Yehova Mbwaatucafwa Kuliyumya

1. Ino nceebonshi tulayandika kuliyumya, alimwi ino ngani weenga watucafwa? (1 Pita 5:10)

SOONSE tuleenda mumapensho apusenepusene. Aboobo cimwi ciindi inga twalinyumfwa ayi inga tatucikoonshi kutolelela kuliyumya kushikila kumamanino. Bamwi batolelela kuciswa kwaciindi cilaamfu. Bamwi batoopenga ceebo cakufwitwa shikamukowa nabi shicibusa ngobakalinga kusuni abuumbi. Lyalo bamwi batopenshekwa ku bamumukwashi na ku mfulumeende. (Mate. 10:​18, 36, 37) Amushibe kwaamba ayi nabi mwiinde mumapensho ayumu buyani, Yehova inga wamucafwa kuliyumya.—Amubelenge 1 Pita 5:​10, NWT.

2. Ino ngani utucafwa kuliyumya alimwi ino nceebonshi?

² Kuliyumya cilaamba kutolelela kushomeka kuli Yehova akunomusebensela calusangalalo nabi ndyetutokwiinda mubukaalo buyumu, ndyetutopenshekwa nabi ndyetweeleshekwa kucita cintu cibiibi. Alimwi kwaamba ayi tucikonshe kuliyumya tulyeelete kushoma ayi shintu shilaakuba kabotu. Inga tatucikonshi kuliyumya mu nkusu shesu. Yehova eenkabo ngweenga watucafwa kuliyumya mukwiinga alatupa “nkusu shiindaawo nshetucite.” (2 Koli. 4:7) Mumutwi uyu, tutobandika pashintu shimwi shili 4 Yehova nshaakatupa sheenga shatucafwa kuliyumya. Tutokwiiya ansheenga twaciita kwaamba ayi nshaakatupa shitucaafwe.

WAKATUPA COOLWE CAKUPAILA KULI NGUWE

3. Ino nceebonshi nceenga twaambila ayi mupailo ncipo cibotu abuumbi Yehova ncaakatupa?

³ Yehova wakatupa cipo cibotu abuumbi citucafwa kuliyumya. Nabi kwaamba ayi tamumaninitewo alimwi tulabisha, wakatupa coolwe cakubandika anguwe mumupailo. (Ebu. 4:16) Amuyeeyebo mupailo mboolibetele: Inga twapaila kuli Yehova ciindi cilicoonse alimwi inga twamulwiita shintu shili shoonse. Inga watukutika mumushobo uli woonse alimwi kuli koonse nkweenga katubete, inga caba ayi tuli sweenka nabi tuli mujeele. (Jona 2:​1, 2; Milimo 16:​25, 26) Na twalisukama abuumbi cakwaamba ayi tatucishiwo ambweenga twasansulwiita Yehova mbotutoolinyumfwa, alacikonsha kunyumfwishisha nshotusuni kumulwiita. (Loma. 8:​26, 27) Ncakutatoonsha kwaamba ayi mupailo ncipo cibotu abuumbi Yehova ncaakatupa!

4. Ino tulishi buyani ayi Yehova alaakukumbula mipailo yesu na twapaila kuli nguwe kwaamba ayi atucaafwe kuliyumya?

⁴ Kwiinda mu Maswi akwe, Yehova alatulwiita ayi ‘alanyumfwa na twamusenga cintu cili coonse kweelana akuyanda kwakwe.’ (1 Joni 5:14) Sa inga twasenga Yehova kwaamba ayi atucaafwe kuliyumya? Ncakutatoonsha! Yehova alisuni kwaamba ayi tutolelele kuliyumya. Ino nceebonshi nceenga twaambila boobo? Na twatolelela kuliyumya ndyetutokwiinda mumapensho, Yehova alakumbula Satana uyo umusebaanya. (Tus. 27:11) Alimwi Baibo ilaamba ayi Yehova alisunishishi kupa “nkusu kubaabo bashomeka kuli nguwe.” (2 Maka. 16:9) Aboobo inga twashoma cakutatoonsha ayi Yehova alisunishi kutucafwa akutupa nkusu shakuliyumya.—Isa. 30:18; 41:10; Luka 11:13.

