Miipusho Kuswa Kubeshikubelenga
Ino ngu “muyeeyo” nshi Yehova ngweshi akabike mumyoyo ya mfulumeende conoono?
Pa Ciyubululo 17:16, 17 palaamba ayi: ‘Meeca ali 10 ngowalinga wabona alimwi amunyama uyo, balaakupata mwanakashi mufuule uyo. Balaakubwesa shoonse nshaacite akumufuula akacaalebo matakosha alimwi balaakulyako mubili wakwe akumutenta mumulilo. Mukwiinga Lesa alaakucibika mumyoyo yabo kwaamba ayi bakumanishe muyeeyo wakwe, akwaamba ayi bakumanishe muyeeyo wabo kwiinda mukupa nkusu shabo shakweendelesha kumunyama.’ Na ishi shikacitike, alaakuba ngomatalikilo amapensho anene. Mabuku esu kale kale akalinga kwaamba ayi “muyeeyo” Yehova ngweshi akabike mumyoyo ya mfulumeende, nkunyonyoola bupailishi bwakubeca.
Nacibi boobo, tutoyandika kwaalula mbotunyumfwishisha bushinshimi ubu. “Muyeeyo” Yehova ngweshi akabike mumyoyo ya mfulumeende, ‘nkupa nkusu shabo shakweendelesha kumunyama.’ Amuleke tucane shikumbulo kumiipusho itokonkelaawo, kwaamba ayi tunyumfwishishe bushinshimi ubu mbweshi bukakumanishikwe.
Ino mbaani bambwaawo mubushinshimi ubu? Bulaamba pa “mwanakashi mufuule” na “Babiloni Munene.” Babiloni Munene aleemikaninaako bupailishi boonse bwakubeca. Bushinshimi ubu bulaamba apa ‘munyama musalalabo pyu.’ Munyama uyu aleemikaninaako libunga lya United Nations. Libunga ili lyakapangwa mu 1919 kwaamba ayi linoyuminisha luumuno mucishi. Pakutaanguna lyakalinga kwiitwa ayi League of Nations. (Ciyu. 17:3-5) Lyalo ‘meeca ali 10’ aleemikaninaako mfulumeende shabantu shoonse shicafwilisha munyama.
Ino mwanakashi mufuule amunyama musalalabo pyu balicatene buyani? Mwanakashi mufuule ‘alishiite’ pamunyama, kusansulula ayi alamucafwilisha akweelesha kumweendelesha.
Ino nshiinshi sheshi shikacitikile mwanakashi mufuule? Munyama alimwi ameeca ali 10, “balaakupata mwanakashi mufuule” akubwesa shintu shoonse nshaacite, lyalo akutondesha bantu boonse ayi ngumubiibi. Kuswawaawo, balaakumunyonyoola kweelana a Yehova mbwakaambila limwi. (Ciyu. 17:1; 18:8) Na ishi shikacitike, bupailishi bwakubeca mpweshi bukashiminganine. Nacibi boobo, ishi kashitana kucitika, Yehova alaakupa kwaamba ayi mfulumeende shicite cintu citana kucitikaawo kale.
Ino nciinshi Yehova nceshi akape kwaamba ayi mfulumeende shicite? Alaakubika “muyeeyo wakwe” mu ‘meeca ali 10’ na mfulumeende. Muyeeyo uyo ngwaakwaamba ayi mfulumeende isho ‘shikape nkusu shakweendelesha kumunyama [musalalabo pyu,]’ nkokwaamba ayi libunga lya United Nations. (Ciyu. 17:13) Ino ici citosansulula nshi? Sa mfulumeende shicafwilisha libunga ili shilaakuliyeeyelabo ayi shipe nkusu shakweendelesha kumunyama? Sobwe! Bushinshimi bulatondesha ayi Lesa ngweshi akape kwaamba ayi shikacite boobo. (Tus. 21:1; amweelanye a Isaya 44:28.) Sa mfulumeende shilaakunooya cipa munyama nkusu shakweendelesha paniini paniini? Sobwe! Ici cilaakucitika cakuteengashila alimwi muciindi ciniinibo. Lyalo na munyama akapekwe nkusu, alaakupyanga bupailishi bwakubeca boonse kweelana a Lesa mbwaasuni.
Ino nshiinshi nsheenga twalangila ayi shilaakucitika conoono? Tatweelete kulisukama bunene pasheshi shikacitike nabi kulangila ayi panyusi balaakutalika kunokwaamba ayi mfulumeende shatalika kunoocafwa bunene libunga lya United Nations. Nceenga twalangila ncakwaamba ayi: Cakuteengashila, Yehova alaakupa kwaamba ayi mfulumende shoonse shipe nkusu shabo shakweendelesha kulibunga lya United Nations. Na ici cikacitike, tulaakushiba ayi mapensho anene ali pafwiifwi kutalika. Ndyetutolindila ayi ishi shikacitike, ‘atutolelele kuba bacenjete akunolibambite lyoonse,’ mukwiinga conoonobo shintu shilaakwaaluka cakuteengashila!—1 Tesa. 5:6.