Josiya Wakalinga Kucite Babye Bali Kabotu

Sa utooyeeya ayi nciyumu kucita shintu shibotu?— Baanji mbobayeeya. Baibo ilatwaambila ayi cakalinga ciyumu kumwanike musankwa Josiya kucita shintu shibotu. Sombi wakalinga kucite babye bali kabotu abo bakamucafwa. Atwiiye pali Josiya ababye.

Baishi Josiya bakalinga mba Amoni, mwaami wa baJuda. Amoni wakalinga mubiibi alimwi wakalinga kulambila shibumbwabumbwa. Josiya wakaba mwaami wa baJuda, baishi ndibakafwa. Ono wakalinga kucitebo myaaka ili 8! Sa utooyeeya ayi wakalinga mubiibi mbuli baishi?— Sobwe, tabushi mbwakalinga!

Nabi ndyaakalinga mwanike, Josiya wakalinga kusuni kunyumfwila Yehova. Aboobo wakasala kuba abushicibusa abaabo bakalinga kusuni Yehova. Alimwi bakamucafwa kucita shintu shibotu. Ino mbani bakalinga babyakwe Josiya?

Umwi wakalinga ngu Sefaniya. Sefaniya wakalinga ngu mushinshimi wakacenjesha baJuda kwaamba ayi shintu shibiibi shilaakubacitikila na kabalambila shibumbwabumbwa. Josiya wakanyumfwila Sefaniya alimwi wakalambila Yehova, kuteshi shibumbwabumbwa.

Aumwi mubyaakwe Josiya wakalinga ngu Jelemiya. Bakalinga babusela alimwi bakalinga kubambene kukala ciindi ndyebakalinga kukula. Bakalinga kunyumfwana abuumbi cakwaamba ayi Josiya ndyaakafwa, Jelemiya wakalemba lwiimbo lutondesha mbwakalinga kumuyeeya. Jelemiya aJosiya bakacafwana kucita shintu shibotu akunyumfwila Yehova.

Ino inga weeya nshi kuli Josiya?— Nabi Josiya ndyaakalinga mwanike, wakalinga kusuni kucita shintu shibotu. Wakalinga kucishi ayi ulyeelete kuba ababye basuni Yehova. Awebo ulyeelete kusala babyo basuni Yehova alimwi beenga bakucafwa kucita shintu shibotu!