Makani Akusebensesha amu Kabuku Kamabungano Abuumi Anciito
© 2024 Watch Tower Bible and Tract Society of Pennsylvania
JANUARY 6-12
BUBONI BUCANIKA MUMASWI AKWE LESA KULUMBAISHA 127-134
Nobashali—Amutolelele Kulama Kabotu Bana Banu
Amusune Lubasu Ndomucite Mumukwashi Wakwe Yehova
9 Yehova wakapa bantu coolwe cakuba abaana alimwi amukuli wakubaiisha kumusuna alimwi akumusebensela. Na muli mushali, sa mulalumba pacoolwe ici cilibetele? Nabi kwaamba ayi baanjelo bakapekwa shabupe shiinji, Yehova taakwe kubapa coolwe cakuba abaana. Aboobo na muli bashali, munoolumba pacoolwe ncomucite cakuba abaana. Bashali bakapekwa mukuli uyandika abuumbi wakulama baana kweelana a “kululika alwiiyo lwakwe Yehova.” (Efe. 6:4, NWT; Duto. 6:5-7; Kulu. 127:3) Libunga lyakwe Yehova lyakabamba shisebensesho shiinji shaamba pamakani amu Baibo mbuli mabuku, mavidyo, inyimbo, alimwi amakani acanika pa webusaiti, kwaamba ayi licafwe bashali. Ici cilatondesha patuba kwaamba ayi Ishiwesu wakwiculu alimwi a Mwanaakwe balibasuni baana. (Luka 18:15-17) Yehova alasangalala na bashali kabacinka manungo muli nguwe akucita shoonse nsheenga bacikonsha kwaamba ayi balame bana babo. Alimwi bashali aba balacafwa bana babo kuba acoolwe cakuba mumukwashi wakwe Yehova kwamuyayaya!
Nobashali—Amwiishe Bana Banu Kusuna Yehova
20 Amubashibe kabotu bana banu. Kulumbaisha 127 ilakoshanisha baana ku mifwi. (Amubelenge Kulumbaisha 127:4.) Bweenka mbuli mbobasebensesha shintu shipusenepusene kupanga mifwi, alimwi a bweenka mbuli imwi mboiba inene alimwi imwi iniini, abaana abalo mbobabete kupusana. Aboobo bashali balyeelete kushiba kabotu bwakwiisha mwaana womwi awomwi. Beebene bamwi baku Israel bakaamba ayi cakabacafwa kwiisha kabotu bana babo nkucita ciiyo ca Baibo a mwaana womwi awomwi. Ncakwiila mutwi wamukwashi ngoweelete kusala na inga cakonsheka kwiiya amwaana womwi awomwi.
Buboni Bwakumushimu
Amusangalale Akuya Panembo Kwanu Muncito Yakwe Yehova!
6 Citeente ciyandika nceenga bashali beeya nceeci ncetucana palilembo lya Kulumbaisha 131:1, 2. (Amubelenge.) Mwaami Defedi wakaamba ayi taakalinga kubikila maano kushintu shimwiinda ciimo. Mukwiinga wakalinga muntu uliceesha wakekala muluumuno akukwana. Ino bashali inga beeya nshi kumaswi akaamba Defedi? Kwaamba ayi bashali bacikoonshe kuliceesha, tabeelete kulangila kucita nsheenga balo abana babo tabacikoonshi. Bashali inga bacafwa mwaana kulinyumfwa kuyandika kwiinda mukushiba nsheenga wacikonsha kucita alimwi ansheenga taacikoonshi, lyalo inga bayeeya nsheenga wacita kunembo kweelana ankusu shakwe mposheela. Nankashi waliina lya Marina wakaamba ayi: “Bama tabakalinga kunjeelanisha kumunene wangu na banike bangu bobilo nabi kubaana bamwi. Bakalinga kunjiisha ayi bantu boonse balicite shipo shipusene alimwi muntu uli woonse alayandika kuli Yehova. Aboobo nshilyeelanyiiwo kubamwi.”
JANUARY 13-19
BUBONI BUCANIKA MUMASWI AKWE LESA | KULUMBAISHA 135-137
“Mwaami Lesa . . . Ngumunene Kwiinda Balesa Bamwi Boonse”
w15-E 6/15 pe. 6 pala. 15
Lesa Alatondesha Nkusu Nshaacite Kwiinda Muli Klistu
15 Yehova ngwaakapa Klistu nkusu shakucita shaankamiko, aboobo inga twashoma cakutatonsha ayi Lesa alicite nkusu pashintu shoonse. Amuyeeye pa shakubonenaako shitokonkelaawo. Kakutana kuba Muyoba wakacitika muciindi cakwe Nowa, Yehova wakaamba ayi: “Na peende nshiku [7] kuswa sunu ndaakutuma mfula ishi ikaloke kwanshiku shili [40] malumwi amashiku.” (Mata. 7:4) Alimwi pa Kulonga 14:21, Baibo ilaamba ayi: “[Yehova] wakapansaanya maanshi kwiinda mumuuwo wakapupa kuswa kwicwe.” Kwiilikaawo, pa Jona 1:4 Baibo ilaamba ayi: “[Yehova] wakatuma cipuupu cinene palweenge. Lyalo kwakaba maaba ayoosha cakwaamba ayi bwaato bwakalinga kusuni kupasuka.” Kushiba ayi Yehova alicite nkusu pashintu shoonse, kulayumya lushomo lwesu. Aboobo ncakutatoonsha kwaamba ayi kunembo Yehova a Yesu balaakwaalula cishi kuba Paladaiso.
