamba pa ‘mbelele shakasoweka,’ lyalo wakaamba ayi: “Mukwiinga mwakalinga anga ni mbelele shakasoweka, sombi bulya mwaboola kumweembeshi amutanjilili wabuumi bwanu.” Maswi aya alyeelete atokwaamba pali Yehova Lesa. Pita wakalinga kwaamba pabantu bakaboolela kuli Yehova Lesa kwiinda muli Klistu Yesu uboosha bantu kuli Yehova Lesa, Mweembeshi Munene wa bantu bakwe. (Kulu. 23:1; 80:1; Jele. 23:3; Ese. 34:12) Yehova ngumutanjilili, ushi kuya bulanga langa bantu. (Kulu. 17:3) Muci Giliki maswi akwaamba ayi kulanga langa ngu e·pi·sko·peʹ liswi ndyebasebensesha akwaamba koombolosha kunene kuswa kuli Yehova, bweenka mbuli mbwaakacita ku ndabala ya Jelusalemu muciindi ca batumwi. Bakalinga kukala mundabala iyi tabakwe kushiba ayi nciindi “cakulangwa langwa [Gr., e·pi·sko·pesʹ].” (Luka 19:44) Kwiilikaawo maswi aya balaasebensesha andyebatokwaamba pashintu shibotu, mbuli mbweshi cikabe bushiku Lesa ndyeshi akalemeke liina lyakwe “pabushiku bwa boomboloshi bwakwe? [Gr., e·pi·sko·pesʹ].”—1 Pita 2:12.
Kubelenga Baibo: (1 Pita 1:1-16)
OCTOBER 21-27
BUBONI BUCANIKA MUMASWI AKWE LESA | 1 Pita 3-5
“Mamanino Ashintu Shoonse ali Pafwiiwi”
(1 Pita 4:7) Ono mamanino ashintu shoonse ali pafwiifwi. Paceebo ceeco, kamulitibuka alimwi amucenjele, akuba babikila maano kumipailo.
w13-CG 11/15 pe. 3 pala. 1
“Amucenjele Akuba Babikila Maano Kumipailo”
MUSANKWA umwi usebensa mashiku wakaamba ayi: “Ciindi ciyumu abuumbi kutashinshila, nciindi cakumuyamaca.” Baanji basebensa mashiku inga basuminisha kwaamba ayi nshaakaamba nshancine. Beneklistu abalo ndyelipenshi ndyebatoolwana, cishi cakwe Satana ndyecili pafwiifwi akunyonyoolwa. Cilibo anga twashika kumuyamaca ciindi ciyumu abuumbi kwaamba ayi muntu atasepukilwi, aboobo tulyeelete kusebensa cankusu kwaamba ayi tucikoonshe kutolelela. (Loma. 13:12) Inga cabica abuumbi na toonenena lwakumushimu pacecino ciindi ncetwashikaawo! Cino nceciindi ncotweelete ‘kucenjela’ akukonkela shaamba Malembo ayi “amucenjele, akuba babikila maano kumipailo.”—1 Pita. 4:7.
(1 Pita 4:8) Cinene ncakwaamba ayi, amusunane abuumbi, mukwiinga lusuno lulafweka pa shibiibi shiinji.
w99-CW 4/15 pe. 22 pala. 3
Mbweenga Twashiiba Akukoma Nshetwaalilwa Lwakumushimu
Cakweelaako, amutolelele kwiibaluka kuyuminisha kwakaamba mutumwi Pita ndyaakaamba ayi: “Ono mamanino ashintu shoonse ali pafwiifwi. Paceebo ceeco, kamulitibuka alimwi amucenjele, akuba babikila maano kumipailo. Cinene ncakwaamba ayi, amusunane abuumbi, mukwiinga lusuno lulafweka pa shibiibi shiinji.” (1 Pita 4:7, 8) Ncuubu kutalika kubikila maano abuumbi kushilubo sha bamwi a sheesu sobeene lyalo akuba mfumpu. Satana alikushi kabotu kutasalala kwesu. Aboobo alisuni kutukoma kwiinda mukuyuminisha shintu sheenga shapa kwaamba ayi tutanoonyumfwana. Aboobo tulyeelete kufwambaana kufweka pashilubo sha bamwi kwiinda mukusunana abuumbi “akutapa Satana ciindi cakutweelesha.”—Bene Efeso 4:25-27.