5. Ino kupaila inga kwatucafwa buyani kuba aluumuno lwamumiyeeyo? (Isaya 26:3)

⁵ Baibo ilatulwiita ayi na twapaila kuli Yehova kuswa panshi lyamoyo kumulwiita shitotusukamika, “luumuno lwakwe Lesa ulo lwiinda pabusongo bwa bantu boonse lulaakulama myoyo [yesu] alimwi amiyeeyo [yesu].” (Filip. 4:7) Tulalumba abuumbi ceebo cakwaamba ayi Yehova alatupa luumuno lwakwe. Bantu batasebenseli Yehova abalo baleenda mumapensho. Alimwi baleelesha nshila shipusenepusene kwaamba ayi babe aluumuno lwa mumiyeeyo na kwaamba ayi balubeeko kumapensho ngobatokwiindaamo. Sombi luumuno Yehova ndwatupa na twapaila kuli nguwe luliinditeewo. Na twapaila kuli Yehova tulatondesha ayi tulashoma mulinguwe cakumaninina alimwi alatolelela kutupa “luumuno lwiine lwiine.” (Amubelenge Isaya 26:3.) Nshila yomwi Yehova mbwatupa luumuno nkwiinda mukutucafwa kwiibaluka malembo ayuminisha ngotwakeeya mu Maswi akwe. Malembo ayo alatwiibalusha ayi Yehova alitusuni alimwi alisunishishi kutucafwa. Ici cilatucafwa kukalikana mumiyeeyo.—Kulu. 62:​1, 2.

6. Ino nshiinshi nsheenga mweelikaamo mumipailo yanu? (Amubone acikope.)

⁶ Nsheenga mwaciita. Na mutokwiinda mulipenshi, amulwiite Yehova mbomutolinyumfwa. ‘Amutule nshemulisukama mumaansa akwe,’ akumusenga kwaamba ayi amucaafwe kuba aluumuno. (Kulu. 55:22) Amusenge busongo kwaamba ayi mushibe nsheenga mwaciita. (Tus. 2:​10, 11) Alimwi mutanolubaako kulumba Yehova ndyemutopaila kuli nguwe. (Filip. 4:6) Amuyeeye panshila Yehova mbwaatomucafwa kuliyumya bushiku abushiku, akumulumba palucafwo lwakwe apashintu shibotu nshaamupa. Nabi kwaamba ayi mutokwiinda mumapensho, mutanolubaako kubikila maano kunshila shipusenepusene Yehova mbwaatomucafwa.—Kulu. 16:​5, 6.

WAKATUPA MASWI AKWE

7. Ino Baibo inga yatucafwa buyani kuliyumya?

⁷ Yehova wakatupa Maswi akwe kwaamba ayi anotucafwa kuliyumya. Mu Baibo muli makani aanji atucafwa kushoma ayi ncakwiila Yehova alaakutucafwa. Amuyeeye pacakubonenaako comwi ici. Mateyo 6:8 ilaamba ayi: ‘Ishiwanu alashiba shoonse nshemuyandika nabi kamutana kumusenga.’ Yesu ngwaakaamba maswi aya alimwi alimushi kabotu Yehova kwiinda muntu uli woonse mbwaamwishi. Aboobo na tutokwiinda mumapensho inga twashoma cakutatoonsha ayi Yehova alishi nshetuyandika alimwi alaakutucafwa. Mu Baibo muli shishomesho shiinji Yehova nshaakatushomesha sheenga shatucafwa kuliyumya.—Kulu. 94:19.

8. (a) Amwaambe cakubonenaako ca njiisho yamu Baibo yeenga yatucafwa kuliyumya. (b) Ino nciinshi ceenga catucafwa kwiibaluka njiisho shamu Baibo na tulisuni kusalawo shakucita nabi kushiba bwakuliyumya mulipenshi ndyetutokwiindaamo?