Sa Mulalumba Palusuno Lutamaani Lwakwe Yehova?
16 Tulayuminishikwa na twashoma muli Yehova ayi inga watushitilisha. Nacibi boobo, cimwi ciindi inga twalinyumfwa kulefuka alimwi inga twatolelela kulinyumfwa boobo. Ino nshiinshi Yehova nsheenga wacita na twalinyumfwa boobo? (Amubelenge Kulumbaisha 136:23.) Alaakutucafwa amaansaakwe amuyayaya kwaamba ayi tucileeke kulinyumfwa kulefuka. (Kulu. 28:9; 94:18) Mbotufubilaamo: Kushiba kwaamba ayi lyoonse inga twashoma muli Lesa, kulatucafwa kwiibaluka shoolwe shobilo nshetucite. Cakutaanguna, tulishi kwaamba ayi Yehova alaakutushitilisha lyoonse tacicite mulandu ankotukala. Cabili, Ishiwesu wakwiculu shilusuno, alatubikila maano abuumbi.
Buboni Bwakumushimu
‘Balisangalete Abo Batacite Kampenda’ Kuli Yehova
12 Yehova watondesha patuba kwaamba ayi ngoocite nkusu kwiinda “beendeleshi bacishi.” Amuleke tubandike shakubonenaako shotatwe. Falawo Mwaami wa cishi ca Ijipiti wakalinga wabika bantu bakwe Yehova mubusha akukaka kubaangulula. Sombi Yehova wakabaangulula akupisha Falawo mulweenge Lusalala. (Kulo. 14:26-28; Kulu. 136:15) Muciindi cakulumbaisha Yehova, mwaami Beloshasa wakucishi ca Babiloni ndyaakalinga kucite kusekelela “wakalisumpula akulwana Mwaami Lesa wakwiculu” alimwi “akulumbaisha balesa ba silifa alimwi aba golodi.” (Danye. 5:22, 23) Sombi Lesa wakalensha nsoni musankwa ulisumpula uyu. “Mashiku eenka ayo,” Beloshasa wakacaikwa alimwi bwaami bwakwe bwakapekwa kubene Mediya a Pesha. (Danye. 5:28, 30, 31) Mwaami Elodi Agilipa I wakucishi ca Palestine wakalengesha mutumwi Jemusi kucaikwa alimwi akubika mutumwi Pita mujeele, kwaamba ayi alakwe akacaikwe. Sombi Yehova wakapa kwaamba ayi Elodi nshaakalinga kusuni kucita shitacitiki. “Munjelo wakwe Yehova wakamuuma,” aboobo wakafwa.—Milimo 12:1-5, 21-23, NWT.
JANUARY 20-26
BUBONI BUCANIKA MUMASWI AKWE LESA KULUMBAISHA 138-139
Mutanoloonda Kwaabanamo Lubasu Kumabungano
w19-E 01 pe. 10 pala. 10
Amulumbaishe Yehova Mulibungano
10 Sa mulaloonda abuumbi na mulisuni kutambika lyaansa kwaamba ayi mukumbulewo? Na ubo mbocibete, amushibe ayi tamubete nweenka. Cancine ncakwaamba ayi sobaanji tulaloondaako ndyetutokumbulawo. Kwaamba ayi mucileeke kuloonda na mulisuni kukumbulawo, mulyeelete kushiba cimupa kuloonda. Sa mulaloonda ayi mpashi inga mwaluba nshemusuni kukumbula na mpashi ayi mutokwaamba cikumbulo citeeshi? Sa mulalisukama ayi cikumbulo canu teshi cinyufwike kabotu mbuli bamwi mbobakumbula? Kwalo, kuloonda kwamushobo uyu kulibo kabotu mukwiinga kulatondesha ayi mulaliceesha alimwi mulabona bamwi ayi balamwindaawo. Yehova alisuni bantu baliceesha. (Kulu. 138:6; Filip. 2:3) Nacibi boobo, Yehova alisuni ayi munomulumbaisha, akuyuminisha bamakwesu abenankashi ndyemuli kumabungano. (1 Tesa. 5:11) Yehova alimusuni alimwi alaakumucafwa kuba bataloondi.
