Nkalata Yeenga Yatucafwa Kuliyumya Cakushomeka Kushikila Kumamanino

1-2. (a) Ino buumi bwakalinga buyani ku Beneklistu baku Judeya paciindi Paulo ndyaakabalembela nkalata? (b) Ino nceebonshi nkalata iyi yakabacafwa abuumbi?

BENEKLISTU bene Ebulu abo bakalinga kukala mu Jelusalemu amu Judeya bakeenda mubukaalo buyumu pesule lyakwaamba ayi Yesu wafwa. Ndipakeendabo ciindi ciniini kuswa ciindi libungano lya Bwineklistu ndyelyakapangwa, Beneklistu bakatalika kupenshekwa abuumbi. (Milimo 8:1) Lyalo ndyepakeenda myaaka pafwiifwi a 20, bakapenga ceebo ca nsala inene yakalingaako alimwi abukandu. (Milimo 11:​27-30) Nacibi boobo, pafwiifwi amwaaka wa 61 C.E., Beneklistu tabakalinga kupenshekwa bunene mbuli mbobakalinga kusa mukupenshekwa kunembo. Paciindi cilya, Yehova wakatanjilila mutumwi Paulo kubalembela nkalata. Kululika kwakalinga munkalata iyo nkobakalinga kuyandika kwaamba ayi balibambile shakalinga kusa mukucitika conoono.

² Nkalata yakalembelwa bene Ebulu yakalinga ya paciindi ceelete mukwiinga tabakwe kutolelela kwikala muluumuno. Paulo wakalwiita Beneklistu aba makani akalinga kusa mukubacafwa kuliyumya mumapensho ngobakalinga kulangila kwiindaamo conoono. Kunyonyoolwa kwa Jelusalemu alimwi a tempele Yesu nkwakaambila limwi, kwakalinga pafwiifwi. (Luka 21:20) Kwalo, Paulo a Beneklistu bakalinga kukala mu Judeya tabakalinga kucishiiwo bushiku bwiine ishi ndyeshakalinga kusa mukucitika. Nacibi boobo, Beneklistu aba bakalinga kweelete kusebensesha ciindi ncobakalinga kucite kuyumya lushomo lwabo akwiiya kuliyumya.—Ebu. 10:25; 12:​1, 2.

3. Ino nceebonshi Beneklistu balyeelete kubikila maano abuumbi ku makani alembetwe mu nkalata yakalembelwa bene Ebulu?

³ Tutolangila kwiinda mumapensho anene abuumbi kwiinda ngobakeendaamo Beneklistu bene Ebulu. (Mate. 24:21; Ciyu. 16:​14, 16) Aboobo amuleke tubandike pakululika kumwi Yehova nkwakapa Beneklistu bene Ebulu kweenga kwatucafwa aswebo munshiku shino.

‘ATWEELESHE CANKUSU KUYA PANEMBO KWAAMBA AYI TUSHIMPE’

4. Ino ngamapensho nshi Beneklistu baJuda ngobakalinga kwiindaamo? (Amubone acikope.)

⁴ BaJuda abo bakaba Beneklistu bakalinga kweelete kwaalula shiinji mubuumi bwabo. Alimwi ici tacakalinga cuubu kuli mbabo. Paciindi cimwi, baJuda bakalinga mbantu bakwe Yehova abo mbaakasala. Kwamyaaka iinji, Jelusalemu wakalinga musena uyandika abuumbi. Mwaami wakalinga kwiimikaninaako bweendeleshi bwakwe Yehova, njondabala njaakalinga kweendelesha. Alimwi bantu bakalinga kusuni kulambila Yehova bakalinga kuya ku tempele yakalinga mu Jelusalemu. BaJuda bashomeka bakalinga kukonkela Milawo yakwe Mose njobakalinga kwiishikwa ku bamatanjilili babupailishi. Kwakalinga milawo yakalinga kwaamba pa shakulya, kupalulwa abwakucita shintu kubantu batakalinga baJuda. Sombi pesule lyakwaamba ayi Yesu wafwa, Yehova wakacileka kutambula milambu njobakalinga kubenga ku tempele. Aboobo tacakalinga cuubu ku baJuda abo bakesa mukuba Beneklistu kwaalula nshila mbobakalinga kulambila Lesa. (Ebu. 10:​1, 4, 10) Nabibo Beneklistu bakalinga kucite lushomo luyumu mbuli Pita, cakababeta ciyumu kukonkela kwaaluka uku. (Milimo 10:​9-14; Gala. 2:​11-14) Ceebo ca shintu shipya Beneklistu nshobakatalika kushoma, bamatanjilili babupailishi ba baJuda bakatalika kubapensha.