⁸ Njiisho shamu Baibo inga shatucafwa kuliyumya. Njiisho shiliimo inga shatucafwa kuba abusongo bweenga bwatucafwa kunoosala kabotu shakucita. (Tus. 2:​6, 7) Kucakubonenaako, Baibo ilatuyuminisha kutanoolisukama pa sheenga shacitika kunembo. Muciindi cakucita boobo, tulyeelete kunoocinka manungo muli Yehova bushiku abushiku. (Mate. 6:34) Na katubelenga Baibo bushiku abushiku akunookutumana kuyeeyawo abuumbi, tulaakucikonsha kwiibaluka njiisho shamu Baibo ndyeshi tukayandike kusalawo shakucita na ndyeshi tukayandike kushiba mbweenga twaliyumya mulipenshi ndyetutokwiindaamo.

9. Ino kubelenga makani amu Baibo aamba Yehova mbwakacafwa basebenshi bakwe kulatucafwa buyani?

⁹ Mu Baibo muli amakani aamba pa bantu bakalinga mbuli ndiswe abo bakalinga kucinka manungo muli Yehova alimwi bakacafwikwa kuli nguwe. (Ebu. 11:​32-34; Jemu. 5:17) Na twayeeya Yehova mbwaakabacafwa, tulashoma cakutatoonsha ayi aswebo alaakutucafwa. Lakwe “nceciyubilo cesu alimwi ngootupa nkusu, ulilibambite kutucafwa lyoonse ndituba mumapensho.” (Kulu. 46:1) Alimwi na twayeeya basebenshi bakwe Yehova mbobakashoma muli nguwe akutolelela kumusebensela nabi ndyebakalinga kwiinda mubukaalo buyumu, aswebo tulayuminishikwa kukonkela cakubonenaako cabo.—Jemu. 5:​10, 11.

10. Ino nshiinshi nsheenga mwaciita kwaamba ayi Baibo inoomucafwa abuumbi?

¹⁰ Nsheenga mwaciita. Munobelenga Baibo bushiku abushiku, akuba amulongo wa malembo amuyuminisha abuumbi. Baanji macuunsa balabelenga lilembo lya bushiku kuswa mukabuku ka Kwiinduluka Mumalembo Bushiku Abushiku. Kucita boobo kulabacafwa kuba amakani ayuminisha ngeenga kabayeeyawo bushiku ubo boonse. Ici ncocakacafwa nankashi waliina lya Mariea ndyaakalinga kulama baishi abanyina. Boonse bobilo bakaciswa kansa paciindi comwi alimwi kwakalinga kucaalitebo myeenshi iniini kwaamba ayi bafwe. Ba Marie bakaamba ayi: “Lyoonse macuunsa ndakalinga kubelenga lilembo lya bushiku akuyeeyawo abuumbi pa nshendabelenga. Kucita boobo kwakancafwa kunoyeeya pali Yehova apashintu shibotu nshatwiisha mu Maswi akwe muciindi cakunoyeeyabo pamapensho ngondakalinga kucite.”—Kulu. 61:2.

WAKATUPA BASHOMINYINEESU

11. Ino nceebonshi tulayuminishikwa kushiba ayi tatubete sweenka sotutoliyumya mumapensho?

¹¹ Yehova wakatupa bashominyineesu kwaamba ayi banootucafwa kuliyumya. Tulayuminishikwa abuumbi kushiba ayi ‘bashominyineesu nsengwe yoonse abalo baleenda mumapensho ngotwiindaamo.’ (1 Pit. 5:9) Ici cilaamba ayi kuli bamakwesu abenankashi bakeendaawo kale mumapensho akoshenye angotutokwiindaamo alimwi bakatolelela kushomeka kuli Yehova. Aboobo aswebo inga twacikonsha kuliyumya!—Milimo 14:22.

