Bamakwesu Abenankashi Batosebensa Cankusu Kupanga Mavidyo a Makani Abotu Atokwaamba Pali Yesu

Mwaaka uno, Bakamboni bakwe Yehova bakasangalala abuumbi kweebela Cipansha 1 ca vidyo ya Makani Abotu Atokwaamba Pali Yesu. Bene muunji bakeebela kale. Alimwi ici cakalinga cipansha cakutaanguna pa shipansha 18 sheshi shikabeeko! Ino nincito nshi bamakwesu abenankashi njebatosebensa kwaamba ayi incito yakupanga mavidyo aya itolelele kweenda? Alimwi sa mulishishi nshemwakacita kwaamba ayi mubacaafwe kusebensa ncito iyi?

Kulama Baabo Beshikukopwa Alimwi Abeshikukopa

Mbasu shiinji sha mavidyo a Makani Abotu Atokwaamba Pali Yesu, shitokopelwa ku musampi waku Australasia. Pakukopa lubasu lomwi alomwi kulaba bantu bashika kuma 50 kuya mukushika kuma 80.a Kulaba bamakwesu abenankashi babamba shakulya sha malumwi, sha macolesha alimwi ashakulya shimwi sha baabo beshikukopwa alimwi abeshikukopa. Alimwi balasalila limwi shakulya sheshi shikabambwe kakucili ciindi cilaamfu. Ba Esther basebensa mu Dipatimenti Ibamba Shakulya bakaamba ayi: “Tuloola shakulya kuswa kubeshikuulisha bapusenepusene kwaamba ayi tuule shitoyandika pamutengo uli kabotu. Alimwi lyoonse tulacinja bwakuteleka kwaamba ayi tutanyonyooli shakulya.” Bushiku abushiku pamuntu womwi, tulasebensesha maali amadola aku America ashika 4 kuula shakulya.

Kwiilika pa shakulya, beshikukopwa a beshikukopa balayandika kushitilishikwa. Mpashi inga mwaliipusha ayi, ino balayandika kushitilishikwa kunshi? Ku Australia nshiiku shiinji kulalungula alimwi kulaba lumwi, alimwi cikasaashi ca lumwi cishi kubaako inga caleta lipenshi kumuntu. Aboobo kwaamba ayi boonse bashitilishikwe ku lumwi alimwi akwaamba ayi bataleemi kulumwi, bamakwesu abenankashi balasebensa cankusu kubika matente mumisena mweenga bookeshela, alimwi balashinisha ayi kuli mafuta aanji akunana ashitilisha kulumwi, ma ambulela, alimwi amaanshi. Ba Kevin basebensa ku Audio/Video Services bakaamba ayi: “Bamakwesu abenankashi baanji basebensa ncito iyi balaswabo kumaandaabo kusa mukusebensela pa Bethel. Balasebensa ncito iyi alimwi anciito shimwi shiinji cakuliceesha alimwi cakusangalala. Nakwiinga tatukwe kucikonsha kusebensa ncito iyi kwakubula mbabo.”

Kukopa Mbasu sha Mumavidyo Kumusena Uli Kulaale Amusampi

Mbasu shimwi shamu mavidyo inga tashiboneki kuba shancine na shakopelwa pamusampi, na musena wakukopelaawo mavidyo pansengwe nabi mu situdyo. Beshikukopa alimwi abeshikukopwa balaya kumisena yakulaale kwaamba ayi bakope misena yakalekale yaambwa mu Baibo kumusena kutaaku malaiti, kutaaku mashila amunshiku shino alimwi kutaaku maanda amunshiku shino. Shakufwala nshebafwala beshikukopwa alimwi ashisebensesho nshebasebensesha kukopa balashilongela akushitola kumusena kwakukopela lyalo akushilamina mumusena uli kabotu. Kabatana kutalika kukopa, bamakwesu beshikusebensa ncito yakukopa, balashinisha ayi kumusena nkobabete kuli ma generator, maanshi abotu akunwa, alimwi amatoileti. Beshikukopwa alimwi abeshikukopa balakala mumaanda abamakwesu bakumusena uko, mumatilela ali anga niŋanda, muma hotela na mutwaanda twakupangabo amapulanga.