(1 Pita 4:9) Amutambulane kwakubula kutongooka.
w18-CG.03 mape. 14-15 mapa. 2-3
Kutambula Beensu Calusangalalo Nkubotu!
2 Pita wakayuminisha bamakwesu ayi: “Amutambulane.” (1 Pita 4:9) Liswi lyakwaamba ayi “kutambulana” muci Giliki lilasansulula “kusuna, na kucitila shibotu bantu mbotuteshi.” Nacibi boobo, Pita wakayuminisha Beneklistu boonse ayi balyeelete ‘kutambulana,’ nabi kwaamba ayi bakalinga kushibene. Ano ino kutambulana kwakabacafwa buyani?
3 Kwakabacafwa kuba bacatene abuumbi. Amuyeeye nshomwakeendaamo mubuumi bwanu. Sa umwi wakamwiitaawo kale kuŋanda kumishaabo mukufwakasha? Sa tamuna kusangalala akuyuminishikwa abuumbi ceebo cakufwakasha uko? Sa bushicibusa bwanu abamakwesu abenankashi tabuna kuyuminaako ndyebakamufwakashila kumishaanu? Kufwakashilana kulatucafwa kubashiba kabotu abuumbi bamakwesu abenankashi. Beneklistu bamuciindi cakwe Pita bakalinga kuyandika kunoonyumfwana abuumbi shintu ndyeshakalinga kuya bubicilaako. Mbocibete akulindiswe sobeneklistu munshiku shino “shakweelaako.”—2 Timo. 3:1.
Kulangoola Buboni Bwakumushimu
(1 Pita 3:19, 20) Munshila yeenka iyi wakaya mukushimikila mishimu yakalinga mujeele, 20 mishimu yakalinga ya baabo batakwe kunyumfwila Lesa kale kale, ndyaakalinga kulindila amoyonteeka ciindi ici Nowa ndyaakalinga kupanga bwaato. Mwakalingabo bantu baniini bakapuluka kumaanshi, bosanwe abotatwe.
w13-CG 6/15 pe. 23
Miipusho Kuswa Kubeshikubelenga
Baibo ilaamba ayi Yesu “wakaya mukushimikila mishimu yakalinga mujeele.” (1 Pita 3:19) Ino ici cilaamba nshi?
▪ Mutumwi Pita wakaamba ayi mishimu iyi mbaabo “batakwe kunyumfwila Lesa kale kale, ndyaakalinga kulindila amoyonteeka ciindi ici Nowa ndyaakalinga kupanga bwaato.” (1 Pita 3:20) Cakutatoonsha, Pita wakalinga kwaamba pashilengwa shakumushimu shakasala kwaashukila Lesa akuba kulubasu lwakwe Satana. Judi wakaamba ayi baanjelo “batakwe kukondwa kunooli mumisena ya nkusu nshebakapekwa, sombi bashiya musena wakabapa Lesa kwiculu,” wakaamba ayi “Lesa wakabaanga ncetani shitanyonyooki alimwi ulibasungite mumusena wa mushinshe ushiya mbi kushikila pabushiku bunene ndyeshi bakoomboloshekwe.”—Judi 6.
Ino baanjelo muciindi cakwe Nowa bakatondesha buyani kutanyumfwila? Muyoba unene kootana kwisa, baanjelo babiibi aba bakaswa kwiculu akusa mukuba bantu pacishi ca panshi—cintu Lesa ncaatana kubalwiitawo kucita. (Mata. 6:2, 4) Kwiilikaawo, baanjelo bakacita cintu cibiibi abuumbi. Mukwiinga Lesa taana kulenga baanjelo kwaamba ayi banokoonana abanakashi. (Mata. 5:2) Baanjelo babiibi aba, balaakunyonyoolwa paciindi Lesa ncaakabika. Pacecino ciindi, bweenka mbuli lilembo lyakwe Judi mbolyaamba, bali mubukaalo buli anga “ngumunshinshe ushiya mbi”—nkokwaamba ayi bali mujeele yakumushimu.