Atuyuminishanye Ndyetuli Kumabungano Ansondo Ansondo
7 Mpashi inga mweenduluka mumakani amwi acanika mu Njashi Yamulindilishi akalinga kwaamba pa kukumbulawo kumabungano. Kucakubonenaako, amulibambile kabotu. (Tus. 21:5) Na mwaashiba kabotu makani eshi akabandikweewo, teshi mukaloonde abuumbi kukumbulawo kumabungano. Alimwi ndyemutokumbula, amwaambe shikumbulo shifwiifwi. (Tus. 15:23; 17:27) Kwaamba cikumbulo cifwiifwi, kulaakumucafwa kutaloonda bunene ndyemusuni kukumbulawo. Na mwaamba cikumbulo cifwiifwi, bamakwesu abenankashi inga banyumfwishisha kabotu citeente kwiinda kwaamba cikumbulo cilaamfu muli miyeeyo iinji. Kwaamba cikumbulo cifwiifwi mumaswi anu, kulaakutondesha ayi mwakalibambila kabotu alimwi mwakanyumfwisha kabotu makani ngomutokwiiya.
Buboni Bwakumushimu
it-1-E pe. 862 pala. 4
Kulekelela
Kwiilikaawo, Mwineklistu uli woonse alyeelete kulekelela baabo beenga bamubishila nabi bamubishila mankanda aanji buyani. (Lk 17:3, 4; Efe. 4:32; Kol 3:13) Lesa alalekelela baabo balekelela bamwi. (Mt 6:14, 15) Alimwi, nabi kwaamba ayi muntu wacita cilubo cinene ceenga capa kwaamba ayi akushikwe mulibungano, mukuya kwaciindi inga walekelelwa na watondesha ayi waana cancinencine. Na wabooshekwa, bantu boonse mulibungano inga batondesha ayi balimusuni muntu uyo. (1Ko 5:13; 2Ko 2:6-11) Nacibi boobo, Beneklistu tabayandiki kulekelela baabo bacita shilubo shinene cakashanga kwakubula kwaana. Bantu bamushobo uyo Lesa alibapatite.—Ebu 10:26-31; Kulu 139:21, 22.
JANUARY 27–FEBRUARY 2
BUBONI BUCANIKA MUMASWI AKWE LESA KULUMBAISHA 140-143
Amucite Kweelana Anshemwapaililawo
‘Amukutike Maswi Abasongo’
13 Munoobona kululikwa mbuli citondesho cakwaamba ayi Lesa alimusuni. Yehova alisuni ayi shintu shinootwendela kabotu. (Tus. 4:20-22) Alatondesha ayi alitusuni kwiinda mukutululika kusebensesha Maswi akwe, mabuku aamba shamu Baibo, na kwiinda mumushominyineesu ushimpite lwakumushimu. Bene Ebulu 12:9, 10 ilaamba ayi: ‘Alacita boobo kwaamba ayi tucafwikwe.’
14 Amubikile maano kumakani ngobatomulwiita, kuteshi mbobatomululika. Cimwi ciindi, mpashi inga twalinyumfwa ayi tabana kutululika munshila ili kabotu. Ncakwiila muntu utolulika bamwi alyeelete kweelesha kululika munshila yakwaamba ayi cibe cuubu kuwooyo utolulikwa kusumina kululikwa. (Gala. 6:1) Sombi na batotululika, tulyeelete kubikila maano kumakani ngobatotulwiita, nabi twalinyumfwa ayi tabana kutululika munshila ili kabotu. Mpashi inga twaliipusha ayi: ‘Sa kuli nsheenga ndeeya pamakani ngobandwiita nabi kwaamba ayi tabana kundulika munshila ili kabotu? Sa inga ndashilubakobo shilubo shawooyo utondulika akubikila maano kukulika uko mbweenga kwancafwa?’ Inga twatondesha busongo na katucana nshila mbweenga twakonkela kululikwa kuli koonse nkweenga twapeekwa.—Tus. 15:31.
w10-E 3/15 pe. 32 pala. 4
Amutolelele Kuba ‘Amoyo Usalalite’ Munshiku Ishi Shishupite
Basebenshi bakwe Lesa bamwi balalefuka ceebo ca kubula maali, kuciswa malwashi anene alimwi akupikishikwa. Alimwi cimwi ciindi basebenshi bakwe Lesa balalisukama. Mwaami Defedi alakwe wakeendawo kale mubukalo bwamushobo uyu, wakaamba ayi: “Aboobo moyo wangu watyongola,ncakwiila moyo wangu woongumana.” (Kulu. 143:4) lno nciinshi cakacafwa Defedi kuliyumya? Cakamucafwa, nkuyeeya Yehova mbwaakamupulusha lakwe mwiine alimwi ambwaakacafwa basebenshi Bakwe. Wakakutumana kuyeeya Yehova nshaakacita kwaamba ayi liina lyakwe lisalashikwe. Alimwi lyoonse Defedi wakalinga kuyeeya pa shintu Yehova nshaakalinga kucita. (Kulu. 143:5) Aswebo kukutumana kuyeeya pa Mulengi wesu apashintu nshaakatucitila alimwi a nshaatucitila pacecino ciindi, kulaakutucafwa kuliyumya nabi ndyetutokwiinda mumapensho.
w15-E 3/15 pe. 32 pala. 2
Sa Mulawo Wakweeba na Kweebwabo ku “Mushomi” Ucisebensa?
