Peenda Myaaka 100—Kuswa mu 1921

MU NJASHI Yamulindilishi ya January 1, 1921, mwakalinga mwiipusho ku Bashikwiiya Baibo wakwaamba ayi “Ino nincito nshi njetutolangila kusebensa mwaaka uno?” Lyalo yakaamba maswi ngotucana pa Isaya 61:1, 2, ayo akabeebalusha ncito yakushimikila njobakalinga kucite. “Yehova wansala kwaamba ayi nshimikile makani abotu kubakandu . . . , akwaambilisha ayi uno ngomwaaka Lesa ngweshi apulushe bantu bakwe akuboosha cishole kwakwe Lesa.”

BESHIKUSHIMIKILA BATALOONDI

Bashikwiiya Baibo bakalinga kuyandika kutaloonda kwaamba ayi bacikonshe kusebensa ncito yakushimikila. Bakalinga kweelete kushimikila “makani abotu” kubantu bakandu alimwi akushimikila makani “akuboosha cishole kwakwe Lesa” kubamucita shibiibi.

Mukwesu J. H. Hoskin, uyo wakalinga kukala ku Canada, wakalinga kushimikila cakutaloonda nabi kwaamba ayi wakalinga kupikishikwa. Kumatalikilo a mwaaka wa 1921, wakakumanya mutanjilili wabupailishi umwi. Mukwesu Hoskin wakatalika mubandi kwiinda mukwaamba ayi: “Tatweelete kupikishanya pakubandika makani amu Baibo. Alimwi nabi tulipusene mushintu shimwi nshetushoma, tulyeelete kumana mubandi wesu muluumuno alimwi akutolelela kunyumfwana.” Sombi ishi tashikwe kucitikaawo. Mukwesu Hoskin wakaamba ayi: “Twakabandikabo kwaciindi ciniini lyalo [mutanjilili wabupailishi uyo] wakooma kucisasa cankusu cakwaamba ayi ndakayeeya ayi ligilasi linene lyakalinga pacisasa litooloka.”

Mupailishi uyo wakaamba cabukali ayi: “Ino nceebonshi ncotayiti kubantu bateshi Beneklistu?” Mukwesu Hoskin taakwe kukumbulawo. Sombi ndyaakalinga kuswawo wakalyambosha ayi, “Ndakalinyumfwa anga nshindakalinga kubandika amuntu Mwineklistu!”

Bushiku bwakakonkelawo mupailishi uyo ndyaakalinga kwiisha muceeci yakwe, wakaamba makani akubeca aanji pamukwesu Hoskin. Mukwesu Hoskin wakaamba ayi: “Wakalwiita bantu ayi pabantu boonse bakesaawo mutauni ino nebo ndakalinga mubeshi kwiindaawo aboobo ndakalinga kweelete kucaikwa.” Sombi ici tacikwe kumupa kucileka kushimikila, wakatolelela kushimikila kubantu baanji. Wakaamba ayi: “Ndakalinga kusangalala abuumbi kushimikila mutauni ilya. Bantu bamwi bakalinga kwaamba ayi, ‘Tulishi kwaamba ayi utosebensa ncito yakwe Lesa!’ alimwi bakalyaaba kunoompa shintu nshendakalinga kuyandika.”

CIIYO CAPALWAABO ALIMWI AKULAMBILA KWAMUKWASHI

Bashikwiiya Baibo bakalinga kubamba miipusho pamakani amu Baibo alimwi ashikumbulo mumagazini ya The Golden Age kwaamba ayi bacafwe bantu kunyumfwisha makani amu Baibo.a Kwakalinga miipusho yamu Baibo yakalinga kubambilwa bacanike bashali njobakalinga kweelete kubandika abana babo. Bashali bakalinga “kwiipusha bana babo miipusho iyi akubacafwa kucana shikumbulo mu Baibo.” Miipusho imwi mbuli, “Ino mu Baibo muli mabuku ongaye?,” yakalinga kubacafwa kwiiya makani amu Baibo oobu. Imwi mbuli, “Sa Mwineklistu wancine uliwoonse alyeelete kulangila kupenshekwa?,” yakalinga kucafwa bacanike kuba beshikushimikila bataloondi.

Alimwi kwakalinga miipusho yamu Baibo ashikumbulo shakabambilwa baabo bakalinga kucishi kale makani aanji amu Baibo. Shikumbulo shakalinga kucanika mulibuku lyakutaanguna lyakalinga kwiitwa ayi Studies in the Scriptures. Miipusho iyi yakacafwa bantu baanji kwiiya shintu shiinji, sombi mumagazini ya The Golden Age ya December 21, 1921 mwakalinga cakoolobesha cakwaamba ayi miipusho iyi teshi itolelele kubambwa. Ino nceebonshi ncekwakabeta kwaaluka uku?