12. Ino bashominyineesu inga batucafwa buyani, alimwi ino aswebo inga twabacafwa buyani? (2 Bene Kolinto 1:​3, 4)

¹² Bamakwesu abenankashi inga batucafwa kuliyumya kwiinda mushintu nsheenga baamba anshebatucitila. Ishi bamakwesu abenankashi bamwi nshobakacita akuli Paulo. Mumakalata ngaakalemba, wakaamba meena abaabo bakamucafwa ndyaakalinga kwangitwe alimwi wakabalumba. Bakayuminisha Paulo, kumuumbulusha akumupa nshaakalinga kuyandika. (Filip. 2:​25, 29, 30; Kolo. 4:​10, 11) Munshiku shino, bamakwesu abenankashi inga batuumbulusha akutucafwa kuliyumya ndyetutokwiinda mubukaalo buyumu. Alimwi aswebo inga twabacafwa na batoyandika kuyuminishikwa.—Amubelenge 2 Bene Kolinto 1:​3, 4.

13. Ino nshiinshi shakacafwa Nankashi Maya kuliyumya?

¹³ Bamakwesu abenankashi bakamuyuminisha abuumbi Nankashi Maya waku Russia. Mu 2020 bakapokola bakenjila muŋanda yakwe cakuteengashila akutalika kuseca. Lyalo bakamutola kukooti mukumoombolosha ceebo cakulwiitako bamwi nshaashoma. Ba Maya bakaamba ayi: “Paciindi cilya ndakalinga kulisukama, kunyumfwa kulema, akulinyumfwa cibiibi. Sombi bamakwesu abenankashi bakalinga kuntuminako fooni, kundembela mameseji amakalata. Ici cakancafwa kushiba ayi bakalinga kunsuni abuumbi. Kuswabo kale kale ndakalinga kucishi ayi bamakwesu abenankashi balinsuni alimwi balibo anga ngumukwashi wangu. Sombi kuswabo ndyebakancafwa mu 2020, ndakeendaawo kushoma ayi balinsuni.”

14. Ino nshiinshi nsheenga twaciita kwaamba ayi bamakwesu abenankashi batucaafwe? (Amubone acikope.)

¹⁴ Nsheenga mwaciita. Na kuli lipenshi ndyemutoliyumya, cilayandika abuumbi kunobandika abashominyinaanu akucana ciindi cakuba pomwi ambabo. Mutanoowayawaya kusenga lucafwo kuswa kubamanene. Inga baba anga “ncakulishitilishaako muuwo, nabi anga ncakulishitilishaako cipuupu.” (Isa. 32:2) Alimwi munookwiibaluka ayi bashominyinaanu abalo batoliyumya mumapensho. Aboobo na mwacafwako umwi utoyandika lucafwo, mulaakuba alusangalalo alimwi ici cilaakumucafwa kuliyumya mulipenshi ndyemutokwiindaamo.—Milimo 20:35.

WAKATUPA KULANGILA

15. Ino kulangila kwakamucafwa buyani Yesu, alimwi ino kulatucafwa buyani andiswe? (Bene Ebulu 12:2)

¹⁵ Yehova wakatupa kulangila uko kutucafwa kuliyumya mukwiinga tulishomete cakutatoonsha ayi nshaakatushomesha shilaakukumanishikwa. (Loma. 15:13) Na mutokwiibaluka, Yesu wakacikonsha kuliyumya ndyaakapenga abuumbi pabushiku ndyaakafwa, ceebo cakulangila nkwaakalinga kucite. (Amubelenge Bene Ebulu 12:2.) Yesu wakalinga kucishi ayi kushomeka kwakwe kwakalinga kusa mukupa kwaamba ayi liina lyakwe Yehova lisalashikwe. Alimwi Yesu wakalinga kulangila kuboolela kuli Baishi kwiculu aciindi ndyaakalinga kusa mukuba Mwaami akutalika kweendelesha pomwi aba 144,000. Aswebo kulangila nkotucite kwakukala buumi butamaani mucishi cipya, kulatucafwa kuliyumya mumapensho ali woonse ngeenga tweendaamo mucishi cino cakwe Satana.