5. Ino ngamakoto nshi obilo akalinga kupikisha Beneklistu?

⁵ Beneklistu bene Ebulu bakalinga kupikishikwa ku makoto obilo abantu. Bamatanjilili babupailishi ba baJuda bakalinga kulinyumfwa ayi Beneklistu aba bakaswaamo mubupailishi bwabo. Alimwi bamwi mulibungano bakalinga kwaamba ayi Beneklistu bakalinga kweelete kutolelela kukonkela Milawo yakwe Mose. Mpashi bakalinga kuyeeya boobo kwaamba ayi batanopenshekwa. (Gala. 6:12) Ino nciinshi cakalinga kweelete kucafwa Beneklistu kutolelela kushomeka kuli Yehova?

6. Ino nciinshi Paulo ncaakayuminisha bashominyina kunoocita? (Bene Ebulu 5:14–6:1)

⁶ Munkalata Paulo njaakalembela bene Ebulu, wakabayuminisha kunookwiiya Maswi akwe Lesa akukutumana kuyeeyawo. (Amubelenge Bene Ebulu 5:14–6:1.) Paulo wakaamba pa Malembo amwi amuci Ebulu akusansulula ayi nshila Beneklistu mbobakalinga kulambila Yehova yakalinga kwiinditeewo abuumbi panshila baJuda mbobakalinga kumulambila.a Alimwi wakayuminisha Beneklistu kushiba akunyumfwishisha kabotu cancine camu Malembo kwaamba ayi banooshiba njiisho shakubeca akushikaka.

7. Ino ngamapensho nshi ngotwiindaamo munshiku shino?

⁷ Munshiku shino, bantu bamwi balaamba makani alimwi amiyeeyo iteendelani anjiisho shiluleme shakwe Yehova. Bantu bamwi balaamba ayi Bakamboni Bakwe Yehova balisowekete mukwiinga balakonkela milawo yamu Baibo yaamba pamakani akoonana. Miyeeyo ya bantu itooya ciindaawo kupusana amiyeeyo yakwe Yehova. (Tus. 17:15) Aboobo cilayandika abuumbi kwaamba ayi twashiiba kuyeeya kutabete kabotu akukukaka. Tatweelete kusuminisha beshikutupikisha kutupa kuloonda akucileka kusebensela Yehova.—Ebu. 13:9.

8. Ino nciinshi ceshi cikatucaafwe kutolelela kuya panembo lwakumushimu?

⁸ Paulo wakalwiita Beneklistu bene Ebulu kutolelela kuya panembo lwakumushimu. Aswebo ici ncotweelete kunoocita. Ici cilaamba ayi tulayandika kunookwiiya Baibo cakubikila maano kwaamba ayi tumushibe kabotu Yehova ambwayeeya. Tulayandika kutolelela kucita boobo nabi pesule lyakubombekwa. Tacicite mulandu akufula kwamyaaka njotwekala mucancine, soonse tulyeelete kunobelenga akwiiya Maswi akwe Lesa bushiku abushiku. (Kulu. 1:2) Kwiiya Baibo bushiku abushiku kulaakutucafwa kuyumya lushomo lwesu, mubo Paulo ngwaakayuminisha Beneklistu bene Ebulu kubaawo.—Ebu. 11:​1, 6.

“TULI BAABO BASHOMA BESHI BAKAPULUSHIKWE”

9. Ino nceebonshi Beneklistu bene Ebulu bakalinga kuyandika kuba alushomo luyumu?

⁹ Beneklistu bene Ebulu bakalinga kuyandika kuba alushomo luyumu kwaamba ayi bacikonshe kupuluka mapensho ndyaakesa mu Judeya. (Ebu. 10:​37-39) Yesu wakacenjesha bashikwiiya bakwe ayi na bakabone ayi Jelusalemu yashingulukwa ku bashilumamba, balyeelete kucicaamo mundabala kuya kutulundu. Beneklistu boonse bakalinga kuyandika kukonkela kucenjesha uku inga caba ayi bakalinga kukala mundabala ya Jelusalemu nabi mumishi yamu Judeya. (Luka 21:​20-24) Kale kale, na bashilumamba besa mukulwana ndabala, bantu bakalinga kukala mumishi bakalinga kucicila mundabala kwaamba ayi bashitilishikwe ceebo cakwaamba ayi yakalinga kuba alubumbu. Kucicila kutulundu muciindi cakukala mundabala ya Jelusalemu kwakalinga kuboneka anga takubete kabotu. Aboobo bakalinga kuyandika kuba alushomo luyumu kwaamba ayi bakonkele kucenjesha kwakwe Yesu.