Mpashi cimwi ciindi inga mwalinyufwa bweenka mbwaakalinyufwa shikulumbaisha Defedi uyo waakamba ayi: ‘Yehova, amunkumbule cakufwambaana ceebo moyo wangu utoolela. Mutamfutatili, sobwe.’ (Kulu. 143:5-7, 10) Mubukaalo bwamushobo uyu mulyeelete kulindila Yehova kwaamba ayi amutondeshe nshaasuni ayi mucite. Ndyemutolindila Yehova mulyeelete kunobelenga Maswi akwe Baibo lyalo akukutumana kuyeeyawo pasheesho nshemutobelenga. Na mwacita boobo, mulaakushiba milawo yakwe Lesa alimwi ambwaakacafwa bantu bakwe kale kale. Alimwi kucita boobo kulaakumucafwa kubona bubotu bwakunyumfwila Yehova.
Buboni Bwakumushimu
Amutondeshe Kulumba Pacoolwe Cakupaila
2 Mwaami Defedi wakatondesha kulumba pacoolwe cakupaila. Wakeembila Yehova ayi: “Mupailo wangu ube anga ntununkila kabotu pakutenta kunembo lyanu.” (Kulu. 141:1, 2) Paciindi Defedi ndyaakalinga muumi, tuli anga ntununkila kabotu bapailishi ntobakalinga kutenta mukulambila kwancine, twakalinga kubambwa cakubikila maano abuumbi. (Kulo. 30:34, 35) Bweenka mbuli bapailishi bakalinga kutenta tununkila kabotu mbobakalinga kucita, Defedi wakalinga kusuni kuyeeya cakubikila maano kumakani ngakalinga kusuni kwaamba kaatana kupaila kuli Yehova. Aswebo ici ncetusunishishi kucita. Tulisuni kwaamba ayi mipailo yesu inoosangalasha Yehova.
FEBRUARY 3-9
BUBONI BUCANIKA MUMASWI AKWE LESA KULUMBAISHA 144-146
‘Balisangalete Abo Baamba Ayi Yehova Ngo Lesa Wabo!’
w18-E 04 pe. 32 mapa. 3-4
Miipusho Kuswa Kubeshikubelenga
2. Maswi akasebenseshekwa aleendelana kabotu amaswi ali mumavesi amwi acaala. Mu Baibo yakeendulukwaamo vesi 12 ilatalika aliswi lyakwaamba ayi “lyalo” kutondesha ayi shoolwe shitokwaambwa muvesi 12 kushika ku 14 shitokwaamba pa baluleme—abo basenga ‘kubafuna’ kuswa kubantu bacita shibiibi abo vesi 11 mboyaambawo. Vesi 15 ayalo ilaamba pabantu bomwi, kwa mankanda obilo bakasebensesha liswi lyakwaamba ayi “balisangalete,” kwaamba pa ‘bantu abo baamba ayi Yehova ngo Lesa wabo!’
3. Maswi akasebenseshekwa aleendelana kabotu amakani amwi amu Baibo aamba pa shoolwe Lesa nshaakashomesha bantu bakwe bashomeka. Makani aya akulumbaisha alaamba pa shintu Defedi nshaakalinga kulangila ayi Lesa atoocitila bene Isilaeli pesule lyakubapulusha kubalwani babo, nkokwamba ayi Lesa wakalinga kusa mukupa kwaamba ayi bantu basangalale akuba ashintu shiinji. (Lefi. 26:9, 10; Duto. 7:13; Kulu. 128:1-6) Kucakubonenaako, lilembo lya Dutolonomi 28:4 lilaamba ayi: “Ulaakumupa coolwe cakuba abaana baanji, shakulya shiinji alimwi aŋombe ambelele shiinji.” Alimwi ncakwiila Solomoni mwanaakwe Defedi ndyaakalinga kulela, bene Isilaeli bakalinga kwikala muluumuno alimwi bakalinga kucite shintu shiinji. Alimwi shimwi shakalinga kucitika mubuleelo bwakwe Solomoni shakalinga kutondesha shintu mbweshi shikabe mubuleelo bwakwe Mesiya.—1 Baam. 4:20, 21; Kulu. 72:1-20.
Amutolelele Kuyumya Kulangila Kwanu
16 Buumi butamaani mbotutoolangila ncipo cibotu abuumbi kuswa kuli Lesa. Tutoolangila buumi bubotu abuumbi kunembo ubo mbotushomete ayi bulaakubaako. Kulangila uku kuli anga nceela cakwiimikishako bwaato, kulatucafwa kuliyumya ndyetutokwiinda mumapensho, ndyetutoopenshekwa, nabi ndyetwalangana alufu. Kuli anga ncimpoompo, kulashitilisha miyeeyo yesu kwaamba ayi tucikoonshe kukaka shintu shibiibi akucita shibotu. Kulangila uku nkotucana mu Baibo kulatucafwa kumushiba kabotu Lesa alimwi akututondesha mbwaatusuni. Kutolelela kuyumya kulangila kwesu kulatucafwa abuumbi.