16. Ino kulangila kwakamucafwa buyani Nankashi Anna, alimwi ino nshiinshi nshomweeya kumaswi ngakaamba?

¹⁶ Amuyeeye pacakubonenaako cakwe Nankashi Anna ukala ku Russia mbwakacafwikwa ceebo cakulangila nkwaacite. Beebaye bakabacata kubakapokola akubatola ku maseelo kulindilila koomboloshekwa. Ishi ndyeshakacitika ba Anna bakaamba ayi: “Liinji ndapaila kuli Yehova akumulumba pakulangila nkooncite akunoyeeya bunene pabuumi mbweshi bukabe kunembo. Kucita boobo kulancafwa kutalefuka bunene. Ndicishi kwaamba ayi kunembo shintu shilaakubota. Yehova alaakukoma balwani bakwe akutupa shoolwe.”

17. Ino inga twatondesha buyani ayi tulalumba pakulangila nkotucite? (Amubone acikope.)

¹⁷ Nsheenga mwaciita. Munookutumana kuyeeya pashintu shibotu Yehova nshakashomesha kumucitila kunembo. Munoyeeya ayi muli mucishi cipya akunoyeeya pashoolwe shibotu Yehova nsheshi akamupe. Lyalo mapensho ngomutokwiindaamo pacecino ciindi alaakuboneka ayi ‘ngoobu alimwi teshi aciindi cilaamfu,’ na nkwaeelanya kucoolwe cakukala kwamuyayaya nceshi mukabaaco mupaladaiso. (2 Koli. 4:17) Alimwi munoocita nsheenga mwacikonsha kulwiitako bamwi pashishomesho shakwe Lesa. Amuyeeyebo buumi mbobubete buyumu kubantu batasebenseli Yehova. Abalo baleenda mumapensho aanji, sombi tabacishiiwo shintu shibotu Yehova nshaakatushomesha. Na mwabalwiitaako nabibo makani aniini, inga basuna kwiiya shiinji pa Bwaami bwakwe Lesa ashishomesho shakwe.

18. Ino nceebonshi inga twashooma ayi Yehova nshaakatushomesha shilaakukumanishikwa?

¹⁸ Jobo ndyaakacikonsha kuliyumya mumapensho aanji, wakaamba pali Yehova ayi: ‘Ano ndashiiba kwaamba ayi mwebo mulicite nkusu shoonse alimwi ayi taakuwo muyeeyo wanu weenga wabula kuswitilila.’ (Jobo 42:2) Jobo wakashiba ayi taakuwo ceenga capa kwaamba ayi Yehova aalilwe kukumanisha nshaakashomesha. Kunokwiibaluka cancine ici inga kwatucafwa kuliyumya. Kucakubonenaako, amuyeeye ayi mwanakashi waciswa kwaciindi cilaamfu abuumbi. Alilefukite ceebo cakwaamba ayi wakaya kushipatela shipusenepusene sombi taakuwo dokota wakacikonsha kumushilika. Lyalo mukweelaako waya kucipatela cimwi akucana dokota uyo wamulwiita bulwashi bwiine mbwaatociswa ambweshi akamushilike. Peenkaapo mwanakashi uyo wasangalalaako ceebo cakushiba ayi alaakoola nabi palakwiindaako ciindi. Ano inga camubeta cuubu kuliyumya kubulwashi mbwaatociswa mukwiinga alicishi ayi alaakoola. Aswebo inga twatolelela kuliyumya mukwiinga tulicishi ayi Paladaiso Lesa njaakatushomesha ilaakubaako nabi cikabe buyani.

19. Ino nshiinshi nshotweelete kutolelela kucita kwaamba ayi tucikonshe kuliyumya?

¹⁹ Kweelana ambotweeya, Yehova alatucafwa kuliyumya na katupaila kuli nguwe, katubelenga Maswi akwe, katuba pomwi abashominyineesu, ana katuyeeya pakulangila nkotucite. Na twatolelela kucita boobo, Yehova alaakutucafwa nabi twiinde mumapensho ayumu buyani. Tulaakucikonsha kutolelela kuliyumya kushikila mapensho oonse ngotutokwiindaamo akamaane alimwi akuciindi Satana ndyeshi akanyonyoolwe kwamuyayaya.—Filip. 4:13.