Mbweenga Twalibambila Kabotu Mabungano

Na mutokwiiya Baibo aBakamboni Bakwe Yehova, mulyeelete kwaamba ayi muleendulukaamo muciiyo kamutana kwiiya. Kwaamba ayi mufubileemo, mulyeelete kucita bweenka ubo kamutana kuya kumabungano. Inga twacana mpindu na twabamba pulogilamu yakulibambila mabungano lyoonse.

Amusale ciindi cakulibambila alimwi amusena. Ino nciindi cili ndyeenga mwacikonsha kulibambila kabotu? Sa ndimacuunsa, kamutana kutalika ncito yanu ya bushiku abushiku, na macolesha baana ndyebaya mukoona? Na inga tamucikonshi kubelenga ciindi cilaamfu, amusale ciindi nceenga mwasebensesha kubelenga, alimwi mutalekeleli cintu cili coonse kumupilinganya. Amulangoole musena kuumwite, alimwi amushimye shintu shili shoonse sheenga shamucita coongo mbuli wailesi, TV, alimwi afooni. Kutalika amupailo kulaakumucafwa kubikila maano kuMaswi akwe Lesa ndyemutobelenga.—Bene Filipi 4:6, 7.

Amutaleewo pamakani ngomwabelenga akulibambila kwabanaamo. Amutaangune kunyumfwisha makani atokwaambwa. Amuyeeyewo pamutwi wa ciiyo, amubone tumitwi tuniini mbotutocatana amutwi unene, alimwi amulange shikope amiipusho yakwiindulukaamo itokwaamba pa makani anene. Lyalo amubelenge mapalagilafu, akucana shikumbulo kumiipusho ilembetwe. Amubelenge malembo ngobatana kwaambawo, akuyeeya mbwatocatana amakani ali muciiyo. (Milimo 17:11) Na mwacana pali cikumbulo, amutaleewo kwaamba ayi mukashibewo ndyeshimukanokumbula kumabungano. Na kamusuni inga mwakumbulawo.

Na kamulibambila limwi nsheshi mukeeye kumabungano nsondo ili yoonse, mulaakushiba makani aanji amuBaibo.—Mateyo 13:51, 52.

• Ino nshiinshi sheenga shamucafwa kulibambila kabotu mabungano?

• Ino inga mwalibambila buyani na kamusuni ayi mukakumbulewo kumabungano?