17 Kwiinda munkalata Paulo njaakalembela bene Loma wakabayuminisha ayi: ‘Amusangalale ceebo ca nshemutolangila.’ (Loma. 12:12) Paulo wakalinga kusangalala mukwiinga wakalinga kushoma ayi na watolelela kushomeka alaakutambula buumi butamaani kwiculu. Aswebo inga twasangalala mukwiinga tulishomete cakutatoonsha kwaamba ayi Yehova alaakukumanisha shishomesho shakwe. Shikulumbaisha wakalemba ayi, “ulisangalete . . . ulangila Yehova Lesa wakwe, . . . uyo ushomeka lyoonse.”—Kulu. 146:5, 6, NWT.
w18-E 01 pe. 26 mapa. 19-20
Lusuno Lweenga Lwatupa Kuba Alusangalalo Lwancinencine
19 Kwa myaaka 6,000 bantu baliciteekobo kupenga mucishi ici cakwe Satana, sombi conoonobo cilaakunyonyoolwa. Mucishi muliswitebo bantu balisuni, basuni maali, alimwi abasunishi kulisangalasha. Balabikilabo maano kusheesho nsheenga kabasuni kubaasho alimwi asheesho nshebasuni mubuumi bwabo. Bantu bamushobo uyo inga tababiiwo alusangalalo lwancinencine. Nceceeco shikulumbaisha wakalemba ayi: ‘Ulisangalete muntu ucafwikwa a Lesa wakwe Jakobo, ncakwiila muntu ucinkite manungo muli Yehova, Lesa wakwe.’—Kulu. 146:5.
20 Bantu bakwe Yehova balatondesha lusuno, alimwi mwaaka amwaaka balaya cifulilaako. Ubu mbumboni butondesha ayi Bwaami bwakwe Lesa butokweendelesha alimwi conoonobo bulaakuleta shoolwe shiinji abuumbi pacishi capanshi. Inga twaba alusangalalo lwancinencine na katucita kuyanda kwakwe Lesa, akushiba ayi tutosangalasha wooyo Wiinditeewo. Alimwi abo basuni Yehova balaakutolelela kuba basangalete kwamuyayaya! Mumutwi utokonkelaawo, tulaakwiiya pamibo imwi itabete kabotu bantu njebacite ceebo cakwaamba ayi balilisuni. Alimwi tulaakwiiya mibo iyi mboipusene amibo ibotu icite basebenshi bakwe Yehova.
Buboni Bwakumushimu
Kupa Kulaakumupa Kuba Alusangalalo
6 Yehova alatupa nshetuyandika lwakumubili mukwiinga alitusuni. Amuyeeye pa maswi Yesu ngakaamba ngotucana pa Mateyo 6:25, 26. (Amubelenge.) Yesu wakaamba pashintu Lesa nshaakalenga. Kucakubonenaako, Yesu wakaamba pa bayuni ayi: “Tabashangi, tabatebuli nabi kubika mumatala.” Nacibi boobo, amunyumfwe maswi atokonkelaawo ngakaamba: “Ishiwanu uli kwiculu ulabasanina.” LyaloYesu wakeepusha bakalinga kumukutika ayi: “Sa mwebo tamuyandiki kwiinda bayuni?” Ino wakalinga kutwiisha nshi? Basebenshi bakwe Yehova balayandika abuumbi kuli nguwe kwiinda bayuni. Aboobo na Yehova alababikilako maano bayuni, inga twashoma ayi alaakunootupa nshetuyandika! Bweenka mbuli mushali musankwa ulama kabotu mukwashi wakwe, Yehova alapa mukwashi wakwe nshoyandika ceebo ca lusuno.—Kulu. 145:16; Mate. 6:32.
FEBRUARY 10-16
BUBONI BUCANIKA MUMASWI AKWE LESA KULUMBAISHA 147-150
Kuli Shintu Shiinji Shitupa Kulumbaisha Yehova
w17-E 07 pe. 18 mapa. 5-6
Ino Nceebonshi Tulyeelete Kulumbaisha Yehova?
5 Yehova taakalinga kuyuminishabo bene Isilaeli mbuli likoto, sombi wakalinga kuyuminisha amuntu womwi awomwi. Ubo bweenka mbwaacita amunshiku shino. Shikulumbaisha wakaamba pali Lesa ayi: “Ngooyumyayumya myoyo ityongookite akwaanga shilonda shabo.” (Kulu. 147:3) Ncakwiila Yehova alabikila maano bantu boonse bacite mapensho. Munshiku shino, Yehova alisunishishi kutuyuminisha ndyetutokwiinda mumapensho. (Kulu. 34:18; Isa. 57:15) Alatupa busongo ankusu kwaamba ayi tucikonshe kuliyumya mumapensho ngeenga twacaana.—Jemu. 1:5.
