Makani Eenga Acafwa Banakashi na Bacitilwa Shintu Shitabete Kabotu
“ BANAKASHI baanji nsengwe yoonse balacitilwa shintu shitabete kabotu, inga caba ayi mbanene na mbacanike. Sa ishi andimwe shakamucitikilaawo? Amushibe shipa kwaamba ayi Lesa anoobona ayi mulayandika kushitilishikwa alimwi ansheshi akacite pashintu shitabete kabotu bantu nshobacita ku banakashi.”
Maswi aya ali peculu ngo ali kumatalikilo kwa mutwi uli pa jw.org waamba ayi “Kushitilishikwa Kwa Banakashi—Ino Nshiinshi Baibo Nshoyaamba?” Kumamanino kwa mutwi uyu, kuli PDF njeenga mwacita dauniloodi akupulinta. Lyalo na mwaipeta ilaba anga nkatilakiti kacite mapeeji ali 4. Nankashi waliina lya Stacy ukala ku United States wakaamba ayi: “Ndakapulinta mutwi uyu, lyalo nebo pomwi anankashi umwi twakatola mapepa ngondakapulinta kumusena kumwi libungano lyesu nkolishimikila, uko kulaminwa banakashi kwaamba ayi batacitilwi shintu shitabete kabotu kubamwi.”
Mwanakashi umwi wakalinga kusebensa pamusena uyo wakasenga benankashi kwaamba ayi bakatole matilakiti aamwi. Aboobo bakamutolela matilakiti aamwi ali 40 amakaadi a jw.org ali 30 kwaamba ayi alakwe aabile banakashi bakalinga kukala pamusena uyo. Bushiku bumwi benankashi ndyebakabolelaako, boosi wakabasenga ayi batondeshe banakashi bakalinga kukala pamusena uyo ciiyo ca Baibo mbocicitwa.
Ba Stacy abenankashi bamwi bobilo bakaya kumusena akumwi kwakalinga kulaminwa banakashi akwaabila matilakiti ali 5. Lyalo banakashi bamwi bakalinga kusebensa pamusena uyo abalo bakasenga ayi bakabaletele matilakiti. Mwanakashi umwi wakalinga kusebensa pamusena uyo wakaamba ayi: “Makani ali mukapeepa aka alaakubacafwa maningi banakashi bekala waano. Muli makani abotu.” Benankashi ndyebakaboolelaako bushiku bumwi, banakashi baanji bakalinga kukala pamusena uyo bakabungana kwaamba ayi babone ciiyo ca Baibo mbocicitwa. Lyalo banakashi bamwi bobilo bakaamba ayi inga basuna kucanikaako kumabungano a Pasondo ku Ŋanda ya Bwaami nsondo yakakonkelaawo.
Ba Stacy bakaamba ayi: “Twakasangalala kubona banakashi mbobakanyumfwa kabotu kubelenga katilakiti aka. Na mwakapulinta akukapeta, kalaboneka kabotu cakwaamba ayi cilaba cuubu kushimikila makani a Bwaami kubanakashi bakacitilwa shintu shitabete kabotu. Cakatusangalasha abuumbi kubona bantu mbobakasangalala kuba akatilakiti aka. Tutolangila kunembo kubona Yehova mbweshi akatucaafwe kutolelela kushimikila makani abotu kubanakashi aba.”