CIIYO 4
Ino Ngumulandunshi Ngotwakasansulwita Baibo ya Busanduluzi Bwanyika Mpya?
Congo (Kinshasa)
Rwanda
Lubasu lwa malembo akwe Symmachus lucite liina lyakwe Lesa mulibuku lya Kulumbaisha 69:30, mumwaanda wamwaaka watatu na wane C.E.
Kwamyaaka iinji, Bakamboni Bakwe Yehova bakalinga kusebensesha, kupulinta, akwaabila maBaibo abusansulushi bupusene-pusene. Ono sombi twakabona kwaamba ayi kulisuniki kwaabila Baibo ya busansulushi bupya yeenga yacafwa bantu kwiiya “lushibo lwiine lwiine lwa lushinisho.” (1 Timoti 2:3, 4) Aboobo mumwaaka wa 1950 twakatalika kwaabila mbasu shaBaibo ya Busanduluzi Bwanyika Mpya. Baibo iyi yakasansululwa kabotu alimwi cakushomeka mumishobo iinda ku 130.
Kwakalinga kuyandika Baibo yuubu kunyumfwishisha. Mukuya kwaciindi, mishobo ilaaluka alimwi maBaibo aanji acite mushobo wakale kale ngayumu kunyumfwisha. Alimwi mabuku akale kale aamba shancine sheendelana kabotu ashakalinga kulembetwe pamabuku akutaanguna akacanika, ici cakalengesha ayi banyumfwishe cancinencine cakalinga kwaambwa muCiebulu, Ciaramu, aCigiliki ca muBaibo.
Kwakalinga kuyandika Baibo yakasansululwa kweelana aMaswi akwe Lesa. Beshikusansulula Baibo tabeelete kwaalula Maswi akwe Lesa, sombi balyeelete kwasansulula kweelana ambwakalinga kulembetwe mumalembo akutaanguna. Nacibi boobo, muma Baibo aanji, liina lyakwe Lesa, Yehova, bakalikushaamo muMalembo Asalashi.
Kwakalinga kuyandika Baibo ilumbaisha liina lyakwe Lesa. (2 Samwelo 23:2) Bweenka mbuli mbotutoobona mucakubonenaako cili panshi apa, liina lyakwe Lesa, Yehova lyakalingaamo mumalembo akale kale. Lyakalinga kucanika mankanda ali 7,000. Nceceeco muBaibo ya Busanduluzi Bwanyika Mpya, liina ili balibooshaamo mumalembo oonse molyakalinga kucanika. (Kulumbaisha 83:18) Mukwiinga beshikusansulula bakatola myaaka iinji kulangoola makani aya, Baibo iyi ilanyumfwika kabotu kwiibelenga mukwiinga ilatucafwa kushiba kabotu miyeeyo yakwe Lesa. Na mulicite Baibo ya Busanduluzi Bwanyika Mpya mumushobo wanu nabi sobwe, twamusenga ayi munobelenga Maswi akwe Yehova bushiku abushiku.—Joshuwa 1:8; Kulumbaisha 1:2, 3.
Ino nciinshi cakalengesha ayi tusansulule Baibo ipya?
Ino nciinshi ncotweelete kucita bushiku abushiku na tulisuni kwiiya kuyanda kwakwe Lesa?