6 Lyalo shikulumbaisha wakatalika kwaamba pa shakwiculu, alimwi wakaamba ayi Yehova “ulishi mweelo wa nyenyeenshi, alimwi shoonse ulashiita meena a nshinsho.” (Kulu. 147:4) Ino nceebonshi wakacileka kwaamba makani ngaakalinga kwaambawo akutalika kwaamba pashintu shakwiculu? Amuyeeye paceeci: Shikulumbaisha wakalinga kushibona nyenyeenshi, sombi taakalinga kucishiiwo na shakalinga shongaye. Myaaka iinji yeendaawo, nyenyeenshi shiinji nshetubona shakafulilaako abuumbi. Bantu bamwi balayeeya ayi mumulalabungu womwibo muli mabiliyoni anyenyeenshi. Alimwi cilyeelete mwiculu muli milalabungu iinji abuumbi! Swebo inga tatucikonshiiwo kubelenga nyenyeenshi! Sombi Mulengi lakwe nyenyeenshi yomwi ayomwi wakaipa liina. Ici citosansulula ayi nyenyeenshi yomwi ayomwi ililibetele kuli Yehova. (1 Koli. 15:41) Ino mbuyani bantu bali pacishi capanshi? Bweenka Lesa mbwaashiba nyenyeenshi yomwi ayomwi mpoibete paciindi ico, alashiba amuntu womwi awomwi mpwaabete, mbwaatolinyumfwa alimwi ashiine nshaatoyandika paciindi ico!
w17-E 07 pe. 18 pala. 7
Ino Nceebonshi Tulyeelete Kulumbaisha Yehova?
7 Yehova tabikilibo maano ku muntu womwi awomwi sombi alicite ankusu alimwi alacitawo comwi kwaamba ayi amucaafwe ndyemuli mumapensho. (Amubelenge Kulumbaisha 147:5.) Cimwi ciindi inga mwabona anga lipenshi ndyemubeteemo ndinene abuumbi cakwaamba ayi inga tamucikoonshi kuliyumya. Lesa alashiba mapensho ngeenga tamucikonshi kuliyumya, ‘taaluubi ayi mwakaswa kubulongo.’ (Kulu. 103:14) Ceebo cakwaamba ayi tatumaninite tulaciboshaawo kucita shilubo shomwi ashomwi mankanda aanji. Tulalinyumfwa cibiibi abuumbi na twalubisha mukwaamba, na twaciita shintu shitootuyumina kucileka nabi na katucite lunkumbwa lwakusuna kuba ashintu bamwi nshebacite! Yehova taacitiiwo shintu ishi nshetwambaawo, sombi alishi kabotu mbotulinyumfwa!—Isa. 40:28.
w17-E 07 pe. 21 pala. 18
Ino Nceebonshi Tulyeelete Kulumbaisha Yehova?
18 Shikulumbaisha wakalinga kucishi Lesa mbwaakalinga kubasuni bantu bakwe bakale kale. Wakalinga ngomushobo weenkabo wakalinga kucite “maswi” akwe Lesa alimwi a “milawo amilasho yakwe.” (Amubelenge Kulumbaisha 147:19, 20.) Munshiku shino, ndiswebo sotucite coolwe cakwiitwa aliina lyakwe Lesa. Tulicite coolwe cakuba beshicibusa bakwe ceebo cakwaamba ayi tulimushi alimwi mubuumi bwesu tulakonkela shaamba Maswi akwe. Bweenka mbwaakacita wakalemba Kulumbaisha 147, aswebo kuli shintu shiinji sheenga shatupa kulumbaisha Yehova akuyuminisha bamwi kwaamba ayi abalo bamulumbaishe!
Buboni Bwakumushimu
Amwiiye Shiinji Pali Yehova Kwiinda Mushintu Nshaakalenga
6 Yehova wakabika ciindi shintu shimwi ndyesheelete kucitika. Mwaaka amwaaka, kumamanino amweenshi wa February kushika pakati ka mweenshi wa May, bene Isilaeli bakalinga kubona matongola ciindi ndyaakalinga kulonga kuya kumatwa. Lesa wakalwiita bene Isilaeli ayi: ‘Matongola alicishi ciindi ncaeelete kuboolelamo.’ (Jele. 8:7) Bweenka Yehova mbwaakabika ciindi matongola ndyaeelete kulonga, wakabika aciindi ndyeshi akalete boomboloshi pacishi. Munshiku shino, na twaboona tuyuni katulonga tulashoma cakutatonsha ayi Yehova wakabika ciindi ndyeshi akalete mamanino acishi cino cibiibi.—Abaku. 2:3.
FEBRUARY 17-23
BUBONI BUCANIKA MUMASWI AKWE LESA TUSHIMPI 1
Nobacanike—Ino Mulanyumfwila Baani?
w17-E 11 pe. 29 mapa. 16-17
Mutaleeki Cintu Cili Coonse ayi Cikamupe Kwaalilwa Kutambula Cilambu
16 Ino nshiinshi nsheenga mwaciita na muli wacanike sombi mulabona anga bashali banu Beneklistu bakamupa milawo iyumu alimwi tabacishi mbomulinyumfwa? Na kamulinyumfwa cibiibi inga mwatalika kutoonsha ayi kusebensela Yehova teshi kubotu. Na mwacileka kusebensela Yehova, mulaakubona ayi taakuwo bamwi beenga bamubikilako maano mbuli mbobamubikilako maano bashali banu Beneklistu alimwi abamakwesu abenankashi.