LIBUKU LIPYA!

Libuku lya *The Harp of God*

Kaadi palembetwe mapeeji shikwiiya ngaeelete kubelenga mulibuku

Makaadi palembetwe miipusho

Bamakwesu bakalinga kutanjilila bakabona ayi bantu bakalinga kweelete kwiiya makani amu Baibo munshila ibambitwe kabotu. Aboobo mu November 1921, kwakabambwa libuku lyakalinga kwiitwa ayi The Harp of God. Abo bakalinga kusuni kwiiya bakatambula libuku akutalika kwiiya beene. Kwiiya uku kwakacafwa bantu kushiba “kuyanda kwakwe Lesa kwakwaamba ayi bantu balaakuba abuumi butamaani.” Ino bakalinga kwiiya buyani?

Na muntu wasumina kutambula libuku, wakalinga kupekwa kakaadi kakalinga kutondesha mapeeji ngaeelete kubelenga mulibuku. Nsondo yakalinga kukonkelaawo, wakalinga kutambula kaadi pakalinga miipusho iinji pamakani ngaakabelenga kuswa mulibuku. Kumamanino a kaadi kwakalinga kuba lubasu lwakalinga kutondesha mapeeji ngaeelete kubelenga mulibuku ili nsondo itokonkelaawo.

Nsondo yomwi ayomwi kwansondo 12, shikwiiya wakalinga kutambula kaadi ipya kuswa kulibungano lyakalinga pafwiifwi ankwakala. Liinji bacinene alimwi abaabo batakalinga kucikonsha kweenda kuya kuŋanda aŋanda, mbobakalinga kutuma makaadi. Kucakubonenaako, ba Anna K. Gardner bakalinga kukala ku U.S.A. bakaamba ayi: “Libuku lya The Harp of God ndyelyakaswa, nankashi yangu Thayle uyo watakalinga kucikonsha kweenda wakaba ashakucita shiinji kwiinda mukunootuma makaadi pakalinga miipusho nsondo ansondo.” Na muntu wamanisha kwiiya, umwi mulibungano wakalinga kumufwakashila kwaamba ayi amucaafwe kwiiya makani aanji amu Baibo.

Ba Thayle Gardner balishiite pakacinga kabalema

INCITO NJOBAKALINGA KWEELETE KUSEBENSA

Kumamanino amwaaka uyu, Mukwesu J. F. Rutherford wakatuma nkalata kumabungano oonse. Wakabona ayi “mumwaaka uyu bantu baanji bakashimikilwa makani a Bwaami alimwi akucafwikwa kwiinda myaaka yoonse yainda.” Lyalo wakeelikawo akwaamba ayi: “Tucicite ncito inene njetutoyandika kusebensa. Amuyuminishe bamwi kutalika kwaabanamo lubasu muncito iyi ibotu abuumbi.” Ncakutatoonsha kwaamba ayi Bashikwiiya Baibo bakakonkela nshaakaamba. Mumwaaka wa 1922, bakashimikila makani a Bwaami cakutaloonda kwiinda mwaaka uliwoonse.

Beshicibusa Bataloondi

Bashikwiiya Baibo bakalinga kutondesha lusuno lwa bwanabwankashi kwiinda mukucafwana. Bakalinga beshicibusa bataloondi ‘bakashalilwa kucafwana mumapensho,’ kweelana amakani atokonkelaawo mbwaatotondesha.—Tus. 17:17.

Pacibili pa 31 May, 1921, musankwa muntu mushiya wakalinga kukala mu tauni ya Tulsa (Oklahoma, U.S.A) wakaangwa ceebo cakubekeshekwa ayi wakacisa musungu mwanakashi. Kuswawaawo, basungu basankwa beendilila 1,000 bakalwana alikoto liniini lyabasankwa bantu bashiya. Cakufwambaana inkondo yakashika kumusena wakalinga kwiitwa ayi Greenwood, uko kwakalinga kukala bantu bashiya baanji. Bakeepa shintu mumaanda alimwi amu mashoopu eendilila 1,400 lyalo akwaatenta. Malipooti alaamba ayi kwakafwabo bantu bali 36. Sombi bantu bakafwa mpashi bakalinga 300. Mukuya kwaciindi, inkondo iyi yakatalika kwiitwa ayi Tulsa Race Massacre.