Ino ndilili alimwi ino Yesu wakashimikila buyani “kumishimu yakalinga mujeele”? Pita wakalemba ayi ishi shakacitika Yesu “ndyaakabushikwa mumushimu.” (1 Pita 3:18, 19) Amubone kwaamba ayi Pita alimwi waamba ayi Yesu “wakaya mukushimikila.” Nkokwaamba ayi Yesu wakacita boobo Pita kaatana kulemba maswi aya. Aboobo citooboneka kwaamba ayi pesule lyakubushikwa, Yesu wakaambilisha makani kubaanjelo bamucita shibiibi aba kulansha ku mbweshi bakaanishikwe cakumaninina. Takwakalinga kushimikila kwa kwaamba ayi mpashi inga baaluka sobwe. Kwakalinga nkushimikila makani akoomboloshekwa kwabo. (Jona 1:1, 2) Mukwiinga Yesu wakatolelela kushomeka kushikila akulufu alimwi wakabushikwa, cakatondesha patupa kwaamba ayi Satana taakalinga kucite nkusu palinguwe, aboobo wakalinga kweelete kwaambilisha nkombe yaboomboloshi iyi.—Joni 14:30; 16:8-11.
Kunembo, Yesu alaakwaanga Satana abaanjelo bakwe akubawaala mucilindi citeeli. (Luka 8:30, 31; Ciyu. 20:1-3) Kushikila ciindi ico, baanjelo batanyumfwili aba bali mubukaalo buli anga ngumunshinshe wakumushimu, alimwi kunyonyoolwa kwabo kuli shinishitwe.—Ciyu. 20:7-10.
(1 Pita 4:6) Nceceeco makani abotu ncaakashimikililwa akubaabo bakafwa, nabi bakoomboloshekwe mumubili bweenka mbuli bantu boonse, sombi mumushimu banookala abuumi bweenka mbuli Lesa.
w08-CG 11/15 pe. 21 pala. 7
Shiteente Shinene Shitocanika Munkalata Yakwe Jemusi a Yakwe Pita
4:6—Ino “bakafwa” abo “bakashimikilwa makani abotu” mbaani? Mbalya bakalinga ‘bafu ceebo ca shilubo shabo abubi,’ na abo bakalinga kufwite lwakumushimu kabatana kunyumfwa makani abotu. (Efe. 2:1) Pesule lyakushoma makani abotu, bakaba “abuumi” alimwi ceebo cakuba abushicibusa a Yehova.
Kubelenga Baibo: (1 Pita 3:8-22)
OCTOBER 28–NOVEMBER 3
BUBONI BUCANIKA MUMASWI AKWE LESA | 2 PITA 1-3
“Munoolindila Akuyeeya Bunene Kushika kwa Bushiku Bwakwe Yehova”
(2 Pita 3:9, 10) Yehova taacelwi kucita kweelana ambwaakashomesha mbuli mbobayeeya bamwi ayi wacelwa, sombi ucimukalikila moyo mukwiinga taasuni muntu nabi womwi kunyonyoolwa. Ncakwiila ulisuni kwaamba ayi boonse baaluke kuswa kushibiibi shabo. 10 Nacibi boobo, bushiku bwakwe Yehova bulaakwisa anga ngumwiipi, pabushiku ubo liculu lilaakumana acoongo cinene mukukapula kwa liinso, shintu shoonse sha kwiicula apacishi capanshi shilaakupya akunyonyoolwa, alimwi cishi amilimo iliimo shilaakubikwa patuba.
w06-CG 12/15 pe. 20 pala. 11
Yehova “Alakucita Bululami”
11 Ino tulyeelete kwanyumfwisha buyani maswi akushomesha akaamba Yesu ayi Yehova “alaakufwambaana” kucita bululami? Maswi akwe Lesa alatondesha ayi nabi kwaamba ayi [Yehova] alakalika moyo,” alaakuleta bululami cakufwambaana na ciindi cikashiike. (Luka 18:7, 8; 2 Pita 3:9, 10) Muyoba ndyewakashika muciindi cakwe Nowa, babiibi boonse bakanyonyoolwa kwakubula kutola aciindi. Ubu mbocakalinga amuciindi cakwe Loti, mulilo ndyewakesa kuswa kwiculu, bamucita shibiibi boonse bakanyonyooka. Yesu wakaamba ayi: “Kulaakuba bweenka ubu pabushiku Mwanaamuntu ndyeshi akayubululwe.” (Luka 17:27-30) Alimwi, bushiku bwakunyonyoola bamucita shibiibi “bulaakushika cakutengashila.” (1 Bene Tesalonika 5:2, 3) Ncakwiila, inga twashoma cakutatoonsha kwaamba ayi ciindi cakunyonyoola Satana caakushika, Yehova teshi akasowewo ciindi nabi paniini.