17 Sa inga mwaamba ayi bashali banu balimusuni na kabatamululiki? (Ebu. 12:8) Mpashi cimwi ciindi cimukalasha ninshila njebamululikilaamo bashali banu. Muciindi cakukalala anshila njebamululikilaamo, amushibe ayi kuli cipa kwaamba ayi banomululika munshila iyo. Aboobo munokalika moyo akweelesha cankusu kuleya kukalala na bamululika. Maswi akwe Lesa alaamba ayi: “Muntu ucite lushibo taabwekibweki, alakwe ucite maano akunyumfwisha shintu ulacata caamba.” (Tus. 17:27) Munokweelesha cankusu kutakalala na batomululika, alimwi munoobikila maano kusheesho nshebatomulwiita muciindi cakubikila bunene maano kunshila njebatomululikilaamo. (Tus. 1:8) Ncoolwe cinene abuumbi kuba abashali basuni Yehova ceebo balaakumucafwa kucana cilambu cakuba abuumi bwamuyayaya.
w05-E 2/15 mape. 19-20 mapa. 11-12
Atulishitilishe Kwaamba ayi Tutolelele Kuba Beneklistu
11 Amucite shisuni Lesa kuteshi bantu. Kukashililo sobantu tulasuna kushibikwa kwiinda mukuba mulikoto limwi lya bantu. Muntu womwi awomwi alasuna kuba abeshicibusa alimwi ici cilatupa kulinyumfwa kabotu. Na tucili bacanike nabi na twakuula inga caba cuubu kuyungwa abamwi cakwaamba ayi inga twatalika kucita shicita bamwi na kusuna kubasangalasha. Sombi teshi lyoonse beshicibusa besu ndyebasuna kwaamba ayi shintu shitweendele kabotu. Cimwi ciindi balasunabo kuba abamwi ndyebatocita shibiibi. (Tushimpi 1:11-19) Na Mwineklistu wasumina kuyungwa kucita cintu citabete kabotu, liinji aleelesha kulisisa ayi teshi Mwineklistu. (Kulumbaisha 26:4) Mutumwi Paulo wakatucenjesha ayi: “Bwikaalo bwanu butabi anga mbwa bantu ba mucishi ca panshi.” (Bene Loma 12:2) Yehova alatupa nkusu nshetuyandika kwaamba ayi tukake kucita shintu bantu bamucishi nshebatuyunga kucita.—Bene Ebulu 13:6.
12 Na bantu bamwi batukakatisha kucita cintu cimwi citabete kabotu, tulyeelete kunokwiibaluka ayi kushomeka kuli Lesa kulayandika abuumbi kwiinda nsheenga kabayeeya bantu baanji. Pa Kulonga 23:2 pali njiisho yeenga yatushitilisha yakwaamba ayi: “Mutanookonkela likoto lya bantu na batoobisha.” Bene Isilaeli baanji ndyebakatoonsha nkusu Yehova nshaacite shakukumanisha shishomesho Shakwe, Kalebu wakaalabo taakwe kubakonkeleshaawo. Wakalinga kushomete ayi Lesa alaakukumanisha nshaakashomesha, alimwi wakacana shoolwe shiinji ceebo cakucita boobo. (Shakubelenga 13:30; Joshuwa 14:6-11) Sa amwebo bweenka mbuli Kalebu mulilibambite kukaka shisuni bene muunji kwaamba ayi mushitilishe bushicibusa bwanu a Lesa?
Buboni Bwakumushimu
Busongo Bwancinencine Butokwiita
7 Bantu ‘batacite lushibo’ mbantu bashomabo shili shoonse nshebanyumfwa alimwi batashuupi kuyungoolwa. (Tus. 14:15.) Liinji ndyetutoshimikila tulabacana bantu ba mushobo uyu. Kucakubonenaako, amuyeeye kufula kwa bantu batoyungoolwa abamatanjilili ba bupailishi abeshimapolitiki. Bamwi balakankamana na bashiba ayi bakabecekwa kubamatanjilili babo. Nacibi boobo, abo baambwa pa Tushimpi 1:22 balasalawo kutolelela kuba bantu batacite lushibo mukwiinga balanyumfwa kabotu kuba boobo. (Jele. 5:31) Balacita nshebasuni alimwi tabasuniiwo kwiiya Baibo nshoyaamba na kukonkela milawo ya njiyo. Bantu baanji balalinyumfwa bweenka bulinyumfwa mwanakashi umwi waku Canada usuni sha bupailishi abuumbi uyo wakalwiita Kamboni umwi ayi, “Na ba pulisiti balatubeca, ngumulandu wabo, kuteshi ndiswe!” Ncakutatoonsha tatusuniiwo kukonkela bantu batacite lushibo mukashanga!—Tus. 1:32; 27:12.