10. Ino kuba alushomo luyumu kwakacafwa Beneklistu kucita nshi? (Bene Ebulu 13:17)

¹⁰ Kwiilikaawo, Beneklistu bene Ebulu bakalinga kuyandika kunooshoma baabo Yesu mbwaakalinga kusebensesha kutanjilila libungano. Cilyeelete kwaamba ayi abo bakalinga kutanjilila bakalwiita bamulibungano ciindi ndyebakalinga kweelete kucica ambweenga baswaamo mundabala. (Amubelenge Bene Ebulu 13:17.) Mutumwi Paulo wakalwiita bashominyina ayi ‘amunyumfwile baabo bamutanjilila pakati kanu.’ Taakalinga kusansulula ayi bakalinga kweelete kunoonyumfwila bamanene ceebo cakwaamba ayi balyeelete kucita boobo, sombi ceebo cakwaamba ayi bakalinga kushoma bamanene. Aboobo Beneklistu bene Ebulu bakalinga kuyandika kwiiya kunooshoma bamanene akukonkela butanjilishi bwabo mapensho kaatana kutalika. Na Beneklistu bakalinga kunyumfwila bamanene shintu ndyeshakalinga kabotu, cilyeelete kwaamba ayi cakababeta cuubu kubanyumfwila ndyebakalinga kwiinda mubukaalo buyumu.

11. Ino nceebonshi Beneklistu balayandika kuba alushomo luyumu munshiku shino?

¹¹ Bweenka mbuli Beneklistu bene Ebulu, aswebo tulayandika kuba alushomo. Tutokala muciindi bantu baanji ndyebatashomi ayi mamanino acishi cino ali pafwiifwi. Alimwi balatuweluluka ceebo cakushoma ayi cishi cino cilaakumana conoonobo. (2 Pit. 3:​3, 4) Kwiilikaawo, nabi kwaamba ayi Baibo ilatulwiita shimwi sheshi shikacitike paciindi ca mapensho anene, kuli shiinji nshotutacishiiwo sheshi shikacitike paciindi ici. Tulayandika kuba alushomo luyumu lwakwaamba ayi Yehova wakasala kale bushiku mamanino ndyeshi akese. Alimwi tulyeelete kushoma cakutatoonsha ayi alaakutushitilisha paciindi ici.—Abaku. 2:3.

12. Ino nciinshi ceshi cikatucaafwe kupuluka mapensho anene?

¹² Alimwi tulyeelete kuyumya lushomo lwesu lwakwaamba ayi Yehova atosebensesha ‘musebenshi ushomeka alimwi ucite maano’ kututanjilila munshiku shino. (Mate. 24:45) Na mapensho anene akatalike, mpashi tulaakutambula butanjilishi bweshi bukape kwaamba ayi tukapuluke, bweenka mbocakalinga ku Beneklistu bene Ebulu paciindi bashilumamba bene Loma ndyebakashinguluka ndabala ya Jelusalemu. Cilayandika abuumbi kwaamba ayi tunooshoma baabo batanjilila mulibunga lyakwe Yehova. Cilaakutubeta ciyumu kukonkela butanjilishi mbweshi tukapekwe paciindi ca mapensho anene, na katwaalilwa kukonkela butanjilishi mbobatupa pacecino ciindi.