Mukwesu Richard J. Hill, Shikwiiya Baibo wakalinga muntu mushiya alimwi wakalinga kukala ku Greenwood, wakaamba shakacitika ayi: “Bushiku inkondo ndyeyakatalika, twakalinga kumabungano bweenka mbotucita lyoonse. Pesule lyakubungana twakanyumfwa mfuti kashilila mu tauni ya Tulsa. Mfuti shakatolelela kulila kushikila ndyetwakaya mukoona.” Kushika pa Citatu macuunsa pa 1 June, shintu shakabicilaako. “Bantu bamwi bakesa akwaamba ayi na tulisuni kushitilishikwa tulyeelete kuya kumusena wakubunganinaamo.” Aboobo Mukwesu Hill pomwi amukaakwe abana babo bali 5 bakaya kumusena wakubunganinaamo wakalinga mu tauni ya Tulsa. Kumusena uyu kwakalinga bantu bashiya basankwa abanakashi beendilila 3,000 abo bakalinga kushitilishikwa kubasoja bakatumwa ku mfulumeende kwaamba ayi bakashe bantu kulwana.

Paciindi ceenka ici, Mukwesu Arthur Claus uyo wakalinga musungu, wakatondesha kutaloonda ndyaakasalaawo kucita cintu cimwi. Mukwesu Claus wakaamba ayi: “Ndyendakanyumfwa ayi bantu batokwiipa shintu alimwi akutenta maanda ku Greenwood, ndakasalawo kuyaako kwaamba ayi njembone na shicibusa wangu ngoonsuni, Mukwesu Hill, wakalingabo kabotu.”

Mukwesu Arthur Claus wakalinga kucafwa bacanike bali 14 kwiiya makani aanji amu Baibo kusebensesha libuku lya The Harp of God

Ndyaakashika paŋanda ya Mukwesu Hill, wakabona musungu umwi wakalinga kukala pafwiifwi aba Hill kaacite mfuti. Muntu uyo alakwe wakalinga shicibusa waba Hill, aboobo wakayeeya ayi ba Arthur bali pa baabo batooya ciipa shintu akutenta maanda. Muntu uyo wakaamba cabukali ayi: “Ino wesa mukucitanshi paŋanda ya muntu uyu?”

Ba Arthur bakaamba ayi: “Naakwiinga nshikwe kumusansulwiita kabotu, naakwiinga wakanjasa mfuti. Ndakamulwiita ayi ndakalinga shicibusa waba Hill alimwi ayi liinji ndakalinga kuyaawo paŋanda pamishaabo.” Ba Arthur alimwi amuntu uyo bakacikonsha kushitilisha ŋanda yaba Hill kubantu bakalinga kwiipa shintu alimwi akutenta maanda.

Tapana kwiinda aciindi cilaamfu ba Arthur bakashiba kwaamba ayi Mukwesu Hill alimwi amukwashi wakwe bali kumusena wakubunganinaamo. Ba Arthur bakabalwiita ayi bantu bashiya inga tabaswi kumusena uyu kwakubula cipepa cakasainwa kumunene wabasoja waliina lya Barrett. Ba Arthur bakaamba ayi: “Cakalinga ciyumu abuumbi kuya mukubonana amunene wabasoja uyu. Ndyendakamulwiita ayi ndisuni ayi ba Hill amukwashi wabo basweeko kumusena wakubunganinaamo, wakanjipusha ayi: ‘Sa ulaakulama mukwashi uyu akubapa nshebayandika?’ Calusangalalo ndakakumbula ayi, Ee.”

Cakufwambaana, ba Arthur bakaya kumusena wakubunganinaamo kabacite acipepa cakasainwa amunene wabasoja. Bakatondesha musoja umwi cipepa, uyo wakaamba muliswi lyapeculu ayi: “Cipepa ici casainwa amunene wabasoja! Sa ulicishi kwaamba ayi ndiwe wakutaanguna kusa mukubwesa bantu kuno?” Ndipakeendabo ciindi ciniini, ba Arthur amusoja uyo bakamucana Mukwesu Hill amukwashi wakwe. Boonse bakatanta mumotoka yaba Arthur akuya kumishaabo ba Hill.

Mukwesu Claus wakashinisha kwaamba ayi Mukwesu Hill amukwashi wakwe bashitilishikwa. Bamwi ndyebakabona Mukwesu Claus mbwaakatondesha lusuno lwa bwanabwankashi, bakanyumfwa kabotu abuumbi. Ba Arthur bakaamba ayi: “Muntu ngondakacafwanaakwe kushitilisha ŋanda yaba Hill, wakabasuna abuumbi Bakamboni Bakwe Yehova. Alimwi bantu baanji bakalinga kusuni kwiiya cancine mukwiinga bakabona ayi bantu bakwe Lesa tabakalinga kuciteewo kasalulushi kashikanda alimwi taakuwo wakalinga kuyeeya ayi aliindite pabantu bakwe Lesa bamwi.”

a Mu 1937 magazini ya The Golden Age yakatalika kwiitwa ayi Consolation, lyalo mu 1946 yakatalika kwiitwa ayi Awake!