Ino Inga Mwasena Buyani Pafwafwi Kuli Lesa?

1. Sa Lesa ulakutika ku mipailo yoonse?

Lesa uleeta bantu ba mishobo yoonse kusena pafwafwi anguwe kwiinda mu mupailo. (Kulumbaisha 65:2) Ono, taakutiki, nabi kusumina, mipailo yoonse. Na musankwa ulapensha mukaakwe, ndyapaila mipailo yakwe inga taikumbulwiwo. (1 Pita 3:7) Mbocakalinga aku bene Isilaeli ndi bakatolelela kucita shibiibi, Lesa wakacileka kukutika ku mipailo yabo. Tatweelete kubona coolwe ncotucite ca kupaila kuli Yehova anga teshi ca bulemu. Nacibi boobo, Lesa ulakutika amipailo ya baabo beshi kubisha abuumbi na basanduka.—Amubelenge Isaya 1:15; 55:7.

2. Ino mipailo yesu ilyeelete kuba buyani?

Mupailo ndubasu lwa kulambila kwesu, aboobo tulyeelete kupailabo ku Mulengi wesu, Yehova. (Mateyo 4:10; 6:9) Alimwi, mukwiinga tatumaninite, tulyeelete kupaila kwiinda mu liina lyakwe Yesu wakafwa ceebo ca kubisha kwesu. (Joni 14:6) Yehova taasuni ayi tunoboosho maswi antu omwi mu mipailo nabi kusebensesha mipailo yakalembwa. Ulisuni ayi mipailo yesu inooswa mu myoyo yesu.—Amubelenge Mateyo 6:7; Bene Filipi 4:6, 7.

Mulengi wesu ulakutika amipailo ipailwa buumwite. (1 Samwelo 1:12, 13) Ulayanda ayi tunopaila ciindi cili coonse, mbuli macunsa a mashiku, pa kulya, a ndi tucite mapenshi.—Amubelenge Kulumbaisha 55:22; Mateyo 15:36.

3. Ino bene Klistu balayiita nshi mu kubungana?

Kusena pafwafwi a Lesa teshi cuubu mukwiinga tulekala pantu pomwi abantu batashomi muli Lesa a beshikuseka na banyumfwa nshaashomesha Lesa ayi ulakuleta lumuuno pa cishi. (2 Timoti 3:1, 4; 2 Pita 3:3, 13) Aboobo, tulaya mu kubungana kwaamba ayi tunoyuminishanya.—Amubelenge Bene Ebulu 10:24, 25.

Kunocanika abantu basuni Lesa kulatucafwa kusena pafwafwi a Lesa. Kubungana kwa Bakamboni bakwe Yehova kulatucafwa kuyuminishanya mu lushomo ndotucite.—Amubelenge Bene Loma 1:11, 12.

4. Ino inga mwasena buyani pafwafwi a Lesa?

Inga mwasena pafwafwi a Lesa na kamuyeeyawo pa shintu nshomwiiya mu Maswi akwe. Munoyeeya nshenga mweeyako ku shintu nshaacita, ku milawo yakwe, a nshaashomesha. Mupailo a kuyeeya pa shintu nshotwiiya kulatucafwa kunyumfwishisha lusuno lwakwe Lesa a maano akwe.—Amubelenge Joshuwa 1:8; Kulumbaisha 1:1-3.

Inga mwasena pafwafwi a Lesa na mwashoma muli nguwe. Ono lushomo luli anga ncintu cicite buumi ciyandika shakulya. Lushomo lwanu inga lwaba a buumi na kamuyeeya cakalengesha ayi mushome muli Lesa.—Amubelenge Mateyo 4:4; Bene Ebulu 11:1, 6.

5. Kusena pafwafwi a Lesa inga kwamucafwa buyani?

Yehova ulalama bamusuni. Inga wabafuna kuswa ku shintu nshenga shalenga ayi bacileeke kushoma a kumana lulangilo lwabo lwa kukala buumi butamaani. (Kulumbaisha 91:1, 2, 7-10) Ulatucenjesha kuswa ku micito yenga yalenga ayi tutanosangalala a kutuletela malwashi. Yehova ulatwiisha mbwenga twakala kabotu.—Amubelenge Kulumbaisha 73:27, 28; Jemusi 4:4, 8.