13. Ino nceebonshi kululika nkotucana pa Bene Ebulu 13:5 kwakalinga kuyandika?

¹³ Beneklistu bene Ebulu ndyebakalinga kulindila ciindi cakutalika kucica kuswa mundabala, bakalinga kuyandika kukala buumi bwakutalila shiinji kwiinda mukuleya ‘kusunishisha bunene maali.’ (Amubelenge Bene Ebulu 13:5.) Bamwi bakapengaawo ceebo ca nsala inene abukandu shakalingaako. (Ebu. 10:​32-34) Nabi kwaamba ayi bakalinga kulibambite kuliyumya mubukaalo buyumu ceebo ca makani abotu, bamwi mpashi bakalinga batalika kubikila maano kukuba amaali aanji kwaamba ayi balishitilishe kumapensho amwi abukandu. Sombi maali taakalinga kusa mukubapulusha bene Loma ndyebakesa mukulwana ndabala ya Jelusalemu. (Jemu. 5:3) Alimwi cancine ncakwaamba ayi abo bakalinga kusunishishi shintu shakumubili, mpashi cakababeta ciyumu kuswaamo mundabala akushiya shintu shabo amaandaabo.

14. Ino kuba alushomo luyumu inga kwakuma buyani shintu nshotusalawo kucita pacecino ciindi?

¹⁴ Na katucite lushomo luyumu lwakwaamba ayi conoonobo Yehova alaakunyonyoola cishi cino cibiibi, teshi tukatalike kuyeeya ayi kuba amaali aanji na shintu shakumubili nshoshintu shiyandika. Paciindi camapensho anene, maali teshi akatucafweewo. Baibo ilaamba ayi bantu “balaakusowa silifa agolodi wabo mumikwakwa” mukwiinga balaakushiba ayi ‘silifa a golodi wabo teshi ukabapulusheewo pabushiku bwa bukali buyoosha bwakwe Yehova.’ (Esek. 7:19) Muciindi cakubikila maano kukuba amaali aanji, tulyeelete kusalawo shakucita sheenga shatucafwa kulilama sobeene akulama mukwashi wesu alimwi akutolelela kusebensela Yehova. Ici cileelelikaawo akuleya kuba ankongole shiinji na kubikila bunene maano kukulama shintu shesu. Alimwi tulyeelete kucenjela kwaamba ayi shintu shakumubili shitabi nshoshintu shiyandika abuumbi mubuumi bwesu. (Mate. 6:​19, 24) Ndyeshi tunooya cisena pafwiifwi amamanino acishi cino, tulaakuyandika kusalawo na tulashoma muli Yehova na mushintu shakumubili nshotucite.

‘MULAYANDIKA KULIYUMYA’

15. Ino nceebonshi Beneklistu bene Ebulu bakalinga kuyandika kuliyumya?

¹⁵ Beneklistu baku Judeya bakalinga kuyandika kuliyumya ndyebakalinga kusebensela Yehova ceebo cakwaamba ayi conoono bakalinga kusa mukutalika kwiinda mumapensho. (Ebu. 10:36) Nabi kwaamba ayi baanji bakapenshekwawo kale abuumbi, baanji bakaba Beneklistu paciindi ndyekwakalingako luumuno. Aboobo Paulo wakabebalusha ayi bakalinga kuyandika kuba balibambite kukupenshekwa abuumbi, akutolelela kushomeka kushikila kulufu bweenka Yesu mbwaakacita. (Ebu. 12:4) BaJuda baanji bakalinga kukalalite abuumbi akupensha baJuda bamwi ceebo cakwaamba ayi baanji bakalinga kusalawo kuba Beneklistu. Kakucaalite myaaka iniini kwaamba ayi Paulo alembe nkalata ya Bene Ebulu, likoto lya bantu bakalinga kukalalite lyakamulwana ndyaakalinga kushimikila mu Jelusalemu. BaJuda beendilila 40 ‘bakalumbila ayi teshi bakalye nabi kunwa cintu naciceyi kushikila bakamucaaye Paulo.’ (Milimo 22:22; 23:​12-14) Nabi kwaamba ayi Beneklistu bakalinga kubapatite alimwi bakalinga kupenshekwa, bakalinga kuyandika kutolelela kubungana pomwi kulambila Yehova, kushimikila makani abotu akuyumya lushomo lwabo.