Kukopela kumusena uli kulaale amusampi kuladula, kulatola ciindi cilaamfu, alimwi kulalemya baabo boonse baabanamo lubasu muncito njeenga kabasebensa. Aboobo mu 2023, Likoto Litanjilila lyakasuminisha ayi kube kuula cisikilini cinene cakoolwa amaali amadola aku America ashika 2.5 miliyoni, ico citondesha mavidyo kwisule lya muntu utokopwa kwaamba ayi kaciboneka anga ali kumusena umwi. Cisikilini ici cilatondesha shikope shibonekesha kabotu abuumbi alimwi kulaba kushinisha ayi mumuni wa malaiti utokweendelana a utoswa ku cisikilini kwaamba ayi kacibonekabo anga vidyo bakalinga kwiikopela pansengwe. Ici cilapa kwaamba ayi tuleye kusebensesha maali aanji kwiinda mukuya mukukopela kumusena wakulaale. Ba Darren abo basebensa mu Komiti ya Musampi waku Australasia, bakaamba ayi: “Kukopa kusebensesha cisikilini cinene ici kulacafwa kwaamba ayi bantu batookopwa kabatalemi bunene alimwi cilacafwa kwaamba ayi batookopa kabacikonsha kukopa mbasu shimwi kwa mankanda aanji mbuli mbobasuni. Kucakubonenaako, nakwiinga katukopela pansengwe nakwiinga katubabo aciindi ciniini cakukopa lisuba litoopila kalitana kucileka kuboneka. Ano ceebo ca kusebensesha cisikilini ici, inga twatondesha mbasu shalisuba litoopila kwa mankanda aanji kweelana ambweenga katusuni kushikila twakopa mbotusuni.”

“Shoolwe Nshondakacana Nshiinji Kwiinda Kulyaaba Nkondakacita”

Kutoyandika bantu baanji abuumbi beenga bakopa mbasu sha mavidyo a Makani Abotu alimwi abeenga bakopwa mumbasu ishi. Ino bamakwesu abenankashi balalinyumfwa buyani pa mbobakabalama ku bamakwesu abenankashi ba pa Bethel?

Ba Amber abo bakeenda mushinso ulaampa makilomita ali 700 kuswa kumishaabo ku Melbourne kwaamba ayi baye mukwaabanamo lubasu muncito iyi, bakaamba ayi: “Kuswabo ciindi ndyendakashika ku eyapoti, bamakwesu baku Bethel bakandama kabotu abuumbi. Baanji basebensela pa Bethel bakalinga kunjita kucakulya. Abo mbotwakalinga kubaabo kumusena kwakukopela, boonse bakalinga kuumpa kulinyumfwa kwaanguluka akulinyumfwa ayi balinsuni. Ndakacana shoolwe shiinji palweendo ulu. Shoolwe nshondakacana nshiinji kwiinda kulyaaba nkondakacita!”

Ba Derek abo basebensela pomwi abeshikupanga mavidyo aya, bakaamba ayi: “Kuswabo ciindi incito iyi ndyeyakatalika bamu madipatimenti aanji bakatucafwa. Ndalumba abuumbi kuba abamakwesu baaba ciindi cabo, shintu shabo alimwi ankusu shabo kwaamba ayi basebense incito iyi. Balacafwa abuumbi, balilyaabite, alimwi balatondesha nkumbu. Ncakutatoonsha kwaamba ayi Yehova wakabapa shoolwe alimwi andiswe wakatupa shoolwe. Ndishomete cakutatonsha ayi Yehova alabikila maano mbotusebensa ncito alimwi asheenga shaswaamo.”

Twalumba abuumbi pa lucafwo lwanu kwiinda mumaali ngomupa mukuliyandila alimwi a aayo ngomupa kusebensesha donate.jw.org kwaamba ayi cikonsheke kupanga mavidyo aya.