FEBRUARY 24–MARCH 2
BUBONI BUCANIKA MUMASWI AKWE LESA TUSHIMPI 2
Ino Nceebonshi Mulyeelete Kusunishisha Kucita Ciiyo Capalwaanu?
‘Amutolelele Kweenda Mucancine’
16 Sobamwi tatusuni bunene kubelenga akwiiya. Nacibi boobo, Yehova alatulwiita ayi tulyeelete ‘kutolelela kulangoola’ kwaamba ayi tucinyumfwishishe kabotu cancine. (Amubelenge Tushimpi 2:4-6.) Kucita boobo lyoonse kulacafwa. Kwaamba pamakani akucita ciiyo capalwaakwe, mukwesu waliina lya Corey wakaamba ayi alabikila maano pavesi yomwi paciindi comwi. Wakaamba ayi: “Ndabelenga mafutunoti oonse, kubona malembo amwi aamba pamakani ayo alimwi akulangwetaawo makani aamwi. Kucita boobo kulancafwa kwiiya shiinji!” Inga twatondesha ayi cancine cilayandika na katucana ciindi akusebensa cankusu kuciiya.—Kulu. 1:1-3.
Busongo Bwancinencine Butokwiita
3 Maswi akwaamba ayi busongo inga asansulula kusala shintu kweelana alushibo ndotucite. Nacibi boobo, busongo bwancinencine buleelikawo shiinji. Baibo ilaamba ayi: ‘Kuloonda Yehova ngomatalikilo abusongo, kwishiba Wooyo Usalalite nkokuba amaano akunyumfwishisha shintu.’ (Tus. 9:10) Aboobo na kuli makani amwi ayandika ngotweelete kusalawo cakucita, tulyeelete kutaanguna kushiba Yehova mbwaabona makani ayo katutana kusalawo. Inga twacita boobo kwiinda mukwiiya Baibo amabuku esu aamba shamu Baibo. Kucita boobo kulaakutondesha ayi tulicite busongo bwancinencine.—Tus. 2:5-7.
4 Busongo bwancinencine bulaswa kuli Yehova eenkabo. (Loma. 16:27) Ino nceebonshi nceenga twaambila ayi busongo bulaswa kuli Yehova? Cakutaanguna, Yehova ngo Mulengi alimwi alicishi makani oonse pashintu nshaakalenga. (Kulu. 104:24) Cabili, Yehova alatondesha busongo mushintu shoonse nshaacita. (Loma. 11:33) Catatu, lyoonse abo bakonkela busongo bwakwe Yehova balacafwikwa. (Tus. 2:10-12) Na tulisuni kuba abusongo bwancinencine, tulyeelete kusumina lushinisho ulu akulukonkela mushintu nshetusala akucita.
w16-E 09 pe. 23 mapa. 2-3
Nobacanike, Amuyumye Lushomo Lwanu
2 Na muli bacanike alimwi mutosebensela Yehova na kwiiya pali Nguwe, sa amwebo mulabona ayi mulyeelete kushoma ayi shintu shakasandukabo mbuli baanji mbobashoma? Na ubo mbocibete, amushibe ayi kuli nsheenga mwaciita kwaamba ayi muyumye lushomo lwanu. Comwi nceenga mwaciita nkusebensesha maano Lesa ngaakamupa, ceebo kucita boobo ‘kulaakumutabilila.’ Kusebensesha maano kulaakumucafwa kukaka njiisho bantu nshebeeisha sheenga shanyonyoola lushomo lwanu.—Amubelenge Tushimpi 2:10-12.
3 Na mwamushiba kabotu Lesa mulaakuba alushomo luyumu. (1 Timo. 2:4) Aboobo ndyemutokwiiya Maswi akwe Lesa alimwi amabuku aamba shamu Baibo, tamweelete kwiindamobo calubilo. Amusebenseshe maano anu kwaamba ayi munyumfwishishe nshemutobelenga. (Mate. 13:23) Ano amuleke tubone kucita boobo mbweenga kwamucafwa kushoma cakutatonsha ayi Lesa ngu Mulengi alimwi akushoma makani acanika mu Baibo.—Ebu. 11:1.
Buboni Bwakumushimu
‘Amutolelele Kweenda Mucancine’
16 Sobamwi tatusuni bunene kubelenga akwiiya. Nacibi boobo, Yehova alatulwiita ayi tulyeelete ‘kutolelela kulangoola’ kwaamba ayi tucinyumfwishishe kabotu cancine. (Amubelenge Tushimpi 2:4-6.) Kucita boobo lyoonse kulacafwa. Kwaamba pamakani akucita ciiyo capalwaakwe, mukwesu waliina lya Corey wakaamba ayi alabikila maano pavesi yomwi paciindi comwi. Wakaamba ayi: “Ndabelenga mafutunoti oonse, kubona malembo amwi aamba pamakani ayo alimwi akulangwetaawo makani aamwi. Kucita boobo kulancafwa kwiiya shiinji!” Inga twatondesha ayi cancine cilayandika na katucana ciindi akusebensa cankusu kuciiya.—Kulu. 1:1-3.