(2 Pita 3:11, 12) Ono na shintu shoonse ishi shilaakunyonyooka boobo, amuyeeyebo na mulyeelete kuba bantu bali buyani mumibo isalalite alimwi anciito yakusebensela Lesa cakulyaaba, 12 ndyemutolindila akuyeeyesha kushika kwa bushiku bwakwe Yehova, ndyeshi liculu likanyonyoonwe amulilo unene alimwi ashintu shakwiculu shilaakusunguluka kucikasashi ca mulilo!
w06-CG 12/15 pe. 12 pala. 18
“Bushiku Bunene Bwakwe Yehova Buli Pafwiifwi”
18 Nceceeco mutumwi Pita ncaakatuyuminishila ayi tulyeelete kunokwiibaluka “kubaako kwa bushiku bwakwe Yehova”! Ino inga twatondesha buyani ayi tutokwiibaluka bushiku bwakwe Yehova? Nshila yomwi nkwiinda mukuba bantu ‘bacite mibo isalalite akucita ncito shitondesha kusebensela Yehova cakulyaaba.’ (2 Pita 3:11, 12) Kutaatilwa muncito sha mushobo uyu kulaakutucafwa kulangila cakuyandishisha kushika kwa “bushiku bwakwe Yehova.” Muci Giliki maswi akwaamba ayi “kuyeeyesha” alasansulula “kufwambaana.” Inga tatupi kwaamba ayi ciindi cacaala cifwambaane kweenda kwaamba ayi bushiku bwakwe Yehova bwise. Nacibi boobo, ndyetutolindila bushiku bulya, ciindi cilaakuboneka anga ceenda lubilo na katucite shiinji shakucita muncito yakwe Lesa.—1 Bene Kolinto 15:58.
Kulangoola Buboni Bwakumushimu
(2 Pita 1:19) Aboobo maswi akaamba balaluki ashinishikwa cancinencine kulindiswe, alimwi mutoocita kabotu kwaabikila maano bweenka mbuli lilampi linyaka mumushinshe (kushikila mumuni ukamunike anga ngwa ntanda) mumyoyo yanu.
w08-CG 11/15 pe. 22 pala. 2
Shiteente Shinene Shitocanika Munkalata Yakwe Jemusi a Yakwe Pita
1:19—Ino “ntanda ya macuunsa,” ngani, ino ndilili ndyaakabonekela alimwi ino tulishi buyani ayi ishi shakacitika? “Ntanda ya macuunsa” ngu Yesu Klistu kuswabo ciindi ndyaakaba Mwaami wa Bwaami bwakwe Lesa. (Ciyu. 22:16) Mu 1914, Yesu wakamunika kushilengwa shoonse mbuli Mwaami Mesiya, akwaambilisha ayi bushiku bupya bwatalika. Kwaaluka kwakwe Yesu pakalundu kwakatondesha bulemu mbwakalinga kusa mukubaabo ankusu sha Bwaami nshaakalinga kusa mukupekwa, kutondesha kwaamba ayi ncakwiila maswi akwe Lesa abushinshimi ngalushinisho. Kubikila maano ku maswi abushinshimi kulamunikila myoyo, aboobo tulashiba kwaamba ayi Ntanda yamacuunsa yaswa.
(2 Pita 2:4) Mukwiinga Lesa taakwe kulekabo baanjelo bakabisha, sombi wakabawaala mu Tatalasi, wakabaanga ancetani sha munshinshe ushiya mbi kwaamba ayi balindile bushiku bwa koomboloshekwa.
w08-CG 11/15 pe. 22 pala. 3
Shiteente Shinene Shitocanika Munkalata Yakwe Jemusi a Yakwe Pita
2:4—Ino “Tatalasi,” nciinshi, alimwi ino ndilili baanjelo bakaashuka ndyebakawalwaamo? Tatalasi ni jeele yacikoshanyo umo mwakabikwa baanjelo bakaangwa, sombi tamwaangwi bantu beene sobwe. Mbukaalo bwa kutashiba nabi comwi pamakani akuyanda kwakwe Lesa kuli anga ngumumuni. Baanjelo bakabikwa mu Tatalasi tabaciteewo bulindilishi bwakunembo. Lesa wakawaala baanjelo balya batakwe kunyumfwila mu Tatalasi muciindi cakwe Nowa, alimwi balaakutolelela kuba mubukaalo ubu kushikila andyeshi bakanyonyoolwe.
Kubelenga Baibo: (2 Pita 1:1-15)