16. Ino nkalata yakalembelwa bene Ebulu inga yatucafwa buyani kubona kupenshekwa munshila yeelete? (Bene Ebulu 12:7)

¹⁶ Ino nciinshi cakalinga kweelete kucafwa Beneklistu bene Ebulu kuliyumya ndyebakalinga kupikishikwa? Paulo wakalinga kucafwa Beneklistu kushiba shibotu shiswaamo na batolelela kuliyumya. Wakasansulula ayi na Beneklistu batokwiinda mubukaalo buyumu, mpashi Lesa inga wasebensesha bukaalo ubo kubeeisha kuba amibo imwi. (Amubelenge Bene Ebulu 12:7.) Inga beeya kuba amibo isangalasha Yehova alimwi akunootondesha bunene mibo imwi. Cakalinga cuubu kuliyumya ku Beneklistu bene Ebulu, na babikila maano ku shibotu shiswaamo ndyebali mubukaalo buyumu.—Ebu. 12:11.

17. Ino nciinshi Paulo ncaakeeya pamakani akuliyumya muntu ndyatopenshekwa?

¹⁷ Paulo wakayuminisha Beneklistu bene Ebulu kuba bataloondi akutolelela kuliyumya ndyebakalinga kwiinda mubukaalo buyumu. Cakalinga kweelela Paulo kubalwiita mbweenga baliyumya ndyebatopenshekwa. Kaatana kuba Mwineklistu, wakalinga kupensha Beneklistu alimwi wakabona shintu shitabete kabotu nshobakalinga kucitilwa. Alimwi wakalinga kucishi bwakuliyumya muntu ndyatopenshekwa, mukwiinga lakwe wakapenshekwa munshila shipusenepusene ndyaakaba Mwineklistu. (2 Koli. 11:​23-25) Aboobo Paulo wakalinga kucishi kabotu muntu nshaakalinga kuyandika kucita kwaamba ayi aliyuumye. Wakebalusha Beneklistu bene Ebulu ayi bakalinga kuyandika kucinka manungo muli Yehova ndyebatoliyumya mubukaalo buyumu, kuteshi munkusu shabo. Ici ncocakacafwa Paulo kuba utaloondi akwaamba ayi: ‘Yehova ngomucafwi wangu, teshi nkaloondeewo.’—Ebu. 13:6.

18. Ino nciinshi ceshi cikatucitikile soonse kunembo, alimwi ino nciinshi ncotweelete kunoocita pacecino ciindi?

¹⁸ Bamakwesu bamwi batoliyumya ndyebatopenshekwa munshiku shino. Nshila yomwi mbweenga twatondesha ayi tulibasuni nkwiinda mukubapaililaako. Alimwi cimwi ciindi inga twabacafwa kwiinda mukubapa nshebatoyandika. (Ebu. 10:33) Nacibi boobo, Baibo ilaamba ayi ‘uyo woonse usuni kukala buumi bwakusebensela Lesa cakulyaaba muli Klistu Yesu ulaakupenshekwa.’ (2 Timo. 3:12) Aboobo soonse tulayandika kulibambila bukaalo mbweshi tukeendeemo. Tulyeelete kucinka manungo muli Yehova cakumaninina, akushoma ayi alaakutucafwa kuliyumya mubukaalo buli boonse mbweshi tukeendeemo. Paciindi ceelete, alaakumana mapensho oonse ngobeendaamo abo boonse bashomeka kuli nguwe.—2 Tesa. 1:​7, 8.

19. Ino nshiinshi nshotweelete kucita kwaamba ayi tulibambile mapensho anene? (Amubone acikope.)

¹⁹ Ncakutatoonsha kwaamba ayi nkalata Paulo njaakalembela bene Ebulu yakabacafwa kulibambila mapensho ngobakalinga kusa mukwiindaamo. Paulo wakayuminisha bashominyina kwiiya Maswi akwe Lesa cakubikila maano akwaanyumfwishisha kabotu. Kucita boobo kwakalinga kusa mukubacafwa kunooshiba miyeeyo itabete kabotu akwiikaka mukwiinga naakwiinga yakanyonyoola lushomo lwabo. Wakabayuminisha kuyumya lushomo lwabo kwaamba ayi banoofwambaana kukonkela butanjilishi bwakwe Yesu abwa baabo bakalinga kutanjilila mulibungano. Alimwi wakacafwa Beneklistu kuliyumya ndyebatokwiinda mubukaalo buyumu, kwiinda mukunoobona bukaalo ubo ayi ninshila Ishiwabo shilusuno njeenga wasebensesha kubeeisha. Aswebo tulyeelete kukonkela kululika uku kwamu Baibo. Lyalo tulaakucikonsha kuliyumya cakushomeka, kushikila kumamanino.—Ebu. 3:14.