Josiya Wakalinga Kusuni Milawo Yakwe Lesa

Josiya wakaba mwaami wa bene Juda kaacite myaaka 8. Paciindi cilya, bantu bakalinga kucita sha majiki akulambila shibumbwabumbwa. Josiya ndyaakalinga kucite myaaka 16, wakeeya kulambila Yehova munshila yeelete. Ndyaakakwanisha myaaka 20, wakatalika kunyonyoola shibumbwabumbwa ashipaililo mucishi coonse. Lyalo ndyaakakwanisha myaaka 26, wakabika bubaambo bwakubamba tempele yakwe Yehova.

Mupailishi munene Ilikiya wakacana libuku lya Milawo mu tempele, mpashi lyakalembwa a Mose. Lyalo Shafani mulembi wa mwaami wakaleta libuku kuli Josiya akutalika kumubelengela. Josiya ndyaakalinga kukutika, wakeshiba ayi bantu tabakalinga kunyumfwila Yehova kwa myaaka iinji. Mwaami Josiya wakalwiita Ilikiya ayi: ‘Yehova alikalalite abuumbi pa nshetwakacita. Koya ukabandikaakwe. Atootulwiita nshotweelete kucita.’ Yehova wakabakumbula kwiinda mukusebensesha mushinshimi mwanakashi Ulida ayi: ‘Bantu bamu Juda bankaka. Ndaakubaanisha, sombi kuteshi paciindi Josiya ndyaali mwaami mukwiinga waliceesha.’

Mwaami Josiya ndyaakanyumfwa makani aya, wakaya ku tempele akwiita bene Juda boonse. Wakababelengela Milawo yakwe Yehova. Josiya abantu boonse bakashomesha kunyumfwila Yehova camoyo woonse.

Kwamyaaka iinji bene Juda tabakalinga kucitaawo kusekelela kwa Kusotokela. Ano Josiya ndyaakabelenga kuswa mu Milawo ayi kusekelela kwakalinga kweelete kucitwa mwaaka amwaaka, wakalwiita bantu ayi: ‘Tulaakucita Kusekelela uku kwakwe Yehova.’ Lyalo Josiya wakabamba milambu iinji akubika bubaambo bwa beshikwiimba pa tempele. Aboobo bene Juda bakacita Kusekelela uku, kwiilikaawo a Kusekelela kwa Shinkwa utacite Isiti uko kwakatola shinku 7. Takuna kubaawo kale Kusekelela kwa Kusotokela kuswabo muciindi cakwe Samwelo. Josiya wakalinga kwiisuni abuumbi Milawo yakwe Yehova. Sa awebo ulasangalala kwiiya pali Yehova?